ಮಾವಿನ ಎಲೆಗಳ ಅದ್ಭುತ ಆರೋಗ್ಯಲಾಭಗಳು ಗೊತ್ತೇ ?
ಮಾವಿನ ಹಣ್ಣಿನ ಸ್ವಾದ ಯಾರಿಗೆ ಇಷ್ಟವಿಲ್ಲ?, ಸ್ವಾದದ ಜೊತೆಗೆ ಸಮೃದ್ಧ ವಿಟಾಮಿನ್ಗಳು ಮತ್ತು ಖನಿಜಗಳನ್ನೊಳಗೊಂಡಿರುವ ಅದು ಆರೋಗ್ಯಲಾಭಗಳನ್ನೂ ನೀಡುತ್ತದೆ. ಮಾವಿನ ಎಲೆಗಳೂ ಔಷಧೀಯ ಗುಣಗಳನ್ನು ಹೊಂದಿವೆ. ತನ್ನ ಈ ಗುಣಗಳಿಂದಾಗಿ ಪೌರ್ವಾತ್ಯ ವೈದ್ಯಕೀಯದಲ್ಲಿ ಅದು ಮಹತ್ವದ ಸ್ಥಾನವನ್ನು ಹೊಂದಿದೆ.
ಮಾವಿನ ಎಲೆಯು ಎ,ಬಿ ಮತ್ತು ಸಿ ವಿಟಮಿನ್ಗಳ ಜೊತೆಗೆ ಫೆನಾಲ್ಗಳು ಮತ್ತು ಫ್ಲಾವನಾಯ್ಡಾಗಳು ಸೇರಿದಂತೆ ಉತ್ಕರ್ಷಣ ನಿರೋಧಕಗಳನ್ನು ಒಳಗೊಂಡಿದೆ. ಮಾವಿನ ಎಲೆಗಳು ನೀಡುವ ಆರೋಗ್ಯಲಾಭಗಳ ಕುರಿತು ಮಾಹಿತಿಯಿಲ್ಲಿದೆ.....
►ಟೈಪ್ 2 ಮಧುಮೇಹವನ್ನು ನಿಯಂತ್ರಿಸುತ್ತದೆ
ಮಧುಮೇಹದ ಚಿಕಿತ್ಸೆಗೆ ನೆರವಾಗುವ ಆ್ಯಂಥೊಸೈನಿಡಿನ್ಗಳೆಂಬ ಟ್ಯಾನಿನ್ಗಳನ್ನು ಒಳಗೊಂಡಿರುವುದರಿಂದ ಮಾವಿನ ಎಲೆಗಳು ಮಧುಮೇಹವನ್ನು ನಿಯಂತ್ರಿಸಲು ಪರಿಣಾಮಕಾರಿಯಾಗಿವೆ ಎಂದು ಪರಿಗಣಿಸಲಾಗಿದೆ. ಮಧುಮೇಹ ನಿಯಂತ್ರಣಕ್ಕಾಗಿ ಮಾವಿನ ಎಲೆಗಳನ್ನು ಚೆನ್ನಾಗಿ ಒಣಗಿಸಿ ಪುಡಿಯ ರೂಪದಲ್ಲಿ ಸೇವಿಸಬಹುದಾಗಿದೆ.
►ಗ್ರಹಣ ಶಕ್ತಿಯನ್ನು ಉತ್ತಮಗೊಳಿಸುತ್ತದೆ
ಟೈಪ್ 2 ಮಧುಮೇಹವು ಅಲ್ಝೀಮರ್ಸ್ ಕಾಯಿಲೆ ಮತ್ತು ಮಿದುಳಿಗೆ ರಕ್ತಪೂರೈಕೆಯಲ್ಲಿ ವ್ಯತ್ಯಯಗಳಿಂದಾಗಿ ಉಂಟಾಗುವ ವಸ್ಕುಲರ್ ಡಿಮೆನ್ಶಿಯಾ ಅಥವಾ ನಾಳೀಯ ಬುದ್ಧಿಮಾಂದ್ಯತೆಗೆ ಗುರಿಯಾಗುವ ಅಪಾಯವನ್ನು ಹೆಚ್ಚಿಸುತ್ತದೆ. ಮಾವಿನ ಎಲೆಗಳ ಸಾರವು ಟೈಪ್ 2 ಮಧುಮೇಹಿಗಳಲ್ಲಿ ಅರಿವಿನ ಕಾರ್ಯನಿರ್ವಹಣೆಯನ್ನು ಸುಧಾರಿಸುವ ಮೂಲಕ ಇಂತಹ ಗಂಭೀರ ರೋಗಗಳ ವಿರುದ್ಧ ರಕ್ಷಣೆಯನ್ನು ನೀಡುತ್ತದೆ.
►ಅಧಿಕ ರಕ್ತದೊತ್ತಡವನ್ನು ತಗ್ಗಿಸುತ್ತದೆ
ಮಾವಿನ ಎಲೆಯು ಅಧಿಕ ರಕ್ತದೊತ್ತಡವನ್ನು ತಗ್ಗಿಸಲು ನೆರವಾಗುತ್ತದೆ ಎನ್ನುವುದನ್ನು ಅಧ್ಯಯನಗಳು ತೋರಿಸಿವೆ. ಮಾವಿನ ಎಲೆಗಳ ಸೇವನೆಯು ರಕ್ತನಾಳಗಳನ್ನು ಬಲಗೊಳಿಸಲು ಮತ್ತು ವೆರಿಕೋಸ್ ವೇನ್(ಉಬ್ಬಿದ ರಕ್ತನಾಳ)ಗಳ ಚಿಕಿತ್ಸೆಗೂ ನೆರವಾಗುತ್ತದೆ.
►ಅಸ್ತಮಾಕ್ಕೆ ಚಿಕಿತ್ಸೆ ನೀಡುತ್ತದೆ
ಅಸ್ತಮಾ ಸೇರಿದಂತೆ ಶ್ವಾಸಕೋಶದ ಕಾಯಿಲೆಗಳಿಗೆ ಮಾವಿನ ಎಲೆಗಳನ್ನು ಬಳಸಿ ಚಿಕಿತ್ಸೆ ನೀಡಬಹುದಾಗಿದೆ. ಬ್ರಾಂಕೈಟಿಸ್ ಅಥವಾ ಶ್ವಾಸನಾಳಗಳ ಒಳಪೊರೆಗಳ ಉರಿಯೂತ,ಅಸ್ತಮಾ ಮತ್ತು ಶೀತದಿಂದ ಬಳಲುತ್ತಿರುವವರು ಮಾವಿನ ಎಲೆಗಳನ್ನು ನೀರಿನಲ್ಲಿ ಕುದಿಸಿ,ಆ ನೀರಿಗೆ ಸ್ವಲ್ಪ ಜೇನನ್ನು ಸೇರಿಸಿ ಕುಡಿಯಬಹುದಾಗಿದೆ.
►ಬೇಧಿಯನ್ನು ನಿಲ್ಲಿಸುತ್ತದೆ
ಮಾವಿನ ಎಲೆಯಲ್ಲಿರುವ ಬ್ಯಾಕ್ಟೀರಿಯಾ ನಿರೋಧಕ ಮತ್ತು ಸೂಕ್ಷ್ಮಜೀವಿ ನಿರೋಧಕ ಗುಣಗಳು ಸ್ಟಾಫೈಲೊಕಾಕಸ್ ಆರಿಯಸ್ ಮತ್ತು ಸಾಲ್ಮೊನೆಲ್ಲಾ ಟೈಫಿಮುರಿಯಮ್ ಬ್ಯಾಕ್ಟೀರಿಯಾಗಳ ವಿರುದ್ಧ ಪರಿಣಾಮಕಾರಿಯಾಗಿವೆ. ಇವೆರಡೂ ಬ್ಯಾಕ್ಟೀರಿಯಾಗಳು ಮಾನವರಲ್ಲಿ ಹಲವಾರು ವಿಧದ ಸೋಂಕುಗಳನ್ನುಂಟು ಮಾಡುತ್ತವೆ.
► ಜಠರದ ಆರೋಗ್ಯವನ್ನು ಹೆಚ್ಚಿಸುತ್ತದೆ
ಮಾವಿನ ಎಲೆಯು ತನ್ನಲ್ಲಿರುವ ಗ್ಯಾಸ್ಟ್ರಿಕ್ನಿಂದ ರಕ್ಷಣೆ ನೀಡುವ ಗುಣಗಳಿಂದಾಗಿ ಜಠರವನ್ನು ವಿವಿಧ ಅನಾರೋಗ್ಯಗಳಿಂದ ರಕ್ಷಿಸುತ್ತದೆ. ಇದಕ್ಕಾಗಿ ನೀವು ಮಾಡಬೇಕಿರುವುದು ಇಷ್ಟೇ:ರಾತ್ರಿ ಬೆಚ್ಚಗಿನ ನೀರಿನಲ್ಲಿ ಕೆಲವು ಮಾವಿನ ಎಲೆಗಳನ್ನು ಹಾಕಿಡಿ. ಬೆಳಿಗ್ಗೆ ಈ ನೀರನ್ನು ಸೋಸಿ ಕುಡಿದುಬಿಡಿ.