ನನ್ನ ಪುತ್ರ ರಶ್ಯ ವಕೀಲರನ್ನು ಭೇಟಿಯಾಗಿದ್ದು ನಿಜ: ಒಪ್ಪಿಕೊಂಡ ಟ್ರಂಪ್
ವಾಶಿಂಗ್ಟನ್, ಆ. 6: ಎದುರಾಳಿಯೊಬ್ಬರ ಕುರಿತು ಮಾಹಿತಿ ಸಂಗ್ರಹಿಸುವುದಕ್ಕಾಗಿ ತನ್ನ ಪುತ್ರ 2016ರಲ್ಲಿ ‘ಟ್ರಂಪ್ ಟವರ್’ನಲ್ಲಿ ರಶ್ಯದ ವಕೀಲರೊಬ್ಬರನ್ನು ಭೇಟಿಯಾಗಿರುವುದು ನಿಜ ಎಂಬುದಾಗಿ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ರವಿವಾರ ಒಪ್ಪಿಕೊಂಡಿದ್ದಾರೆ. ಆದರೆ, ಇದು ‘ಸಂಪೂರ್ಣವಾಗಿ ಕಾನೂನುಬದ್ಧ’ ಎಂಬುದಾಗಿ ಸಮರ್ಥಿಸಿಕೊಂಡಿದ್ದಾರೆ.
2016ರ ಜೂನ್ನಲ್ಲಿ ನಡೆದ ಈ ಭೇಟಿಯ ಉದ್ದೇಶ, ಅಧ್ಯಕ್ಷೀಯ ಚುನಾವಣೆಯಲ್ಲಿ ತನ್ನ ಪ್ರತಿಸ್ಪರ್ಧಿಯಾಗಿದ್ದ ಡೆಮಾಕ್ರಟಿಕ್ ಪಕ್ಷದ ಹಿಲರಿ ಕ್ಲಿಂಟನ್ ಮೇಲೆ ಕೆಸರು ಎರಚುವುದಾಗಿತ್ತು ಎಂಬುದನ್ನು ಟ್ರಂಪ್ ಈ ಮೂಲಕ ಮೊದಲ ಬಾರಿಗೆ ನೇರವಾಗಿ ಒಪ್ಪಿಕೊಂಡಿದ್ದಾರೆ.
ತನ್ನ ಮಗ ಡೊನಾಲ್ಡ್ ಜೂನಿಯರ್ ಮತ್ತು ರಶ್ಯ ಸರಕಾರದೊಂದಿಗೆ ನಂಟು ಹೊಂದಿರುವ ವಕೀಲೆ ನಟಾಲಿಯಾ ವೆಸೆಲ್ನಿಸ್ಕಯ ನಡುವಿನ ಭೇಟಿಯ ಬಗ್ಗೆ ತನಗೆ ಅಂದು ತಿಳಿದಿರಲಿಲ್ಲ ಎಂದು ಟ್ರಂಪ್ ಹೇಳಿಕೊಂಡರು.
ಇದೇ ಮಾತನ್ನು ಅವರು ಹಿಂದಿನಿಂದಲೂ ಹೇಳಿಕೊಂಡು ಬರುತ್ತಿದ್ದಾರೆ.
‘‘ಅದು ಎದುರಾಳಿಯೊಬ್ಬರ ಬಗ್ಗೆ ಮಾಹಿತಿ ಪಡೆಯಲು ನಡೆದ ಭೇಟಿಯಾಗಿತ್ತು. ಅದು ಸಂಪೂರ್ಣವಾಗಿ ಕಾನೂನುಬದ್ಧವಾಗಿದೆ ಹಾಗೂ ಅದು ರಾಜಕೀಯದಲ್ಲಿ ಎಲ್ಲ ಕಾಲದಲ್ಲೂ ನಡೆದುಕೊಂಡು ಬಂದಿದೆ. ನನಗೆ ಅದರ ಬಗ್ಗೆ ಗೊತ್ತಿರಲಿಲ್ಲ’’ ಎಂದರು.
2016ರ ಅಧ್ಯಕ್ಷೀಯ ಚುನಾವಣೆಯನ್ನು ಟ್ರಂಪ್ ಪರವಾಗಿ ತಿರುಗಿಸುವ ಪ್ರಯತ್ನವಾಗಿ ಟ್ರಂಪ್ ಪ್ರಚಾರ ತಂಡದ ಸದಸ್ಯರು ರಶ್ಯದೊಂದಿಗೆ ಕೈಜೋಡಿಸಿದ್ದರೇ ಎನ್ನುವ ಬಗ್ಗೆ ವಿಶೇಷ ವಕೀಲ ರಾಬರ್ಟ್ ಮುಲ್ಲರ್ ತನಿಖೆ ನಡೆಸುತ್ತಿದ್ದಾರೆ.
ಟ್ರಂಪ್ ಜೂನಿಯರ್ ಮತ್ತು ರಶ್ಯನ್ ವಕೀಲೆ ನಡುವೆ ನಡೆದ ಸಭೆಯ ಬಗ್ಗೆ ಮುಲ್ಲರ್ ತೀವ್ರ ತನಿಖೆ ನಡೆಸುತ್ತಿದ್ದಾರೆ.
ಮುಲ್ಲರ್ ವಿರುದ್ಧ ತೀವ್ರ ವಾಗ್ದಾಳಿ
2016ರ ಅಮೆರಿಕ ಅಧ್ಯಕ್ಷೀಯ ಚುನಾವಣೆಯ ಸಂದರ್ಭದಲ್ಲಿ ಡೆಮಾಕ್ರಟಿಕ್ ಅಭ್ಯರ್ಥಿ ಹಿಲರಿ ಕ್ಲಿಂಟನ್ರನ್ನು ಸೋಲಿಸುವುದಕ್ಕಾಗಿ, ರಿಪಬ್ಲಿಕನ್ ಅಭ್ಯರ್ಥಿ ಡೊನಾಲ್ಡ್ ಟ್ರಂಪ್ರ ಪ್ರಚಾರ ತಂಡವು ರಶ್ಯ ಸರಕಾರದೊಂದಿಗೆ ನಂಟು ಹೊಂದಿತ್ತೇ ಎಂಬುದನ್ನು ಪತ್ತೆಹಚ್ಚಲು ತನಿಖೆ ನಡೆಸುತ್ತಿರುವ ವಿಶೇಷ ವಕೀಲ ರಾಬರ್ಟ್ ಮುಲ್ಲರ್ ವಿರುದ್ಧ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಹಿಂದಿನಿಂದಲೂ ತೀವ್ರ ವಾಗ್ದಾಳಿ ನಡೆಸುತ್ತಲೇ ಬಂದಿದ್ದಾರೆ.
‘‘ಅವರ ತನಿಖೆಯು ನಮ್ಮ ದೇಶದ ಇತಿಹಾಸದಲ್ಲೇ ಅತ್ಯಂತ ಏಕಪಕ್ಷೀಯ ಸೇಡಿನ ಕ್ರಮವಾಗಿದೆ ಹಾಗೂ ಅವರ ತನಿಖೆಯಲ್ಲಿರುವುದು ಸುಳ್ಳುಗಳು ಮತ್ತು ಭ್ರಷ್ಟಾಚಾರ’’ ಎಂಬುದಾಗಿ ಟ್ರಂಪ್ ಆಗಾಗ ಟ್ವೀಟ್ ಮಾಡುತ್ತಾರೆ.