ಇವಿಎಂನ್ನು ಹ್ಯಾಕ್ ಮಾಡಿ ಮತಗಳನ್ನು ಹೆಚ್ಚಿಸಿದ ಹ್ಯಾಕರ್!
ಮತಯಂತ್ರ ದುರುಪಯೋಗದ ಬಗ್ಗೆ ಹೆಚ್ಚಿದ ಆತಂಕ
ಲಾಸ್ ವೇಗಸ್, ಆ.12: ಭಾರತದಲ್ಲಿ ವಿದ್ಯುನ್ಮಾನ ಮತಯಂತ್ರಗಳ ಕಾರ್ಯವೈಖರಿ ಬಗ್ಗೆ ಸಾಕಷ್ಟು ಅನುಮಾನಗಳನ್ನು ವ್ಯಕ್ತಪಡಿಸಲಾಗಿದೆ. ಈ ಮತಯಂತ್ರಗಳು (ಇವಿಎಂ) ಸುರಕ್ಷಿತವಾಗಿದ್ದು ಅವುಗಳನ್ನು ತಿರುಚಲು ಸಾಧ್ಯವಿಲ್ಲ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ. ಆದರೆ ಹಲವು ಬಾರಿ ಅವರ ಈ ಭರವಸೆಯನ್ನು ಸುಳ್ಳು ಮಾಡಿರುವ ಉದಾಹರಣೆಗಳಿವೆ. ಸದ್ಯ ಅಮೆರಿಕ ಚುನಾವಣೆಗೆ ಸಜ್ಜಾಗುತ್ತಿದ್ದು, ಅಲ್ಲೂ ಇವಿಎಂ ಯಂತ್ರಗಳನ್ನು ಹ್ಯಾಕ್ ಮಾಡುವ ಅಪಾಯ ಎದುರಾಗಿದೆ. ಆಂಗ್ಲ ಸುದ್ದಿ ವಾಹಿನಿಯೊಂದು ಮಾಡಿರುವ ವರದಿಯಲ್ಲಿ, ವಾರ್ಷಿಕ ಡೆಫ್ ಕಾನ್ ಹ್ಯಾಕರ್ ಸಮ್ಮೇಳನದಲ್ಲಿ ಭಾಗವಹಿಸಿದ್ದ ಸ್ಥಳೀಯ ಚುನಾವಣಾ ಅಧಿಕಾರಿಗಳು, ಹ್ಯಾಕರ್ಗಳು ಇವಿಎಂ ಯಂತ್ರಗಳನ್ನು ಏನೆಲ್ಲಾ ಮಾಡಬಲ್ಲರು ಎಂಬುದನ್ನು ಕಣ್ಣಾರೆ ಕಂಡು ದಂಗಾಗಿದ್ದಾರೆ. ಒಬ್ಬ ಹ್ಯಾಕರ್ ಅಂತೂ ಇವಿಎಂ ಯಂತ್ರವನ್ನು ಸಂಗೀತ ನುಡಿಸುವ ಯಂತ್ರವಾಗಿ ಪರಿವರ್ತಿಸಿದ್ದಾನೆ ಎಂದು ವರದಿಯಲ್ಲಿ ತಿಳಿಸಲಾಗಿದೆ. ಇಂಥ ಹ್ಯಾಕರ್ಗಳ ಬಗ್ಗೆ ಸದ್ಯ ಚುನಾವಣಾ ಅಧಿಕಾರಿಗಳು ಚಿಂತಿತರಾಗಿದ್ದಾರೆ. ಸಾಂಪ್ರದಾಯಿಕ ಚುನಾವಣಾ ಸಾಧನಗಳಾದ ಮತಯಂತ್ರ ಮತ್ತು ಮತ ದತ್ತಾಂಶದ ಬಗ್ಗೆ ಹೆಚ್ಚು ಯೋಚಿಸದೆ ತಪ್ಪು ಮಾಹಿತಿಯನ್ನು ರಾವಾನಿಸುವವರ ಬಗ್ಗೆ ಅಧಿಕಾರಿಗಳು ಹೆಚ್ಚು ಚಿಂತಿತರಾಗಿದ್ದಾರೆ ಎಂದು ವರದಿ ತಿಳಿಸಿದೆ.
ಈ ಕಾರ್ಯಕ್ರಮದಲ್ಲಿ ನಲ್ವತ್ತಕ್ಕೂ ಅಧಿಕ ಯುವಕರು ಚುನಾವಣಾ ಮಂಡಳಿಯ ನಕಲಿ ಜಾಲತಾಣದಲ್ಲಿ ಅಭ್ಯರ್ಥಿಗಳು ಪಡೆದ ಮತಗಳ ಸಂಖ್ಯೆಯನ್ನು ತಿರುಚುವಲ್ಲಿ ಯಶಸ್ವಿಯಾಗಿದ್ದಾರೆ. ಅಷ್ಟು ಮಾತ್ರವಲ್ಲ, ಅಭ್ಯರ್ಥಿಗಳ ಹೆಸರುಗಳನ್ನೂ ಇವರು ಬದಲಿಸಿದ್ದಾರೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ. ಈ ಬಾರಿ ನಡೆದ ಹ್ಯಾಕಿಂಗ್ ಸಮ್ಮೇಳನದಲ್ಲಿ 2018ರಲ್ಲಿ ಯುಎಸ್ನಲ್ಲಿ ನಡೆಯಲಿರುವ ಮಧ್ಯಾವಧಿ ಚುನಾವಣೆಗಳಲ್ಲಿ ಬಳಸಲು ಉದ್ದೇಶಿಸಲಾಗಿರುವ ಹೊಸ ಮಾದರಿಯ ಮತಯಂತ್ರಗಳನ್ನು ಬಳಸಲಾಗಿತ್ತು ಎಂದು ವರದಿ ತಿಳಿಸಿದೆ. ಈ ಬಾರಿ ಹ್ಯಾಕಿಂಗ್ ಸಮ್ಮೇಳನದಲ್ಲಿ ಕೇವಲ ಮತಯಂತ್ರಗಳನ್ನು ತಿರುಚುವುದು ಮಾತ್ರವಲ್ಲ ಇಡೀ ಮತದಾನ ಪ್ರಕ್ರಿಯೆಯನ್ನೇ ಬದಲಿಸುವ ಸವಾಲನ್ನು ನೀಡಲಾಗಿತ್ತು. ಇದರಲ್ಲಿ ಮತ ಚಲಾಯಿಸುವುದರಿಂದ ಹಿಡಿದು ಆನ್ಲೈನ್ನಲ್ಲಿ ಚುನಾವಣಾ ಫಲಿತಾಂಶವನ್ನು ಪ್ರಕಟಿಸುವವರೆಗಿನ ಪ್ರಕ್ರಿಯೆ ಸೇರಿತ್ತು. ಸಮ್ಮೇಳನದಲ್ಲಿ ಓರ್ವ ಹ್ಯಾಕರ್ ಸಂಪೂರ್ಣ ಮತ ಪ್ರಕ್ರಿಯೆಯನ್ನು ತಿರುಚಿದರೂ ಅದು ಮೇಲ್ನೋಟಕ್ಕೆ ಯಾರ ಗಮನಕ್ಕೂ ಬಂದಿರಲಿಲ್ಲ. ಇಂಥ ಯಂತ್ರಗಳನ್ನು ನಂಬಿ ನೀವು ಮತ ಚಲಾಯಿಸುತ್ತೀರಾ ಎಂದು ಆತ ಜನರಲ್ಲಿ ಪ್ರಶ್ನಿಸಿದ್ದಾನೆ.