ಆಮಿರ್ ಬದಲಿಗೆ ಶಾರುಕ್ ‘ಸಲ್ಯೂಟ್’
ಈಗ ಬಾಲಿವುಡ್ನಲ್ಲಿ ಬಯೋಪಿಕ್ ಚಿತ್ರಗಳ ಯುಗ. ಅಂದರೆ, ಗಣ್ಯರ, ಸಾಧಕರ ಬದುಕನ್ನು ಆಧರಿಸಿದ ಚಿತ್ರಗಳು ಸಾಲು ಸಾಲಾಗಿ ತಯಾರಾಗುತ್ತಿವೆ. ಈಗಾಗಲೇ ಧೋನಿ,ಮೇರಿಕೋಮ್, ಮಿಲ್ಖಾಸಿಂಗ್ ಅವರ ಕುರಿತಾದ ಬಯೋಪಿಕ್ ಚಿತ್ರಗಳು ಬಿಡುಗಡೆ ಯಾಗಿ ಯಶಸ್ಸು ಕಂಡಿದ್ದವು. ಹೀಗಾಗಿ ಬಾಲಿವುಡ್ ನಿರ್ಮಾಪಕರಿಗೆ ಬಯೋಪಿಕ್ ಕಥಾಚಿತ್ರಗಳು ಯಶಸ್ಸಿನ ಸಿದ್ಧಸೂತ್ರವಾಗಿ ಕಂಡುಬರುತ್ತಿವೆ.
ಇದೀಗ ಭಾರತದ ಪ್ರಪ್ರಥಮ ಬಾಹ್ಯಾಕಾಶಯಾತ್ರಿ ರಾಕೇಶ್ ಶರ್ಮಾ ಕುರಿತ ಚಿತ್ರವೊಂದು ತಯಾರಾಗುತ್ತಿದ್ದು, ಅದಕ್ಕೆ ‘ಸಲ್ಯೂಟ್’ ಎಂದು ಹೆಸರಿಡಲಾಗಿದೆ. ಮೊದಲಿಗೆ ಈ ಚಿತ್ರದಲ್ಲಿ, ಬಾಲಿವುಡ್ನ ಮಿಸ್ಟರ್ ಪರ್ಫೆಕ್ಟ್ ಆಮಿರ್ ಖಾನ್ ನಟಿಸಲಿರುವುದು ಸುದ್ದಿಯಾಗಿತ್ತು. ಆದರೆ ಈಗ ಆಮಿರ್ ಬದಲಿಗೆ ಶಾರುಖ್ ಖಾನ್ ಆಯ್ಕೆಯಾಗಿದ್ದಾರೆ.
ವಿಶೇಷವೆಂದರೆ, ಈ ಚಿತ್ರದಲ್ಲಿ ರಾಕೇಶ್ ಶರ್ಮಾ ಪಾತ್ರಕ್ಕೆ ಶಾರುಕ್ ಖಾನ್ ಸೂಕ್ತ ಆಯ್ಕೆ ಎಂದು ಸ್ವತಃ ಆಮಿರ್ಖಾನ್ ಶಿಫಾರಸು ಮಾಡಿದ್ದರಂತೆ.
ಥಗ್ಸ್ ಆಫ್ ಹಿಂದೋಸ್ತಾನ್ ಬಳಿಕ ಆಮಿರ್ಖಾನ್ ಸಲ್ಯೂಟ್ ಚಿತ್ರದಲ್ಲಿ ನಟಿಸುವುದೆಂದು ನಿರ್ಧಾರವಾಗಿತ್ತು. ಆದರೆ, ಆಮಿರ್ ಸದ್ಯದಲ್ಲೇ, ತನ್ನ ಮಹತ್ವಾಕಾಂಕ್ಷೆಯ ‘ಮಹಾಭಾರತ’ ಚಿತ್ರದ ಪ್ರಾಜೆಕ್ಟ್ನಲ್ಲಿ ತನ್ನನ್ನು ತೊಡಗಿಸಿಕೊಳ್ಳಲಿದ್ದಾರಂತೆ. ಈ ಕಾರಣದಿಂದಲೇ ಅವರು ಸಲ್ಯೂಟ್ನಿಂದ ಹಿಂದೆ ಸರಿದಿದ್ದಾರೆಂದು ಹೇಳಲಾಗುತ್ತಿದೆ. ರಿಲಯನ್ಸ್ ಉದ್ಯಮ ಸಮೂಹದ ವರಿಷ್ಠ ಮುಖೇಶ್ ಅಂಬಾನಿ ಮಹಾಭಾರತವನ್ನು ನಿರ್ಮಿಸಲು ಮುಂದೆ ಬಂದಿದ್ದಾರೆಂಬ ಮಾತುಗಳು ಕೂಡಾ ಕೇಳಿಬರುತ್ತಿವೆ ಅದೇನಿದ್ದರೂ, ಶಾರುಕ್ ಖಾನ್ ಅವರು ಸದ್ಯ ಝೀರೋ ಚಿತ್ರದ ಶೂಟಿಂಗ್ನಲ್ಲಿ ಬ್ಯುಸಿಯಾಗಿದ್ದು, ಎಪ್ರಿಲ್ ವೇಳೆಗೆ ಆ ಚಿತ್ರದ ಪೋಸ್ಟ್ ಪ್ರೊಡಕ್ಷನ್ ಕೆಲಸಗಳು ಮುಗಿಯಲಿವೆ. ಆನಂತರ ಕಿಂಗ್ಖಾನ್, ಸಲ್ಯೂಟ್ಗೆ ಬಣ್ಣಹಚ್ಚುವುದು ಖಚಿತವಾಗಿದೆ. ಎಲ್ಲ ಸರಿಹೋದಲ್ಲಿ, ಸಲ್ಯೂಟ್ನ ಶೂಟಿಂಗ್, ನವೆಂಬರ್ ವೇಳೆಗೆ ಆರಂಭಗೊಳ್ಳುವ ನಿರೀಕ್ಷೆಯಿದೆ.