ಸಂಜು: ನೀವು ನೋಡಲೇಬೇಕಾದ ಟೀಸರ್
ಸಂಜಯ್ ದತ್ ಕಕ್ಕಾಬಿಕ್ಕಿಯಾಗಬಹುದು ರಣ್ ಬೀರ್ ಅದ್ಭುತ ನಟನೆಗೆ
'ತ್ರಿ ಈಡಿಯೆಟ್ಸ್' ಹಾಗೂ 'ಪಿಕೆ' ಖ್ಯಾತಿಯ ನಿರ್ದೇಶಕ ರಾಜ್ ಕುಮಾರ್ ಹಿರಾನಿಯವರ ಸಂಜಯ್ ದತ್ ಜೀವನವನ್ನಾಧರಿಸಿದ ‘ಸಂಜು’ ಚಿತ್ರದ ಟೀಸರ್ ಇಂದು ಬಿಡುಗಡೆಯಾಗಿದೆ. ರಣ್ ಬೀರ್ ಕಪೂರ್ ಅವರ ಸಂಜಯ್ ದತ್ ಲುಕ್ ಬಿಡುಗಡೆಯಾದಾಗಿನಿಂದ ಈ ಚಿತ್ರದ ಬಗೆಗಿನ ನಿರೀಕ್ಷೆಗಳು ಹೆಚ್ಚಾಗಿತ್ತು. ಸಂಜಯ್ ದತ್ ಪಾತ್ರದಲ್ಲಿ ರಣ್ ಬೀರ್ ಹೇಗೆ ನಟಿಸಿರಬಹುದು ಎನ್ನುವ ಕುತೂಹಲ ಕೆರಳಿಸಿತ್ತು.
ಇವೆಲ್ಲದಕ್ಕೆ ಉತ್ತರವೆಂಬಂತೆ ಇಂದು ‘ಸಂಜು’ ಟೀಸರ್ ಬಿಡುಗಡೆಯಾಗಿದೆ. ಸಂಜಯ್ ದತ್ ಅವರ ಬಾಲ್ಯ, ಮಾದಕ ವ್ಯಸನಕ್ಕೆ ತುತ್ತಾದ ಸಂದರ್ಭ, ವಿಲಾಸಿ ಜೀವನ, ರಸ್ತೆ ಬದಿ ಭಿಕ್ಷೆ ಬೇಡಿದ ಘಟನೆ, ಜೈಲು ಪಾಲಾದ ಪ್ರಕರಣ ಹಾಗು ಭೂಗತ ಜಗತ್ತಿನೊಂದಿಗಿನ ನಂಟಿನ ಬಗ್ಗೆ ಟೀಸರ್ ನಲ್ಲಿ ತೋರಿಸಲಾಗಿದೆ.
ಸಂಜಯ್ ದತ್ ಬದುಕನ್ನಾಧರಿಸಿದ ಚಿತ್ರ ಇದಾದರೂ ರಣ್ ಬೀರ್ ಕಪೂರ್ ಹಲವು ಗೆಟಪ್ ಗಳಲ್ಲಿ, ಮ್ಯಾನರಿಸಂಗಳಲ್ಲಿ ಮಿಂಚಿದ್ದಾರೆ. ಸ್ವತಃ ಸಂಜಯ್ ದತ್ ಅವರೇ ಶಹಬ್ಬಾಸ್ ಹೇಳುವ ರೀತಿಯಿದೆ ಅವರ ನಟನೆ. ಕೇವಲ ಲುಕ್ ನಲ್ಲಿ ಮಾತ್ರವಲ್ಲ ಹಾವಭಾವದಲ್ಲೂ ಸಂಜತ್ ದತ್ ರನ್ನು ಹೋಲಲು ರಣ್ ಬೀರ್ ಕಸರತ್ತು ನಡೆಸಿದ್ದಾರೆ ಎನ್ನುವುದು ಟೀಸರ್ ನಲ್ಲೇ ತಿಳಿಯುತ್ತದೆ. ಯುಟ್ಯೂಬ್ ನಲ್ಲಿ ಇಂದು ಈ ಟೀಸರ್ ಬಿಡುಗಡೆಯಾಗಿದ್ದು, ಚಿತ್ರರಸಿಕರಿಂದ ಭಾರೀ ಮೆಚ್ಚುಗೆ ವ್ಯಕ್ತವಾಗುತ್ತಿದೆ.
ಅನುಷ್ಕಾ ಶರ್ಮಾ, ಪರೇಶ್ ರಾವಲ್, ಸೋನಮ್ ಕಪೂರ್, ದಿಯಾ ಮಿರ್ಝಾ, ಕರೀಷ್ಮಾ ತನ್ನಾ, ಮನೀಷಾ ಕೊಯಿರಾಲಾ, ವಿಕ್ಕಿ ಕೌಶಲ್ ಹಾಗು ಬೊಮಾನಿ ಇರಾನಿ ಚಿತ್ರದ ಪ್ರಮುಖ ಪಾತ್ರಗಳಲ್ಲಿ ನಟಿಸಿದ್ದಾರೆ.