ಧಾರಾವಾಹಿಯ ಸಾಕ್ಷಿ ಆಮಿರ್ ಗೆ ಕೈಸೆ ಬಡೇ ಅಚ್ಛೇ ಲಗ್ನೇ ಲಗೇ ?
ಮುಂದಿನ ವಾರ ಬೆಳ್ಳಿತೆರೆಗೆ ಅಪ್ಪಳಿಸಲಿರುವ ಬಹು ನಿರೀಕ್ಷಿತ ದಂಗಲ್ ಚಿತ್ರದ ರೋಚಕ ವೀಡಿಯೊವನ್ನು ನಿರ್ಮಾಪಕರು ಬಿಡುಗಡೆ ಮಾಡಿದ್ದಾರೆ. ಧಾರಾವಾಹಿ ನಟಿ ಸಾಕ್ಷಿ ತನ್ವರ್, ಆಮಿರ್ ಚಿತ್ರದ ಅನುಭವವನ್ನು ಹಂಚಿಕೊಂಡ ವೀಡಿಯೊ ಅದು. ಕುಸ್ತಿಪಟು ಮಹಾವೀರ್ ಸಿಂಗ್ ಪೋಗಲ್ ಅವರ ಜೀವನವನ್ನಾಧರಿಸಿದ ಚಿತ್ರದಲ್ಲಿ ಆಮಿರ್ ನಾಯಕನಟ. ಸಾಕ್ಷಿ ಆತನ ಪತ್ನಿ ದಯಾ ಕೌರ್ ಪಾತ್ರ ನಿರ್ವಹಿಸಿದ್ದಾರೆ. ದಂಗಲ್ನಲ್ಲಿ ನಟಿಸಲು ನನಗೆ ಮೊದಲ ಕರೆ ಬಂದಾಗ ತಮಾಷೆ ಎಂದುಕೊಂಡಿದ್ದಾಗಿ ಸಾಕ್ಷಿ ಹೇಳಿದ್ದಾರೆ. ಆಮಿರ್ ಹೇಳುವವರೆಗೆ ಸಾಕ್ಷಿ ನನ್ನ ಮನಸ್ಸಿನಲ್ಲೂ ಸುಳಿಯಲಿಲ್ಲ. ಏಕೆಂದರೆ ಸಾಕ್ಷಿಯನ್ನು ಇಂಥ ಪಾತ್ರದಲ್ಲಿ ನಾನೆಂದೂ ನೋಡಿರಲೇ ಇಲ್ಲ ಎಂದು ನಿರ್ದೇಶಕ ನಿತೇಶ್ ತಿವಾರಿ ಹೇಳುತ್ತಾರೆ. ಇಂಥ ಪಾತ್ರ ಆಮಿರ್ ಕಲ್ಪನೆಗೆ ಮಾತ್ರ ಬರಲು ಸಾಧ್ಯ. ಸಾಕ್ಷಿ ಹೆಸರನ್ನು ಶಿಫಾರಸು ಮಾಡಿದ್ದು ತಾಯಿ ಎನ್ನುವುದು ಆಮಿರ್ ವಿವರಣೆ. ತಾಯಿ ಟಿವಿ ಧಾರಾವಾಹಿ ನೊಡುತ್ತಾರೆ. ಅವರು ಸಾಕ್ಷಿಯನ್ನು ಇಷ್ಟಪಟ್ಟಿದ್ದರು ಎಂದು ಆಮಿರ್ ಬಹಿರಂಗಪಡಿಸಿದ್ದಾರೆ. ಎರಡು ದಿನಗಳಲ್ಲಿ ಪಾತ್ರಕ್ಕೆ ಸಾಕ್ಷಿಯವರ ಧ್ವನಿ ಪರೀಕ್ಷೆ ನಡೆಯಿತು. ಆಕೆಯ ಜತೆ ಕೆಲಸ ಮಾಡುವುದು ಹೇಗೆ ಎಂಬ ಬಗ್ಗೆ ಕಲ್ಪನೆಯೇ ಆಮಿರ್ಗೆ ಇರಲಿಲ್ಲವಂತೆ. ಆದರೆ ಸಾಕ್ಷಿ ಅಚ್ಚರಿಪಡುವಮಟ್ಟಿಗೆ ಪಾತ್ರ ನಿರ್ವಹಿಸಿದ್ದಾರೆ ಎಂದು ಆಮಿರ್ ಹೇಳಿಕೊಂಡಿದ್ದಾರೆ.
ವನ್ ಟೇಕ್ ನಟಿ ತನ್ನ ಪಾತ್ರವನ್ನು ಪ್ರಾಮಾಣಿಕವಾಗಿ ನಿರ್ವಹಿಸಿದ್ದಾರೆ ಎಂದು ಆಮಿರ್ ಮುಕ್ತಕಂಠದಿಂದ ಪ್ರಶಂಸಿಸಿದ್ದಾರೆ.
ಇಡೀ ಕುಟುಂಬವನ್ನು ಸರಿದೂಗಿಸಿಕೊಂಡು ಹೋಗುವ ಪೇಸ್ಮೇಕರ್ ಪಾತ್ರ ದಯಾ ಕೌರ್ ಅವರದ್ದು ಎಂದು ಸಾಕ್ಷಿ ವಿವರಿಸಿದ್ದಾರೆ. ರಾಜಸ್ಥಾನದ ಗಡಿಪ್ರದೇಶವಾದ ಅಲ್ವಾರ್ ಮೂಲದವರಾದ ಸಾಕ್ಷಿ, ಹರಿಯಾಣಿ ಭಾಷೆಯನ್ನು ಕೇಳಿ ಬೆಳೆದವರು. ಇದು ಕೂಲ್ ಭಾಷೆ ಎಂದು ಬಣ್ಣಿಸಿದ್ದಾರೆ.
ಈಗಾಗಲೇ ಈ ಚಿತ್ರಕ್ಕಾಗಿ ಆಮಿರ್ ಖಾನ್ 25 ಕೆ.ಜಿ. ತೂಕ ಇಳಿಸಿಕೊಂಡದ್ದು ಸುದ್ದಿಯಾಗಿತ್ತು.