ಬೇಗಂ ಜಾನ್ ವಿದ್ಯಾಬಾಲನ್
‘ಇಶ್ಕಿಯಾ’, ‘ಡರ್ಟಿ ಪಿಕ್ಚರ್’, ‘ಕಹಾನಿ’ ಚಿತ್ರಗಳಲ್ಲಿ ಅತ್ಯದ್ಭುತ ಅಭಿನಯ ನೀಡಿದ್ದ ವಿದ್ಯಾಬಾಲನ್, ಶೀಘ್ರದಲ್ಲೇ ಇನ್ನೊಂದು ಪವರ್ಫುಲ್ ಪಾತ್ರದೊಂದಿಗೆ ಬೆಳ್ಳಿತೆರೆಯಲ್ಲಿ ಮೋಡಿಮಾಡಲಿದ್ದಾರೆ. ರಾಷ್ಟ್ರಪ್ರಶಸ್ತಿ ಪುರಸ್ಕೃತ ನಿರ್ದೇಶಕ ಸುರ್ಜಿತ್ ಮುಖರ್ಜಿ ನಿರ್ದೇಶನದ ‘ಬೇಗಂಜಾನ್’ನಲ್ಲಿ ವಿದ್ಯಾಬಾಲನ್ ಅದ್ಭುತವಾಗಿ ನಟಿಸಿದ್ದಾರೆಂಬ ಮಾತು ಬಾಲಿವುಡ್ ವಲಯದಲ್ಲಿ ಕೇಳಿಬರುತ್ತಿದೆ, ಬಂಗಾಳಿ ಚಿತ್ರ ರಾಜ್ಕಹಿನಿಯ ಬಾಲಿವುಡ್ ರಿಮೇಕ್ ಆಗಿರುವ ‘ಬೇಗಂ ಜಾನ್’ ಎಪ್ರಿಲ್ 14ರಂದು ಬಿಡುಗಡೆಯಾಗಲಿದೆ. 2015ರಲ್ಲಿ ಬಿಡುಗಡೆಯಾದ ರಾಜ್ಕಹಿನಿಯನ್ನು ಕೂಡಾ ಸುರ್ಜಿ್ ಮುಖರ್ಜಿ ಅವರೇ ನಿರ್ದೇಶಿಸಿದ್ದರು.
1947ರ ಭಾರತ-ಪಾಕ್ ವಿಭಜನೆಯ ಕಾಲದ ಕಥಾವಸ್ತುವನ್ನು ಹೊಂದಿರುವ ಬೇಗಂಜಾನ್ನಲ್ಲಿ ನಾಯಕಿ ಪುರುಷ ಪ್ರಧಾನ ಸಮಾಜಕ್ಕೆ ಸವಾಲೆಸೆಯುತ್ತಾಳೆ. ಚಿತ್ರದ ಟೈಟಲ್ ಪಾತ್ರವನ್ನು ವಿದ್ಯಾ ನಿರ್ವಹಿಸಿದ್ದರೆ. ಮೂಲ ಬಂಗಾಳಿ ಆವತರಣಿಕೆಯ ಈ ಪಾತ್ರವನ್ನು ರಿತುಪರ್ಣಾ ಸೇನ್ಗುಪ್ತಾ ನಿರ್ವಹಿಸಿದ್ದರು.
ಬಹುತೇಕ ದೃಶ್ಯಗಳಲ್ಲಿ ವಿದ್ಯಾಬಾಲನ್ ಮೇಕಪ್ ಹಚ್ಚದೆಯೇ ನಟಿಸಿರುವುದು ಈ ಚಿತ್ರದ ಪ್ರಮುಖ ಹೈಲೈಟ್ ಆಗಿದೆ. ಪಾತ್ರಕ್ಕೆ ನೈಜತೆಯನ್ನು ತುಂಬುವ ಉದ್ದೇಶದಿಂದ, ನಿರ್ದೇಶಕ ಶ್ರೀಜಿತ್, ಚಿತ್ರದಲ್ಲಿ ನಟ, ನಟಿಯರ ಮೇಕಪ್ಗೆ ಅತ್ಯಂತ ಕನಿಷ್ಠ ಆದ್ಯತೆ ನೀಡಿದ್ದಾರಂತೆ.