25ನೆ ಚಿತ್ರಕ್ಕೆ ಪ್ರಿನ್ಸ್ ರೆಡಿ
ಪ್ರಿನ್ಸ್ ಮಹೇಶ್ಬಾಬು ಅಭಿನಯದ 25ನೆ ಚಿತ್ರ ಯಾವುದೆಂಬುದನ್ನು ತಿಳಿಯಲು ಅವರ ಅಭಿಮಾನಿಗಳು ಬಹಳ ಸಮಯದಿಂದ ತುದಿಗಾಲಲ್ಲಿ ನಿಂತಿದ್ದರು. ಇದೀಗ ಅವರಿಗೊಂದು ‘ಪ್ರಿನ್ಸ್’ ಸಿಹಿ ಸುದ್ದಿ ನೀಡಿದ್ದಾರೆ. ಅವರ 25ನೆ ಚಿತ್ರ ಅನೌನ್ಸ್ ಆಗಿದ್ದು, ಅದಕ್ಕೆ ‘ಮಹೇಶ್ 25’ ಎಂದು ಹೆಸರಿಡಲಾಗಿದೆ. ವಂಶಿ ಪೈಡಿಪಲ್ಲಿ ನಿರ್ದೇಶನದ ಈ ಚಿತ್ರ ವನ್ನು ದಿಲ್ ರಾಜು ಹಾಗೂ ಸಿ. ಅಶ್ವಿನಿ ದತ್ ಜಂಟಿಯಾಗಿ ನಿರ್ಮಿಸಲಿದ್ದಾರೆ.
‘ಮೊಹೆಂಜಾದಾರೋ’ ಚಿತ್ರದ ಮೂಲಕ ಚಿತ್ರರಂಗಕ್ಕೆ ಪರಿಚಯವಾದ ಕನ್ನಡ ಕರಾವಳಿಯ ಬೆಡಗಿ ಪೂಜಾ ಹೆಗ್ಡೆ ಈ ಚಿತ್ರದ ನಾಯಕಿಯಾಗಲಿದ್ದಾರೆಂಬ ವದಂತಿಗಳು ಈಗಾಗಲೇ ಟಾಲಿವುಡ್ನಲ್ಲಿ ದಟ್ಟವಾಗಿ ಹರಡಿವೆ. ಹಾಗಾದಲ್ಲಿ ಪೂಜಾ ಹೆಗ್ಡೆ ಈ ಚಿತ್ರದ ಮೂಲಕ ದಕ್ಷಿಣ ಭಾರತದ ಚಿತ್ರರಂಗಕ್ಕೆ ಚೊಚ್ಚಲ ಪ್ರವೇಶ ಮಾಡಿದಂತಾಗುವುದು.
ಈ ಮಧ್ಯೆ ಮಹೇಶ್ಬಾಬು ತನ್ನ 23ನೆ ಚಿತ್ರದ ‘ಸ್ಪೈಡರ್’ನ ಬಿಡುಗಡೆಯನ್ನು ಕಾತರದಿಂದ ಎದುರು ನೋಡುತ್ತಿದ್ದಾರೆ. ತಮಿಳು, ತೆಲುಗಿನಲ್ಲಿ ಏಕಕಾಲದಲ್ಲಿ ನಿರ್ಮಾಣಗೊಂಡಿರುವ ‘ಸ್ಪೈಡರ್’ನ್ನು ಗಜನಿ ಖ್ಯಾತಿಯ ಎ.ಆರ್.ಮುರುಗದಾಸ್ ನಿರ್ದೇಶಿಸಿದ್ದಾರೆ. ಚಿತ್ರದ ಪೋಸ್ಟ್ಪ್ರೊಡಕ್ಷನ್ ಕೆಲಸಗಳು ಮುಕ್ತಾಯಗೊಂಡಿದ್ದು, ಬಿಡುಗಡೆಗೆ ಎಲ್ಲಾ ರೀತಿಯ ಸಿದ್ಧತೆಗಳಾಗುತ್ತಿವೆ. ತಮಿಳಿನ ನಟ-ನಿರ್ದೇಶಕ ಎಸ್.ಜೆ. ಸೂರ್ಯ ಈ ಚಿತ್ರದಲ್ಲಿ ವಿಲನ್ ಆಗಿ ಕಾಣಿಸಿಕೊಂಡಿದ್ದಾರೆ. ರಾಕುಲ್ ಪ್ರೀತ್ಸಿಂಗ್ ನಾಯಕಿಯಾಗಿದ್ದು, ಭರತ್ ಹಾಗೂ ಆರ್.ಜೆ. ಬಾಲಜಿ ಮುಖ್ಯಪಾತ್ರಗಳಲ್ಲಿದ್ದಾರೆ. ‘ಸ್ಪೈಡರ್’ ಎಪ್ರಿಲ್ 27ಕ್ಕೆ ತೆರೆಕಾಣಲು ಅಣಿಯಾಗಿದೆ.
ಈ ಮಧ್ಯೆ ಮಹೇಶ್ ಅಭಿನಯದ 24ನೆ ಚಿತ್ರ ‘ಭರತ್ ಅನೆ ನೇನು’ ಚಿತ್ರದ ಶೂಟಿಂಗ್ ಭರದಿಂದ ಸಾಗುತ್ತಿದ್ದು, ಅದು ಜನವರಿಗೆ ರಿಲೀಸ್ ಆಗಲಿದೆ. ರಾಜಕೀಯ ಹಿನ್ನೆಲೆಯ ಕಥಾವಸ್ತುವನ್ನು ಹೊಂದಿರುವ ಈ ಚಿತ್ರವನ್ನು ಕೊರಟಾಲ ಶಿವ ನಿರ್ದೇಶಿಸಿದ್ದಾರೆ.