ಮಣಿಪಾಲ: ಫೆ.28, 29 ಉದ್ಯಮಶೀಲತಾ ಸಮಾವೇಶ
ಮಣಿಪಾಲ, ಫೆ.27: ಮಣಿಪಾಲ ಇನ್ಸ್ಟಿಟ್ಯೂಟ್ ಆಫ್ ಟೆಕ್ನಾಲಜಿ (ಎಂಐಟಿ) ವತಿಯಿಂದ ನಾಲ್ಕನೇ ಮಣಿಪಾಲ ಉದ್ಯಮಶೀಲತಾ ಸಮಾವೇಶ ಫೆ. 28 ಮತ್ತು 29ರಂದು ಎಂಐಟಿ ಮಣಿಪಾಲದಲ್ಲಿ ನಡೆಯಲಿದೆ ಎಂದು ಎಂಐಟಿಯ ಜಂಟಿ ನಿರ್ದೇಶಕ ಡಾ.ಬಿ.ಎಚ್.ವಿ.ಪೈ ತಿಳಿಸಿದ್ದಾರೆ.
ಇಲ್ಲಿ ಕರೆದ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಅವರು ಪದವೀಧರ ವಿದ್ಯಾರ್ಥಿಗಳು ಹಾಗೂ ಸಾರ್ವಜನಿಕರಲ್ಲಿ ಹೊಸ ಹೊಸ ಆವಿಷ್ಕಾರ, ಅನ್ವೇಷಣೆಯೊಂದಿಗೆ ಉದ್ಯಮಶೀಲತೆಯನ್ನು ಪ್ರೋತ್ಸಾಹಿಸಲು ಕಳೆದ ನಾಲ್ಕು ವರ್ಷಗಳಿಂದ ಈ ಸಮಾವೇಶವನ್ನು ಆಯೋಜಿಸಲಾಗುತ್ತಿದೆ ಎಂದವರು ನುಡಿದರು.
ಹಿಂದಿನ ಮೂರು ಸಮಾವೇಶಗಳಲ್ಲಿ 30ಕ್ಕೂ ಅಧಿಕ ಉದ್ದಿಮೆದಾರರು ಸಂಪನ್ಮೂಲ ವ್ಯಕ್ತಿಗಳಾಗಿ ಭಾಗವಹಿಸಿ, ತಮ್ಮ ಅನುಭವ ಗಳನ್ನು ಆಸಕ್ತ ಹಾಗೂ ಉದ್ಯಮಶೀಲರಾಗ ಬಯಸುವ ವಿದ್ಯಾರ್ಥಿಗಳು ಹಾಗೂ ಪ್ರಾಧ್ಯಾಪಕ ರೊಂದಿಗೆ ಹಂಚಿಕೊಂಡಿದ್ದರು. ಈ ಬಾರಿ ಯಶಸ್ವಿ ಉದ್ಯಮಶೀಲರಾಗಿ ಗುರುತಿಸಿಕೊಂಡಿರುವ ಎಂಐಟಿಯ ಎಂಟು ಮಂದಿ ಹಳೆ ವಿದ್ಯಾರ್ಥಿಗಳು ಪಾಲ್ಗೊಳ್ಳಲಿದ್ದಾರೆ ಎಂದು ಡಾ.ಪೈ ನುಡಿದರು.
ಎಂಐಟಿ ಆವರಣದಲ್ಲಿರುವ ಇನ್ನೋವೇಶನ್ ಸೆಂಟರ್, ಮಣಿಪಾಲ ಯುನಿವರ್ಸಲ್ ಟೆಕ್ನಾಲಜಿ ಬ್ಯುಸಿನೆಸ್ ಇನ್ಕ್ಯೂಬೇಟರ್, ಮಣಿಪಾಲ- ಕರ್ನಾಟಕ ಸರಕಾರ ಬಯೋಇನ್ಕ್ಯುಬೇಟರ್ಗಳ ಸಂಯುಕ್ತ ಆಶ್ರಯದಲ್ಲಿ ಎರಡು ದಿನಗಳ ಈ ಸಮಾವೇಶ ನಡೆಯಲಿದೆ ಎಂದರು.
ಸಮಾವೇಶದ ಉದ್ಘಾಟನೆ ಫೆ.28ರ ಅಪರಾಹ್ನ 2ಗಂಟೆಗೆ ಎಂಐಟಿಯ ಎಂ.ವಿ.ಸೆಮಿನಾರ್ ಹಾಲ್ನಲ್ಲಿ ನಡೆಯಲಿದೆ. ಬಳಿಕ ವಿಶೇಷ ಉಪನ್ಯಾಸಗಳು, ಗುಂಪು ಚರ್ಚೆ, ಸ್ಟಾರ್ಟ್ಅಪ್ಗಳ ಕುರಿತು ಮಾಹಿತಿಗಳನ್ನು ನೀಡಲಾಗುತ್ತದೆ. ಎರಡನೇ ದಿನದಂದು ಬೆಳಗ್ಗೆ 10ರಿಂದ ಅಪರಾಹ್ನ 2:00ರವರೆಗೆ ಇನ್ನೋಪೇಷನ್ ಉತ್ಸವ ನಡೆಯಲಿದೆ. ಇದು ಸಾರ್ವಜನಿಕರಿಗೆ ಮುಕ್ತವಾಗಿ ತೆರೆದಿರು ತ್ತದೆ. ಇದರಲ್ಲಿ 50ಕ್ಕೂ ಅಧಿಕ ಯೋಜನೆಗಳ ಪ್ರದರ್ಶನ, ಸ್ಟಾರ್ಟ್ಅಪ್ನೊಂದಿಗೆ ಸಂವಾದ ಕಾರ್ಯಕ್ರಮವೂ ನಡೆಯಲಿದೆ ಎಂದು ಎಂಯುಟಿಬಿಐನ ಸಿಇಓ ಪ್ರೊ. ಶ್ರೀಹರಿ ಉಪಾಧ್ಯಾಯ ನುಡಿದರು.
ಪತ್ರಿಕಾಗೋಷ್ಠಿಯಲ್ಲಿ ಡಾ.ಮನೀಶ್ ಥಾಮಸ್, ಕಾರ್ಯಕ್ರಮ ಸಂಯೋಜಕ ರಾದ ಶ್ರೀರಾಮ ಕೆ.ವಿ., ಧನಂಜಯ ಉಪಸ್ಥಿತರಿದ್ದರು.