ಐಸಿಸಿ ಅಂಡರ್-19 ವಿಶ್ವಕಪ್ ತಂಡದಲ್ಲಿ ಭಾರತದ ಐವರು ಆಟಗಾರರಿಗೆ ಸ್ಥಾನ
ದುಬೈ, ಫೆ.4: ಐಸಿಸಿ ರವಿವಾರ ಪ್ರಕಟಿಸಿರುವ ಅಂಡರ್-19 ವಿಶ್ವಕಪ್ ತಂಡದಲ್ಲಿ ನಿರೀಕ್ಷೆಯಂತೆ ಭಾರತೀಯರು ಪ್ರಾಬಲ್ಯ ಸಾಧಿಸಿದ್ದಾರೆ. ವಿಶ್ವ ಚಾಂಪಿಯನ್ ಭಾರತದ 11 ಆಟಗಾರರ ಪೈಕಿ ಐದು ಮಂದಿ ಐಸಿಸಿ ಆಯ್ಕೆ ಮಾಡಿರುವ ತಂಡದಲ್ಲಿ ಸ್ಥಾನ ಪಡೆದಿದ್ದಾರೆ.
ನ್ಯೂಝಿಲೆಂಡ್ನ ವೌಂಟ್ ವೌಂಗ್ನುಯ್ನಲ್ಲಿ ಶನಿವಾರ ನಡೆದ ವಿಶ್ವಕಪ್ ಫೈನಲ್ನಲ್ಲಿ ಆಸ್ಟ್ರೇಲಿಯವನ್ನು 8 ವಿಕೆಟ್ಗಳಿಂದ ಮಣಿಸಿರುವ ಭಾರತ ನಾಲ್ಕನೇ ಬಾರಿ ಅಂಡರ್-19 ವಿಶ್ವಕಪ್ ಟ್ರೋಫಿ ಜಯಿಸಿ ದಾಖಲೆ ನಿರ್ಮಿಸಿತ್ತು.
ಐಸಿಸಿ ಪ್ರಕಟಿಸಿರುವ ವಿಶ್ವ ಇಲೆವೆನ್ ತಂಡದಲ್ಲಿ ಭಾರತದ ಬ್ಯಾಟಿಂಗ್ ಸರದಿಯ ಅಗ್ರ ಮೂವರು ಬ್ಯಾಟ್ಸ್ಮನ್ಗಳಾದ ನಾಯಕ ಪೃಥ್ವಿ ಶಾ(261 ರನ್), ಫೈನಲ್ ಪಂದ್ಯದ ಪಂದ್ಯಶ್ರೇಷ್ಠ ಮನ್ಜೋತ್ ಕಾರ್ಲಾ(252 ರನ್) ಹಾಗೂ ಸರಣಿಶ್ರೇಷ್ಠ ಪ್ರಶಸ್ತಿ ವಿಜೇತ ಶುಭ್ಮನ್ ಗಿಲ್(372 ರನ್) ಅವರಿದ್ದಾರೆ.
ಎಡಗೈ ಸ್ಪಿನ್ನರ್ ಅನುಕೂಲ್ ರಾಯ್(14 ವಿಕೆಟ್ಗಳು) ಹಾಗೂ ವೇಗದ ಬೌಲರ್ ಕಮಲೇಶ್ ನಾಗರಕೋಟಿ (9 ವಿಕೆಟ್ಗಳು) ವಿಶ್ವ ಟೀಮ್ನಲ್ಲಿ ಸ್ಥಾನ ಪಡೆದಿರುವ ಭಾರತದ ಇತರ ಇಬ್ಬರು ಆಟಗಾರರಾಗಿದ್ದಾರೆ.
ವೆಸ್ಟ್ಇಂಡೀಸ್ನ ವೇಗದ ಬೌಲರ್ ಇಯಾನ್ ಬಿಷಪ್, ಭಾರತದ ಮಹಿಳಾ ತಂಡದ ಮಾಜಿ ನಾಯಕಿ ಅಂಜುಮ್ ಚೋಪ್ರಾ, ನ್ಯೂಝಿಲೆಂಡ್ನ ಮಾಜಿ ನಾಯಕ ಜೆಫ್ ಕ್ರೋವ್, ಪತ್ರಕರ್ತ ಶಶಾಂಕ್ ಕಿಶೋರ್ ಹಾಗೂ ಆಸ್ಟ್ರೇಲಿಯದ ಮಾಜಿ ಆಲ್ರೌಂಡರ್ ಟಾಮ್ ಮೂಡಿ ಅವರನ್ನೊಳಗೊಂಡ ಐವರು ಸದಸ್ಯರ ಆಯ್ಕೆ ಸಮಿತಿ ಐಸಿಸಿ ಅಂಡರ್-19 ವಿಶ್ವಕಪ್ ಕ್ರಿಕೆಟ್ ತಂಡವನ್ನು ಆಯ್ಕೆ ಮಾಡಿದೆ.
ದಕ್ಷಿಣ ಆಫ್ರಿಕದ ರೇನಾರ್ಡ್ ವ್ಯಾನ್ ಟಾಂಡರ್ ಐಸಿಸಿ ವರ್ಲ್ಡ್ ತಂಡದ ನಾಯಕನಾಗಿ ಆಯ್ಕೆಯಾಗಿದ್ದು, ವಾನ್ ಟಂಡರ್ 6 ಪಂದ್ಯಗಳಲ್ಲಿ 348 ರನ್ ಗಳಿಸಿದ್ದಾರೆ.
ದಕ್ಷಿಣ ಆಫ್ರಿಕ ತಂಡ ವಿಶ್ವಕಪ್ನ ಕ್ವಾರ್ಟರ್ ಫೈನಲ್ನಲ್ಲಿ ಪಾಕಿಸ್ತಾನ ವಿರುದ್ಧ 3 ವಿಕೆಟ್ಗಳಿಂದ ಸೋಲನುಭವಿಸಿತ್ತು. ಪ್ಲೇ-ಆಫ್ ಪಂದ್ಯದಲ್ಲಿ ಬಾಂಗ್ಲಾದೇಶವನ್ನು 8 ವಿಕೆಟ್ಗಳಿಂದ ಸೋಲಿಸಿ ಐದನೇ ಸ್ಥಾನ ಪಡೆದಿತ್ತು.
ನ್ಯೂಝಿಲೆಂಡ್ ಬ್ಯಾಟ್ಸ್ಮನ್ ಫಿನ್ ಅಲ್ಲೆನ್(338 ರನ್), ಪಾಕಿಸ್ತಾನದ ಎಡಗೈ ವೇಗದ ಬೌಲರ್ ಶಾಹೀನ್ ಅಫ್ರಿದಿ(12 ವಿಕೆಟ್) ಹಾಗೂ ಅಫ್ಘಾನಿಸ್ತಾನದ ಲೆಗ್-ಸ್ಪಿನ್ನರ್ ಖೈಸ್ ಅಹ್ಮದ್(14 ವಿಕೆಟ್) 11ರ ಬಳಗದಲ್ಲಿದ್ದಾರೆ.
ಟೂರ್ನಮೆಂಟ್ನಲ್ಲಿ ಶ್ರೀಲಂಕಾ ಹಾಗೂ ಕೀನ್ಯ ವಿರುದ್ಧ ಶತಕ ಸಿಡಿಸಿ ಒಟ್ಟು 418 ರನ್ ಗಳಿಸಿ ಗರಿಷ್ಠ ಸ್ಕೋರರ್ ಆಗಿರುವ ವಿಂಡೀಸ್ ಬ್ಯಾಟ್ಸ್ಮನ್ ಅಲಿಕ್ ಅಥಾನಝ್ 12ನೇ ಆಟಗಾರನಾಗಿ ಆಯ್ಕೆಯಾಗಿದ್ದಾರೆ.
ಐಸಿಸಿ ಅಂಡರ್-19 ಕ್ರಿಕೆಟ್ ವಿಶ್ವಕಪ್ ತಂಡ
ಪೃಥ್ವಿ ಶಾ(ಭಾರತ), ಮನ್ಜೋತ್ ಕಾರ್ಲಾ(ಭಾರತ), ಶುಭಮನ್ ಗಿಲ್(ಭಾರತ), ಫಿನ್ ಅಲ್ಲೆನ್(ನ್ಯೂಝಿಲೆಂಡ್), ರೇನಾರ್ಡ್ ವ್ಯಾನ್ ಟಂಡರ್(ದಕ್ಷಿಣ ಆಫ್ರಿಕ, ನಾಯಕ), ವ್ಯಾಂಡಿಲ್ ಮಕ್ವೆಟು(ವಿಕೆಟ್ಕೀಪರ್)(ದ.ಆಫ್ರಿಕ), ಅನುಕೂಲ್ ರಾಯ್(ಭಾರತ), ಕಮಲೇಶ್ ನಾಗರಕೋಟಿ(ಭಾರತ), ಗೆರಾಲ್ಡ್ ಕೊಟ್ಝಿ(ದ.ಆಫ್ರಿಕ), ಖೈಸ್ ಅಹ್ಮದ್(ಅಫ್ಘಾನಿಸ್ತಾನ), ಶಾಹೀನ್ ಅಫ್ರಿದಿ(ಪಾಕಿಸ್ತಾನ)