ದಾಂಪತ್ಯ ಜೀವನಕ್ಕೆ ಬ್ಯಾಡ್ಮಿಂಟನ್ ತಾರೆಗಳಾದ ಸೈನಾ ನೆಹ್ವಾಲ್-ಕಶ್ಯಪ್
ಡಿ.16ಕ್ಕೆ ಒಂದು ದಶಕದ ರೊಮ್ಯಾನ್ಸ್ ಗೆ ಬೀಳಲಿದೆ ವಿವಾಹಮುದ್ರೆ
ಹೈದರಾಬಾದ್, ಸೆ.26: ಭಾರತದ ಬ್ಯಾಡ್ಮಿಂಟನ್ ತಾರೆಗಳಾದ ಸೈನಾ ನೆಹ್ವಾಲ್ ಮತ್ತು ಪರುಪಲ್ಲಿ ಕಶ್ಯಪ್, ಬ್ಯಾಡ್ಮಿಂಟನ್ ಕೋರ್ಟ್ ಹೊರಗೆ ಅಪರೂಪದ ಮ್ಯಾಚ್ ಪಾಯಿಂಟ್ ಸಾಧಿಸಿದ್ದಾರೆ!
ಉಭಯ ಆಟಗಾರರ ಒಂದು ದಶಕದ ರೊಮ್ಯಾನ್ಸ್ ವಿವಾಹ ರೂಪದಲ್ಲಿ ಸುಖಾಂತ್ಯವಾಗುತ್ತಿದೆ. ಭಾರತದ ಹೆಮ್ಮೆಯ ತಾರೆಗಳು ಡಿಸೆಂಬರ್ 16ರಂದು ದಾಂಪತ್ಯ ಜೀವನಕ್ಕೆ ಕಾಲಿರಿಸಲಿದ್ದಾರೆ ಎಂದು ತಿಳಿದುಬಂದಿದೆ. ತೀರಾ ಖಾಸಗಿ ಕಾರ್ಯಕ್ರಮ ಕೇವಲ 100 ಮಂದಿಗಷ್ಟೇ ಸೀಮಿತವಾಗಲಿದೆ. ಆದರೆ ಡಿಸೆಂಬರ್ 21ರಂದು ವೈಭವದ ರಿಸೆಪ್ಷನ್ ನಡೆಯಲಿದೆ.
"ಎರಡೂ ಕುಟುಂಬಗಳು ಸದ್ಯದಲ್ಲೇ ವಿವಾಹ ಇಟ್ಟುಕೊಳ್ಳುವ ನಿರ್ಧಾರಕ್ಕೆ ಬಂದಿವೆ. ಇದೀಗ ದಿನಾಂಕ ಅಂತಿಮವಾಗಿದ್ದು, ಡಿಸೆಂಬರ್ 16ಕ್ಕೆ ಎಲ್ಲ ಸಿದ್ಧತೆಗಳು ನಡೆಯುತ್ತಿವೆ" ಎಂದು ಈ ಜೋಡಿಯ ಆತ್ಮೀಯ ಮೂಲಗಳಿಂದ ತಿಳಿದುಬಂದಿದೆ.
ಈ ಹೈದ್ರಾಬಾದಿ ಜೋಡಿ ಹತ್ತು ವರ್ಷಗಳಿಂದ ಸಂಬಂಧ ಹೊಂದಿದ್ದರು. ಆದರೆ ಕಿಡಂಬಿ ಶ್ರೀಕಾಂತ್, ಎಚ್.ಎಸ್.ಪ್ರಣಯ್ ಹಾಗೂ ಗುರುಸಾಯಿದತ್ ಬಳಗದೊಂದಿಗೆ ಕಾಣಿಸಿಕೊಳ್ಳುವ ಮೂಲಕ ಈ ರಹಸ್ಯ ಬಚ್ಚಿಟ್ಟುಕೊಂಡಿದ್ದರು. ಇದುವರೆಗೆ ಇಬ್ಬರೂ ಈ ಸಂಬಂಧವನ್ನು ದೃಢಪಡಿಸಿರಲಿಲ್ಲ ಅಥವಾ ನಿರಾಕರಿಸಿರಲೂ ಇಲ್ಲ.
ಈ ವಿವಾಹವು ಮತ್ತೊಂದು ಕ್ರೀಡಾ ಜೋಡಿಗೆ ಸಾಕ್ಷಿಯಾಗಲಿದೆ. ದೀಪಿಕಾ ಪಲ್ಲಿಕಲ್- ದಿನೇಶ್ ಕಾರ್ತಿಕ್, ಇಶಾಂತ್ ಶರ್ಮಾ- ಪ್ರತಿಮಾ ಸಿಂಗ್, ಗೀತಾ ಪೋಗಟ್- ಪವನ್ ಕುಮಾರ್, ಸಾಕ್ಷಿ ಮಲಿಕ್- ಸತ್ಯಾವರ್ತ್ ಕದಿಯನ್ ಇತ್ತೀಚಿನ ವರ್ಷಗಳಲ್ಲಿ ವಿವಾಹ ಬಂಧನಕ್ಕೊಳಗಾದ ಕ್ರೀಡಾಜೋಡಿಗಳು.
28 ವರ್ಷದ ಸೈನಾ ಹಾಗೂ 32 ವರ್ಷದ ಕಶ್ಯಪ್, ಬ್ಯಾಡ್ಮಿಂಟನ್ನ ಸೂಪರ್ ಜೋಡಿ ಎನಿಸಿದ ಇಂಡೋನೇಷ್ಯಾದ ಸೂಸಿ ಸುಸಾಂತಿ ಮತ್ತು ಅಲನ್ ಬುಡಿಕುಸುಮಾ, ಚೀನಾದ ಲೀ ಡೆನ್ ಹಾಗೂ ಕ್ಸಿ ಕ್ಸಿಂಗ್ಫಾಂಗ್, ಬ್ರಿಟಿಷ್ ಜೋಡಿ ಕ್ರಿಸ್ ಗಾಬ್ಬೆ ಅಡ್ಕಾಕ್ ಹಾಗೂ ಬಾಕ್ ಹೋಮ್, ಮಧುಮಿತಾ ಗೋಸ್ವಾಮಿ- ವಿಕ್ರಮ್ ಸಿಂಗ್ ಭಿಷ್ಟ್, ಸೈಯದ್ ಮೋದಿ- ಅಮಿತಾ ಕುಲಕರ್ಣಿ ಜೋಡಿಯನ್ನು ಅನುಕರಿಸಲಿದೆ.