‘ನನ್ನನ್ನು ಪ್ರಶ್ನಿಸಿದವರಿಗೆ ಗೆಲುವೇ ನನ್ನ ಉತ್ತರ’
ಸಿಂಧು
ಬಾಸೆಲ್, ಆ.26: ಕಳೆದ ಎರಡು ಆವೃತ್ತಿಗಳಲ್ಲಿ ಚಿನ್ನ ಗೆಲ್ಲಲು ವಿಫಲವಾದಾಗ ನನ್ನ ಆಟದ ಬಗ್ಗೆ ಹಲವು ಮಂದಿ ಟೀಕಿಸಿದ್ದರು. ಇದರಿಂದ ನನಗೆ ದು:ಖ ಉಂಟಾಗಿತ್ತು. ಕೆಲವು ಮಂದಿ ಟೀಕಿಸಿದಾಗ ಕೋಪಗೊಂಡಿದ್ದೆ. ಚಿನ್ನ ಗೆಲ್ಲದಕ್ಕೆ ಅಂದು ಯಾರು ನನ್ನನ್ನು ಪ್ರಶ್ನಿಸಿದ್ದರೂ ಇಂದು ಅವರಿಗೆ ಚಿನ್ನದ ಮೂಲಕ ಉತ್ತರ ನೀಡಿರುವೆನು ಎಂದು ವರ್ಲ್ಡ್ ಚಾಂಪಿಯನ್ಶಿಪ್ನ ಮಹಿಳೆಯರ ಸಿಂಗಲ್ಸ್ನಲ್ಲಿ ಚಿನ್ನ ಜಯಿಸಿರುವ ಭಾರತದ ಖ್ಯಾತ ಬ್ಯಾಡ್ಮಿಂಟನ್ ತಾರೆ ಪಿ.ವಿ.ಸಿಂಧು ಹೇಳಿದ್ದಾರೆ.
ವಿಶ್ವ ಚಾಂಪಿಯನ್ಶಿಪ್ನಲ್ಲಿ ಎರಡು ಬಾರಿ ಬೆಳ್ಳಿ ಜಯಿಸಿದ್ದ ಸಿಂಧು ಚಿನ್ನಕ್ಕಾಗಿ ಹಲವು ವರ್ಷಗಳಿಂದ ಕಾದಿದ್ದರು. ಜಪಾನ್ನ ನೊರೊಮಿ ಒಕುಹರಾ ಅವರನ್ನು ರವಿವಾರ 21-7, 21-7 ಅಂತರದಿಂದ ಮಣಿಸಿ ಮೊದಲ ಬಾರಿ ವಿಶ್ವ ಚಾಂಪಿಯನ್ಶಿಪ್ ಚಿನ್ನವನ್ನು ಮುಡಿಗೇರಿಸಿಕೊಂಡಿದ್ದರು.
ವಿಶ್ವ ಚಾಂಪಿಯನ್ಶಿಪ್ನ ಫೈನಲ್ನಲ್ಲಿ ‘‘ನನ್ನನ್ನು ಪದೇ ಪದೇ ಪಶ್ನಿಸಿದ್ದ ಜನರಿಗೆ ರಾಕೆಟ್ನ ಮೂಲಕ ಮತ್ತು ಗೆಲುವಿನೊಂದಿಗೆ ಉತ್ತರ ನೀಡಬೇಕೆಂದು ಬಯಸಿದ್ದೆ. ಈಗ ಎಲ್ಲವೂ ಕೈಗೂಡಿದೆ ’’ ಎಂದು ವರ್ಲ್ಡ್ಬ್ಯಾಡ್ಮಿಂಟನ್ ಫೆಡರೇಶನ್(ಬಿಡಬ್ಲುಎಫ್) ಅಧಿಕೃತ ಜಾಲತಾಣದಲ್ಲಿ ಪ್ರತಿಕ್ರಿಯೆ ನೀಡಿದ್ದಾರೆ.
ಎರಡು ಬಾರಿ ಫೈನಲ್ನಲ್ಲಿ ಚಿನ್ನ ಗೆಲ್ಲುವಲ್ಲಿ ಎಡವಿದ್ದ ಸಿಂಧುಗೆ ಈ ಬಾರಿ ಅದೃಷ್ಟ ಖುಲಾಯಿಸಿದೆ. 2017ರಲ್ಲಿ ವಿಶ್ವ ಚಾಂಪಿಯನ್ ಫೈನಲ್ನಲ್ಲಿ ಒಕುಹರಾ ಮತ್ತು 2018ರಲ್ಲಿ ಒಲಿಂಪಿಕ್ ಚಾಂಪಿಯನ್ ಸ್ಪೇನ್ನ ಕರೊಲಿನಾ ಮರಿನ್ ಎದುರು ಸೋಲು ಅನುಭವಿಸಿ ಪ್ರಶಸ್ತಿ ಕೈ ಚೆಲ್ಲಿದ್ದರು.
2016ರಲ್ಲಿ ನಡೆದ ರಿಯೋ ಒಲಿಂಪಿಕ್ಸ್ನಲ್ಲಿ ಮಹಿಳೆಯರ ಸಿಂಗಲ್ಸ್ನ ಫೈನಲ್ನಲ್ಲಿ ಸಿಂಧು ಅವರು ಮರಿನ್ ವಿರುದ್ಧ ಸೋತು ನಿರ್ಗಮಿಸಿದ್ದರು. ಅಂದಿನಿಂದ ಟೀಕೆ ಆರಂಭಗೊಂಡಿತ್ತು ಎಂದು ಸಿಂಧು ಹೇಳಿದ್ದಾರೆ.
ಸಿಂಧುಗೆ ಒಕುಹರಾ ಚಿನ್ನ ನಿರಾಕರಿಸಿ ಎರಡು ವರ್ಷ ಸಂದಿವೆ. ಫೈನಲ್ನಲ್ಲಿ 110 ನಿಮಿಷಗಳ ಕಾಲ ಇವರ ನಡುವೆ ಹಣಾಹಣಿ ನಡೆದಿತ್ತು. ಇದು ಬ್ಯಾಡ್ಮಿಂಟನ್ ಇತಿಹಾಸದಲ್ಲಿ ಸುದೀರ್ಘ ಅವಧಿಯ ಹೋರಾಟವಾಗಿತ್ತು. ಎರಡು ಬಾರಿ ವರ್ಲ್ಡ್ ಚಾಂಪಿಯನ್ಶಿಪ್ನಲ್ಲಿ ಚಿನ್ನ ಮುಡಿಗೇರಿಸುವಲ್ಲಿ ವಿಫಲವಾದ ಸಿಂಧು ಗೋಲ್ಡ್ ಕೋಸ್ಟ್ ಕಾಮನ್ವೆಲ್ತ್ ಗೇಮ್ಸ್, ಜಕಾರ್ತ ಏಶ್ಯನ್ ಗೇಮ್ಸ್ ನಲ್ಲೂ ಫೈನಲ್ನಲ್ಲಿ ಸೋತು ನಿರ್ಗಮಿಸಿದ್ದರು. ಕಳೆದ ವರ್ಷ ಥಾಯ್ಲೆಂಡ್ ಓಪನ್ ಮತ್ತು ಇಂಡಿಯಾ ಓಪನ್ನಲ್ಲಿ ಎರಡನೇ ಸ್ಥಾನ ಪಡೆದಿದ್ದರು.
ಸಿಂಧು ವರ್ಲ್ಡ್ ಚಾಂಪಿಯನ್ಶಿಪ್ನಲ್ಲಿ 5ನೇ ಪದಕ ಜಯಿಸಿದ್ದಾರೆ. 2013 ಮತ್ತು 2014ರಲ್ಲಿ ಕಂಚು, 2017 ಮತ್ತು 2018ರಲ್ಲಿ ಬೆಳ್ಳಿ ಹಾಗೂ 2019ರಲ್ಲಿ ಚಿನ್ನ ಪಡೆದಿದ್ದಾರೆ. ಇದರೊಂದಿಗೆ ಅವರು ವರ್ಲ್ಡ್ ಚಾಂಪಿಯನ್ಶಿಪ್ನಲ್ಲಿ ಗರಿಷ್ಠ ಪದಕ ಜಯಿಸಿದ ಮಾಜಿ ಒಲಿಂಪಿಕ್ಸ್ ಚಾಂಪಿಯನ್ ಚೀನಾದ ಝಾಂಗ್ ನಿಂಗ್ ದಾಖಲೆ ಯನ್ನು ಸರಿಗಟ್ಟಿದ್ದಾರೆ. ಝಾಂಗ್ ನಿಂಗ್ 2001 ರಿಂದ 2007ರ ತನಕ 1 ಚಿನ್ನ , 2 ಬೆಳ್ಳಿ ಮತ್ತು 2 ಕಂಚು ಜಯಿಸಿದ್ದರು.
ಸಿಂಧು ಅವರ ವರ್ಲ್ಡ್ ಚಾಂಪಿಯನ್ಶಿಪ್ನ ಚಿನ್ನದ ಕೊರತೆ ನಿವಾರಣೆಯಾಗಿದೆ. ಇನ್ನು 2020ರ ಒಲಿಂಪಿಕ್ ಚಿನ್ನಕ್ಕಾಗಿ ಅವರ ಪ್ರಯತ್ನ. ‘‘ ಸಿಂಧು 2020ರಲ್ಲಿ ನಡೆಯಲಿರುವ ಟೋಕಿಯೋ ಒಲಿಂಪಿಕ್ನಲ್ಲಿ ಚಿನ್ನ ಗೆಲ್ಲುತ್ತಾರೋ ? ’’ ಜನರು ಕೇಳಲಾರಂಭಿಸಿದ್ದಾರೆ.
‘‘ಒಲಿಂಪಿಕ್ಗೆ ದಿನ ದೂರವಿಲ್ಲ. ಆದರೆ ನಾನು ಹಂತ ಹಂತವಾಗಿ ಪ್ರಯತ್ನ ಮುಂದುವರಿಸಿದ್ದೇನೆ. ಒಲಿಂಪಿಕ್ಸ್ ನಲ್ಲಿ ಉತ್ತಮ ಪ್ರದರ್ಶನ ನೀಡುವ ವಿಶ್ವಾಸ ನನಗಿದೆ’’ ಎಂದು ಸಿಂಧು ಹೇಳಿದ್ದಾರೆ.
‘‘ನಾನು ವರ್ಲ್ಡ್ ಚಾಂಪಿಯನ್ಶಿಪ್ನಲ್ಲಿ ಜಯಿಸಿರುವ ಚಿನ್ನವನ್ನು ತಾಯಿಗೆ ಸಮರ್ಪಿಸುತ್ತೇನೆ. ಯಾಕೆಂದರೆ ಇಂದು ಅವರ ಜನ್ಮದಿನ ’’ ಎಂದು ಸಿಂಧು ತಿಳಿಸಿದರು.
ಪ್ರತಿಯೊಬ್ಬರು ನನ್ನಿಂದ ಗೆಲುವಿನ ನಿರೀಕ್ಷೆಯನ್ನಿಟ್ಟುಕೊಂಡಿದ್ದರು. ರಿಯೋ ಒಲಿಂಪಿಕ್ಸ್ನಲ್ಲಿ ಬೆಳ್ಳಿ ಜಯಿಸಿದ ಬಳಿಕ ಜನರ ನಿರೀಕ್ಷೆ ಜಾಸ್ತಿಯಾಯಿತು. ಪ್ರತಿಯೊಂದು ಟೂರ್ನ ಮೆಂಟ್ಗೂ ತೆರಳುವಾಗಲೂ ನನ್ನಿಂದ ಚಿನ್ನ ನಿರೀಕ್ಷಿಸತೊಡಗಿದರು.
ಪಿ.ವಿ.ಸಿಂಧು, ಭಾರತದ ಖ್ಯಾತ ಬ್ಯಾಡ್ಮಿಂಟನ್ ತಾರೆ