ಅಂತರ್ರಾಷ್ಟ್ರೀಯ ಕ್ರಿಕೆಟ್ಗೆ ಝಿಂಬಾಬ್ವೆ ನಾಯಕ ಮಸಕಝ ವಿದಾಯ
ಚಿತ್ತಗಾಂಗ್, ಸೆ.21: ಝಿಂಬಾಬ್ವೆ ನಾಯಕ ಹ್ಯಾಮಿಲ್ಟನ್ ಮಸಕಝ ಅಫ್ಘಾನಿಸ್ತಾನ ವಿರುದ್ಧ ಶುಕ್ರವಾರ ನಡೆದ ಟ್ವೆಂಟಿ-20 ಪಂದ್ಯದಲ್ಲಿ ಆಡುವುದರೊಂದಿಗೆ ಅಂತರ್ರಾಷ್ಟ್ರೀಯ ಕ್ರಿಕೆಟ್ಗೆ ವಿದಾಯ ಹೇಳಿದರು.
36ರ ಹರೆಯದ ಮಸಕಝ ಚಿತ್ತಗಾಂಗ್ನಲ್ಲಿ ಬ್ಯಾಟಿಂಗ್ಗೆ ಇಳಿದಾಗ ಉಭಯ ತಂಡಗಳ ಆಟಗಾರರು ಬ್ಯಾಟ್ ಎತ್ತಿ ಹಿಡಿದು ಗೌರವ ಸಲ್ಲಿಸಿದರು. ತನ್ನ ಕೊನೆಯ ಪಂದ್ಯದಲ್ಲಿ 42 ಎಸೆತಗಳಲ್ಲಿ 71 ರನ್ ಗಳಿಸಿದ ಮಸಕಝ ಝಿಂಬಾಬ್ವೆ ತಂಡ 7 ವಿಕೆಟ್ಗಳಿಂದ ಜಯ ಸಾಧಿಸಲು ನೆರವಾದರು. ಝಿಂಬಾಬ್ವೆ ಟ್ವೆಂಟಿ-20ಯಲ್ಲಿ ಅಫ್ಘಾನ್ ವಿರುದ್ಧ ಮೊದಲ ಜಯ ದಾಖಲಿಸಿತು. ಮೊದಲು ಬ್ಯಾಟಿಂಗ್ ಮಾಡಿದ್ದ ಅಫ್ಘಾನಿಸ್ತಾನ 8 ವಿಕೆಟ್ ನಷ್ಟಕ್ಕೆ 155 ರನ್ ಗಳಿಸಿತ್ತು. ಈ ಸೋಲಿನೊಂದಿಗೆ ಸತತ 12 ಪಂದ್ಯಗಳಲ್ಲಿ ಜಯ ಸಾಧಿಸಿದ್ದ ಅಫ್ಘಾನ್ನ ಗೆಲುವಿನ ಓಟಕ್ಕೆ ಬ್ರೇಕ್ ಬಿದ್ದಿದೆ. 42 ಎಸೆತಗಳ ಇನಿಂಗ್ಸ್ನಲ್ಲಿ ಐದು ಸಿಕ್ಸರ್ ಹಾಗೂ ನಾಲ್ಕು ಬೌಂಡರಿಗಳನ್ನು ಗಳಿಸಿದ ಮಸಕಝ ತನ್ನ 18 ವರ್ಷಗಳ ಅಂತರ್ರಾಷ್ಟ್ರೀಯ ಕ್ರಿಕೆಟ್ಗೆ ತನ್ನದೇ ಶೈಲಿಯಲ್ಲಿ ತೆರೆ ಎಳೆದರು. ತನ್ನ ಕೊನೆಯ ಟ್ವೆಂಟಿ-20 ಪಂದ್ಯದಲ್ಲಿ ಗರಿಷ್ಠ ವೈಯಕ್ತಿಕ ಸ್ಕೋರ್ ಗಳಿಸಿದ ಆಟಗಾರ ಎನಿಸಿಕೊಂಡರು.
2001ರಲ್ಲಿ ಕ್ರಿಕೆಟ್ಗೆ ಕಾಲಿಟ್ಟಿರುವ ಮಸಕಝ ಅಂತರ್ರಾಷ್ಟ್ರೀಯ ಕ್ರಿಕೆಟ್ನಲ್ಲಿ ಝಿಂಬಾಬ್ವೆ ಬೆಳವಣಿಗೆಗೆ ಪ್ರಮುಖ ಪಾತ್ರವಹಿಸಿದ್ದರು. ‘‘ನನ್ನ ತಂಡದ ಆಟಗಾರರೊಂದಿಗೆ ಬೆಳಗ್ಗೆ ಮಾತನಾಡುವಾಗ ಕಣ್ಣೀರು ಹಾಕಿದ್ದೆ. ನಿವೃತ್ತಿ ಕುರಿತು ನನ್ನ ಅಧಿಕೃತ ಘೋಷಣೆಯ ಮೊದಲು ತಂಡದ ಸದಸ್ಯರಿಗೆ ಮನವರಿಕೆ ಮಾಡಿಕೊಳ್ಳಲು ಯತ್ನಿಸಿದ್ದೆ. ನಾನು ಮೂರೇ ವಾಕ್ಯವನ್ನು ಹೇಳಿದ್ದು,ಅದೊಂದು ನಿಜವಾಗಿಯೂ ಭಾವನಾತ್ಮಕ ಕ್ಷಣವಾಗಿತ್ತು’’ ಎಂದು ಮಸಕಝ ಹೇಳಿದ್ದಾರೆ.
ವೆಸ್ಟ್ಇಂಡೀಸ್ ವಿರುದ್ಧ ಆಡಿದ ತನ್ನ ಚೊಚ್ಚಲ ಟೆಸ್ಟ್ ನಲ್ಲಿ 17 ವರ್ಷ ಹಾಗೂ 254 ದಿನಗಳಲ್ಲಿ ಶತಕ ಸಿಡಿಸಿದ್ದ ಮಸಕಝ ಈ ಸಾಧನೆ ಮಾಡಿದ ಕಿರಿಯ ಆಟಗಾರ ಎನಿಸಿಕೊಳ್ಳುವುದರೊಂದಿಗೆ ವಿಶ್ವ ದಾಖಲೆ ನಿರ್ಮಿಸಿದ್ದರು. ಇವರ ವಿಶ್ವ ದಾಖಲೆ ಕೇವಲ ಮೂರು ತಿಂಗಳು ಮಾತ್ರ ಉಳಿದಿತ್ತು. ಬಾಂಗ್ಲಾದೇಶದ ಮುಹಮ್ಮದ್ ಅಶ್ರಫುಲ್ ಈ ದಾಖಲೆಯನ್ನು ಮುರಿದಿದ್ದರು.
ಮಸಕಝ ಪ್ರಥಮ ದರ್ಜೆ ಕ್ರಿಕೆಟ್ನಲ್ಲಿ ಶತಕ ಸಿಡಿಸಿದ ಝಿಂಬಾಬ್ವೆಯ ಮೊದಲ ಕರಿಯ ಆಟಗಾರನಾಗಿದ್ದಾರೆ. ರಾಷ್ಟ್ರೀಯ ಒಕ್ಕೂಟದೊಂದಿಗೆ ಆಟಗಾರರ ಸಂಘರ್ಷ ನಡೆದ ಕಾರಣ ಮಸಕಝ ತನ್ನ 2ನೇ ಟೆಸ್ಟ್ ಶತಕವನ್ನು ಬಾಂಗ್ಲಾದೇಶ ವಿರುದ್ಧ 2011ರಲ್ಲಿ ಗಳಿಸಿದ್ದರು.
ಮಸಕಝ 38 ಟೆಸ್ಟ್, 209 ಏಕದಿನ ಹಾಗೂ 66 ಟಿ-20 ಅಂತರ್ರಾಷ್ಟ್ರೀಯ ಪಂದ್ಯಗಳನ್ನಾಡಿದ್ದಾರೆ. ತ್ರಿಕೋನ ಸರಣಿಯ ಅಂತ್ಯಕ್ಕೆ ವಿದಾಯ ಹೇಳುವುದಾಗಿ ಈ ತಿಂಗಳಾರಂಭದಲ್ಲಿ ಘೋಷಿಸಿದ್ದ ಮಸಕಝ ಟಿ-20ಯಲ್ಲಿ 25.96ರ ಸರಾಸರಿಯಲ್ಲಿ 11 ಅರ್ಧಶತಕಗಳ ಸಹಿತ 1,662 ರನ್ ಗಳಿಸಿದ್ದಾರೆ. ಟಿ-20ಯಲ್ಲಿ ಝಿಂಬಾಬ್ವೆ ಪರ ಗರಿಷ್ಠ ರನ್ ಗಳಿಸಿದ ಆಟಗಾರನೆಂಬ ಹೆಗ್ಗಳಿಕೆಯೊಂದಿಗೆ ವಿದಾಯ ಹೇಳಿದ್ದಾರೆ.