ಪಿಬಿಎಲ್: ಬೆಂಗಳೂರಿಗೆ ಸೋಲು
ಮುಂಬೈ, ಜ.3: ಇಲ್ಲಿ ನಡೆಯುತ್ತಿರುವ ಪ್ರೀಮಿಯರ್ ಬ್ಯಾಡ್ಮಿಂಟನ್ ಲೀಗ್ನಲ್ಲಿ ಭಾರತದ ಅಗ್ರ ರ್ಯಾಂಕಿನ ಆಟಗಾರ ಕೆ. ಶ್ರೀಕಾಂತ್ ಮಲೇಷ್ಯಾದ ಮಾಜಿ ನಂ.1 ಆಟಗಾರ ಲೀ ಚೊಂಗ್ ವೀ ವಿರುದ್ಧ ಗೆಲುವು ಸಾಧಿಸಿದರು. ಆದರೆ, ಶ್ರೀಕಾಂತ್ ಪ್ರತಿನಿಧಿಸುತ್ತಿರುವ ಬೆಂಗಳೂರು ಹಾಟ್ಗನ್ಸ್ ತಂಡ ಹೈದರಾಬಾದ್ ಹಂಟರ್ಸ್ ವಿರುದ್ಧ 2-3 ಅಂಕಗಳ ಅಂತರದಿಂದ ಸೋತಿದೆ. ರವಿವಾರ ಇಲ್ಲಿ ನಡೆದ ಪುರುಷರ ಸಿಂಗಲ್ಸ್ನಲ್ಲಿ ವಿಶ್ವದ ನಂ.9ನೆ ಆಟಗಾರ ಶ್ರೀಕಾಂತ್ ವಿಶ್ವದ ನಂ.5ನೆ ಆಟಗಾರ ಲೀ ಅವರನ್ನು 15-12, 6-15, 15-7 ಗೇಮ್ಗಳಿಂದ ಮಣಿಸಿದರು. ಶ್ರೀಕಾಂತ್ ಇದೇ ಮೊದಲ ಬಾರಿ ಲೀ ವಿರುದ್ಧ ಜಯ ಸಾಧಿಸಿದರು. ಕಳೆದ ನಾಲ್ಕು ಪಂದ್ಯಗಳಲ್ಲಿ ಶ್ರೀಕಾಂತ್ ಸೋತಿದ್ದರು.
ಹೈದರಾಬಾದ್ ತಂಡ ಮೊದಲ ಪಂದ್ಯವನ್ನು ಸೋತಿತ್ತು. ಮಹಿಳೆಯರ ಸಿಂಗಲ್ಸ್ನಲ್ಲಿ ಥಾಯ್ಲೆಂಡ್ನ ಸುಪನಿದಾ ಅವರು ಬೆಂಗಳೂರಿನ ಸುಯೊ ಡಿ ವಿರುದ್ಧ 15-8, 15-11 ಗೇಮ್ಗಳ ಅಂತರದಿಂದ ಸೋತರು.
ಹೈದರಾಬಾದ್ ಪುರುಷರ ಡಬಲ್ಸ್ನಲ್ಲಿ ಗೆಲುವು ಸಾಧಿಸಿ ತಿರುಗೇಟು ನೀಡಿತು. ಡೆನ್ಮಾರ್ಕ್ನ ಕಾರ್ಸ್ಟನ್ ಹಾಗೂ ಇಂಡೋನೇಷ್ಯದ ಮಾರ್ಕಿಸ್ ಕಿಡೊ ಜೋಡಿ ಬೆಂಗಳೂರು ತಂಡದ ಹೂನ್ ಥಿಯೆನ್ ಹಾಗೂ ಕಿಮ್ ವಾ ಲಿಮ್ರನ್ನು 13-15, 15-9, 15-14 ಅಂತರದಿಂದ ಮಣಿಸಿತು. ಸಿಂಗಲ್ಸ್ ಪಂದ್ಯದಲ್ಲಿ ಬೆಂಗಳೂರಿನ ಸಮೀರ್ ವರ್ಮರನ್ನು 15-14, 15-13 ಅಂತರದಿಂದ ಸೋಲಿಸಿದ ಪಿ. ಕಶ್ಯಪ್ ಹೈದರಾಬಾದ್ಗೆ 3-0 ಮುನ್ನಡೆ ಒದಗಿಸಿಕೊಟ್ಟರು.
ಬೆಂಗಳೂರಿನ ಅಶ್ವಿನಿ ಪೊನ್ನಪ್ಪ ಹಾಗೂ ಡೆನ್ಮಾರ್ಕ್ನ ಜೊಕಿಮ್ ಫಿಶ್ಚರ್ ಜೋಡಿ ಹೈದರಾಬಾದ್ನ ಜ್ವಾಲಾ ಗುಟ್ಟಾ ಹಾಗೂ ಕಿಡೊ ಅವರನ್ನು 15-13, 15-13ಗೇಮ್ಗಳಿಂದ ಮಣಿಸಿ ಬೆಂಗಳೂರಿಗೆ ಮೊದಲ ಗೆಲುವು ತಂದುಕೊಟ್ಟರು. ಅಂತಿಮವಾಗಿ ಶ್ರೀಕಾಂತ್ ಸಿಂಗಲ್ಸ್ನಲ್ಲಿ ಗೆಲುವು ಸಾಧಿಸಿದರೂ ಬೆಂಗಳೂರು 2-3 ಅಂತರದಿಂದ ಶರಣಾಯಿತು.