ವಿಜಯ್ ಕ್ರೈಸ್ತ ಧರ್ಮೀಯ ಎಂದು ಪರೋಕ್ಷ ಟ್ವೀಟ್: ಬಿಜೆಪಿ ನಾಯಕನಿಗೆ ಚಾಟಿ ಬೀಸಿದ ಟ್ವಿಟ್ಟರಿಗರು
ಚೆನ್ನೈ, ಅ.23: ತಮಿಳು ನಟ ವಿಜಯ್ ಅವರ ಪೂರ್ಣ ಹೆಸರು ಜೋಸೆಫ್ ವಿಜಯ್ ಚಂದ್ರಶೇಖರ್. ವಿಜಯ್ ಕೈಸ್ತ ಧರ್ಮೀಯರಾಗಿದ್ದು, ಇದರಲ್ಲಿ ಅಂತಹ ವಿಶೇಷತೆಗಳೇನೂ ಯಾರಿಗೂ ಕಾಣಿಸುವುದಿಲ್ಲ. ಆದರೆ ಬಿಜೆಪಿ ನಾಯಕರೊಬ್ಬರಿಗೆ ವಿಜಯ್ ಅವರ ಹೆಸರು ಹಾಗು ಧರ್ಮ ‘ವಿಶೇಷ’ವಾಗಿ ಕಂಡಿದೆ.
ಬಿಜೆಪಿಯ ರಾಷ್ಟ್ರೀಯ ಕಾರ್ಯದರ್ಶಿ ಎಚ್. ರಾಜಾ ಈ ಬಗ್ಗೆ ಟ್ವೀಟೊಂದನ್ನು ಮಾಡಿದ್ದಾರೆ. ಇದರಲ್ಲಿ ವಿಜಯ್ ಅವರು ಕ್ರೈಸ್ತ ಧರ್ಮೀಯರು ಎನ್ನುವುದನ್ನು ತೋರಿಸಲು ವಿಜಯ್ ರ ಮತದಾರ ಗುರುತು ಪತ್ರವನ್ನೂ ಪೋಸ್ಟ್ ಮಾಡಿದ್ದಾರೆ. ಇಷ್ಟೇ ಅಲ್ಲದೆ ಟ್ವೀಟ್ ನೊಂದಿಗೆ “ಸತ್ಯ ಒಳ್ಳೆಯದು” ಎಂದಿದ್ದಾರೆ.
ಇತ್ತೀಚೆಗಷ್ಟೇ ವಿಜಯ್ ನಟನೆಯ ಮೆರ್ಸಲ್ ಚಿತ್ರ ಬಿಡುಗಡೆಯಾಗಿದ್ದು, ಜಿಎಸ್ ಟಿ ಹಾಗು ಡಿಜಿಟಲ್ ಇಂಡಿಯಾ ಬಗ್ಗೆ ಚಿತ್ರದಲ್ಲಿರುವ ಸಂಭಾಷಣೆಗಳು ಬಿಜೆಪಿ ನಾಯಕರ ಕಣ್ಣು ಕೆಂಪಾಗಿಸಿದೆ. ಆದ್ದರಿಂದ ವಿಜಯ್ ಕ್ರೈಸ್ತ ಧರ್ಮೀಯರು ಎಂದು ತೋರಿಸಲು ರಾಜಾ ಈ ಟ್ವೀಟ್ ಮಾಡಿದ್ದಾರೆ ಎಂದು ಟ್ವಿಟ್ಟರಿಗರು ಆಕ್ರೋಶ ವ್ಯಕ್ತಪಡಿಸಿದ್ದಾರೆ.
ಚರ್ಚೆಗೆ ಸಂಬಂಧವೇ ಇರದ ಧರ್ಮದ ವಿಚಾರವನ್ನು ರಾಜಾ ಎಳೆದು ತಂದಿದ್ದಾರೆ ಎಂದು ಆಕ್ರೋಶ ವ್ಯಕ್ತಪಡಿಸಿರುವ ಟ್ವಿಟ್ಟರಿಗರು #WeLoveJosephVijay ಎಂದು ಹ್ಯಾಶ್ ಟ್ಯಾಗ್ ಟ್ರೆಂಡ್ ಒಂದನ್ನು ಪ್ರಾರಂಭಿಸಿದ್ದಾರೆ.
“ಇದು ಭಕ್ತರ ಅಗ್ಗದ ಧಾರ್ಮಿಕ ದಾಳಿಯಾಗಿದೆ. ಹೌದು ಅವರ ಹೆಸರು ಜೋಸೆಫ್ ವಿಜಯ್”, “ವಿಜಯ್, ಜೋಸೆಫ್ ವಿಜಯ್ ಅಥವಾ ಮುಹಮ್ಮದ್ ಏನೇ ಇರಲಿ, ಧರ್ಮವನ್ನೂ ಮೀರಿ ನಾವು ಅವರನ್ನು ಸಹೋದರನಂತೆ ಪ್ರೀತಿಸುತ್ತೇವೆ” ಎಂದು ಟ್ವಿಟ್ಟರಿಗರು ರಾಜಾಗೆ ತಿರುಗೇಟು ನೀಡಿದ್ದಾರೆ.