ಬಿಜೆಪಿ ರಾಷ್ಟ್ರಾಧ್ಯಕ್ಷ ಹುದ್ದೆಗೆ ನಡ್ಡಾ, ಭೂಪೇಂದ್ರ ಯಾದವ್ ಮುಂಚೂಣಿಯಲ್ಲಿ

 ಹೊಸದಿಲ್ಲಿ, ಜೂ.1: ಬಿಜೆಪಿ ರಾಷ್ಟ್ರಾಧ್ಯಕ್ಷ ಅಮಿತ್ ಶಾ ಗೃಹ ಸಚಿವರಾಗಿ ಪದೋನ್ನತಿ ಪಡೆದ ಕಾರಣ ಪಕ್ಷ ಶಾ ಅವರಿಂದ ತೆರವಾದ ಸ್ಥಾನಕ್ಕೆ ಸೂಕ್ತ ಅಭ್ಯರ್ಥಿಯನ್ನು ಹುಡುಕಬೇಕಾಗಿದೆ. ಈ ಹಿಂದಿನ ನರೇಂದ್ರ ಮೋದಿ ಸರಕಾರದಲ್ಲಿ ಆರೋಗ್ಯ ಸಚಿವರಾಗಿದ್ದ ಜಗತ್ ಪ್ರಕಾಶ್ ನಡ್ಡಾ ಹಾಗೂ ರಾಜ್ಯಸಭಾ ಸಂಸದ ಭೂಪೇಂದ್ರ ಯಾದವ್ ಅವರು ಶಾ ಅವರಿಂದ ತೆರವಾದ ಸ್ಥಾನ ತುಂಬಲು ಮುಂಚೂಣಿಯಲ್ಲಿದ್ದಾರೆ.

ಮೋದಿ ಪ್ರಧಾನಮಂತ್ರಿಯಾಗಿ ಅಧಿಕಾರವಹಿಸಿಕೊಂಡ 2 ತಿಂಗಳ ಬಳಿಕ 2014ರ ಜುಲೈನಲ್ಲಿ ಶಾ ಅವರು ರಾಜ್‌ನಾಥ್ ಸಿಂಗ್‌ರಿಂದ ಬಿಜೆಪಿ ಅಧ್ಯಕ್ಷ ಪದವಿ ಪಡೆದಿದ್ದರು. ಆಗ ಗೃಹ ಸಚಿವರಾಗಿ ಆಯ್ಕೆಯಾಗಿದ್ದ ಸಿಂಗ್ ಅವರು ಶಾಗೆ ಅಧ್ಯಕ್ಷ ಸ್ಥಾನ ಬಿಟ್ಟುಕೊಟ್ಟಿದ್ದರು. ಯಾವುದೇ ಬಿಜೆಪಿ ಅಧ್ಯಕ್ಷನ ಅಧಿಕಾರದ ಅವಧಿ 3 ವರ್ಷ. ಸಿಂಗ್ 2013ರಲ್ಲಿ ನಿತಿನ್ ಗಡ್ಕರಿ ಅವರಿಂದ ಅಧ್ಯಕ್ಷ ಸ್ಥಾನ ಸ್ವೀಕರಿಸಿದ್ದರು. ಒಂದೂವರೆ ವರ್ಷದ ಅಧಿಕಾರದ ಅವಧಿ ಬಾಕಿ ಇರುವಾಗಲೇ 2014ರಲ್ಲಿ ಅಧ್ಯಕ್ಷ ಸ್ಥಾನಕ್ಕೆ ರಾಜೀನಾಮೆ ನೀಡಿದ್ದರು.

ಶಾ ಅವರು ಸಿಂಗ್ ಅವರ ಅವಧಿಯನ್ನು ಪೂರ್ಣಗೊಳಿಸಿದ್ದಲ್ಲದೆ 2016ರಲ್ಲಿ ಮತ್ತೊಮ್ಮೆ ಅಧ್ಯಕ್ಷರಾಗಿ ಆಯ್ಕೆಯಾಗಿದ್ದರು. ಶಾ ಅವರ ಅವಧಿ 2019ರ ಜನವರಿಗೆ ಅಂತ್ಯವಾಗಿದೆ. ಚುನಾವಣೆ ಮುಗಿಯುವ ತನಕ ಅವರ ಅಧಿಕಾರದ ಅವಧಿಯನ್ನು ಪಕ್ಷ ವಿಸ್ತರಿಸಿತ್ತು.

 ಬಿಜೆಪಿ ತಕ್ಷಣಕ್ಕೆ ಹರ್ಯಾಣ, ಮಹಾರಾಷ್ಟ್ರ ಹಾಗೂ ಜಾರ್ಖಂಡ್‌ನ ಚುನಾವಣೆಯ ಸವಾಲಿಗೆ ಸಜ್ಜಾಗಬೇಕಾಗಿದೆ. ರಾಷ್ಟ್ರಪತಿ ಆಡಳಿತದಲ್ಲಿರುವ ಜಮ್ಮು-ಕಾಶ್ಮೀರ ಕೂಡ ಚುನಾವಣೆಯ ಹೊಸ್ತಿಲಲ್ಲಿದೆ. ಈ ಚುನಾವಣೆಯನ್ನು ಎದುರಿಸಲು ಪಕ್ಷಕ್ಕೆ ಪೂರ್ಣಕಾಲಿಕ ಅಧ್ಯಕ್ಷನ ಅಗತ್ಯವಿದೆ.