ಪ್ಲಾಸ್ಟಿಕ್ ನಿಂದ ಇಂಧನ ತಯಾರಿ, ಲೀಟರ್ ಗೆ 40 ರೂ.!
ಗಮನ ಸೆಳೆದಿದೆ ಸತೀಶ್ ಕುಮಾರ್ ರ ಅನ್ವೇಷಣೆ
ಹೈದರಾಬಾದ್,ಜೂ.25: ಮೆಕ್ಯಾನಿಕಲ್ ಇಂಜಿನಿಯರ್ ಆಗಿರುವ ಹೈದರಾಬಾದ್ ನಿವಾಸಿ ಪ್ರೊ.ಸತೀಶ್ ಕುಮಾರ್ ಅವರು ಬಳಸಿದ ಪ್ಲಾಸ್ಟಿಕ್ನಿಂದ ಪೆಟ್ರೋಲ್ ತಯಾರಿಸುವ ವಿನೂತನ ಸಾಧನೆಯನ್ನು ಮಾಡಿದ್ದಾರೆ.
ಪ್ಲಾಸ್ಟಿಕ್ನ್ನು ಇಂಧನವನ್ನಾಗಿ ಪರಿವರ್ತಿಸಲು ಮೂರು ಹಂತಗಳ ‘ಪ್ಲಾಸ್ಟಿಕ್ ಪೈರೊಲಿಸಿಸ್’ ವಿಧಾನವನ್ನು ಬಳಸುತ್ತಿದ್ದೇವೆ ಎಂದು ಕಿರು,ಸಣ್ಣ ಮತ್ತು ಮಧ್ಯಮ ಉದ್ಯಮಗಳ ಸಚಿವಾಲಯದಲ್ಲಿ ನೋಂದಣಿ ಹೊಂದಿರುವ ಕಂಪನಿಯನ್ನು ಸ್ಥಾಪಿಸಿರುವ ಕುಮಾರ್ ತಿಳಿಸಿದರು.
ಈ ತಂತ್ರಜ್ಞಾನವು ಪ್ಲಾಸ್ಟಿಕ್ನ್ನು ಪೆಟ್ರೋಲ್,ಡೀಸಿಲ್ ಮತ್ತು ವೈಮಾನಿಕ ಇಂಧನವನ್ನಾಗಿ ಪರಿವರ್ತಿಸಲು ನೆರವಾಗುತ್ತದೆ. ಸುಮಾರು 500 ಕೆ.ಜಿ.ಗಳಷ್ಟು ಪುನರ್ಬಳಕೆ ಮಾಡಲಾಗದ ಪ್ಲಾಸ್ಟಿಕ್ನಿಂದ 400 ಲೀ. ಇಂಧನವು ಉತ್ಪಾದನೆಯಾಗುತ್ತದೆ. ಇದೊಂದು ಸರಳ ಪ್ರಕ್ರಿಯೆಯಾಗಿದ್ದು, ನೀರಿನ ಅಗತ್ಯವಿಲ್ಲ ಮತ್ತು ತ್ಯಾಜ್ಯ ನೀರನ್ನು ಬಿಡುಗಡೆಗೊಳಿಸುವುದಿಲ್ಲ. ಇದು ನಿರ್ವಾತದಲ್ಲಿ ನಡೆಯುವುದರಿಂದ ವಾಯು ಮಾಲಿನ್ಯವನ್ನೂ ಉಂಟು ಮಾಡುವುದಿಲ್ಲ ಎಂದು ಅವರು ತಿಳಿಸಿದರು.
ಕುಮಾರ್ ಅವರು 2016ರಿಂದ ಪುನರ್ಬಳಕೆಗೆ ಅರ್ಹವಲ್ಲದಿದ್ದ 50 ಟನ್ ಪ್ಲಾಸ್ಟಿಕ್ನ್ನು ಇಂಧನವನ್ನಾಗಿ ಪರಿವರ್ತಿಸಿದ್ದಾರೆ. ಸದ್ಯ ಅವರ ಕಂಪನಿಯು ಪ್ರತಿದಿನ 200 ಕೆ.ಜಿ.ಪ್ಲಾಸ್ಟಿಕ್ಗಳಿಂದ 200 ಲೀ.ಪೆಟ್ರೋಲ್ನ್ನು ತಯಾರಿಸುತ್ತಿದೆ ಮತ್ತು ಅದನ್ನು ಸ್ಥಳೀಯ ಕೈಗಾರಿಕೆಗಳಿಗೆ ಪ್ರತಿ ಲೀಟರ್ಗೆ 40/50 ರೂ.ಗೆ ಮಾರಾಟ ಮಾಡುತ್ತಿದೆ. ಆದರೆ ವಾಹನಗಳಲ್ಲಿ ಈ ಇಂಧನ ಬಳಕೆ ಯೋಗ್ಯವೇ ಎನ್ನುವುದನ್ನು ಇನ್ನಷ್ಟೇ ಪರೀಕ್ಷಿಸಬೇಕಿದೆ. ವಿಂಗಡಣೆಯ ಅಗತ್ಯವಿಲ್ಲದೆ ಎಲ್ಲ ವಿಧಗಳ ಪ್ಲಾಸ್ಟಿಕ್ಗಳನ್ನು ಇದಕ್ಕೆ ಬಳಸಬಹುದಾಗಿದೆ.
‘‘ಪರಿಸರಕ್ಕೆ ನೆರವಾಗುವುದು ಈ ಸ್ಥಾವರ ಸ್ಥಾಪನೆಯ ಹಿಂದಿನ ನಮ್ಮ ಮುಖ್ಯ ಉದ್ದೇಶವಾಗಿದೆ. ನಾವು ಯಾವುದೇ ವಾಣಿಜ್ಯಿಕ ಲಾಭಗಳನ್ನು ನಿರೀಕ್ಷಿಸುತ್ತಿಲ್ಲ. ಸ್ವಚ್ಛ ಭವಿಷ್ಯಕ್ಕಾಗಿ ನಮ್ಮ ಅಲ್ಪ ಪ್ರಯತ್ನವನ್ನು ಮಾಡುತ್ತಿದ್ದೇವೆ. ಯಾವುದೇ ಆಸಕ್ತ ಉದ್ಯಮಿಯೊಂದಿಗೆ ನಮ್ಮ ತಂತ್ರಜ್ಞಾನವನ್ನು ಹಂಚಿಕೊಳ್ಳಲು ನಾವು ಸಿದ್ಧರಿದ್ದೇವೆ ’’ ಎಂದು ಕುಮಾರ ಹೇಳಿದರು.