ನೀರವ್ ಮೋದಿ, ಸೋದರಿ ಪೂರ್ವಿಯ ನಾಲ್ಕು ಸ್ವಿಸ್ಬ್ಯಾಂಕ್ ಖಾತೆಗಳ ಮುಟ್ಟುಗೋಲು
ಖಾತೆಗಳಲ್ಲಿ ಒಟ್ಟು 283.16 ಕೋಟಿ ರೂ.
ಹೊಸದಿಲ್ಲಿ, ಮಾ.27: ಪಂಜಾಬ್ ನ್ಯಾಶನಲ್ ಬ್ಯಾಂಕ್ಗೆ 13 ಸಾವಿರ ಕೋಟಿ ರೂ. ವಂಚನೆ ಹಗರಣದ ಆರೋಪಿ ನೀರವ್ ಮೋದಿ ಹಾಗೂ ಆತನ ಸಹೋದರಿ ಪೂರ್ವಿ ಮೋದಿಗೆ ಸೇರಿದ ನಾಲ್ಕು ಸ್ವಿಸ್ ಬ್ಯಾಂಕ್ ಖಾತೆಗಳನ್ನು ಜಾರಿ ನಿರ್ದೇಶನಾಲಯವು ಗುರುವಾರ ಮುಟ್ಟುಗೋಲು ಹಾಕಿದೆ. ಈ ನಾಲ್ಕು ಖಾತೆಗಳು ಒಟ್ಟು 283.16 ಕೋಟಿ ರೂ. ಮೌಲ್ಯದ ಹಣವನ್ನು ಹೊಂದಿರುವುದಾಗಿ ಅಧಿಕೃತ ಮೂಲಗಳು ತಿಳಿಸಿವೆ.
ಈ ಹಣವು ಅಪರಾಧದ ಮೂಲಕ ಸಂಗ್ರಹವಾದ ಆದಾಯವಾಗಿದ್ದು, ಅದನ್ನು ಮುಟ್ಟುಗೋಲು ಹಾಕುವಂತೆ ಜಾರಿ ನಿರ್ದೇಶನಾಲಯವು ಮನವಿ ಮಾಡಿದ ಹಿನ್ನೆಲೆಯಲ್ಲಿ ಸ್ವಿಸ್ ಬ್ಯಾಂಕ್ ಈ ಕ್ರಮ ಕೈಗೊಂಡಿದೆ.
ಬ್ರಿಟನ್ಗೆ ಪರಾರಿಯಾಗಿದ್ದ 48 ವರ್ಷದ ನೀರವ್ಮೋದಿಯನ್ನು ಪ್ರಸಕ್ತ ಲಂಡನ್ನ ವ್ಯಾಂಡ್ಸ್ವರ್ತ್ ಜೈಲಿನಲ್ಲಿರಿಸಲಾಗಿದೆ. ಪಂಜಾಬ್ ನ್ಯಾಶನಲ್ ಬ್ಯಾಂಕ್ ವಂಚನೆ ಹಗರಣಕ್ಕೆ ಸಂಬಂಧಿಸಿ ನೀರವ್ನನ್ನು ತನಗೆ ಹಸ್ತಾಂತರಿಸಬೇಕೆಂದು ಭಾರತ ಮನವಿ ಸಲ್ಲಿಸಿದ ಹಿನ್ನೆಲೆಯಲ್ಲಿ ಬ್ರಿಟಿಶ್ ಪೊಲೀಸರು ಆತನನ್ನು ಬಂಧಿಸಿದ್ದರು.
ನೀರವ್ ರಿಮಾಂಡ್ ಅವಧಿ ಜುಲೈ 25ರವರೆಗೆ ವಿಸ್ತರಣೆ
ಪಂಜಾಬ್ ನ್ಯಾಶನಲ್ ಬ್ಯಾಂಕ್ಗೆ ಕೋಟ್ಯಂತರ ರೂ. ವಂಚನೆ ಹಗರಣದ ಆರೋಪಿ ನೀರವ್ ಮೋದಿಗೆ ವಿಧಿಸಿರುವ ಜೈಲು ರಿಮಾಂಡ್ನ ಅವಧಿಯನ್ನು ಬ್ರಿಟನ್ನ ವೆಸ್ಟ್ಮಿನ್ಸ್ಟರ್ ಮ್ಯಾಜಿಸ್ಟ್ರೇಟ್ ನ್ಯಾಯಾಲಯವು ಗುರುವಾರ ಮುಂದಿನ ವಿಚಾರಣೆ ನಡೆಯಲಿರುವ ದಿನಾಂಕವಾದ ಜುಲೈ 25ರವರೆಗೆ ವಿಸ್ತರಿಸಿದೆ. ಈ ವರ್ಷದ ಮಾರ್ಚ್ನಿಂದ ಮೋದಿ ಜೈಲು ವಾಸ ಅನುಭವಿಸುತ್ತಿದ್ದಾರೆ. ಪಂಜಾಬ್ ನ್ಯಾಶನಲ್ ಬ್ಯಾಂಕ್ಗೆ 13 ಸಾವಿರ ಕೋಟಿ ರೂ.ಗೂ ಅಧಿಕ ಹಣವನ್ನು ವಂಚಿಸಿದ ಆರೋಪದಲ್ಲಿ ನೀರವ್ನನ್ನು ಬಂಧಿಸಲಾಗಿದೆ.
ಇಂದು ತನ್ನನ್ನು ಇರಿಸಲಾಗಿರುವ ವ್ಯಾಂಡ್ಸ್ವರ್ತ್ ಜೈಲಿನಿಂದ ವಿಡಿಯೋ ಸಂಪರ್ಕದ ಮೂಲಕ ನೀರವ್ ನ್ಯಾಯಾಲಯಕ್ಕೆ ಹಾಜರಾಗಿದ್ದಾರೆ. ನೀರವ್ ಅವರ ಜಾಮೀನು ಅರ್ಜಿಯನ್ನು ಬ್ರಿಟನ್ ನ್ಯಾಯಾಲಯ ತಳ್ಳಿಹಾಕಿರುವುದು ಇದು ನಾಲ್ಕನೆ ಸಲವಾಗಿದೆ. ತನ್ನ ಗಡಿಪಾರು ಕೋರಿ ಭಾರತ ಸಲ್ಲಿಸಿರುವ ಮನವಿಗೆ ಸಂಬಂಧಿಸಿದ ಎಲ್ಲಾ ದಾಖಲೆಗಳನ್ನು ಮೋದಿಗೆ ಒದಗಿಸಲು ತನ್ನಿಂದ ಸಾಧ್ಯವಿರುವುದೆಲ್ಲವನ್ನೂ ಮಾಡುವುದಾಗಿ ನ್ಯಾಯಾಲಯ ಈ ಸಂದರ್ಭದಲ್ಲಿ ನೀರವ್ಗೆ ಭರವಸೆ ನೀಡಿತು. ತನ್ನ ವಿರುದ್ಧ ಭಾರತ ಸರಕಾರವು ದಾಖಲಿಸಿರುವ 5 ಸಾವಿರ ಪುಟಗಳ ದೋಷಾರೋಪಪಟ್ಟಿಯ ಪರಾಮರ್ಶೆ ನಡೆಸಲು ತನಗೆ ಲ್ಯಾಪ್ಟಾಪ್ ಒದಗಿಸುವಂತೆ ನೀವರ್ರ ನ್ಯಾಯವಾದಿಗಳ ತಂಡವು ನ್ಯಾಯಾಧೀಶರನ್ನು ಕೋರಿದೆ.