ಕೈಯಲ್ಲಿ ರಿವಾಲ್ವರ್, ರೈಫಲ್ ಹಿಡಿದು ಕುಣಿದಾಡಿದ ಬಿಜೆಪಿ ಶಾಸಕ: ವಿಡಿಯೋ ವೈರಲ್
ಹೊಸದಿಲ್ಲಿ, ಜು.10: ಉತ್ತರಾಖಂಡದ ಬಿಜೆಪಿ ಶಾಸಕ ಕುನ್ವರ್ ಪ್ರಣವ್ ಸಿಂಗ್ ತನ್ನ ಕೈಯಲ್ಲಿ ಬಂದೂಕುಗಳನ್ನು ಹಿಡಿದುಕೊಂಡು ಬಾಲಿವುಡ್ ಹಾಡಿಗೆ ಕುಣಿಯುತ್ತಿರುವ ವೀಡಿಯೋ ವೈರಲ್ ಆಗಿದ್ದು, ಅವರ ವಿರುದ್ಧ ಕ್ರಮ ಕೈಗೊಳ್ಳುವುದಾಗಿ ಬಿಜೆಪಿ ಎಚ್ಚರಿಸಿದೆ.
ಮಂಗಳವಾರ ಸಾಮಾಜಿಕ ಜಾಲತಾಣಗಳಲ್ಲಿ ಅಪ್ ಲೋಡ್ ಮಾಡಲಾದ ವೀಡಿಯೋದಲ್ಲಿ ಪ್ರಣವ್ ಸಿಂಗ್ ಒಂದು ಕೈಯ್ಯಲ್ಲಿ ರೈಫಲ್ ಹಾಗೂ ಇನ್ನೊಂದು ಕೈಯ್ಯಲ್ಲಿ ರಿವಾಲ್ವರ್ ಹಿಡಿದುಕೊಂಡು ಕುಣಿಯುತ್ತಾ ಅಶ್ಲೀಲ ಪದಗಳನ್ನು ಪ್ರಯೋಗಿಸಿರುವುದು ಕಂಡು ಬರುತ್ತದೆ.
ಬಿಳಿ ಪ್ಯಾಂಟ್ ಹಾಗೂ ಕಪ್ಪು ಬನಿಯನ್ ಧರಿಸಿದ್ದ ಪ್ರಣವ್ ಸಿಂಗ್ ಮಧ್ಯದಲ್ಲಿ ಏನನ್ನೊ ಕುಡಿಯುತ್ತಿರುವುದೂ ಕಾಣಿಸುತ್ತದೆ. ಈ ಒಂದು ನಿಮಿಷ 45 ಸೆಕೆಂಡ್ ಅವಧಿಯ ವೀಡಿಯೋದಲ್ಲಿ ಸಿಂಗ್ ಜತೆ ಕೆಲ ಇತರ ಜನರೂ ಕುಣಿಯುತ್ತಿರುವುದು ಕಾಣಿಸುತ್ತದೆ.
ಸಿಂಗ್ ಕೈಯ್ಯಲಿದ್ದ ಬಂದೂಕುಗಳು ಪರವಾನಗಿ ಹೊಂದಿದ ಬಂದೂಕುಗಳೇ ಎಂದು ಪರಿಶೀಲಿಸಲಾಗುವುದು ಎಂದು ಪೊಲೀಸರು ತಿಳಿಸಿದ್ದಾರೆ. ಆದರೆ ಶಾಸಕ ಮಾತ್ರ ಈ ವೀಡಿಯೋ ಮೂರು ವರ್ಷ ಹಳೆಯದ್ದು ಆಗ ತಾನು ಕಾಂಗ್ರೆಸ್ ಪಕ್ಷದಲ್ಲಿದ್ದೆ ಎಂದು ಹೇಳಿಕೊಂಡಿದ್ದಾರಲ್ಲದೆ, ತನ್ನ ಮಾನಹಾನಿಗೈಯ್ಯುವ ಉದ್ದೇಶದಿಂದ ಹೀಗೆ ಮಾಡಲಾಗಿದೆ ಎಂದು ಹೇಳುವ ಮೂಲಕ ಇತರ ಬಿಜೆಪಿ ಶಾಸಕರು ಹಾಗೂ ತನ್ನ ವಿರೋಧಿಗಳು ಇದರ ಹಿಂದೆ ಇರಬಹುದು ಎಂಬ ಸುಳಿವು ನೀಡಿದ್ಧಾರೆ.
ಖಾನ್ಪುರ್ ಕ್ಷೇತ್ರದ ಶಾಸಕನಾಗಿರುವ ಸಿಂಗ್ ಪತ್ರಕರ್ತರೊಬ್ಬರನ್ನು ಬೆದರಿಸಿದ ಪ್ರಕರಣದ ನಂತರ ಪಕ್ಷದಿಂದ ಮೂರು ತಿಂಗಳು ಅಮಾನತುಗೊಂಡಿದ್ದರು. 2016ರಲ್ಲಿ ಮಾಜಿ ಸಿಎಂ ಹರೀಶ್ ರಾವತ್ ವಿರುದ್ಧ ಬಂಡೆದ್ದ 9 ಶಾಸಕರಲ್ಲಿ ಒಬ್ಬರಾಗಿದ್ದ ಸಿಂಗ್ ನಂತರ ಬಿಜೆಪಿ ಸೇರಿದ್ದರು.
BJP MLA Pranav Champion who was recently suspended from the party for threatening a journalist, seen in a viral video brandishing guns. Police says, "will look into the matter and also verify if the weapons are licensed or not." (Note: Abusive language) pic.twitter.com/AbsApoYR2g
— ANI (@ANI) July 10, 2019