"ನಮ್ಮ ನಂ.1, ನಂ.2ಗಳಿಂದ ಆದೇಶ ಬಂದರೆ ನಿಮ್ಮ ಸರಕಾರ 24 ಗಂಟೆಗಳಲ್ಲಿ ಉರುಳುತ್ತದೆ"

ಭೋಪಾಲ್ : ''ನಮ್ಮ ಮೇಲಿನವರಾದ ನಂ. 1 ಹಾಗೂ ನಂ. 2 ಅವರಿಂದ ಆದೇಶ ಬಂದಲ್ಲಿ  24 ಗಂಟೆಗಳೊಳಗಾಗಿ ನಿಮ್ಮ ಸರಕಾರ ಇರುವುದಿಲ್ಲ'' ಹೀಗೆಂದು ಮಧ್ಯ ಪ್ರದೇಶದ ಕಮಲ್ ನಾಥ್ ಸರಕಾರಕ್ಕೆ ರಾಜ್ಯದ ವಿಪಕ್ಷ ಬಿಜೆಪಿ ನಾಯಕ ಗೋಪಾಲ್ ಭಾರ್ಗವ ವಿಧಾನಸಭೆಯಲ್ಲಿಯೇ ಎಚ್ಚರಿಕೆ ನೀಡಿದ್ದಾರೆ.

ಕರ್ನಾಟಕದಲ್ಲಿ ಕಾಂಗ್ರೆಸ್-ಜೆಡಿಎಸ್ ಸಮ್ಮಿಶ್ರ ಸರಕಾರ ಪತನಗೊಂಡ ಮರುದಿನವೇ ಅವರಿಂದ ಈ ಹೇಳಿಕೆ ಬಂದಿದೆ.

ಅವರ ಈ ಹೇಳಿಕೆಗೆ ತಕ್ಷಣ ಪ್ರತಿಕ್ರಿಯಿಸಿದ ಕಮಲ್ ನಾಥ್ ತಾವು ತಮ್ಮ ಬಹುಮತ ಸಾಬಿತು ಪಡಿಸಲು ವಿಶ್ವಾಸಮತ ನಿರ್ಣಯಕ್ಕೆ ಸಿದ್ಧರಿರುವುದಾಗಿ ತಿಳಿಸಿದರು. ''ನಿಮ್ಮ ನಂ. 1 ಹಾಗೂ ನಂ 2 ಸ್ಮಾರ್ಟ್ ಆಗಿಲ್ಲ'' ಎಂದು ಹೇಳುವ ಮೂಲಕ  ಮುಖ್ಯಮಂತ್ರಿ ಬಿಜೆಪಿಯನ್ನು ವ್ಯಂಗ್ಯವಾಡಿದರಲ್ಲದೆ ತಮ್ಮ ಸರಕಾರವನ್ನು ಅಸ್ಥಿರಗೊಳಿಸಲು ಸಾಧ್ಯವಿಲ್ಲವೆಂದು ಅರಿತು ಈ ನಿಟ್ಟಿನಲ್ಲಿ ಪ್ರಯತ್ನಗಳು ನಡೆದಿಲ್ಲ ಎಂಬುದನ್ನು ಸೂಚ್ಯವಾಗಿ ತಿಳಿಸಿದರು.

ಅತ್ತ ಮಾಜಿ ಸಿಎಂ ಶಿವರಾಜ್ ಸಿಂಗ್ ಚೌಹಾಣ್ ಪ್ರತಿಕ್ರಿಯಿಸುತ್ತಾ ರಾಜ್ಯ ಸರಕಾರವನ್ನು ಅಸ್ಥಿರಗೊಳಿಸುವ ಪ್ರಯತ್ನ ನಡೆಯುವುದಿಲ್ಲ ಎಂದರೂ  ಸರಕಾರ ಹೆಚ್ಚು ಸಮಯ ಬಾಳದು ಎಂಬ ಸುಳಿವು ನೀಡಿದ್ದಾರೆ. ಒಟ್ಟು 230 ಸದಸ್ಯರ ಸದನದಲ್ಲಿ ಕಾಂಗ್ರೆಸ್ ಬಳಿ 114 ಶಾಸಕರಿದ್ದಾರೆ. ಇಬ್ಬರು ಬಿಎಸ್‍ಪಿ, ಒಬ್ಬರು ಎಸ್‍ಪಿ ಹಾಗೂ ನಾಲ್ಕು ಮಂದಿ ಪಕ್ಷೇತರ ಶಾಸಕರೂ ಕಾಂಗ್ರೆಸ್ ಸರಕಾರವನ್ನು ಬೆಂಬಲಿಸುತ್ತಿದ್ದಾರೆ. ಬಿಜೆಪಿ ಬಳಿ ರಾಜ್ಯದಲ್ಲಿ ಒಟ್ಟು 109 ಶಾಸಕರಿದ್ದಾರೆ. ಅವರಲ್ಲೊಬ್ಬರು ಜಭುವ ಲೋಕಸಭಾ ಕ್ಷೇತ್ರದಿಂದ ಸ್ಪರ್ಧಿಸಿ ಗೆದ್ದಿದ್ದಾರೆ.