ಮೊಣಕಾಲಿನವರೆಗೆ ನೆರೆ ನೀರಿದ್ದರೂ ಟ್ರಾಫಿಕ್ ನಿರ್ವಹಿಸಿದ ಪೊಲೀಸ್
ಇವರ ಕರ್ತವ್ಯ ಪಾಲನೆಗೆ ಹ್ಯಾಟ್ಸಾಫ್ ಎಂದ ನೆಟ್ಟಿಗರು..
ಹೈದರಾಬಾದ್, ಸೆ. 30: ಮೊಣಕಾಲಿನವರೆಗೆ ನೀರಿದ್ದರೂ ತನ್ನ ಕರ್ತವ್ಯವನ್ನು ಶ್ರದ್ಧೆಯಿಂದ ನಿರ್ವಹಿಸುತ್ತಿರುವ ಹೈದರಾಬಾದ್ ಟ್ರಾಫಿಕ್ ಪೊಲೀಸ್ ಒಬ್ಬರ ವೀಡಿಯೋ ನೆಟ್ಟಿಗರ ಹೃದಯ ಗೆದ್ದಿದ್ದು ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದೆ.
ವೀಡಿಯೋದಲ್ಲಿ ಒಂದು ಕೈಯ್ಯಲ್ಲಿ ಕೊಡೆಯನ್ನು ಹಿಡಿದ ಪೊಲೀಸ್ ಇನ್ನೊಂದು ಕೈಯ್ಯಿಂದ ವಾಹನಗಳಿಗೆ ಸೂಕ್ತ ನಿರ್ದೇಶನ ನೀಡುತ್ತಿರುವುದು ಕಾಣಿಸುತ್ತಿದೆ. ಮೊಣಕಾಲಿನ ತನಕ ನೀರು ಹರಿಯುತ್ತಿದ್ದರೂ ಆತ ಅದನ್ನು ಲೆಕ್ಕಿಸದೆ ತನ್ನ ಕರ್ತವ್ಯ ನಿರ್ವಹಿಸುತ್ತಿರುವುದು ಎಲ್ಲರ ಮನಸ್ಸನ್ನು ನಾಟುವಂತಿದೆ. ಈ ವೀಡಿಯೋವನ್ನು ಶುಕ್ರವಾರ ತೆಗೆಯಲಾಗಿದೆ ಎಂದು ತಿಳಿದಿದ್ದರೂ ಎಲ್ಲಿ ತೆಗೆಯಲಾಗಿದೆ ಎಂದು ತಿಳಿದು ಬಂದಿಲ್ಲ.
ಕಾರು ಚಾಲಕರೊಬ್ಬರು ಈ ಪೊಲೀಸ್ ಸಿಬ್ಬಂದಿಯ ಕರ್ತವ್ಯಪರತೆಯನ್ನು ಮೆಚ್ಚಿ ವೀಡಿಯೋ ತೆಗೆದು ಅದನ್ನು ಟ್ವಿಟ್ಟರ್ ನಲ್ಲಿ ಅಪ್ಲೋಡ್ ಮಾಡಿದ್ದಾರೆ. ಹೈದರಾಬಾದ್ ನಗರ ಪೊಲೀಸರು ಈ ಪೋಸ್ಟ್ ನೋಡಿ ಸಂತಸ ಪಟ್ಟಿದ್ದಾರೆ. ವೀಡಿಯೋ ಅಪ್ಲೋಡ್ ಮಾಡಿದ ಚಾಲಕ ಆ ಪೇದೆಯ ಮಾಹಿತಿಗಳನ್ನು ಕೇಳಿದ್ದು ಆತನಿಗೆ ಅಥವಾ ಆತನ ಮಕ್ಕಳಿಗೆ ಏನಾದರೂ ಉಡುಗೊರೆ ಕೊಡಬಯಸಿದ್ದಾಗಿ ತಿಳಿಸಿದ್ದಾರೆ.
ಶುಕ್ರವಾರ ಹೈದರಾಬಾದ್ ನಗರದಲ್ಲಿ ಭಾರೀ ಮಳೆಯಾಗಿದೆ. ಮಾಧಪುರದಲ್ಲಿ ಗರಿಷ್ಠ 8 ಸೆಂ.ಮೀನಷ್ಟು ಮಳೆ ದಾಖಲಾಗಿದೆ.
@hydcitypolice this is incredible job guidng us to safety in #rains #hydpolice @KTRTRS @HYDTP salute!!! pic.twitter.com/HHUF8x2GHR
— kaali Sudheer (@kaalisudheers) September 29, 2017