ನೆನಪ ಹಿಡಿದು ಹೋದವರು | Vartha Bharati- ವಾರ್ತಾ ಭಾರತಿ

---

ನೆನಪ ಹಿಡಿದು ಹೋದವರು

ಬೆಳಗಾವಿಯ ಸಿಂದೊಳ್ಳಿ ಗ್ರಾಮದಿಂದ ಹೊರಟ ಈ ಜೀವ ಶಿಕ್ಷಣಕ್ಕಾಗಿ ಅಲೆಯುತ್ತ, ಪದವಿ ಗಳಿಸಿ ಮುಂದೆ ಸಮಾಜ ಶಿಕ್ಷಣಾಧಿಕಾರಿಯಾಗಿ ಹಳ್ಳಿ ಹಳ್ಳಿಗಳನ್ನು ಸುತ್ತಿ, ವಾರ್ತಾ ಇಲಾಖಾ ಅಧಿಕಾರಿಯಾಗಿ, ಗುಜರಾತನ್ನು ಸೇರಿ ಮುಂದೆ ಮುಂಬೈ ಆಕಾಶವಾಣಿಗೆ ಅಧಿಕಾರಿಯಾಗಿ ಬಂದುದು ಒಂದು ರೋಚಕ ಇತಿಹಾಸ. ಮುಂದಿನ ಮೂರು ದಶಕಗಳ ಮುಂಬೈ ಬದುಕು, ಜನಸ್ನೇಹ, ಇಲ್ಲಿಯ ಕಡಲಿನ ಗುಣದಂತೆ ಎಲ್ಲರನ್ನೂ, ಎಲ್ಲವನ್ನೂ ಬೆೇಧವಿಲ್ಲದೆ ಹೊದ್ದುಕೊಳ್ಳುವ ಜನಸಮುದಾಯ ಪ್ರೀತಿ ಸನದಿಯವರು ಮುಂಬೈ ಬಗೆಗೆ ತಾಳಿಕೊಂಡಿದ್ದ ನಕಾರಾತ್ಮಕತೆಯನ್ನು ತೊಡೆದು ಹಾಕಿತು. ಆದ್ದರಿಂದಲೇ ನಮಗೆ ಸನದಿಯವರು ಮುಂಬೈ ಕನ್ನಡಿಗರು. ಅವರ ಅಗಲಿಕೆ ನಮಗೆ ತಂದ ನೋವನ್ನು ಬಿಡಿಸಿ ಹೇಳಲು ಶಬ್ದಗಳು ಸಾಲವು.

ದಿನಾಂಕ 29-3-2019 ಶುಕ್ರವಾರದಂದು ನಾನು ಕುಮಟಾದ ಹೆರವಾಟ್ಟಾದಲ್ಲಿರುವ ಬಿ.ಎ.ಸನದಿಯವರಿಗೆ ಎಂದಿನಂತೆ ‘ಫೋನ್’ ಮಾಡಿದೆ. ಅವರು ಮುಂಬೈ ಬಿಟ್ಟು ಕುಮಟಾದಲ್ಲಿ ನೆಲೆ ನಿಂತ ಮೇಲೆ ನಾನು ನೆನಪಾದಾಗಲೆಲ್ಲ ಹೀಗೆ ದೂರವಾಣಿ ಎತ್ತಿಕೊಳ್ಳುವುದಿತ್ತು. ನನ್ನೊಂದು ಕನ್ನಡ ಪುಸ್ತಕ ಪ್ರಕಟವಾಯಿತೆಂದರೆ ಕೂಡಲೆ ಅವರಿಗೆ ಕಳುಹಿಸಿಕೊಟ್ಟು ಅಭಿಪ್ರಾಯ ಪಡೆಯುವುದಿತ್ತು. ಅವರು ಓದಿಕೊಂಡು ಮರು ಟಪಾಲಿಗೆ ಒಂದು ಅಂಚೆಕಾರ್ಡನ್ನು ಹಾಕಿದರೆಂದರೆ, ನನಗೆ ಅದೇ ಸಮಾಧಾನ. ಈ ಬಾರಿಯ ದೂರವಾಣಿ ಕರೆಯನ್ನು ಎತ್ತಿಕೊಂಡ ಅವರ ಪತ್ನಿ ನಯನಾ ಸನದಿಯವರು ‘ಅವರಿಗೆ ವಿಪರೀತ ಜ್ವರ, ಮಲಗಿದಲ್ಲೇ ಇದ್ದಾರೆ; ತಾಳಿ, ಅವರಿಗೆ ಕೊಡುತ್ತೇನೆ ಎಂದರು. ‘ತುಂಬ ಜ್ವರ ಕಾಣಿಸಿಕೊಂಡಿದೆ, ಸ್ವರ ಕಟ್ಟಿದೆ’ ಎಂದು ನಡುಗುವ ಧ್ವನಿಯಲ್ಲಿ ಅವರು ನುಡಿದಾಗ ನಾನು ‘ನೀವು ಮುಂಬೈ ಬಿಟ್ಟು ಹೋದುದೇಕೆ?’ ಎಂದು ಸ್ವಲ್ಪ ಏರು ಧ್ವನಿಯಲ್ಲೆ ಪ್ರಶ್ನಿಸಿದೆ. ಒಂದು ಸಣ್ಣ ನಗು ನನಗೆ ಕೇಳಿಸಿತು. ಅದೇ ದಿ.31ರಂದು ಸನದಿಯವರು ಇಹಲೋಕ ತ್ಯಜಿಸಿದ ವಾರ್ತೆ ನನ್ನ ಕಿವಿಗೆ ತಲುಪಿತೋ ಇಲ್ಲವೋ, ನಾನು ಪಶ್ಚಾತ್ತಾಪದಿಂದ ಕುಗ್ಗಿ ಹೋದೆ. ಕೊನೆಯ ಗಳಿಗೆಯಲ್ಲಿ ನಾನೇಕೆ ಇಂಥ ಪ್ರಶ್ನೆ ಮಾಡಿದೆ, ಎಂಬ ಕೊರಗು ಈಗಲೂ ನನ್ನನ್ನು ಬಾಧಿಸುತ್ತಿದೆ.

ಮೂರು ದಶಕಗಳಿಗೂ ಮಿಕ್ಕಿ ಮುಂಬೈ ಕನ್ನಡಿಗರ ಬಂಧುತ್ವದ ನಂಟನ್ನು ಬೆಸೆದುಕೊಂಡ ಸನದಿಯವರು ನಿವೃತ್ತಿಯ ನಂತರ ಇಲ್ಲಿಯ ಹವಾಮಾಲಿನ್ಯ ಧಾವಂತದ ಬದುಕು, ಒತ್ತಡಗಳನ್ನು ಎದುರಿಸಲಾರದೆ, ಪ್ರಶಾಂತ ಪರಿಸರದ ಕುಮಟಾ ಊರಿನ ಕಡಲ ತೀರದಲ್ಲಿ ವಾಸಿಸತೊಡಗಿದರೂ ಮುಂಬೈ ಸೆಳೆತ ಅವರನ್ನು ಬಿಡಲೇ ಇಲ್ಲ. ಮುಂಬೈಯನ್ನು ಸಹಜವಾಗಿ ‘ಭಾರತದ ಹೆಬ್ಬಾಗಿಲು’ ಎನ್ನುವುದುಂಟು. ಅರಬೀ ಸಮುದ್ರ ದಂಡೆ "gateway of india"  ಇದಕ್ಕೆ ಸಾಕ್ಷಿಯಾಗಿ ನಿಂತಿದೆ. ಆದರೆ ಸನದಿಯವರ ಪಾಲಿಗೆ ಇದು "gateway of the world" ವಿಶ್ವದ ಹೆಬ್ಬಾಗಿಲು. ಈ ಮಾತು ಸತ್ಯ. ‘ಮುಂಬೈಯ ಯಾಂತ್ರಿಕ ಜೀವನದಲ್ಲಿಯೂ ಜನ, ಸಾಂಸ್ಕೃತಿಕ ಸ್ವಾತಂತ್ರವನ್ನು ಉಳಿಸಿಕೊಂಡಿದ್ದಾರೆ’ ಎಂದಿರುವ ಸನದಿಯವರು ಮುಂಬೈಯನ್ನು ‘ಬದುಕಿನ ದಾರಿ ತೋರುವ ಅಯಸ್ಕಾಂತ’ಎಂದಿರುವುದು ಅತಿಶಯೋಕ್ತಿಯಲ್ಲ.

 ಕವಿವರ್ಯ ಬೇಂದ್ರೆ ಯವರು ‘ಸಹಭಾವ, ಸಖ್ಯಭಾವ, ಸಹ್ಯಭಾವ’ ಇವು ಮೂರು ಬದುಕಿನ ಮೇರು ತತ್ವಗಳೆಂದು ಹೇಳಿರುವುದನ್ನು ಸನದಿ ಯವರು ಪಾಲಿಸಿಕೊಂಡೇ ಬಂದರು.ಅದರ ಜೊತೆಯಲ್ಲಿ ಅವರು ‘ಬದುಕು ಸಹ್ಯವಾಗಬೇಕು, ಸಾರ್ಥಕವಾಗಬೇಕು’ ಎಂದರು. ರಾಷ್ಟ್ರಪ್ರೇಮದಲ್ಲಿ ಹಿಂದೂ ಮುಸ್ಲಿಂ ಗೆರೆಗಳ ಕೊರೆಯುವ ನಾಯಕರೇ ಯಾವ ದೇಶದಲಿ ಮೈದಾಳಿದ್ದು ನಿಮ್ಮ ಜೀವಕೋಶ? ಎಂಬ ಸವಾಲನ್ನೂ ಒಡ್ಡಿದರು. ಓರ್ವ ಸೃಜನಶೀಲ ಲೇಖಕನಾಗಿ, ಚಿಂತಕನಾಗಿ, ಸಮೃದ್ಧ ಅನುಭವಿಯಾಗಿ, ‘ಮನೆ ಮನೆಗೆ ಬೇಲಿ’ ಹಾಕಿಕೊಳ್ಳುವವರ ವೌಢ್ಯವನ್ನು ಪ್ರಶ್ನಿಸುವ ಎದೆಗಾರಿಕೆಯನ್ನು ತೋರಿದರು.ಆದ್ದರಿಂದಲೇ ಕನ್ನಡದ ಶ್ರೇಷ್ಠ ಬರಹಗಾರ, ವಿಮರ್ಶಕ ಗೌರೀಶ್ ಕಾಯ್ಕಿಣಿಯವರು ಸನದಿಯವರನ್ನು ‘ಮಾನವ್ಯ ಕವಿ’ ಎಂದು ಗುರುತಿಸಿದ್ದು, ಪಾಟೀಲ ಪುಟ್ಟಪ್ಪನವರು ತನ್ನ ಪ್ರಪಂಚದಲ್ಲಿ ಸನದಿಯವರು ‘ಒಳ್ಳೆಯ ಮುಸ್ಲಿಂ, ಒಳ್ಳೆಯ ಕನ್ನಡಿಗ, ಒಳ್ಳೆಯ ಭಾರತೀಯ’ನೆಂದು ದಾಖಲಿಸಿದ್ದು ಕೇವಲ ಹೊಗಳಿಕೆಯ ಮಾತುಗಳಲ್ಲ. ಡಾ.ಜಿ.ಎನ್.ಉಪಾಧ್ಯರ ‘ಕನ್ನಡ ಮನಸ್ಸುಗಳೊಂದಿಗೆ’ ಕೃತಿಗೆ ಬರೆದ ತನ್ನ ಮುನ್ನುಡಿಯಲ್ಲಿ ‘ಕನ್ನಡಕ್ಕಾಗಿ ದುಡಿದವರು, ಮಡಿದವರು, ದುಡಿದುಡಿದು ಹಣ್ಣಾದವರು,ಸಣ್ಣಾದವರು’ ಎಂಬೊಂದು ಮಹತ್ವದ ವ್ಯಾಖ್ಯಾನವನ್ನು ಮುಂಬೈ ಕನ್ನಡಿಗರ ಬಗೆಗೆ ಅವರು ನೀಡಿದ್ದಾರೆ.ಎಷ್ಟೇ ದುಡಿದರೂ ಕೆಲವರಷ್ಟೇ ಹೊಗಳಿಕೆಗೆ ಪಾತ್ರರಾಗಿ, ಇನ್ನುಳಿದವರು ಸಣ್ಣಾಗಿ ಆಲಕ್ಷಕ್ಕೆ ತುತ್ತಾಗುವುದನ್ನು ಅವರು ವಿಷಾದದಿಂದಲೇ ಹೇಳಿಕೊಂಡಿದ್ದಾರೆ. ಪ್ರಭಾವೀ ವಲಯವನ್ನು ನಿರ್ಮಿಸಿಕೊಂಡು ತಮ್ಮನ್ನಷ್ಟೇ ಬೆಳಕಿಗೆ ಒಡ್ಡಿಕೊಂಡು, ಉಳಿದವರನ್ನು ಕತ್ತಲೆಗೆ ನೂಕಿ ಬಿಡುವ ಹುನ್ನಾರಗಳು ಅವರಿಗೆ ಸಹ್ಯವಾಗುತ್ತಿದ್ದಿಲ್ಲ.

 ನಮ್ಮ ಸಾಹಿತ್ಯ ಸಮ್ಮೇಳನಗಳ ಉದ್ದೇಶ, ವಿವಾದಗಳನ್ನು ಹುಟ್ಟಿಸುವುದಲ್ಲ. ‘ಕನ್ನಡತ್ವ’ ವೆಂದರೆ. ಅದೊಂದು ‘ಜಂಗಮ ಸ್ವರೂಪಿ ಸಾಂಸ್ಕೃತಿಕ ಚೇತನ’ ಎಂಬುದಾಗಿ ಅರವತ್ತಾರನೆಯ ಅ.ಭಾ.ಕನ್ನಡ ಸಾಹಿತ್ಯ ಸಮ್ಮೇಳನದ ಸ್ಮರಣ ಸಂಚಿಕೆ ‘ಪೊನ್ನಕಂಠಿ’ಯಲ್ಲಿ ಅವರು ನಮೂದಿಸಿದ್ದಾರೆ.

 ‘ನೀ ಮೆಟ್ಟುವ ನೆಲ ಕರ್ನಾಟಕ’ ಎಂಬ ಕವಿಯ ಹೇಳಿಕೆಗೆ ಮತ್ತೆ ಸೊಗಸಾದ ವಿವರಣೆಯೊಂದನ್ನು ನೀಡಿದ ಸನದಿಯವರು, ತಾನು ವಾಸಿಸುವ ಪರಕೀಯ ನೆಲದ ಬಿಸಿ ಅಪ್ಪುಗೆಯಲ್ಲಿ ಕೆಲವೊಮ್ಮೆ ಹುಟ್ಟಿದ ನೆಲದ ಮಮತೆಯನ್ನೇ ಮರೆಯುತ್ತಿರುವ ಕೃತಘ್ನತೆಯನ್ನೂ ಖಂಡಿಸಿದ್ದಾರೆ. ಕರ್ನಾಟಕದಿಂದ ಹೊರಗೆ ವಾಸಿಸುವ ಕನ್ನಡಿಗರ ಅಸ್ತಿತ್ವಕ್ಕೆ ಕೆಲವೊಮ್ಮೆ ಛಾಟಿ ಬೀಸುವ ಸಂದರ್ಭಗಳು ಒದಗಿ ಬರುವುದುಂಟು. ಅದಕ್ಕಾಗಿ ಸನದಿಯವರು ಬರೆದರು.

 ಉತ್ತರ ಪ್ರದೇಶ ಅಥವಾ ಬಂಗಾಳದ ನಾಗರಿಕರು ತಮ್ಮ ರಾಜ್ಯಗಳಲ್ಲಿ ತಮ್ಮ ಪಾಡಿಗಿರುವ ಕನ್ನಡಿಗರ ಉಸಿರಾಟವನ್ನು ತಡೆಹಿಡಿಯಲು ಯತ್ನಿಸುವುದಿಲ್ಲ. ಎಂದರೆ ಒಂದೇ ದೇಶದಲ್ಲಿದ್ದು ಕೇವಲ ಭಾಷೆಯ ನಿಮಿತ್ತದಿಂದ ಮಾನವತೆಗೆ ಧಕ್ಕೆ ತರುವ ‘ಗೂಂಡಾಗಿರಿ’ ಅವರಿಗೆ ಸಹನೆಯಾಗುತ್ತಿದ್ದಿಲ್ಲ ಎಂಬುದೇ ಈ ಮಾತಿನ ಭಾವ. ‘ಹುಟ್ಟಿದ ಮನೆಯಲಿ ಕಟ್ಟುವದೇತಕೆ’ ‘ಅಡಿಗಡಿಗೂ ಗೋಡೆ’ ಇದು ಅವರ ಪ್ರಶ್ನೆ. ಯಶವಂತ ಚಿತ್ತಾಲರು ‘ಮನುಷ್ಯನು ತನ್ನ ಬದುಕಿನ ನಕಾಶೆಯಲ್ಲಿ ಮೂಡಿಸಿಕೊಳ್ಳಲೇಬೇಕಾದ ಅತ್ಯಂತ ವೌಲಿಕ ಸಂಗತಿಗಳಲ್ಲಿ ಕೆಲವು ಸಂಗತಿಗಳು ಸಾಹಿತ್ಯದಿಂದ ಮಾತ್ರ ಒದಗಬಲ್ಲಂಥವುಗಳು’ ಎಂದಿದ್ದಾರೆ. ಸನದಿಯವರ ಸಾಹಿತ್ಯ ವೌಲ್ಯಕ್ಕೆ ಈ ಗಣನೆ ಉಂಟು.

 ಬೆಳಗಾವಿಯ ಸಿಂದೊಳ್ಳಿ ಗ್ರಾಮದಿಂದ ಹೊರಟ ಈ ಜೀವ ಶಿಕ್ಷಣಕ್ಕಾಗಿ ಅಲೆಯುತ್ತ, ಪದವಿ ಗಳಿಸಿ ಮುಂದೆ ಸಮಾಜ ಶಿಕ್ಷಣಾಧಿಕಾರಿಯಾಗಿ ಹಳ್ಳಿ ಹಳ್ಳಿಗಳನ್ನು ಸುತ್ತಿ, ವಾರ್ತಾ ಇಲಾಖಾ ಅಧಿಕಾರಿಯಾಗಿ, ಗುಜರಾತನ್ನು ಸೇರಿ ಮುಂದೆ ಮುಂಬೈ ಆಕಾಶವಾಣಿಗೆ ಅಧಿಕಾರಿಯಾಗಿ ಬಂದುದು ಒಂದು ರೋಚಕ ಇತಿಹಾಸ. ಮುಂಬೈಗೆ ವರ್ಗವಾಗುವುದು ಅವರಿಗೆ ಇಷ್ಟದ ಸಂಗತಿಯಾಗಿರಲಿಲ್ಲ. ‘ಬದಲಿ’ವ್ಯವಸ್ಥೆಯೆಂದು ಒಪ್ಪಿಕೊಂಡರಂತೆ. ಆದರೆ ಮುಂದಿನ ಮೂರು ದಶಕಗಳ ಮುಂಬೈ ಬದುಕು, ಜನಸ್ನೇಹ, ಇಲ್ಲಿಯ ಕಡಲಿನ ಗುಣದಂತೆ ಎಲ್ಲರನ್ನೂ, ಎಲ್ಲವನ್ನೂ ಭೇದವಿಲ್ಲದೆ ಹೊದ್ದುಕೊಳ್ಳುವ ಜನಸಮುದಾಯ ಪ್ರೀತಿ ಸನದಿಯವರು ಮುಂಬೈ ಬಗೆಗೆ ತಾಳಿಕೊಂಡಿದ್ದ ನಕಾರಾತ್ಮಕತೆಯನ್ನು ತೊಡೆದು ಹಾಕಿತು.ಆದ್ದರಿಂದಲೇ ನಮಗೆ ಸನದಿಯವರು ಮುಂಬೈ ಕನ್ನಡಿಗರು, ಅವರ ಅಗಲಿಕೆ ನಮಗೆ ತಂದ ನೋವನ್ನು ಬಿಡಿಸಿ ಹೇಳಲು ಶಬ್ದಗಳು ಸಾಲವು.

ಮುಂಬೈ ಕರ್ನಾಟಕ ಸಂಘದ ಅವರ ನಂಟು ದೀರ್ಘಕಾಲದ್ದು ಅಲ್ಲಿಯ ಸಾಹಿತ್ಯ-ಸಾಂಸ್ಕೃತಿಕ ಚಟುವಟಿಕೆಗಳಿಗೆ ಹೊಸ ರೂಪುಕೊಟ್ಟವರೂ ಅವರೇ. 1994ರಲ್ಲಿ ಕರ್ನಾಟಕ ಸಂಘವು ‘ವಜ್ರ ಮಹೋತ್ಸವ’ ಆಚರಿಸಿದಾಗ ಮಂಬಯಿ ಕವಿಗಳ ‘ಅರುವತ್ತು ಕವಿತೆಗಳು’ ಪ್ರಕಟಗೊಂಡವು. ಇದಕ್ಕೆ ನೀಡಿದ ಪ್ರಸ್ತಾವನೆಯಲ್ಲಿ ಸನದಿಯವರು ‘ಇಲ್ಲಿಯ ಕವಿತೆಗಳು’ ಸಾಹಿತ್ಯಿಕ ಮಹತ್ವಕ್ಕಿಂತ ಸಂಘಟನಾತ್ಮಕ ಔಚಿತ್ಯ ಉಳ್ಳದ್ದಾಗಿವೆ ಎಂದು ಬರೆದರು. ಒಂದು ಸಂಸ್ಥೆಗೆ ಸಂಘಟನೆಯೇ ಬಲವಲ್ಲವೇ? ‘ಕರ್ನಾಟಕ ಸಂಘ’ವು ಸನದಿಯವರ ಬದುಕು -ಬರಹ ಗ್ರಂಥವನ್ನು ಪ್ರಕಟಿಸಿ ಅವರಿಗೆ ಗೌರವ ಸಲ್ಲಿಸಿದೆ.

 ‘ನನ್ನ ನಡೆದ ಹಾದಿಯ ಹೂಗಳು ’ಗ್ರಂಥಕ್ಕೆ ಸನದಿಯವರು ‘ಕವಿಯ ಒಳಗಣ್ಣು’ ಎಂಬೊಂದು ಲೇಖನ ನೀಡಿದ್ದರು. ಅದರಲ್ಲಿ -

 ‘ಕವಿಯ ಒಳಗಣ್ಣು ತುಂಬ ಸೂಕ್ಷ್ಮದರ್ಶಿ ಲೋಕದ ಗೂಢ ಗಹನ ರಹಸ್ಯ ಸ್ಪರ್ಶಿ’

 ಎಂದು ಬರೆದ ಈ ಸಾಲುಗಳು ನನ್ನನ್ನು ತಟ್ಟುತ್ತಲೇ ಇವೆ.

 ಈಗ ಸನದಿಯವರು ನಮ್ಮ ನಡುವೆ ಇಲ್ಲ. ಕಾಣದ ಲೋಕ ಕೈ ಬೀಸಿ ಕರೆದಾಗ ತಟ್ಟನೆ ಎದ್ದು ಹೋದರು .ಆದರೆ ‘ನಿಂತಲ್ಲೇ ದೀಪಸ್ತಂಭವಾಗು’ ಎಂಬ ಅವರ ಮಾತಿನ ಮಾರ್ದವತೆ ನೂರು ಕಾಲ ಬಾಳುವುದು. ಈ ಸಂದರ್ಭದಲ್ಲಿ ರಾಷ್ಟ್ರಕವಿ ‘ಕುವೆಂಪು’ ಮಾತುಗಳನ್ನು ನೆನಪಿಸಿಕೊಳ್ಳುತ್ತೇನೆ. ‘ಕವಿಯ ಮನ ನಂದನ ವನ, ಆನಂದದ ರಸ ನಿಕೇತನ, ಅಲ್ಲಿ ಪಾಪವೂ ಪುಣ್ಯದ ವಾಹನ, ಅಲ್ಲಿ ದುಃಖವೂ ಸುಖದ ಜವಾನ ಅಲ್ಲಿ ಸಾವೂ ಅಮೃತಯಾನ’.

 

‘ವಾರ್ತಾ ಭಾರತಿ’ ನಿಮಗೆ ಆಪ್ತವೇ ? ಇದರ ಸುದ್ದಿಗಳು ಮತ್ತು ವಿಚಾರಗಳು ಎಲ್ಲರಿಗೆ ಉಚಿತವಾಗಿ ತಲುಪುತ್ತಿರಬೇಕೇ? 

ಬೆಂಬಲಿಸಲು ಇಲ್ಲಿ  ಕ್ಲಿಕ್ ಮಾಡಿ

The views expressed in comments published on www.varthabharati.in are those of the comment writers alone. They do not represent the views or opinions of varthabharati.in or its staff, nor do they represent the views or opinions of  Vartha Bharati Group, or any entity of, or affiliated with, Vartha Bharati Group. varthabharati.in reserves the right to take any or all comments down at any time.
 

Refrain from posting comments that are obscene, defamatory or inflammatory, and do not indulge in personal attacks, name calling or inciting hatred against any community. It is obligatory on www.varthabharati.in to provide the IP address and other details of senders of such comments, to the authority concerned upon request. 

Help us delete comments that do not follow these guidelines by informing us (vbwebdesk@gmail.com). Let's work together to keep the conversation civil. 

www.varthabharati.in ನ ಕಮೆಂಟ್ ವಿಭಾಗದಲ್ಲಿ ಪ್ರಕಟವಾಗುವ ಅಭಿಪ್ರಾಯಗಳು ಆ ಕಮೆಂಟ್ ಬರೆದವರ ವೈಯಕ್ತಿಕ ಅಭಿಪ್ರಾಯ ಮಾತ್ರ. ಅವು  www.varthabharati.in ನ ಅಥವಾ ಅದರ ಸಿಬ್ಬಂದಿಯ, ಅಥವಾ 'ವಾರ್ತಾ ಭಾರತಿ' ಬಳಗಕ್ಕೆ ಸೇರಿದ ಯಾರದ್ದೇ ಅಭಿಪ್ರಾಯಗಳಲ್ಲ. ಈ ಕಮೆಂಟ್ ಗಳನ್ನು ಯಾವುದೇ ಸಂದರ್ಭದಲ್ಲಿ ತೆಗೆದುಹಾಕುವ ಹಕ್ಕನ್ನು  ' ವಾರ್ತಾ ಭಾರತಿ' ಕಾದಿರಿಸಿದೆ. 

ಅಶ್ಲೀಲ, ಮಾನಹಾನಿಕರ ಅಥವಾ ಪ್ರಚೋದನಕಾರಿ ಕಮೆಂಟ್ ಗಳನ್ನು ಹಾಗು ಯಾವುದೇ ವ್ಯಕ್ತಿ, ಸಂಸ್ಥೆ , ಸಮುದಾಯಗಳ ವಿರುದ್ಧ ಹಿಂಸೆ ಪ್ರಚೋದಿಸುವಂತಹ ಕಮೆಂಟ್ ಗಳನ್ನು ಹಾಕಬೇಡಿ. ಅಂತಹ ಕಮೆಂಟ್ ಹಾಕಿದವರ ಐಪಿ ಅಡ್ರೆಸ್ ಹಾಗು ಇತರ ವಿವರಗಳನ್ನು ಸಂಬಂಧಪಟ್ಟ ಅಧಿಕಾರಿಗಳು ಕೇಳಿದಾಗ  ನೀಡುವುದು 'ವಾರ್ತಾ ಭಾರತಿ' ಗೆ ಕಡ್ದಾ ಯವಾಗಿರುತ್ತದೆ.  ಆ ರೀತಿಯ ಯಾವುದೇ ಕಮೆಂಟ್ ಗಳು ಕಂಡು ಬಂದಲ್ಲಿ ಕೂಡಲೇ ನಮಗೆ ತಿಳಿಸಿ (vbwebdesk@gmail.com) ಅದನ್ನು ತೆಗೆದು ಹಾಕಲು ನೇರವಾಗಿ. ಆರೋಗ್ಯಕರ ಚರ್ಚೆಗೆ ಸಹಕರಿಸಿ.

Back to Top