ಮಧ್ಯವಯಸ್ಕರು ವೃದ್ಧರೇ? | Vartha Bharati- ವಾರ್ತಾ ಭಾರತಿ

---

ನವಿರು ಸಾಲು

ಮಧ್ಯವಯಸ್ಕರು ವೃದ್ಧರೇ?

        ಶಾಂತಲಾ ರಾವ್, ಬೋಳಾರ

ಟಿ.ವಿ.ಯಲ್ಲಿ ಜಾಹೀರಾತು ಪ್ರಸಾರವಾಗುತ್ತಿತ್ತು. ಹೆಣ್ಣೊಬ್ಬಳು ಕನ್ನಡಿ ಮುಂದೆ ನಿಂತು ತನ್ನ ಅಲ್ಲಲ್ಲಿ ಇಣುಕುತ್ತಿರುವ ಬೆಳ್ಳಿಕೂದಲುಗಳು, ಕೆನ್ನೆ ಮೇಲಿನ ನೆರಿಗೆಗಳು,ಕಣ್ಣ ಸುತ್ತಮುತ್ತ ಕಪ್ಪುವರ್ತುಲಗಳೆಂಬ ಅತ್ಯಂತ ಭೀಕರ ದೃಶ್ಯಗಳನ್ನು ನೋಡಿ ಬೆಚ್ಚಿಬೀಳುತ್ತಾಳೆ. ಆಕಾಶವೇ ತಲೆ ಮೇಲೆ ಬಿದ್ದಂತೆ ಚಿಂತಾಕ್ರಾಂತಳಾಗಿ ಮ್ಲಾನವದನಳಾಗುತ್ತಾಳೆ!! ಅಲ್ಲಾ, ಕನ್ನಡಿ ಹಾಗೂ ಹೆಣ್ಣು, ಇದು ಅವಿನಾಭಾವ ಸಂಬಂಧವೆಂದು ಎಲ್ಲರ ಅಭಿಪ್ರಾಯವಾಗಲು ಕಾರಣವೇನು? ನನಗಂತೂ ಯೌವನ ಹಾಗೂ ಕನ್ನಡಿ ಇವೆರಡಕ್ಕಾದರೆ ಅವಿನಾಭಾವ ಸಂಬಂಧವೆನ್ನುವುದು ಸರಿ ಅನ್ನಿಸುತ್ತದೆ. ಇರಲಿ ಬಿಡಿ, ಟಿ.ವಿ.ಯಲ್ಲಿ ಮುಂದೇನಾಯಿತೆಂದು ನೋಡೋಣ. ಅಲ್ಲಿ ಕೂಡಲೇ ಒಂದು ಕ್ರೀಮ್ ಪ್ರತ್ಯಕ್ಷ!. ಇದನ್ನು ಹಚ್ಚಿದೊಡನೇ ಆಕೆಯ ಯೌವನ ನಳನಳಿಸಿ, ಈವರೆಗೆ ಆಕೆಯನ್ನು ತಿರುಗಿಯೂ ನೋಡದಿದ್ದ ಗಂಡಸರು ಅವಳತ್ತ ಮೆಚ್ಚುಗೆಯ ದೃಷ್ಟಿಹರಿಸುತ್ತಾರೆ!! ಆಕೆಯ ಮುಖದಲ್ಲೀಗ ಜಂಭದ ನಗು! ಈ ದೃಶ್ಯವನ್ನು ಅದೆಷ್ಟು ಚೆನ್ನಾಗಿ ತೋರಿಸುತ್ತಾರೆಂದರೆ 30ರ ಆಸುಪಾಸಿನ ಮಹಿಳೆಯರೂ ಆ ಕ್ರೀಮಿನ ಹೆಸರನ್ನು ತನ್ನ ಸ್ಮತಿಪಟಲದಲ್ಲಿರಿಸಿ ಮುಂದೆ ಸೂಪರ್ ಬಝಾರಿಗೆ ಹೋದಾಗ ಆ ಕ್ರೀಮನ್ನು ಹುಡುಕಾಡಿ ತಕ್ಷಣವೇ ತನ್ನ ಟ್ರಾಲಿಯಲ್ಲಿ ಸೇರಿಸಿ ಬಿಡುವುದರಲ್ಲಿ ಸಂಶಯವೇ ಇಲ್ಲ!! ಹೆಣ್ಣಿಗೆ ಯೌವನ ಮತ್ತು ಬಿಳಿ ಚರ್ಮ ಇವೆರಡೇ ಭೂಷಣ, ಇವೆರಡು ಇಲ್ಲದ ಹೆಣ್ಣು ಯಾರಿಗೂ ಲೆಕ್ಕಕ್ಕೇ ಇಲ್ಲವೆಂದು ಜಾಹೀರಾತುಗಳು ಸಾರಿಸಾರಿ ಹೇಳಿ, ಈಗ ನಮ್ಮ ಸುತ್ತಮುತ್ತಲಿನ ಗಂಡಸರೂ ಇದೇ ಅಭಿಪ್ರಾಯ ಬೆಳೆಸಿಕೊಂಡಿದ್ದಾರೆ.

ಗೀತಾ ತನ್ನ ಪತಿಯೊಂದಿಗೆ ಸೌತ್ ಇಂಡಿಯಾ ಟೂರ್ ಹೋಗಲು ಟ್ರಾವೆಲ್ಸ್‌ನವರೊಂದಿಗೆ ಮಾತನಾಡಿ ಎಲ್ಲರೊಂದಿಗೆ ಹೋಗುವುದು ಮಜಾವಾಗಿರುತ್ತದೆಂದು ಹೊರಟಳು. ಅಪರಿಚಿತರೂ ಆತ್ಮೀಯರಾಗುತ್ತಾರೆ, ಚೆನ್ನಾಗಿ ಎಂಜಾಯ್ ಮಾಡಬಹುದೆಂದು ಹೋದರೆ... ಕೆಲವೇ ದಿನಗಳಲ್ಲಿ ನಡೆದ ಪ್ರಸಂಗವೊಂದು ಅವಳ ಮನ ಕದಡಿತು. ಇವರ ಸೀಟಿನ ಪಕ್ಕದಲ್ಲೇ ಕುಳಿತಿದ್ದ ದಂಪತಿ ಇವರಿಗೆ ಒಂದೇ ದಿನದಲ್ಲಿ ಪರಿಚಿತರಾಗಿ ಸ್ವಲ್ಪ ಸಲಿಗೆಯೂ ಬೆಳೆದಿತ್ತು. ಅವರಿಗೂ ಇವಳ ಮಗನ ಪ್ರಾಯದ್ದೇ ಮಗಳಿದ್ದಳು. ಗೀತಾ ಸುಮಾರು 48 ರ ಪ್ರಾಯದವಳಾಗಿದ್ದು ಚೆನ್ನಾಗಿ ಡ್ರೆಸ್ಸ್ ಮಾಡಿಕೊಳ್ಳುತ್ತಾಳೆ. ಎಂ.ಎ. ಇಂಗ್ಲಿಷ್ ಪದವೀಧರೆ, ಪದವಿ ಪೂರ್ವ ಕಾಲೇಜಿನಲ್ಲಿ ಇಂಗ್ಲಿಷ್ ಲೆಕ್ಚರರ್ ಆಗಿದ್ದಾಳೆ. ಏನೋ ಒಂದು ಪ್ರಸಂಗದಲ್ಲಿ ಆ ಗಂಡಸು ಗೀತಾಳಿಗೆ, ‘‘ಪರವಾಗಿಲ್ಲ ಆಂಟಿ, ನಾನು ಬಸ್ಸಲ್ಲೇ ಕುಳಿತಿರುತ್ತೇನೆ, ನೀವು ಬ್ಯಾಗ್ ಬಿಟ್ಟು ಹೋಗಿ’’ ಅಂದನಂತೆ!! ಗೀತಾ ಕಕ್ಕಾಬಿಕ್ಕಿಯಾಗಿ ಬಸ್ಸಿನಿಂದ ಇಳಿದು ಹೋದರೂ ಸುಮಾರು ಹೊತ್ತು ಆಕೆಗೆ ಆಂಟಿ ಶಬ್ದ ಮನಸ್ಸಲ್ಲೇ ರಿಂಗಣಿಸುತ್ತಿತ್ತು. ತನ್ನನ್ನು ಆಂಟಿ ಹೇಳುವ ಗಂಡಸಾದರೂ ಯಾರು? ಮೊನ್ನೆಯಷ್ಟೇ ಪರಿಚಿತನಾಗಿರುವ, ತಲೆಯ ಮುಂದಿನ ಕೂದಲ್ಲೆಲ್ಲಾ ಉದುರಿ. ಕಿವಿಯ ಬಳಿ ಮಾತ್ರ ಸ್ವಲ್ಪ ಉಳಿದಿರುವ, ಕಣ್ಣಿಗೆ ದಪ್ಪ ಕನ್ನಡಕ ಹಾಕಿಕೊಂಡಿರುವ, 6 ತಿಂಗಳ ಗರ್ಭಿಣಿಯಂತೆ ಹೊಟ್ಟೆ ಊದಿಕೊಂಡಿರುವವ!! ಮನಸಲ್ಲೇ ಒಂದು ರೂಪುರೇಷೆ ಸಿದ್ಧಪದಡಿಸಿಕೊಂಡ ಗೀತಾ ಸಂಜೆಯ ತನಕ ಅವಕಾಶಕ್ಕಾಗಿ ಕಾದು ಕುಳಿತಳು. ಸಂಜೆ ಕಾಫಿಗೆ ಹೋಟೆಲ್ ಬಳಿ ಬಸ್ ನಿಂತಾಗ, ಒಂದೇ ಟೇಬಲಲ್ಲಿ ಕುಳಿತರು ಇವರೆಲ್ಲಾ. ವೈಟರ್ ಬಂದಾಗ ತಕ್ಷಣ ಗೀತಾ ‘‘ಅಂಕಲ್ ನಿಮಗೆ ಕಾಫಿಯಾ, ಟೀಯಾ’’ ಅಂದಳು. ಆತನ ಮುಖ ತಕ್ಷಣ ಗಂಭೀರವಾಯಿತು. ‘‘ನಾನು ಅಂಕಲ್ ಅಲ್ಲ, ನನ್ನ ಹೆಸರು ರಾಘವ್’’ ಅಂದ ಮುಗುಮ್ಮಾಗಿ! ಗೀತಾ ಹಾಯಾಗಿ ನಗುತ್ತಾ, ‘‘ಅಯ್ಯೋ ಹಾಗೆಲ್ಲಾ ಹಿರಿಯರನ್ನು ಹೆಸರಲ್ಲಿ ಕರೆಯೊಕಾಗುತ್ತಾ ಅಂಕಲ್’’ ಅಂದಾಗ ಮುಂದೆ ಪೂರ ಟೂರ್‌ನಲ್ಲಿ ಈ ರಾಘವ್ ಅಂಕಲ್ ಗೀತಾಳ ಹತ್ರ ಮಾತನಾಡಲೇ ಇಲ್ಲ!!

ಗೀತಾ, ವಾಣಿ ಮತ್ತು ನಾನು ಸುಮಾರು ಒಂದೇ ಪ್ರಾಯದವರು. ಈ ಪ್ರಸಂಗ ಕೇಳಿ ಚೆನ್ನಾಗಿ ನಕ್ಕೆವು. ವಾಣಿ ನನಗೂ ಇಂಥದ್ದೇ ಸನ್ನಿವೇಶ ಎದುರಾಗಿತ್ತು ಕಣ್ರೆ ಅಂದಾಗ ಹೇಳು, ಹೇಳು ಎನ್ನುತ್ತಾ ನಾವು ಅವಳ ಮುಂದೆ ಕುಳಿತೆವು.

 ‘‘ನನ್ನ ಪತಿಗೆ ಸರ್ವೀಸಿನ ಕೊನೆಯ ಎರಡು ವರ್ಷ ಊರಿಗೇ ಟ್ರಾನ್ಸ್ ಫರ್ ಸಿಕ್ಕಾಗ ತುಂಬಾ ಖುಷಿಯಿಂದ ಬಂದೆವು. ಪಕ್ಕದ ಮನೆಯ ದಂಪತಿಯರ ಎರಡೂ ಮಕ್ಕಳು ಹೆಚ್ಚಿನ ವಿದ್ಯಾಭ್ಯಾಸಕ್ಕೆಂದು ಹಾಸ್ಟೆಲ್‌ನಲ್ಲಿದ್ದರು, ಥೇಟ್ ನಮ್ಮ ಮಕ್ಕಳಂತೆ. ನಾನು ನನ್ನದೇ ಪ್ರಾಯದವಳಲ್ವಾಂತ ಸಲಿಗೆಯಿಂದ ಮಾತನಾಡಿಸುತ್ತಿದ್ದೆ. ಒಮ್ಮೆ ಅವಳ ಮನೆಗೆ ಹೋದಾಗ ಬನ್ನಿ ಆಂಟಿ ಅಂತ ಸ್ವಾಗತಿಸೋದೆ?!! ನಾನೂ ಬಿಡಲಿಲ್ಲ ಅಂಕಲ್ ಎಲ್ಲಿ ಕಾಣಿಸ್ತಾಯಿಲ್ಲ ಅಂದೆ. ಆಗ ತಕ್ಷಣವೇ ಹೊರಬಂದ ಆ ಗಂಡಸು ಅಯ್ಯೋ ಆಂಟಿ ನನಗೆ ಅಂಕಲ್ ಎನ್ನಬೇಡಿ, ನೀವು ಹಿರಿಯರು ಅಂದ ಗಂಭೀರವಾಗಿ. ಮತ್ತೆ ನೀವು ನನಗಿಂತ ದೊಡ್ಡವರ ತರ ಕಾಣ್ತೀರಲ್ಲ? ನಿವೃತ್ತಿಯಾಗಲು ಹತ್ರ ಬಂತಲ್ಲ ನಿಮಗೂ ಅಂದೆ ಬೇಕಂತ. ನನಗೆ ಇನ್ನೂ 48 ಅಷ್ಟೆ ಅಂದ.

 ನನಗೂ ಅಷ್ಟೆ! ನಿಮ್ಮ ಮಕ್ಕಳು ನನ್ನನ್ನು ಆಂಟಿ ಅಂತ ಕರೆದರೆ ಪರವಾಗಿಲ್ಲ, ನೀವು ನನ್ನನ್ನು ಆಂಟಿ ಅಂದರೆ ಯಾಕೋ ಸರಿ ಅನಿಸುವುದಿಲ್ಲ ಎಂದೆ ಗಂಭೀರವಾಗಿ. ಅದಕ್ಕೆ ಆತ ಏನೂ ಹೇಳದೆ ಸುಮ್ಮನಾದ. ಆದರೆ ಮತ್ತೆ ಮರುದಿನ ಕಾರಿಡಾರಿನಲ್ಲಿ ಸಿಕ್ಕಾಗ ಎಲ್ಲರ ಮುಂದೆಯೇ,

ಆಂಟಿ ಹೇಗಿದ್ದೀರಿ? ಎಂದು ಮತ್ತೆ ನಾಲಿಗೆ ಕಚ್ಚಿ,

 ಸಾರಿ, ಆಂಟಿ ಹೇಳ್ಬಾರದಲ್ಲ ನಿಮಗೆ? ಅಂತ ವಕ್ರ ನಗೆ ಬೀರಿದವನ್ನು ಕಂಡು ನನಗೆ ಸಿಟ್ಟು ನೆತ್ತಿಗೇರಿ,

ಅಯ್ಯೋ ಪರವಾಗಿಲ್ಲ ಅಂಕಲ್, ಹಾಗೆ ಕರೀರಿ ಅಂಕಲ್ ಅಂತಾ ಆತನಿಗೆ ಎರಡು ಅಂಕಲ್‌ಗಳನ್ನು ದಯಪಾಲಿಸಿ ಸಮಾಧಾನಗೊಂಡೆ. ನಾವು ನಕ್ಕುಬಿಟ್ಟೆವು. ಆದರೆ ನಕ್ಕುಬಿಡುವಂತಹ ವಿಷಯವಲ್ಲ ಇದು ಎಂದು ನಮಗೆಲ್ಲ ಅನಿಸಿತ್ತು. ಏನೋ 20-25 ರ ಪ್ರಾಯದ ಮಕ್ಕಳು ನಮ್ಮನ್ನು ಆಂಟಿ ಅಂದರೆ ಏನೂ ಬೇಜಾರಿಲ್ಲ. ಅಥವಾ ಸಣ್ಣಂದಿನಿಂದಲೇ ನಾವು ಎತ್ತಿ ಆಡಿಸಿದ ಮಕ್ಕಳು ಉದಾಹರಣೆಗೆ ನಮ್ಮ ಅಕ್ಕನ, ತಂಗಿಯ, ಅಣ್ಣನ, ತಮ್ಮನ ಮಕ್ಕಳು ನಮ್ಮನ್ನು ಆಂಟಿ ಎಂದಾಗಲೂ ಎನೂ ಬೇಜಾರಿಲ್ಲ. ಅಲ್ಲಿ ಆತ್ಮೀಯತೆ ಇದೆ. ಗೌರವ ಇದೆ, ಪ್ರೀತಿ ಇದೆ. ಅದು ಬಿಟ್ಟು ಸುಮಾರಾಗಿ ಅಪರಿಚಿತರಾಗಿಯೇ ಇರುವ ಮಧ್ಯವಯಸ್ಕರೂ ತಮ್ಮನ್ನು ಇನ್ನೂ ಯಂಗ್ ಎಂದು ಭಾವಿಸಿ ತಮ್ಮದೇ ಪ್ರಾಯದ ಹೆಂಗಸರನ್ನು ಮಾತ್ರ ಮುದುಕಿಯರು ಎಂದು ಭಾವಿಸುವುದೇಕೋ?? ಅಪರಿಚಿತರಾದ ಸ್ತ್ರೀಯರನ್ನು ಮೇಡಂ ಅನ್ನಬಹುದಲ್ವೇ? ಪರಿಚಿತರಾದ್ರೆ ಆತ್ಮೀಯವಾಗಿ ಅಕ್ಕಾ ಎಂದರೆ ಮನಸ್ಸಿಗೆ ಎಷ್ಟು ಹಿತವಾಗಿರುತ್ತದೆ. ಈಗಂತೂ ಸಣ್ಣ ಮಕ್ಕಳು ಎಲ್ಲರನ್ನೂ ಆಂಟಿ ಅಂಕಲ್ ಎಂದೇ ಮಾತನಾಡಿಸುತ್ತಾರೆ. ಸಣ್ಣಮಕ್ಕಳು ಏನು ಹೇಳಿದರೂ ಚಂದವೇ!! ಹಾಗಂತ ತಲೆ ನೆರೆತ ಗಂಡಸರೂ ಹೇಳಿದರೆ ??!!

 

‘ವಾರ್ತಾ ಭಾರತಿ’ ನಿಮಗೆ ಆಪ್ತವೇ ? ಇದರ ಸುದ್ದಿಗಳು ಮತ್ತು ವಿಚಾರಗಳು ಎಲ್ಲರಿಗೆ ಉಚಿತವಾಗಿ ತಲುಪುತ್ತಿರಬೇಕೇ? 

ಬೆಂಬಲಿಸಲು ಇಲ್ಲಿ  ಕ್ಲಿಕ್ ಮಾಡಿ

The views expressed in comments published on www.varthabharati.in are those of the comment writers alone. They do not represent the views or opinions of varthabharati.in or its staff, nor do they represent the views or opinions of  Vartha Bharati Group, or any entity of, or affiliated with, Vartha Bharati Group. varthabharati.in reserves the right to take any or all comments down at any time.
 

Refrain from posting comments that are obscene, defamatory or inflammatory, and do not indulge in personal attacks, name calling or inciting hatred against any community. It is obligatory on www.varthabharati.in to provide the IP address and other details of senders of such comments, to the authority concerned upon request. 

Help us delete comments that do not follow these guidelines by informing us (vbwebdesk@gmail.com). Let's work together to keep the conversation civil. 

www.varthabharati.in ನ ಕಮೆಂಟ್ ವಿಭಾಗದಲ್ಲಿ ಪ್ರಕಟವಾಗುವ ಅಭಿಪ್ರಾಯಗಳು ಆ ಕಮೆಂಟ್ ಬರೆದವರ ವೈಯಕ್ತಿಕ ಅಭಿಪ್ರಾಯ ಮಾತ್ರ. ಅವು  www.varthabharati.in ನ ಅಥವಾ ಅದರ ಸಿಬ್ಬಂದಿಯ, ಅಥವಾ 'ವಾರ್ತಾ ಭಾರತಿ' ಬಳಗಕ್ಕೆ ಸೇರಿದ ಯಾರದ್ದೇ ಅಭಿಪ್ರಾಯಗಳಲ್ಲ. ಈ ಕಮೆಂಟ್ ಗಳನ್ನು ಯಾವುದೇ ಸಂದರ್ಭದಲ್ಲಿ ತೆಗೆದುಹಾಕುವ ಹಕ್ಕನ್ನು  ' ವಾರ್ತಾ ಭಾರತಿ' ಕಾದಿರಿಸಿದೆ. 

ಅಶ್ಲೀಲ, ಮಾನಹಾನಿಕರ ಅಥವಾ ಪ್ರಚೋದನಕಾರಿ ಕಮೆಂಟ್ ಗಳನ್ನು ಹಾಗು ಯಾವುದೇ ವ್ಯಕ್ತಿ, ಸಂಸ್ಥೆ , ಸಮುದಾಯಗಳ ವಿರುದ್ಧ ಹಿಂಸೆ ಪ್ರಚೋದಿಸುವಂತಹ ಕಮೆಂಟ್ ಗಳನ್ನು ಹಾಕಬೇಡಿ. ಅಂತಹ ಕಮೆಂಟ್ ಹಾಕಿದವರ ಐಪಿ ಅಡ್ರೆಸ್ ಹಾಗು ಇತರ ವಿವರಗಳನ್ನು ಸಂಬಂಧಪಟ್ಟ ಅಧಿಕಾರಿಗಳು ಕೇಳಿದಾಗ  ನೀಡುವುದು 'ವಾರ್ತಾ ಭಾರತಿ' ಗೆ ಕಡ್ದಾ ಯವಾಗಿರುತ್ತದೆ.  ಆ ರೀತಿಯ ಯಾವುದೇ ಕಮೆಂಟ್ ಗಳು ಕಂಡು ಬಂದಲ್ಲಿ ಕೂಡಲೇ ನಮಗೆ ತಿಳಿಸಿ (vbwebdesk@gmail.com) ಅದನ್ನು ತೆಗೆದು ಹಾಕಲು ನೇರವಾಗಿ. ಆರೋಗ್ಯಕರ ಚರ್ಚೆಗೆ ಸಹಕರಿಸಿ.

Back to Top