ನಿಮ್ಮ ಸಿಬಿಲ್ ಸ್ಕೋರ್ ತಗ್ಗಿಸುವ ಈ 7 ವಿಷಯಗಳು ನಿಮಗೆ ಗೊತ್ತಿರಲಿ
ವ್ಯವಹಾರದ ಅಭಿವೃದ್ಧಿಗೆ,ಸ್ವಂತ ಮನೆಯ ಕನಸನ್ನು ನನಸಾಗಿಸಿಕೊಳ್ಳಲು,ಸ್ವಂತದ ವಾಹನವನ್ನು ಹೊಂದಲು,ಮಕ್ಕಳ ಉನ್ನತ ವಿದ್ಯಾಭ್ಯಾಸ ಇತ್ಯಾದಿ ಅಗತ್ಯಗಳಿಗೆ ಹೆಚ್ಚಿನವರು ಬ್ಯಾಂಕ್ ಸಾಲಗಳನ್ನೇ ಅವಲಂಬಿಸಿರುತ್ತಾರೆ. ಕ್ರೆಡಿಟ್ ಸ್ಕೋರ್ ನೀವು ಬ್ಯಾಂಕುಗಳಿಂದ ಅಥವಾ ಹಣಕಾಸು ಸಂಸ್ಥೆಗಳಿಂದ ಸಾಲ ಪಡೆಯಲು ಎಷ್ಟು ಅರ್ಹರು ಎನ್ನುವುದನ್ನು ನಿರ್ಧರಿಸುತ್ತದೆ. ಒಂದು ಕ್ರೆಡಿಟ್ ಕಾರ್ಡ್ ಪಡೆಯಬೇಕೆಂದರೂ ಬ್ಯಾಂಕ್ ನಿಮ್ಮ ಸಿಬಿಲ್(ಕ್ರೆಡಿಟ್ ಇನ್ಫಾರ್ಮೇಷನ್ ಬ್ಯೂರೊ ಆಫ್ ಇಂಡಿಯಾ ಲಿ.) ಸ್ಕೋರ್ ಎಷ್ಟಿದೆ ಎನ್ನುವುದನ್ನು ಮೊದಲು ಖಚಿತ ಪಡಿಸಿಕೊಳ್ಳುತ್ತದೆ. ಸಿಬಿಲ್ನಲ್ಲಿ ಕನಿಷ್ಠ 60 ಮಿಲಿಯನ್ ವ್ಯಕ್ತಿಗಳು ಮತ್ತು 32 ಮಿಲಿಯನ್ ಉದ್ಯಮಗಳ ಸಾಲದ ಕಡತಗಳೇ ಇವೆ. ಬ್ಯಾಂಕುಗಳು ಮತ್ತು ಹಣಕಾಸು ಸಂಸ್ಥೆಗಳಿಂದ ಪಡೆದಿರುವ ಸಾಲವು ನಿಯತ್ತಿನಿಂದ ಮರುಪಾವತಿ ಯಾಗುತ್ತಿದೆಯೇ ಎನ್ನುವುದರ ಮೇಲೆ ಸಿಬಿಲ್ ನಿಗಾ ಇರಿಸುತ್ತದೆ. ಸಿಬಿಲ್ ಸ್ಕೋರ್ 300ರಿಂದ 900ರವರೆಗೆ ಇದ್ದು,ಸಾಲ ಪಡೆಯಲು ಬಯಸಿರುವ ವ್ಯಕ್ತಿಯ ಸ್ಕೋರ್ ಕನಿಷ್ಠ 750 ಇದ್ದರೆ ಸಾಲ ಶೀಘ್ರ ಮಂಜೂರಾಗುತ್ತದೆ.
ಕ್ರೆಡಿಟ್ ಸ್ಕೋರ್ ನಮ್ಮ ಆರ್ಥಿಕ ಜೀವನದ ಮೇಲೆ ನೇರ ಪರಿಣಾಮವನ್ನು ಹೊಂದಿದೆ. ಹೆಚ್ಚಿನ ಕ್ರೆಡಿಟ್ ಸ್ಕೋರ್ ಸಾಲ ಸುಸ್ತಿಯಾಗುವ ಕಡಿಮೆ ಅಪಾಯವನ್ನು ಸೂಚಿಸುತ್ತದೆ. ಕ್ರೆಡಿಟ್ ಸ್ಕೋರ್ ಮೇಲೆ ವ್ಯತಿರಿಕ್ತ ಪರಿಣಾಮ ಬೀರುವ ಏಳು ವಿಷಯಗಳಿಲ್ಲಿವೆ....
► ನಿಗದಿತ ದಿನಾಂಕವನ್ನು ತಪ್ಪಿಸಬೇಡಿ
ನಿಮ್ಮ ಕ್ರೆಡಿಟ್ ಕಾರ್ಡ್ ಬಿಲ್ ಅಥವಾ ನಿಮ್ಮ ಇಎಂಐಗಳನ್ನು ಸಕಾಲಕ್ಕೆ ಪಾವತಿಸದಿದ್ದರೆ ಅದು ನಿಮ್ಮ ಕ್ರೆಡಿಟ್ ಹಿಸ್ಟರಿಯ ಮೇಲೆ ನಕಾರಾತ್ಮಕ ಪರಿಣಾಮವನ್ನು ಬೀರುತ್ತದೆ. ನೀವು ಒಂದೇ ಒಂದು ಮರುಪಾವತಿ ಅಥವಾ ಇಎಂಐ ಅನ್ನು ಸಕಾಲದಲ್ಲಿ ತುಂಬದಿದ್ದರೆ ಅದು ನಿಮ್ಮ ಸಾಲ ವರದಿಯಲ್ಲಿ ಉಲ್ಲೇಖಗೊಳ್ಳುತ್ತದೆ. ನಿಗದಿತ ದಿನಾಂಕಕ್ಕಿಂತ ಎಷ್ಟು ವಿಳಂಬವಾಗಿ ನೀವು ಸಾಲದ ಕಂತು ಪಾವತಿಸಿದ್ದೀರಿ ಎಂಬ ಮಾಹಿತಿ ವರದಿಯಲ್ಲಿ ದಾಖಲಾಗಿರುತ್ತದೆ. ಹೀಗಾಗಿ ನೀವು ಸಕಾಲದಲ್ಲಿ ಬಿಲ್ಗಳು ಅಥವಾ ಕಂತುಗಳನ್ನು ಕಟ್ಟದೆ ಕ್ರೆಡಿಟ್ ಸ್ಕೋರ್ ಕಡಿಮೆಯಾಗಿದ್ದರೆ ನಿಗದಿತ ದಿನಾಂಕಕ್ಕೆ ಪಾವತಿಸುವುದನ್ನುಭ್ಯಾಸ ಮಾಡಿಕೊಳ್ಳಿ. ನೀವು ಇದನ್ನು ಚಾಚೂ ತಪ್ಪದೆ ಅನುಸರಿಸಿದರೆ ಕನಿಷ್ಠ 6-8 ತಿಂಗಳುಗಳಲ್ಲಿ ನಿಮ್ಮ ಕ್ರೆಡಿಟ್ ಹಿಸ್ಟರಿಯು ಸುಧಾರಿಸುತ್ತದೆ. ಇದ್ದುದರಲ್ಲೇ ಸಮಾಧಾನದ ವಿಷಯವೆಂದರೆ ಕ್ರೆಡಿಟ್ ಹಿಸ್ಟರಿಯ ವೌಲ್ಯಮಾಪನಕ್ಕೆ ಸಾಲಗಳು ಅಥವಾ ಇಎಂಐ ಜೊತೆಗೆ ಕ್ರೆಡಿಟ್ ಕಾರ್ಡ್ ಬಿಲ್ಗಳನ್ನು ಮಾತ್ರ ಪರಿಗಣಿಸಲಾಗುತ್ತಿದೆ ಮತ್ತು ಇತರ ಮನೆಬಳಕೆ ಕ್ರೆಡಿಟ್ ಬಿಲ್ಗಳನ್ನು ಲೆಕ್ಕಕ್ಕೆ ಹಿಡಿಯಲಾಗುತ್ತಿಲ್ಲ.
► ಸಾಲ ಬಳಕೆ ಅನುಪಾತ ಆರೋಗ್ಯಯುತವಾಗಿರಲಿ
ನಿಮಗೆ ಮಂಜೂರಾಗಿರುವ ಸಾಲದ ಮಿತಿಯಲ್ಲಿ ನೀವು ಎಷ್ಟು ಸಾಲವನ್ನು ಬಳಸಿಕೊಂಡಿದ್ದೀರಿ ಎನ್ನುವುದನ್ನು ಸಾಲಬಳಕೆ ಅನುಪಾತ ಎಂದು ಕರೆಯಲಾಗುತ್ತದೆ. ಇದನ್ನು ಶೇಕಡಾವಾರು ವಿಧಾನದಲ್ಲಿ ಲೆಕ್ಕ ಹಾಕಲಾಗುತ್ತದೆ. ನಿಮ್ಮ ಕ್ರೆಡಿಟ್ ಕಾರ್ಡ್ ಸಾಲದ ಮಿತಿ ಒಂದು ಲಕ್ಷ ರೂ.ಗಳಿದ್ದು, ನೀವು ಕೇವಲ 40,000 ರೂ.ಗಳನ್ನು ಬಳಸಿಕೊಂಡಿದ್ದರೆ ಈ ಅನುಪಾತವು ಶೇ.40 ಆಗುತ್ತದೆ. ನಿಮ್ಮ ಸಾಲಬಳಕೆ ಅನುಪಾತ ಶೇ.40ಕ್ಕಿಂತ ಕಡಿಮೆಯಿದ್ದರೆ ನಿಮ್ಮ ಕ್ರೆಡಿಟ್ ಸ್ಕೋರ್ ಉತ್ತಮವಾಗಿರುತ್ತದೆ. ಅಲ್ಲದೆ ಇಎಂಐ ಮತ್ತು ಆದಾಯದ ಅನುಪಾತವೂ ಮುಖ್ಯವಾಗಿರುತ್ತದೆ. ನಿಮ್ಮ ಸಾಲದ ಮಾಸಿಕ ಕಂತು ಮತ್ತು ಕ್ರೆಡಿಟ್ ಕಾರ್ಡ್ ಬಿಲ್ಗಳ ಒಟ್ಟು ಮೊತ್ತ ನಿಮ್ಮ ಆದಾಯದ ಶೇ.50ರ ಮಿತಿಯೊಳಗೇ ಇರುವಂತೆ ನೋಡಿಕೊಳ್ಳುವುದು ಮುಖ್ಯವಾಗಿದೆ. ನೀವು ಹೆಚ್ಚುವರಿ ಸಾಲವನ್ನು ಪಡೆಯಲು ಬಯಸಿದರೆ ಅದಕ್ಕೆ ನಿಮ್ಮ ಅರ್ಹತೆಯನ್ನು ನಿಗದಿಪಡಿಸುವಲ್ಲಿ ಈ ಅನುಪಾತವು ಮುಖ್ಯವಾಗುತ್ತದೆ.
► ಆಗಾಗ್ಗೆ ಕ್ರೆಡಿಟ್ ಕಾರ್ಡ್ನ ಮಿತಿಯನ್ನು ಹೆಚ್ಚಿಸುತ್ತಿರಬೇಡಿ
ಹೀಗೆ ಮಾಡುವುದು ನಿಮ್ಮ ಕ್ರೆಡಿಟ್ ಸ್ಕೋರ್ ಮೇಲೆ ವ್ಯತಿರಿಕ್ತ ಪರಿಣಾಮವನ್ನು ಬೀರುತ್ತದೆ. ಇದು ನೀವು ನಿಮ್ಮ ಖರ್ಚುಗಳನ್ನು ನಿಭಾಯಿಸಲು ಸಾಲದ ಮೇಲೆಯೇ ಅವಲಂಬಿತ ರಾಗಿದ್ದೀರಿ ಎನ್ನುವುದನ್ನುಸೂಚಿಸುತ್ತದೆ.
► ನಿಮ್ಮ ಎಲ್ಲ ಹಳೆಯ ಸಾಲಗಳು ‘ಕ್ಲೋಸ್’ ಆಗಿವೆ ಎನ್ನುವುದನ್ನು ಖಚಿತ ಪಡಿಸಿಕೊಳ್ಳಿ.
ನೀವು ಹಳೆಯ ಸಾಲಗಳಲ್ಲಿ ಸುಸ್ತಿದಾರರಾಗಿದ್ದರೆ ಅದು ನಿಮ್ಮ ಕ್ರೆಡಿಟ್ ಹಿಸ್ಟರಿಯಲ್ಲಿ ಪ್ರತಿಫಲಿಸಿರುತ್ತದೆ. ಹಾಗಿದ್ದರೆ ನೀವು ತಕ್ಷಣ ಆ ಸಾಲವನ್ನು ಚುಕ್ತಾ ಮಾಡಬೇಕು ಮತ್ತು ನಿಮ್ಮ ವರದಿಯಲ್ಲಿ ಸಾಲವು ‘ಕ್ಲೋಸ್’ ಆಗಿದೆ ಎಂದಿರುವತೆ ನೋಡಿಕೊಳ್ಳಬೇಕು. ಅಲ್ಲದೆ ಸಾಲ ಚುಕ್ತಾ ಆಗಿರುವ ಬಗ್ಗೆ ಬ್ಯಾಂಕಿನಿಂದ ಸರ್ಟಿಫಿಕೇಟ್ನ್ನೂ ಪಡೆದುಕೊಳ್ಳಬೇಕು.
ಬ್ಯಾಂಕುಗಳು ಸಾಲವನ್ನು ಸೆಟಲ್ ಮಾಡಿಕೊಳ್ಳಲು ಒಂದು ಬಾರಿಯ ಪಾವತಿ ಅಥವಾ ಭಾಗಶಃ ಬಾಕಿಯನ್ನು ತುಂಬಿದರೆ ಸಾಲ ಇತ್ಯರ್ಥದ ಕೊಡುಗೆಯನ್ನು ಮುಂದಿಡುತ್ತವೆ. ಇದಕ್ಕೆ ನೀವು ಒಪ್ಪಿಕೊಂಡರೆ ಬ್ಯಾಂಕಿಗೆ ನಷ್ಟವನ್ನುಂಟು ಮಾಡಿದಂತಾಗುತ್ತದೆ ಮತ್ತು ನಿಮ್ಮ ಕ್ರೆಡಿಟ್ ಹಿಸ್ಟರಿಯಲ್ಲಿ ‘ಸೆಟಲ್ಡ್’ಎಂದು ಉಲ್ಲೇಖಿಸಲಾಗುತ್ತದೆ. ಇದು ನಿಮ್ಮ ಸಿಬಿಲ್ ಸ್ಲೋರ್ ಮೇಲೆ ನಕಾರಾತ್ಮಕ ಪರಿಣಾಮವನ್ನು ಬೀರುತ್ತದೆ. ಆದ್ದರಿಂದ ಸಾಲವನ್ನು ಸೆಟಲ್ ಮಾಡಿಕೊಳ್ಳುವ ಬದಲು ಬಡ್ಡಿಸಹಿತ ಚುಕ್ತಾ ಮಾಡಲು ಪ್ರಯತ್ನಿಸಿ. ಸೆಟಲ್ಡ್ ಎಂದಿದ್ದರೆ ಭವಿಷ್ಯದಲ್ಲಿ ಸಾಲ ಪಡೆಯುವುದನ್ನು ಮರೆಯಬೇಕಾಗಬಹುದು.
► ನಿಮ್ಮ ಕ್ರೆಡಿಟ್ ಕಾರ್ಡ್ ತಪ್ಪುಗಳಿಂದ ಮುಕ್ತವಾಗಿರಲಿ
ನಿಮ್ಮ ಸಾಲವರದಿಯಲ್ಲಿನ ಯಾವುದೇ ತಪ್ಪುಗಳು ನಿಮ್ಮ ಕ್ರೆಡಿಟ್ ಸ್ಕೋರ್ ಮೇಲೆ ಪರಿಣಾಮವನ್ನು ಬೀರುತ್ತವೆ. ಹೀಗಾಗಿ ವರ್ಷವಿಡೀ ಆಗಾಗ್ಗೆ ನಿಮ್ಮ ಕ್ರೆಡಿಟ್ ರಿಪೋರ್ಟ್ನ್ನು ಪರಿಶೀಲಿಸುತ್ತಿರಿ. ನಿಮ್ಮ ಹಣಪಾವತಿಯಲ್ಲಿ ವಿಳಂಬ ಅಥವಾ ನಿಮ್ಮ ಹೆಸರಿನ ಸ್ಪೆಲ್ಲಿಂಗ್ನಲ್ಲಿ ದೋಷದಂತಹ ತಪ್ಪುಗಳು ಕ್ರೆಡಿಟ್ ವರದಿಯಲ್ಲಿರಬಹುದು. ಇಂತಹ ತಪ್ಪುಗಳು ಕಂಡು ಬಂದರೆ ಸಿಬಿಲ್ನ್ನು ಆನ್ಲೈನ್ ಅಥವಾ ಆಫ್ಲೈನ್ ಮೂಲಕ ಸಂಪರ್ಕಿಸಿ ಅದನ್ನು ಮೊದಲು ಸರಿಪಡಿಸಿಕೊಳ್ಳಿ.
► ಸಾಲಕ್ಕೆ ಅರ್ಜಿ ಸಲ್ಲಿಸುವ ಮುನ್ನ ಕ್ರೆಡಿಟ್ ರಿಪೋರ್ಟ್ ಓದಿಕೊಳ್ಳಿ
ಕ್ರೆಡಿಟ್ ಸ್ಕೋರ್ ಕಡಿಮೆಯಿದ್ದರೆ ಬ್ಯಾಂಕು ನಿಮಗೆ ನೀಡುವ ಸಾಲಕ್ಕೆ ಹೆಚ್ಚು ಬಡ್ಡಿ ವಿಧಿಸಬಹುದು ಅಥವಾ ಸಾಲವನ್ನು ನೀಡದಿರಬಹುದು. ಹೀಗಾಗಿ ಸಾಲಕ್ಕೆ ಅರ್ಜಿ ಸಲ್ಲಿಸುವ ಎರಡು ತಿಂಗಳ ಮೊದಲೇ ನಿಮ್ಮ ಕ್ರೆಡಿಟ್ ರಿಪೋರ್ಟ್ ಪಡೆದುಕೊಳ್ಳಿ. ನಿಮ್ಮ ಸ್ಲೋರ್ ಕಡಿಮೆಯಿದ್ದರೆ ಅದನ್ನು ಸುಧಾರಿಸಿಕೊಳ್ಳಲು ನಿಮಗೆ ಸಮಯಾವಕಾಶವಿರುತ್ತದೆ.
► ಸಾಲದ ಇತಿಹಾಸವಿಲ್ಲದಿದ್ದರೆ ಕಷ್ಟ
ಇದು ನಿಮಗೆ ಅಚ್ಚರಿಯನ್ನುಂಟು ಮಾಡಬಹುದು. ನೀವು ಜೀವನದಲ್ಲಿ ಈವರೆಗೆ ಸಾಲವನ್ನೇ ಮಾಡಿಲ್ಲ ಎಂದಿಟ್ಟುಕೊಳ್ಳಿ. ಬ್ಯಾಂಕು ನಿಮಗೆ ಸುಲಭದಲ್ಲಿ ಸಾಲ ನೀಡುತ್ತದೆ ಎಂದು ನೀವು ಭಾವಿಸಿರುತ್ತೀರಿ. ವಿಚಿತ್ರವೆಂದರೆ ನೀವು ಸಾಲವನ್ನೇ ಪಡೆದಿಲ್ಲ ಎನ್ನುವ ಅಂಶ ನಿಮ್ಮ ಕ್ರೆಡಿಟ್ ಸ್ಕೋರ್ ಮೇಲೆ ನಕಾರಾತ್ಮಕ ಪರಿಣಾಮವನ್ನು ಬೀರುತ್ತದೆ. ಕ್ರೆಡಿಟ್ ಸ್ಕೋರ್ ನಿಮ್ಮ ಸಾಲ ಮರುಪಾವತಿಯ ಇತಿಹಾಸ,ಸಾಲ ಪಡೆದ ಬಳಿಕ ನಿಮ್ಮ ನಡವಳಿಕೆ,ಸಾಲ ಬಳಕೆ ಮಿತಿ ಇತ್ಯಾದಿ ಅಂಶಗಳ ಮೇಲೆ ನಿಗದಿಯಾಗಿರುತ್ತದೆ. ನೀವು ಹಿಂದೆಂದೂ ಸಾಲ ಪಡೆದಿಲ್ಲ,ಕ್ರೆಡಿಟ್ ಕಾರ್ಡ್ನ್ನೂ ಪಡೆದಿಲ್ಲ ಎಂದಿದ್ದರೆ ನೀವು ಸಾಲವನ್ನು ಸರಿಯಾಗಿ ಪಾವತಿಸುತ್ತೀರೋ ಇಲ್ಲವೋ ಎನ್ನುವುದು ನಿಮಗೆ ಸಾಲ ನೀಡುವ ಬ್ಯಾಂಕಿಗೆ ಖಚಿತವಿರುವುದಿಲ್ಲ. ನಿಮ್ಮ ಸಿಬಿಲ್ ಸ್ಕೋರ್ ಇಲ್ಲದಿರುವುದರಿಂದ ಅದು ನಿಮ್ಮ ಆದಾಯ,ಉದ್ಯೋಗ ಇತ್ಯಾದಿ ವಿವರಗಳನ್ನು ಪರಿಶೀಲಿಸಿ ನಿಮ್ಮ ಸಾಲದ ಬಗ್ಗೆ ನಿರ್ಧರಿಸಬಹುದು. ಅದಕ್ಕೆ ತೃಪ್ತಿಯಾಗದಿದ್ದರೆ ನಿಮಗೆ ಸಾಲವನ್ನು ನಿರಾಕರಿಸಲೂ ಬಹುದು.