ಬಿಜೆಪಿ ಚುನಾವಣೆ ಗೆಲ್ಲುವುದು, ಜನರನ್ನು ಮೋಡಿ ಮಾಡುವುದು ಹೇಗೆ?: ಇಲ್ಲಿದೆ ಕುತೂಹಲಕಾರಿ ಮಾಹಿತಿ | Vartha Bharati- ವಾರ್ತಾ ಭಾರತಿ

---

ಬಿಜೆಪಿ ಚುನಾವಣೆ ಗೆಲ್ಲುವುದು, ಜನರನ್ನು ಮೋಡಿ ಮಾಡುವುದು ಹೇಗೆ?: ಇಲ್ಲಿದೆ ಕುತೂಹಲಕಾರಿ ಮಾಹಿತಿ

ಬಿಜೆಪಿಯ ಮಾಜಿ ಡಾಟಾ ವಿಶ್ಲೇಷಕ ಶಿವಂ ಶಂಕರ್ ಸಿಂಗ್ 2018ರ ಜೂನ್‌ನಲ್ಲಿ, ‘‘ನಾನು ಏಕೆ ಬಿಜೆಪಿಗೆ ರಾಜೀನಾಮೆ ನೀಡುತ್ತಿದ್ದೇನೆ’’ ಎಂಬ ಶೀರ್ಷಿಕೆಯಡಿ ಬ್ಲಾಗಿಂಗ್ ಪ್ಲಾಟ್‌ಫಾರಂ ಮಾಧ್ಯಮದಲ್ಲಿ ಲೇಖನವೊಂದು ಪೋಸ್ಟ್ ಮಾಡಿದರು. ನರೇಂದ್ರ ಮೋದಿ ಮತ್ತು ಅಮಿತ್ ಶಾ ಅವರ ಋಣಾತ್ಮಕ ಅಂಶಗಳು, ಸರಕಾರದ ಧನಾತ್ಮಕ ಅಂಶಗಳಿಗಿಂತ ಅಧಿಕವಾಗಿ ಕಂಡುಬಂದದ್ದರಿಂದ ಪಕ್ಷ ತೊರೆಯುವ ನಿರ್ಧಾರಕ್ಕೆ ಬಂದೆ ಎಂದು ಅವರು ಬಣ್ಣಿಸಿದ್ದರು.
ಸಿಂಗ್ ಅವರು 2017 ಮತ್ತು 2018ರಲ್ಲಿ ನಡೆದ ಮಣಿಪುರ ಹಾಗೂ ತ್ರಿಪುರಾ ವಿಧಾನಸಭಾ ಚುನಾವಣೆಗಳ ಸಂದರ್ಭದಲ್ಲಿ ಬಿಜೆಪಿ ಪರ ಕೆಲಸ ಮಾಡಿದ್ದರು. ಚುನಾವಣಾ ಕಾರ್ಯತಂತ್ರಗಳನ್ನು ರೂಪಿಸಲು ಹಾಗೂ ಸಮಾಜ ಮಾಧ್ಯಮದ ಮೂಲಕ ನಿರ್ದೇಶಿತ ಮತದಾರರ ಗುಂಪುಗಳನ್ನು ತಲುಪಲು ಅಗತ್ಯ ಅಂಕಿ ಅಂಶಗಳನ್ನು ಅವರು ಬಳಸಿದ್ದರು. ‘‘ಬಿಜೆಪಿ ಕೆಲ ನಿರ್ದಿಷ್ಟ ಸಂದೇಶಗಳನ್ನು ನಂಬಲಸಾಧ್ಯ ಪರಿಣಾಮಕಾರಿ ಪ್ರಚಾರ ಆಂದೋಲನವಾಗಿ ಹರಡುವುದನ್ನು ನಾನು ಗಮನಿಸಿದ್ದೇನೆ’’ ಎಂದು ಅವರು ವಿವರಿಸಿದ್ದರು. ಪಕ್ಷ ನೀಡಿದ ಆಶ್ವಾಸನೆ ಮತ್ತು ಮಾಡಿರುವ ಸಾಧನೆಗಳ ಮಧ್ಯೆ ಕೂಡಾ ಅಗಾಧ ಅಂತರವನ್ನು ಅವರು ಗಮನಿಸಿದ್ದರು. ಇದರಿಂದಾಗಿ ಸಿಂಗ್ ಅವರಿಗೆ ಪಕ್ಷದ ಬಗ್ಗೆ ಭ್ರಮನಿರಸನ ಆರಂಭವಾಯಿತು. ‘‘ಬಿಜೆಪಿ ದೇಶವನ್ನು ಕತ್ತಲ ಕೂಪಕ್ಕೆ ತಳ್ಳುತ್ತಿದೆ’’ ಎಂದು ಅವರು ತಮ್ಮ ಪೋಸ್ಟ್‌ನಲ್ಲಿ ಹೇಳಿದ್ದರು.
ಸಿಂಗ್ ಈಗ ಬಿಹಾರದಲ್ಲಿ ಬಿಜೆಪಿಯನ್ನು ವಿರೋಧಿಸುವ ಮಹಾಮೈತ್ರಿ ಪರ ಕೆಲಸ ಮಾಡುತ್ತಿದ್ದಾರೆ. ಈ ತಿಂಗಳ ಆರಂಭದಲ್ಲಿ ಕೆರವಾನ್‌ನ ವರದಿಗಾರ ತುಷಾರ್ ಧರ ದಿಲ್ಲಿಯಲ್ಲಿ ಅವರನ್ನು ಭೇಟಿ ಮಾಡಿದ್ದರು. ಬಿಜೆಪಿ ಚುನಾವಣೆ ಗೆಲ್ಲುವ ಸಲುವಾಗಿ ಜಾತೀಯತೆ ಮತ್ತು ಕೋಮು ಸಂಘರ್ಷಕ್ಕೆ ಕುಮ್ಮಕ್ಕು ನೀಡಲು ಹೇಗೆ ತಂತ್ರಜ್ಞಾನವನ್ನು ಬಳಸಿಕೊಳ್ಳುತ್ತಿದೆ ಎಂಬ ವಿವರ ನೀಡಿದರು. ಅವರ ನಡುವಿನ ಸಂಭಾಷಣೆಯ ಆಯ್ದ ಭಾಗವನ್ನು ಈ ಕೆಳಗೆ ನೀಡಲಾಗಿದೆ.


ಭಾಗ-1

‘‘ನಾನು ಮೊದಲ ಬಾರಿ 2013ರಲ್ಲಿ ಬಿಜೆಪಿ ಪರ ಪ್ರಚಾರ ಕೈಗೊಂಡಾಗ, ದೇಶದಲ್ಲಿ 2ಜಿ ಹಗರಣ, ಕಲ್ಲಿದ್ದಲು ಹಗರಣ, ಕಾಮನ್‌ವೆಲ್ತ್ ಹಗರಣ ಹೀಗೆ ಭ್ರಷ್ಟಾಚಾರದ ಬಗ್ಗೆ ದೊಡ್ಡ ಆರೋಪಗಳು ಕೇಳಿಬರುತ್ತಿದ್ದವು. ಮೋದಿ ತಮ್ಮನ್ನು ಶ್ರೇಷ್ಠ ಆಡಳಿತಗಾರ ಎಂದು ಬಿಂಬಿಸಿಕೊಂಡಿದ್ದರು. ಆ ಅವಧಿಯಲ್ಲಿ ದೇಶದ ಜನರ ಅಪೇಕ್ಷೆ ಇದ್ದುದು ಕೂಡಾ ಅದೇ. ಚುನಾವಣಾ ತಂತ್ರಗಾರ ಪ್ರಶಾಂತ್ ಕಿಶೋರ್ ಈ ವೇಳೆ ‘ಸಿಟಿಜನ್ಸ್ ಫಾರ್ ಅಕೌಂಟೇಬಲ್ ಗವರ್ನೆನ್ಸ್’ ಎಂಬ ಒಂದು ಗುಂಪು ರಚಿಸಿದ್ದರು. ಕೆಪಿಎಂಜಿ ಮತ್ತು ಅರ್ನೆಸ್ಟ್ ಯಂಗ್‌ನಂಥ ತಂತ್ರಜ್ಞಾನ ಮತ್ತು ಸಲಹಾ ಸೇವೆ ನೀಡುವ ಘಟಕಗಳ ಯುವ ವೃತ್ತಿಪರರು ತಮ್ಮ ಉದ್ಯೋಗ ತ್ಯಜಿಸಿ ಸಿಎಜಿ ಸೇರಿ ಮೋದಿ ಪ್ರಚಾರಕ್ಕೆ ಕೆಲಸ ಮಾಡಲು ತೊಡಗಿದರು.

ಅದು ನಾನು ಬಿಜೆಪಿ ಸೇರಿದ ಹಿನ್ನೆಲೆ. ಅನೌಪಚಾರಿಕವಾಗಿ ನಾನು ಅವರ ಪರ ಕೆಲಸ ಆರಂಭಿಸಿದೆ. ಕೆಲ ಲೇಖನಗಳನ್ನು ಹಾಗೂ ಸಮಾಜ ಮಾಧ್ಯಮ ಪೋಸ್ಟ್‌ಗಳನ್ನು ಬರೆದುಕೊಟ್ಟೆ. 2014ರಲ್ಲಿ ಬಿಜೆಪಿಯ ಡಾಟಾ ಕೋಶ ಸಾಕಷ್ಟು ಬಲವಾಗಿತ್ತು. ಆದರೆ ಆ ವ್ಯವಸ್ಥೆ ಶೀಘ್ರವೇ ಧ್ವಂಸವಾಯಿತು; ಏಕೆಂದರೆ ತಾನು ಚುನಾವಣೆ ಗೆದ್ದದ್ದು ಮೋದಿಯಿಂದಾಗಿ ಎಂಬ ಭಾವನೆ ಬಿಜೆಪಿಯಲ್ಲಿತ್ತು. ಪಕ್ಷದ ಅಭಿಪ್ರಾಯ, ಯಾವುದೇ ಮಾಹಿತಿ ಕೋಶ ಅಗತ್ಯವಿಲ್ಲ ಎನ್ನುವುದಾಗಿತ್ತು. ಆದರೆ 2015ರಲ್ಲಿ ಕೆಲ ಆಘಾತಗಳು ಸಂಭವಿಸಿದವು. ದಿಲ್ಲಿ ಹಾಗೂ ಬಿಹಾರ ಚುನಾವಣೆಯಲ್ಲಿ ಬಿಜೆಪಿ ಸೋಲು ಅನುಭವಿಸಿತು. ಪ್ರಧಾನಿ ನರೇಂದ್ರ ಮೋದಿ ಬಿಹಾರಕ್ಕೆ ಹೋಗಿ ರ್ಯಾಲಿಯಲ್ಲಿ, ‘‘ನಿಮಗೆ ವಿದ್ಯುತ್ ಸಿಕ್ಕಿದೆಯೇ? ರಸ್ತೆಗಳು ಆಗಿವೆಯೇ?’’ ಎಂದು ಪ್ರಶ್ನಿಸಿದರು. ಸಹಜವಾಗಿಯೇ ಜನರಿಂದ ‘‘ಇಲ್ಲ’’ ಎಂಬ ಉತ್ತರ ಬರುತ್ತದೆ ಎಂಬ ನಿರೀಕ್ಷೆ ಅವರದ್ದಾಗಿತ್ತು. ಆದರೆ ಜನಸಮೂಹ ‘‘ಹೌದು’’ ಎಂದು ಒಕ್ಕೊರಲಿನಿಂದ ಉತ್ತರಿಸಿತು. ಇಂಥ ಪ್ರಶ್ನೆಗಳನ್ನು ಮೋದಿ ಎತ್ತಬಾರದು ಎಂದು ಪ್ರಾಥಮಿಕ ಸಮೀಕ್ಷೆ ಮೊದಲೇ ಎಚ್ಚರಿಸಿತ್ತು. ಆದರೆ ಇದನ್ನು ನಿರ್ಲಕ್ಷಿಸಿದ ಬಿಜೆಪಿ ಹೀನಾಯವಾಗಿ ಸೋತಿತು. ಈ ಕಾರಣದಿಂದ ಬಿಜೆಪಿ ಮತ್ತೆ ಮಾಹಿತಿ ಕೋಶ ರಚಿಸಲು ಮುಂದಾಯಿತು. 2016ರ ವೇಳೆಗೆ ಅದು ಮತ್ತೆ ಪ್ರಬಲವಾಯಿತು.

ಆ ವರ್ಷ ನಾನು ಕಿಶೋರ್ ರಾಜಕೀಯ ಪ್ರತಿಪಾದನೆ ಗುಂಪಾದ ಭಾರತೀಯ ರಾಜಕೀಯ ಕ್ರಿಯಾಸಮಿತಿ ಸೇರಿದೆ. ಪಂಜಾಬ್‌ನಲ್ಲಿ ಕೆಲ ತಿಂಗಳ ಕಾಲ ಕೆಲಸ ನಿರ್ವಹಿಸಿದೆ. (ಆಗ ಪಂಜಾಬ್ ವಿಧಾನಸಭಾ ಚುನಾವಣೆಗಾಗಿ ಈ ಸಮಿತಿ ಕೆಲಸ ಮಾಡುತ್ತಿತ್ತು). ಆಗ ಸಾಮಾನ್ಯವಾಗಿ ಇದ್ದ ನಂಬಿಕೆ, ‘ಮಹಾರಾಜ’ ಎಂದು ಕರೆಯಲ್ಪಡುವ ಮುಖ್ಯಮಂತ್ರಿ ಅಭ್ಯರ್ಥಿ ಅಮರೀಂದರ್ ಸಿಂಗ್, ತೀರಾ ಆಲಸಿ; ಅವರು ಕಠಿಣ ಪರಿಶ್ರಮದಿಂದ ಕೆಲಸ ಮಾಡಲಾರರು ಎನ್ನುವುದಾಗಿತ್ತು. ಕಾಂಗ್ರೆಸ್‌ನ ಅತಿದೊಡ್ಡ ದೌರ್ಬಲ್ಯ ಎಂದರೆ, ಅದರ ಕಾರ್ಯಕರ್ತರ ಪಡೆ ಬಹುತೇಕ ಕಡೆಗಳಲ್ಲಿ ಇರಲಿಲ್ಲ. ಸಂಘಟನೆ ಇದ್ದ ಪ್ರದೇಶಗಳಲ್ಲಿ ಅದು ಸಕ್ರಿಯವಾಗಿರಲಿಲ್ಲ; ಏಕೆಂದರೆ ಅವರಿಗೆ ಭಾವನಾತ್ಮಕವಾಗಿ ಚಾಲನೆ ಸಿಕ್ಕಿರಲಿಲ್ಲ.

ಆದರೆ ದುಬಾರಿ ಹಾಗೂ ಶಕ್ತಿಶಾಲಿ ಪ್ರಚಾರದ ಮೂಲಕ ವಾತಾವರಣ ಬದಲಾಯಿತು. ‘ಪಂಜಾಬ್‌ನ ಕ್ಯಾಪ್ಟನ್’ ಅಭಿಯಾನ ಪ್ರಮುಖವಾಗಿ ಎರಡು ಅಂಶಗಳನ್ನು ಸಾಧಿಸಿತು. ಮೊದಲನೆಯದಾಗಿ, ಸಿಂಗ್ ಅವರನ್ನು ಅದು ‘ಮಹಾರಾಜ’ ಬದಲಾಗಿ ‘ಕ್ಯಾಪ್ಟನ್’ ಆಗಿ ಮಾಡಿತು. ಎರಡನೆಯದಾಗಿ ಪ್ರತೀ ಕ್ಷೇತ್ರಕ್ಕೂ ಅವರು ಹೋಗುವಂತೆ ಮಾಡಿತು. ಇದರಿಂದಾಗಿ ನಾಯಕರು ನಮ್ಮಿಂದ ಸಂಪರ್ಕ ಕಡಿದುಕೊಂಡಿಲ್ಲ ಎಂಬ ಭಾವನೆ ಸ್ಥಳೀಯ ಕಾರ್ಯಕರ್ತರಲ್ಲಿ ಮೂಡಿತು. ಇದು ಕಾರ್ಯಕರ್ತರಿಗೆ ಭಾವನಾತ್ಮಕವಾಗಿ ಚಾಲನಾಶಕ್ತಿಯಾಯಿತು. ನನಗೆ ರಾಜಕೀಯ ಆಸಕ್ತಿ ಇದೆ; ಕೇವಲ ಸಲಹೆ ಮತ್ತು ಬ್ರಾಂಡಿಂಗ್‌ನಲ್ಲಷ್ಟೇ ಅಲ್ಲ ಎನ್ನುವುದು ನನಗೆ ಮನವರಿಕೆಯಾಯಿತು.ಬಳಿಕ ನಾನು ಬಿಜೆಪಿಯ ರಾಷ್ಟ್ರೀಯ ಪ್ರಧಾನ ಕಾರ್ಯದರ್ಶಿ ರಾಮ್‌ಮಾಧವ್ ಅವರ ಸಂಪರ್ಕದಲ್ಲಿದ್ದೆ. ಮಣಿಪುರದಲ್ಲಿ 2017ರಲ್ಲಿ ನಡೆಯಲಿರುವ ವಿಧಾನಸಭಾ ಚುನಾವಣೆಯ ಸಿದ್ಧತಾ ಕಾರ್ಯಕ್ಕಾಗಿ ಅಲ್ಲಿಗೆ ಹೋಗುವಂತೆ ಅವರು ಸೂಚಿಸಿದರು. ಅಲ್ಲಿ ಪಕ್ಷದ ಕಚೇರಿಯಾಗಲೀ, ಪಕ್ಷ ಸಂಘಟನೆಯಾಗಲೀ, ಅಕ್ಷರಶಃ ಏನೂ ಇರಲಿಲ್ಲ. ಗ್ರಾಫಿಕ್ ಡಿಸೈನರ್‌ಗಳನ್ನು, ಸಂಶೋಧಕರನ್ನು ನಾವು ನಿಯೋಜಿಸಿಕೊಂಡೆವು. ಪ್ರಚಾರ ಸಮಿತಿ ರಚಿಸಿ ಕೆಲ ಸಮೀಕ್ಷೆಗಳನ್ನು ನಡೆಸಿದೆವು. ಆಗ ಎಲ್ಲ ಭಾವನಾತ್ಮಕ ವಿಷಯಗಳು ಬಿಜೆಪಿ ವಿರುದ್ಧವಾಗಿದ್ದವು.

ಇನ್ನರ್‌ಲೈನ್ ಪರ್ಮಿಟ್‌ಗಳಿಗೆ ಬದ್ಧರಾಗಿರಲಿಲ್ಲ; ಆ ಅವಧಿಯಲ್ಲಿ ಮಣಿಪುರಕ್ಕೆ ತಡೆ ಇತ್ತು; ನ್ಯಾಷನಲ್ ಸೋಷಲಿಸ್ಟ್ ಕೌನ್ಸಿಲ್ ಆಫ್ ನಾಗಾಲ್ಯಾಂಡ್ (ಇಸಾಕ್- ಮುವಾಹ್) ಸಂಘಟನೆ ಜತೆ ರಹಸ್ಯ ಒಪ್ಪಂದ ಮಾಡಿಕೊಳ್ಳಲಾಗಿತ್ತು. ಬಿಜೆಪಿಗೆ 31 ಸ್ಥಾನಗಳ ಅಗತ್ಯವಿತ್ತು. ಆದರೆ ಕೇವಲ 21 ಸ್ಥಾನ ಗೆದ್ದಿತು. 2017ರ ಮಾರ್ಚ್‌ನಲ್ಲಿ ಸಣ್ಣಪಕ್ಷಗಳ ನೆರವಿನಿಂದ ಅದು ಸರಕಾರ ರಚಿಸಿತು. ಬಳಿಕ ನಾನು ದಿಲ್ಲಿಗೆ ವಾಪಸಾಗಿ, ಡಾಟಾ ಬಳಸಿಕೊಂಡು ಈಶಾನ್ಯ ರಾಜ್ಯಗಳಿಂದ ಹಿಡಿದು ಕ್ಷೇತ್ರಗಳ ಚಿತ್ರಣವನ್ನು ಸಿದ್ಧಪಡಿಸಲಾರಂಭಿಸಿದೆ. ಇದರ ಮುಖ್ಯ ಉದ್ದೇಶವೆಂದರೆ ಪ್ರಚಾರ ಕಾರ್ಯದ ಹೂಡಿಕೆಯ ಮೇಲೆ ಗರಿಷ್ಠ ಪ್ರಯೋಜನ ಪಡೆಯುವುದಾಗಿತ್ತು. ಬಿಜೆಪಿ ಚುನಾವಣೆ ಗೆಲ್ಲಬೇಕಿದ್ದರೆ ಈ ಮತಗಟ್ಟೆಗಳ ಕಡೆ ಗಮನ ಹರಿಸಬೇಕು, ಈ ಕ್ಷೇತ್ರಗಳಲ್ಲಿ ಗೆಲ್ಲುವ ಸಾಧ್ಯತೆ ಕಡಿಮೆ ಎಂದು ವಿಶ್ಲೇಷಿಸಿ ಈ ಮತಗಟ್ಟೆಗಳಲ್ಲಿ ಶ್ರಮ ಹಾಕುವ ಅಗತ್ಯವಿಲ್ಲ ಎಂದು ಮನದಟ್ಟು ಮಾಡುವುದು.

ಹಿಂದಿನ ಸಂಸತ್ ಮತ್ತು ವಿಧಾನಸಭಾ ಚುನಾವಣೆಯ ಅಂಕಿ ಅಂಶಗಳನ್ನು ಚುನಾವಣಾ ಆಯೋಗದಿಂದ ಪಡೆದೆವು ಹಾಗೂ ಮತ ಪ್ರವೃತ್ತಿಯನ್ನು ತಿಳಿದುಕೊಳ್ಳಲು ಅವುಗಳನ್ನು ಕ್ರೋಡೀಕರಿಸಿದೆವು. ಈಶಾನ್ಯ ರಾಜ್ಯಗಳಲ್ಲಿ ಬಿಜೆಪಿಗೆ ಅಸ್ತಿತ್ವವೇ ಇರಲಿಲ್ಲ. ಅದು ಕಾಂಗ್ರೆಸ್ ಹಾಗೂ ಪ್ರಾದೇಶಿಕ ಪಕ್ಷಗಳ ಕೋಟೆಯಾಗಿತ್ತು. ಆದರೆ ಅಂಕಿ ಅಂಶಗಳನ್ನು ವಿಶ್ಲೇಷಿಸಿದಾಗ, ತ್ರಿಪುರಾದಲ್ಲಿ ಆಡಳಿತಾರೂಢ ಸಿಪಿಎಂ ವಿರುದ್ಧ ಹಲವು ಮತಗಟ್ಟೆಗಳಲ್ಲಿ ಅಸಮಾಧಾನ ಇದ್ದುದು ಕಂಡುಬಂತು. ಈ ವಿಶ್ಲೇಷಣೆಯನ್ನು ಸಾಮಾಜಿಕ, ಆರ್ಥಿಕ, ಜಾತಿ ಮಾಹಿತಿ ಮತ್ತು ಸಮೀಕ್ಷೆ ಮಾಹಿತಿಯ ಜತೆ ಹೋಲಿಕೆ ಮಾಡಿದೆವು. ಬಳಿಕ ಯಾವ ಜಾತಿ ಹಾಗೂ ಬುಡಕಟ್ಟುಗಳು ಯಾವ ಪಕ್ಷದ ಪರವಾಗಿವೆ ಎಂದು ತಿಳಿದುಕೊಳ್ಳಲು ಗುಂಪು ಚರ್ಚೆಗಳನ್ನು ಆಯೋಜಿಸಿದೆವು.

ಬಿಜೆಪಿಯ ಚುನಾವಣಾ ಕಾರ್ಯತಂತ್ರ ಎಂದರೆ, ಒಂದು ಬಾರಿ ಮತಗಟ್ಟೆ ಗೆದ್ದೆವು ಎಂದಾದರೆ ಆ ಕ್ಷೇತ್ರ ಹಾಗೂ ರಾಜ್ಯವನ್ನು ಗೆದ್ದಂತೆ ಎಂದಾಗಿತ್ತು. ನಾವು ಮತಗಟ್ಟೆ ಮಟ್ಟದಲ್ಲಿ ಮತದಾನಪೂರ್ವ ಅಂಕಿ ಅಂಶಗಳನ್ನು ಪರಿಶೀಲಿಸಿದೆವು. ಚುನಾವಣಾ ಆಯೋಗದ ನಮೂನೆ-20ನ್ನು ಪರಿಶೀಲಿಸಿದರೆ, ಆ ಮತಗಟ್ಟೆಯಲ್ಲಿ ಮತಗಳು ಹೇಗೆ ಹಂಚಿಕೆಯಾಗಿವೆ ಎಂಬ ಮಾಹಿತಿ ಸಿಗುತ್ತದೆ. ಪ್ರಮುಖ ಮತಗಳು ಮತ್ತು ಪ್ರತಿ ಪಕ್ಷಗಳ ವರ್ಗಾವಣೆ ಮತಗಳ ಮಾಹಿತಿ ಸಿಗುತ್ತದೆ. ಮತದಾರರ ಯಾದಿಯನ್ನು ಡಿಜಿಟಲೀಕರಿಸಿದೆವು ಹಾಗೂ ಮೊಬೈಲ್ ಸಂಖ್ಯೆ ಹಾಗೂ ಹೆಸರುಗಳನ್ನು ಕ್ರೋಡೀಕರಿಸಿ, ಸಮಾಜ ಮಾಧ್ಯಮದ ಮೂಲಕ ಸಂದೇಶ ವಿತರಿಸಲು ಸಿದ್ಧತೆ ನಡೆಸಿದೆವು. ಬಿಜೆಪಿಯ ಪನ್ನಾ ಪ್ರಮುಖ್ 60 ಮಂದಿಯ ಉಸ್ತುವಾರಿ ಹೊಂದಿದ್ದರು. ಅವರ ಜವಾಬ್ದಾರಿಯೆಂದರೆ ಈ ಮನೆಗಳಿಗೆ ತೆರಳಿ ಬಿಜೆಪಿಯ ಸಂದೇಶಗಳನ್ನು ರವಾನಿಸುವುದು ಹಾಗೂ ಅವರ ಪ್ರತಿಕ್ರಿಯೆಯನ್ನು ಪಕ್ಷಕ್ಕೆ ತಿಳಿಸುವುದು.

ಮಣಿಪುರದಲ್ಲಿ ನಾವು ಸರಕಾರ ರಚಿಸಿದರೂ, ರಾಜ್ಯದಲ್ಲಿ ಭಾಷಣದ ಸಮರದಲ್ಲಿ ನಾವು ಸೋತೆವು. ತ್ರಿಪುರಾದಲ್ಲಿ ನಾವು ಹೆಚ್ಚು ಜಾಗರೂಕತೆ ವಹಿಸಿದೆವು. ಉದಾಹರಣೆಗೆ ಮಾಜಿ ಮುಖ್ಯಮಂತ್ರಿ ಮಾಣಿಕ್ ಸರ್ಕಾರ್ ಅವರು ತ್ರಿಪುರಾದಲ್ಲಿ ಶಾಂತಿ ಸ್ಥಾಪಿಸುವಲ್ಲಿ ಯಶಸ್ವಿಯಾಗಿದ್ದರು. ಇದಕ್ಕೆ ಪ್ರತಿಯಾಗಿ ನಾವು, ಕಳೆದ 15-20 ವರ್ಷಗಳಿಂದ ಎಲ್ಲ ಈಶಾನ್ಯ ರಾಜ್ಯಗಳು ಶಾಂತವಾಗಿವೆ ಎಂದು ಪ್ರಚಾರ ಮಾಡಿದೆವು. ಆ ಮೂಲಕ ಸರ್ಕಾರ್ ಸಾಧನೆ ವಿಶೇಷವೇನಲ್ಲ ಎಂದು ಬಿಂಬಿಸಿದೆವು. ಏಳನೇ ವೇತನ ಆಯೋಗದ ವಿಷಯವನ್ನು ಪ್ರಮುಖ ಎಂದು ನಾವು ಪರಿಗಣಿಸಿದೆವು. ಏಕೆಂದರೆ ಆಗ ತ್ರಿಪುರಾ ಸರಕಾರಿ ಅಧಿಕಾರಿಗಳು ನಾಲ್ಕನೇ ವೇತನ ಆಯೋಗದ ವೇತನ ಪಡೆಯುತ್ತಿದ್ದರು. ಅವರಿಗೆ ಹೆಚ್ಚುವರಿಯಾಗಿ 20-30 ಸಾವಿರ ಆದಾಯದ ಭರವಸೆಯನ್ನು ನಾವು ನೀಡಿದೆವು. ಇದು ದೊಡ್ಡ ಬದಲಾವಣೆಗೆ ಕಾರಣವಾಯಿತು ಹಾಗೂ ಬಿಜೆಪಿ ಅಭೂತಪೂರ್ವ ಜಯ ಸಾಧಿಸಿತು.

ಬಿಜೆಪಿ ಇದೇ ಕಾರ್ಯತಂತ್ರವನ್ನು ಉತ್ತರಪ್ರದೇಶದಂಥ ರಾಜ್ಯಗಳಲ್ಲೂ ಅನುಸರಿಸಿತು. ಇಲ್ಲಿ ಬಹುತೇಕ ಮಂದಿಯ ಜಾತಿ ಹಾಗೂ ಧರ್ಮವನ್ನು ಅವರ ಹೆಸರಿನಿಂದ ಗುರುತಿಸಬಹುದು. ಅದರೊಂದಿಗೆ ಮತದಾರರ ಯಾದಿಗೆ ದೂರವಾಣಿ ಸಂಖ್ಯೆಯನ್ನು ಸೇರಿಸುವ ಮೂಲಕ ನೀವು ಸುಲಭವಾಗಿ ವೈಯಕ್ತಿಕ ಸಂದೇಶಗಳನ್ನು ಕಳುಹಿಸಬಹುದು. ಉದಾಹರಣೆಗೆ, ಹಿಂದುಳಿದ ವರ್ಗಗಳ ಪಟ್ಟಿಯಲ್ಲಿ ಬರುವ ಯಾದವ ಜನಾಂಗ. ಆದ್ದರಿಂದ ಬಿಜೆಪಿ ಯಾದವರಿಂದ ಹೊರತಾದ ಇತರ ಹಿಂದುಳಿದ ವರ್ಗಗಳನ್ನು ಗುರಿ ಮಾಡಿತು. ಅಂತೆಯೇ ಜಾಟವರಲ್ಲದ ದಲಿತರನ್ನು ಗುರಿ ಮಾಡಿತು. ಸಾಮಾಜಿಕ ಜಾಲತಾಣಗಳಲ್ಲಿ, ಮೀಸಲಾತಿಯ ಸೌಲಭ್ಯವನ್ನು ಯಾದವರೇ ಪಡೆದುಕೊಂಡಿದ್ದಾರೆ. ಸಮಾಜವಾದಿ ಪಕ್ಷದ ಸರಕಾರ ಅಧಿಕಾರದಲ್ಲಿರುವವರೆಗೂ ಇತರ ಹಿಂದುಳಿದವರ್ಗದವರು ಮೀಸಲಾತಿಯ ಪ್ರಯೋಜನ ಪಡೆಯುವುದು ಅಸಾಧ್ಯ ಎಂಬ ವೈಯಕ್ತಿಕ ಸಂದೇಶಗಳನ್ನು ಎಲ್ಲ ಯಾದವೇತರ ಹಿಂದುಳಿದ ವರ್ಗಗಳ ಮತದಾರರಿಗೆ ಕಳುಹಿಸಿದೆ. ಈ ಸಂದೇಶಗಳನ್ನು ಬಿಜೆಪಿಯ ಅಧಿಕೃತ ವಾಹಿನಿಯಿಂದ ಕಳುಹಿಸದೆ, ‘ನಮೋ ಸಪೋರ್ಟರ್ಸ್‌ 2019 ಬನಾರಸ್’, ‘ಕಟ್ಟರ್ ಹಿಂದೂ ಸೇನಾ’, ‘ಹಿಂದೂ ಮಹಾಸಭಾ’ ಎಂಬ ವಾಟ್ಸ್‌ಆ್ಯಪ್ ಗುಂಪುಗಳ ಮೂಲಕ ಕಳುಹಿಸಲಾಯಿತು.

 

‘ವಾರ್ತಾ ಭಾರತಿ’ ನಿಮಗೆ ಆಪ್ತವೇ ? ಇದರ ಸುದ್ದಿಗಳು ಮತ್ತು ವಿಚಾರಗಳು ಎಲ್ಲರಿಗೆ ಉಚಿತವಾಗಿ ತಲುಪುತ್ತಿರಬೇಕೇ? 

ಬೆಂಬಲಿಸಲು ಇಲ್ಲಿ  ಕ್ಲಿಕ್ ಮಾಡಿ

The views expressed in comments published on www.varthabharati.in are those of the comment writers alone. They do not represent the views or opinions of varthabharati.in or its staff, nor do they represent the views or opinions of  Vartha Bharati Group, or any entity of, or affiliated with, Vartha Bharati Group. varthabharati.in reserves the right to take any or all comments down at any time.
 

Refrain from posting comments that are obscene, defamatory or inflammatory, and do not indulge in personal attacks, name calling or inciting hatred against any community. It is obligatory on www.varthabharati.in to provide the IP address and other details of senders of such comments, to the authority concerned upon request. 

Help us delete comments that do not follow these guidelines by informing us (vbwebdesk@gmail.com). Let's work together to keep the conversation civil. 

www.varthabharati.in ನ ಕಮೆಂಟ್ ವಿಭಾಗದಲ್ಲಿ ಪ್ರಕಟವಾಗುವ ಅಭಿಪ್ರಾಯಗಳು ಆ ಕಮೆಂಟ್ ಬರೆದವರ ವೈಯಕ್ತಿಕ ಅಭಿಪ್ರಾಯ ಮಾತ್ರ. ಅವು  www.varthabharati.in ನ ಅಥವಾ ಅದರ ಸಿಬ್ಬಂದಿಯ, ಅಥವಾ 'ವಾರ್ತಾ ಭಾರತಿ' ಬಳಗಕ್ಕೆ ಸೇರಿದ ಯಾರದ್ದೇ ಅಭಿಪ್ರಾಯಗಳಲ್ಲ. ಈ ಕಮೆಂಟ್ ಗಳನ್ನು ಯಾವುದೇ ಸಂದರ್ಭದಲ್ಲಿ ತೆಗೆದುಹಾಕುವ ಹಕ್ಕನ್ನು  ' ವಾರ್ತಾ ಭಾರತಿ' ಕಾದಿರಿಸಿದೆ. 

ಅಶ್ಲೀಲ, ಮಾನಹಾನಿಕರ ಅಥವಾ ಪ್ರಚೋದನಕಾರಿ ಕಮೆಂಟ್ ಗಳನ್ನು ಹಾಗು ಯಾವುದೇ ವ್ಯಕ್ತಿ, ಸಂಸ್ಥೆ , ಸಮುದಾಯಗಳ ವಿರುದ್ಧ ಹಿಂಸೆ ಪ್ರಚೋದಿಸುವಂತಹ ಕಮೆಂಟ್ ಗಳನ್ನು ಹಾಕಬೇಡಿ. ಅಂತಹ ಕಮೆಂಟ್ ಹಾಕಿದವರ ಐಪಿ ಅಡ್ರೆಸ್ ಹಾಗು ಇತರ ವಿವರಗಳನ್ನು ಸಂಬಂಧಪಟ್ಟ ಅಧಿಕಾರಿಗಳು ಕೇಳಿದಾಗ  ನೀಡುವುದು 'ವಾರ್ತಾ ಭಾರತಿ' ಗೆ ಕಡ್ದಾ ಯವಾಗಿರುತ್ತದೆ.  ಆ ರೀತಿಯ ಯಾವುದೇ ಕಮೆಂಟ್ ಗಳು ಕಂಡು ಬಂದಲ್ಲಿ ಕೂಡಲೇ ನಮಗೆ ತಿಳಿಸಿ (vbwebdesk@gmail.com) ಅದನ್ನು ತೆಗೆದು ಹಾಕಲು ನೇರವಾಗಿ. ಆರೋಗ್ಯಕರ ಚರ್ಚೆಗೆ ಸಹಕರಿಸಿ.

Back to Top