‘‘ಸತ್ತವರೆಲ್ಲ ಒಂದೇ ಸಮುದಾಯದವರು’’, ಆದುದರಿಂದ ಒಂದು ಸಮುದಾಯದವರೆಲ್ಲ ಸಾಯಬೇಕೆ!? | Vartha Bharati- ವಾರ್ತಾ ಭಾರತಿ

‘‘ಸತ್ತವರೆಲ್ಲ ಒಂದೇ ಸಮುದಾಯದವರು’’, ಆದುದರಿಂದ ಒಂದು ಸಮುದಾಯದವರೆಲ್ಲ ಸಾಯಬೇಕೆ!?

ಬೆಂಗಳೂರು, ಮಾ.28: ಇಂದು (ಶನಿವಾರ) ನಮ್ಮ ನಾಡಿನ ದಿನಪತ್ರಿಕೆಯೊಂದು ತನ್ನ ಮುಖಪುಟದಲ್ಲಿ ಪ್ರಕಟಿಸಿದ ‘ಕೊರೋನ ಸೋಂಕಿನಿಂದ ಸತ್ತವರೆಲ್ಲ ಒಂದೇ ಸಮುದಾಯದವರು’ ಎಂಬ ತಲೆಬರಹದ ವರದಿಯ ಕುರಿತಂತೆ ನಾಡಿನ ವಿವಿಧ ಸಂಘಟನೆಗಳು, ಪ್ರಜ್ಞಾವಂತರು ತೀವ್ರ ಆಘಾತ ಹಾಗೂ ಆಕ್ರೋಶ ವ್ಯಕ್ತಪಡಿಸಿದ್ದು, ಹಲವು ಸಂಘಟನೆಗಳು ಈ ವರದಿಯ ವಿರುದ್ಧ ಪೊಲೀಸರಿಗೆ ದೂರು ಸಲ್ಲಿಸಿವೆ.

ಕರ್ನಾಟಕದಲ್ಲಿ ಕೊರೋನ ಸೋಂಕಿನಿಂದ ಮೃತಪಟ್ಟ ಮೂವರು ಒಂದೇ ಸಮುದಾಯಕ್ಕೆ ಸೇರಿದವರೆಂಬುದನ್ನೇ ಸಬೂಬಾಗಿಸಿಕೊಂಡು ಈ ಪತ್ರಿಕೆಯು ಸಂಪೂರ್ಣ ಕೊರೋನ ಸೋಂಕಿನ ಸಮಸ್ಯೆಯನ್ನು ಒಂದು ಸಮುದಾಯದ ಕೊರಳಿಗೆ ಕಟ್ಟಲು ಶ್ರಮಿಸಿದೆ. ಇದು ತೀರಾ ಅಮಾನುಷ ಹಾಗೂ ಬೇಜವಾಬ್ದಾರಿತನದ ವರ್ತನೆ ಎಂದು ವಿವಿಧ ಸಂಘಟನೆಗಳ ಮುಖಂಡರು ಟೀಕಿಸಿದ್ದಾರೆ. ದೇಶದಲ್ಲಿ ಒಟ್ಟು 21 ಮಂದಿ ಈ ಸೋಂಕಿನಿಂದ ಮೃತಪಟ್ಟಿದ್ದು, ಅವರೆಲ್ಲ ಬೇರೆ ಬೇರೆ ಸಮುದಾಯಗಳಿಗೆ ಸೇರಿದವರಾಗಿದ್ದಾರೆ. ಅವರಲ್ಲಿ ಇಬ್ಬರು ವಿದೇಶಿಯರೂ ಸೇರಿದ್ದಾರೆ ಎಂದು ಸರಕಾರಿ ಮೂಲಗಳು ತಿಳಿಸಿವೆ. ಇಡೀ ದೇಶವೇ ಜಾತಿ, ಧರ್ಮಗಳನ್ನು ಬದಿಗಿಟ್ಟು, ಒಂದಾಗಿ ಕೊರೋನ ವಿರುದ್ಧ ಸೆಣಸಾಡಬೇಕಾದ ಈ ಸಂದರ್ಭದಲ್ಲಿ, ಈ ಪತ್ರಿಕೆ ಕೊರೋನ ಹೆಸರಲ್ಲಿ ಸಮಾಜದಲ್ಲಿ ಕೋಮು ವೈಷಮ್ಯ ಹಬ್ಬಿ ಜನರಲ್ಲಿ ಪರಸ್ಪರ ದ್ವೇಷ ಹಾಗೂ ಅಪನಂಬಿಕೆ ಹಂಚಲು ಹೊರಟಿರುವುದು ತೀರಾ ಹೀನ ಕೃತ್ಯವಾಗಿದೆ. ಈ ಪತ್ರಿಕೆಯ ಮನಸ್ಥಿತಿ ಕೊರೋನ ವೈರಸ್‌ ನಷ್ಟೇ ಅಪಾಯಕಾರಿ ಎಂದು ಹಲವು ಪ್ರಮುಖರು ಖೇದ ವ್ಯಕ್ತಪಡಿಸಿದ್ದಾರೆ.

ವಾಸ್ತವ ಏನು?

ಜಗತ್ತಿನ ಹೆಚ್ಚಿನ ಎಲ್ಲ ವಾರ್ತಾ ಸಂಸ್ಥೆಗಳು ತಿಳಿಸಿರುವ ಪ್ರಕಾರ ಜಗತ್ತಿನೆಲ್ಲೆಡೆಯಿಂದ ಮುಸ್ಲಿಮರು ಯಾತ್ರೆಗೆ ಹೋಗುವ ಸೌದಿ ಅರೇಬಿಯದ ಮಕ್ಕಾ ಮತ್ತು ಮದೀನಾ ನಗರಗಳಲ್ಲಿರುವ ಪವಿತ್ರ ಮಸೀದಿಗಳನ್ನು ಈ ವರ್ಷ ಫೆಬ್ರವರಿ 26ರಂದೇ ಮುಚ್ಚಲಾಗಿದೆ. ಕೊರೋನ ಸೋಂಕಿನ ಸಮಸ್ಯೆ ಸಂಪೂರ್ಣ ಬಗೆಹರಿಯುವ ತನಕ ಅವುಗಳನ್ನು ತೆರೆಯಲಾಗುವುದಿಲ್ಲ ಮತ್ತು ಅಲ್ಲಿ ಯಾವ ಯಾತ್ರಿಕರಿಗೂ ಪ್ರವೇಶ ನೀಡಲಾಗುವುದಿಲ್ಲ ಎಂದು ಘೋಷಿಸಲಾಗಿದೆ. ಈ ರೀತಿ, ಒಂದು ತಿಂಗಳ ಹಿಂದೆಯೇ ಮುಚ್ಚಲಾದ ಒಂದು ಧಾರ್ಮಿಕ ಕೇಂದ್ರವನ್ನು ಇತ್ತೀಚಿನ ಸೋಂಕುಗಳಿಗಾಗಿ ದೂಷಿಸುವುದು ತೀರಾ ರೋಗಗ್ರಸ್ತ ಮಾನಸಿಕತೆಯನ್ನಷ್ಟೇ ಬಿಂಬಿಸುತ್ತದೆ. ಕೊಲ್ಲಿ ದೇಶಗಳಿಂದ ಭಾರತಕ್ಕೆ ಬರುವ ಒಂದು ನಿರ್ದಿಷ್ಟ ಸಮುದಾಯದ ಜನರು ಕೊರೋನ ವೈರಸ್ ತರುತ್ತಾರೆ ಎಂಬರ್ಥದ ವದಂತಿ ಹರಡುತ್ತಿರುವವರು ದಯವಿಟ್ಟು ಗಮನಿಸಬೇಕು;

 ಕೊಲ್ಲಿ ದೇಶಗಳಲ್ಲಿ ಅದರಲ್ಲೂ ವಿಶೇಷವಾಗಿ ಸೌದಿ ಅರೇಬಿಯ, ಯುಎಇ, ಒಮಾನ್, ಕುವೈತ್ , ಖತರ್ ಮತ್ತು ಬಹರೈನ್ ಗಳಲ್ಲಿ ಒಂದು ಕೋಟಿಗೂ ಹೆಚ್ಚು ಭಾರತೀಯರು ಉದ್ಯೋಗ ಅಥವಾ ವ್ಯಾಪಾರೋದ್ಯಮಗಳಲ್ಲಿ ತೊಡಗಿದ್ದಾರೆ. ಅವರೆಲ್ಲ ಕೇವಲ ಯಾವುದಾದರೂ ಒಂದು ಸಮುದಾಯದ ಭಾರತೀಯರಲ್ಲ. ಎಲ್ಲ ಜಾತಿ, ಧರ್ಮಗಳ ಭಾರತೀಯರೂ ಅವರಲ್ಲಿದ್ದಾರೆ. ಸೌದಿ ಅರೇಬಿಯದಲ್ಲಿ 41.24 ಲಕ್ಷ, ಯುಎಇಯಲ್ಲಿ 38.60 ಲಕ್ಷ, ಒಮಾನ್‌ ನಲ್ಲಿ 8.40 ಲಕ್ಷ, ಕುವೈತ್‌ ನಲ್ಲಿ 7.80 ಲಕ್ಷ, ಕತರ್‌ ನಲ್ಲಿ 6.70 ಲಕ್ಷ , ಮತ್ತು ಬಹರೈನ್‌ ನಲ್ಲಿ 1.70 ಲಕ್ಷ ಅನಿವಾಸಿ ಭಾರತೀಯರು ದುಡಿಯುತ್ತಿದ್ದಾರೆ. ಅವರೆಲ್ಲ ಮುಸ್ಲಿಮರಲ್ಲ. ಈ ಪೈಕಿ ಕನಿಷ್ಠ 30 ಲಕ್ಷ ಮಂದಿ ಭಾರತೀಯರಂತೂ ಖಂಡಿತ ಮುಸ್ಲಿಮರಲ್ಲ. ಯುಎಇಯಲ್ಲಿರುವ ಭಾರತೀಯರ ಪೈಕಿ 14 ಲಕ್ಷಕ್ಕೂ ಹೆಚ್ಚಿನವರು ಹಿಂದೂಗಳು. ಕತರ್‌ ನಲ್ಲಿರುವ ಭಾರತೀಯರ ಪೈಕಿ 3.51 ಲಕ್ಷ ಮಂದಿ ಹಿಂದೂಗಳು. ಕುವೈತ್‌ ನಲ್ಲಿರುವ ಭಾರತೀಯರ ಪೈಕಿ 3.50 ಲಕ್ಷ ಮಂದಿ ಹಿಂದೂಗಳು. ಒಮಾನ್‌ನಲ್ಲಿರುವ ಭಾರತೀಯರ ಪೈಕಿ 2.60 ಲಕ್ಷ ಮಂದಿ ಹಿಂದೂಗಳು. ಬಹರೈನ್‌ನಲ್ಲಿರುವ ಭಾರತೀಯರ ಪೈಕಿ 1.5 ಲಕ್ಷ ಮಂದಿ ಹಿಂದೂಗಳು.

ಅನಿವಾಸಿ ಭಾರತೀಯರ ಪೈಕಿ ಯಾರೊಬ್ಬರೂ ಕೊರೋನ ವೈರಸ್‌ಅನ್ನು ಆಮದು ಮಾಡಲಿಕ್ಕಾಗಿ ಹೊರದೇಶಗಳಿಗೆ ಹೋದವರಲ್ಲ. ಹೊಟ್ಟೆಪಾಡಿಗಾಗಿ ಹೋದವರು ಮತ್ತು ದೊಡ್ಡ ಪ್ರಮಾಣದಲ್ಲಿ ತಮ್ಮ ಬೆವರಿನ ಗಳಿಕೆಯನ್ನು ವಿದೇಶಿ ಕರೆನ್ಸಿಯ ರೂಪದಲ್ಲಿ ಭಾರತಕ್ಕೆ ಕಳುಹಿಸುವ ಮೂಲಕ ನಮ್ಮ ದೇಶದ ಆರ್ಥಿಕತೆಗೆ ಅತ್ಯಮೂಲ್ಯ ಕೊಡುಗೆ ನೀಡುತ್ತಿರುವವರು.

2018ರಲ್ಲಿ ನಮ್ಮ ದೇಶವು ತನ್ನ ಅನಿವಾಸಿ ಪ್ರಜೆಗಳ ಮೂಲಕ 6 ಲಕ್ಷ ಕೋಟಿ ರೂಪಾಯಿ ವಿದೇಶಿ ವಿನಿಮಯ ಗಳಿಸಿ ವಿಶ್ವದಾಖಲೆ ಮಾಡಿತ್ತು. ಆ ಪೈಕಿ ಶೇ. 27 ಮೊತ್ತವು ಯುಎಇ ಎಂಬ ಒಂದೇ ಕೊಲ್ಲಿ ದೇಶದಿಂದ ಬಂದಿದ್ದರೆ ಸುಮಾರು ಶೇ.12 ಮೊತ್ತವು ಸೌದಿ ಅರೇಬಿಯ ಎಂಬ ಇನ್ನೊಂದು ಕೊಲ್ಲಿ ದೇಶದ ಅನಿವಾಸಿ ಭಾರತೀಯರಿಂದ ಬಂದಿತ್ತು.

ವಿವಿಧ ಕೊಲ್ಲಿ ದೇಶಗಳಿಂದ ಭಾರತಕ್ಕೆ ಬರುವವರು ಕೊರೋನ ತರುತ್ತಾರೆ ಎಂಬ ವಿಷ ವದಂತಿಯಲ್ಲೂ ಯಾವುದೇ ಹುರುಳಿಲ್ಲ. ವಿಶ್ವ ಆರೋಗ್ಯ ಸಂಸ್ಥೆ (WHO) ಕೊರೋನ ಸೋಂಕಿನ ಹಿನ್ನೆಲೆಯಲ್ಲಿ ಭಾರತದಲ್ಲಿನ ನಿತ್ಯದ ಬೆಳವಣಿಗೆಗಳನ್ನು ಬಹಳ ಸೂಕ್ಷ್ಮವಾಗಿ ವೀಕ್ಷಿಸುತ್ತಿದ್ದು ಆ ಕುರಿತು ವರದಿಗಳನ್ನೂ ಪ್ರಕಟಿಸುತ್ತಿರುತ್ತದೆ. ಮಾರ್ಚ್ 14ರ WHO ವರದಿ ಪ್ರಕಾರ ಫೆಬ್ರವರಿ ತಿಂಗಳ ಆರಂಭದಿಂದ ಮಾರ್ಚ್ ಮಧ್ಯದವರೆಗೆ ಭಾರತದ 30 ನಿರ್ದಿಷ್ಟ ವಿಮಾನ ನಿಲ್ದಾಣಗಳಲ್ಲಿ ವಿವಿಧ ಹೊರದೇಶಗಳಿಂದ 10,876 ವಿಮಾನಗಳು ಬಂದಿಳಿದಿವೆ ಮತ್ತು ಅವುಗಳ ಮೂಲಕ ವಿವಿಧ ಹಿನ್ನೆಲೆಯ 11,71,061 ಮಂದಿ ಭಾರತಕ್ಕೆ ಬಂದಿದ್ದಾರೆ. ಅಂದರೆ ಸುಮಾರು 11 ಸಾವಿರ ವಿಮಾನಗಳಲ್ಲಿ ಸುಮಾರು 12 ಲಕ್ಷ ಮಂದಿ ವಿವಿಧ ಹೊರದೇಶಗಳಿಂದ ಭಾರತಕ್ಕೆ ಬಂದಿದ್ದಾರೆ. ಇವರೆಲ್ಲಾ ಕೊಲ್ಲಿ ದೇಶಗಳಿಂದ ಬಂದವರಲ್ಲ. ಫೆಬ್ರವರಿ 5ರ WHO ವರದಿ ಪ್ರಕಾರ 2,528 ಮಂದಿ ಚೀನಾದಿಂದ ಭಾರತಕ್ಕೆ ಬಂದಿದ್ದಾರೆ. ಫೆಬ್ರವರಿ 13ರ WHO ವರದಿ ಪ್ರಕಾರ ಚೀನಾ, ಹಾಂಗ್ ಕಾಂಗ್, ಜಪಾನ್, ಕೊರಿಯ, ಥಾಯ್‌ ಲ್ಯಾಂಡ್ ಮತ್ತು ಸಿಂಗಾಪುರಗಳಿಂದ 2,315 ವಿಮಾನಗಳು ಭಾರತಕ್ಕೆ ಬಂದಿದ್ದು, ಅವುಗಳ ಮೂಲಕ 2,51,445 ಪ್ರಯಾಣಿಕರು ಭಾರತಕ್ಕೆ ಬಂದಿದ್ದಾರೆ. ಫೆಬ್ರವರಿ 28ರ WHO ವರದಿ ಪ್ರಕಾರ ಇಂಡೋನೇಶ್ಯ, ನೇಪಾಳ, ಮಲೇಶ್ಯ, ವಿಯೆಟ್ನಾಮ್, ಚೀನಾ, ಹಾಂಗ್‌ಕಾಂಗ್, ರಿಪಬ್ಲಿಕ್ ಆಫ್ ಕೊರಿಯ, ಸಿಂಗಾಪುರ್ ಮತ್ತು ಥಾಯ್‌ಲ್ಯಾಂಡ್‌ಗಳಿಂದ ಭಾರತಕ್ಕೆ 4,787 ವಿಮಾನಗಳು ಬಂದಿದ್ದು, 4,82,927 ಮಂದಿ ಪ್ರಯಾಣಿಕರು ಆ ವಿಮಾನಗಳ ಮೂಲಕ ಭಾರತಕ್ಕೆ ಬಂದಿದ್ದಾರೆ. ಈ ಪೈಕಿ ಯಾವುದೂ ಕೊಲ್ಲಿ ದೇಶವಲ್ಲ ಎಂಬುದು ಗಮನಾರ್ಹ.

ಜಗತ್ತಿನೆಲ್ಲೆಡೆ, ಮುಸ್ಲಿಮ್ ವಿದ್ವಾಂಸರು, ಮುಫ್ತಿಗಳು, ವಿವಿಧ ಮುಸ್ಲಿಂ ಸಂಘನೆಗಳ ನೇತಾರರು, ಮುಸ್ಲಿಂ ಮದ್ರಸಗಳ ಹಾಗೂ ಇಸ್ಲಾಮಿ ವಿದ್ಯಾಪೀಠಗಳ ಮುಖ್ಯಸ್ಥರು ಕೊರೋನ ವೈರಸ್ ಅನ್ನು ಒಂದು ಸಾಮೂಹಿಕ ಪಿಡುಗೆಂದು ಪರಿಗಣಿಸಿ ಅದರ ವಿರುದ್ಧ ಸರ್ವ ಸಾಧ್ಯ ಮುಂಜಾಗ್ರತಾ ಕ್ರಮಗಳನ್ನು ಕೈಗೊಳ್ಳಬೇಕು, ತಜ್ಞ ವೈದ್ಯರ ಸಲಹೆಗಳನ್ನು ಅನುಸರಿಸರಿಸಬೇಕು, ಸರಕಾರ ಹೇರುವ ನಿರ್ಬಂಧಗಳನ್ನು ಪಾಲಿಸಬೇಕು, ಆರೋಗ್ಯ ಇಲಾಖೆಗಳು ನೀಡುವ ಎಚ್ಚರಿಕೆಗಳನ್ನೂ ಕಟ್ಟು ನಿಟ್ಟಾಗಿ ಪಾಲಿಸಬೇಕು ಎಂದು ಪದೇ ಪದೇ ಜನತೆಗೆ ಮನವಿ ಮಾಡಿದ್ದಾರೆ. ಜಗತ್ತಿನೆಲ್ಲೆಡೆ ಮತ್ತು ವಿಶೇಷವಾಗಿ ಭಾರತದಲ್ಲಿ ಎಲ್ಲ ಮಸೀದಿಗಳಲ್ಲಿ ಈ ಕುರಿತು ಮೌಖಿಕವಾಗಿಯೂ ಲಿಖಿತರೂಪದಲ್ಲೂ ಜನರಿಗೆ ಎಚ್ಚರಿಕೆ ನೀಡಲಾಗಿದೆ. ಈ ಪ್ರಕ್ರಿಯೆ ಜನವರಿ ಕೊನೆಯಲ್ಲೇ ಆರಂಭವಾಗಿದ್ದು ಈಗಲೂ ಮುಂದುವರಿದಿದೆ. ಹೌದು, ಗೋಮೂತ್ರ ಅಥವಾ ಸೆಗಣಿಯ ಮೂಲಕ ಕೊರೋನ ವೈರಸ್‌ ಗೆ ಪರಿಹಾರ ಪಡೆಯಬೇಕೆಂದು ಮಾತ್ರ ಅವರು ಯಾರೂ ಸೂಚಿಸಿದ್ದಿಲ್ಲ. ಚಪ್ಪಾಳೆ ತಟ್ಟುವ ಮೂಲಕ ಅಥವಾ ತಟ್ಟೆಗಳನ್ನು ಬಡಿಯುವ ಮೂಲಕ ಕೊರೋನ ಸಮಸ್ಯೆಗೆ ಪರಿಹಾರ ಸಾಧ್ಯ ಎಂದು ಕೂಡಾ ಅವರು ಯಾರೂ ಹೇಳಿಲ್ಲ.

ಯಾವುದೇ ಸ್ವರೂಪದ ಸೋಂಕು ರೋಗ ತಗಲಿರುವವರು ತಾವಿರುವ ಸ್ಥಳದಿಂದ ಇನ್ನೊಂದು ಸ್ಥಳಕ್ಕೆ ಹೋಗಬಾರದು ಮತ್ತು ಆ ಮೂಲಕ ರೋಗ ಪ್ರಸಾರಕ್ಕೆ ಕಾರಣರಾಗಬಾರದು ಎಂದು ಪ್ರವಾದಿ ಮುಹಮ್ಮದ್(ಸ) ನೀಡಿದ್ದ ಕಟ್ಟೆಚ್ಚರದ ಮಾತನ್ನು ಎಲ್ಲ ಮಸೀದಿಗಳಲ್ಲಿ ಜನರಿಗೆ ಹೇಳಲಾಗಿದೆ. ಸಾಮೂಹಿಕ ಸೋಂಕು ವ್ಯಾಪಿಸುತ್ತಿರುವ ಪ್ರದೇಶಗಳಲ್ಲಿ ಆರಾಧನೆಗಳನ್ನು ಮಸೀದಿಯ ಬದಲು ಮನೆಗಳಲ್ಲೇ ಸಲ್ಲಿಸಬೇಕೆಂದು ಕೂಡ ಎಲ್ಲ ಮಸೀದಿಗಳಲ್ಲಿ ಜನರಿಗೆ ಪದೇ ಪದೇ ತಿಳಿಸಲಾಗಿದೆ. ಸಂಪೂರ್ಣ ಜಾಗತಿಕ ಮುಸ್ಲಿಮರ ಶ್ರದ್ಧಾಕೇಂದ್ರವಾಗಿರುವ ಮಕ್ಕಾದಲ್ಲಿರುವ ಮಸೀದಿಯನ್ನೇ ಫೆಬ್ರವರಿ 26ರಿಂದ ಅನಿರ್ದಿಷ್ಟಾವಧಿಗಾಗಿ ಮುಚ್ಚಲಾಗಿದೆ ಎಂದ ಮೇಲೆ ಈ ಕುರಿತು ಯಾವುದೇ ಸಂದೇಹಕ್ಕೆ ಎಡೆ ಎಲ್ಲಿದೆ?. ಇಷ್ಟಿದ್ದೂ ಮಾನವೀಯತೆ ಮತ್ತು ಸಾಮಾಜಿಕ ಸಂವೇದನೆಯ ಸರ್ವ ಮೇರೆಗಳನ್ನು ಮೀರಿ, ಕೊರೋನವನ್ನು ಸಮಾಜವನ್ನು ವಿಂಗಡಿಸುವ ಅಸ್ತ್ರವಾಗಿ ಬಳಸಲು ಹೊರಟ ವಿಘ್ನ ಸಂತೋಷಿಗಳ ಘೋರ ಮನಸ್ಥಿತಿ ಕೊರೋನಗಿಂತಲೂ ಮಾರಕ ಎಂಬುದನ್ನು ಸಮಾಜವು ಮನಗಾಣಬೇಕಾಗಿದೆ. ಕೊರೋನ ಸೋಂಕಿನಿಂದ ಮಾತ್ರವಲ್ಲ, ಇಂಥವರ ಸೋಂಕಿನಿಂದಲೂ ಸಮಾಜವನ್ನು ರಕ್ಷಿಸಬೇಕಾಗಿದೆ.

 

‘ವಾರ್ತಾ ಭಾರತಿ’ ನಿಮಗೆ ಆಪ್ತವೇ ? ಇದರ ಸುದ್ದಿಗಳು ಮತ್ತು ವಿಚಾರಗಳು ಎಲ್ಲರಿಗೆ ಉಚಿತವಾಗಿ ತಲುಪುತ್ತಿರಬೇಕೇ? 

ಬೆಂಬಲಿಸಲು ಇಲ್ಲಿ  ಕ್ಲಿಕ್ ಮಾಡಿ

The views expressed in comments published on www.varthabharati.in are those of the comment writers alone. They do not represent the views or opinions of varthabharati.in or its staff, nor do they represent the views or opinions of  Vartha Bharati Group, or any entity of, or affiliated with, Vartha Bharati Group. varthabharati.in reserves the right to take any or all comments down at any time.
 

Refrain from posting comments that are obscene, defamatory or inflammatory, and do not indulge in personal attacks, name calling or inciting hatred against any community. It is obligatory on www.varthabharati.in to provide the IP address and other details of senders of such comments, to the authority concerned upon request. 

Help us delete comments that do not follow these guidelines by informing us (vbwebdesk@gmail.com). Let's work together to keep the conversation civil. 

www.varthabharati.in ನ ಕಮೆಂಟ್ ವಿಭಾಗದಲ್ಲಿ ಪ್ರಕಟವಾಗುವ ಅಭಿಪ್ರಾಯಗಳು ಆ ಕಮೆಂಟ್ ಬರೆದವರ ವೈಯಕ್ತಿಕ ಅಭಿಪ್ರಾಯ ಮಾತ್ರ. ಅವು  www.varthabharati.in ನ ಅಥವಾ ಅದರ ಸಿಬ್ಬಂದಿಯ, ಅಥವಾ 'ವಾರ್ತಾ ಭಾರತಿ' ಬಳಗಕ್ಕೆ ಸೇರಿದ ಯಾರದ್ದೇ ಅಭಿಪ್ರಾಯಗಳಲ್ಲ. ಈ ಕಮೆಂಟ್ ಗಳನ್ನು ಯಾವುದೇ ಸಂದರ್ಭದಲ್ಲಿ ತೆಗೆದುಹಾಕುವ ಹಕ್ಕನ್ನು  ' ವಾರ್ತಾ ಭಾರತಿ' ಕಾದಿರಿಸಿದೆ. 

ಅಶ್ಲೀಲ, ಮಾನಹಾನಿಕರ ಅಥವಾ ಪ್ರಚೋದನಕಾರಿ ಕಮೆಂಟ್ ಗಳನ್ನು ಹಾಗು ಯಾವುದೇ ವ್ಯಕ್ತಿ, ಸಂಸ್ಥೆ , ಸಮುದಾಯಗಳ ವಿರುದ್ಧ ಹಿಂಸೆ ಪ್ರಚೋದಿಸುವಂತಹ ಕಮೆಂಟ್ ಗಳನ್ನು ಹಾಕಬೇಡಿ. ಅಂತಹ ಕಮೆಂಟ್ ಹಾಕಿದವರ ಐಪಿ ಅಡ್ರೆಸ್ ಹಾಗು ಇತರ ವಿವರಗಳನ್ನು ಸಂಬಂಧಪಟ್ಟ ಅಧಿಕಾರಿಗಳು ಕೇಳಿದಾಗ  ನೀಡುವುದು 'ವಾರ್ತಾ ಭಾರತಿ' ಗೆ ಕಡ್ದಾ ಯವಾಗಿರುತ್ತದೆ.  ಆ ರೀತಿಯ ಯಾವುದೇ ಕಮೆಂಟ್ ಗಳು ಕಂಡು ಬಂದಲ್ಲಿ ಕೂಡಲೇ ನಮಗೆ ತಿಳಿಸಿ (vbwebdesk@gmail.com) ಅದನ್ನು ತೆಗೆದು ಹಾಕಲು ನೇರವಾಗಿ. ಆರೋಗ್ಯಕರ ಚರ್ಚೆಗೆ ಸಹಕರಿಸಿ.

Back to Top