ಕೈಗಡಿಯಾರದ ಸದ್ದಿಗೆ ಸ್ಥಗಿತಗೊಂಡ ಕಲಾಪ

ಬೆಂಗಳೂರು, ಮಾ.1: ಮುಖ್ಯಮಂತ್ರಿ ಸಿದ್ದರಾಮಯ್ಯ ಸ್ನೇಹಿತರೊಬ್ಬರಿಂದ ಉಡುಗೊರೆಯಾಗಿ ಪಡೆದಿರುವ ದುಬಾರಿ ಬೆಲೆಯ ಕೈಗಡಿಯಾರ ಪ್ರಕರಣ ವಿಧಾನ ಮಂಡಲದ ಉಭಯ ಸದನಗಳಲ್ಲಿ ಪ್ರತಿಧ್ವನಿಸಿ, ಆಡಳಿತ ಮತ್ತು ವಿಪಕ್ಷಗಳ ಸದಸ್ಯರ ಮಧ್ಯೆ ಪರಸ್ಪರ ಆರೋಪ-ಪ್ರತ್ಯಾರೋಪ, ಗದ್ದಲ-ಕೋಲಾಹಲದಲ್ಲೇ ದಿನದ ಕಲಾಪ ಮುಕ್ತಾಯವಾಗಿದೆ.

ಮಂಗಳವಾರ ಬೆಳಗ್ಗೆ ಉಭಯ ಸದನಗಳಲ್ಲಿ ಅಗಲಿದ ಗಣ್ಯರಿಗೆ ಶ್ರದ್ಧಾಂಜಲಿ ಅರ್ಪಿಸಿದ ಬಳಿಕ ಪ್ರಶ್ನೋತ್ತರ ಕಲಾಪವಿತ್ತಾದರೂ, ವಿಪಕ್ಷಗಳು ಅದಕ್ಕೆ ಅವಕಾಶ ನೀಡಲಿಲ್ಲ. ಮುಖ್ಯಮಂತ್ರಿಗಳ ದುಬಾರಿ ಬೆಲೆಯ ಕೈಗಡಿಯಾರ ಪ್ರಕರಣವನ್ನು ಪ್ರಸ್ತಾಪಿಸಿದ ವಿಪಕ್ಷ ನಾಯಕರಾದ ಜಗದೀಶ್ ಶೆಟ್ಟರ್, ಕೆ.ಎಸ್.ಈಶ್ವರಪ್ಪ ವಿಷಯದ ಚರ್ಚೆಗೆ ಪಟ್ಟುಹಿಡಿದರು.

 ಚಿತ್ರ ಪ್ರದರ್ಶನ: ಬಿಜೆಪಿ ಸದಸ್ಯರ ಕ್ರಮಕ್ಕೆ ತೀವ್ರ ಆಕ್ಷೇಪ ವ್ಯಕ್ತಪಡಿಸಿದ ಆಡಳಿತ ಪಕ್ಷದ ಸದಸ್ಯರು, ನಿಮ್ಮ ಪಕ್ಷದ ನಾಯಕರೂ ದುಬಾರಿ ಕೈಗಡಿಯಾರಗಳನ್ನು ಧರಿಸಿದ್ದಾರೆ ಎಂದು ಜಗದೀಶ್ ಶೆಟ್ಟರ್, ಬಿ.ಎಸ್.ಯಡಿಯೂರಪ್ಪ, ಕೇಂದ್ರ ಸಚಿವ ಡಿ.ವಿ.ಸದಾನಂದಗೌಡ ಸೇರಿದಂತೆ ಇನ್ನಿತರ ಚಿತ್ರಗಳನ್ನು ಪ್ರದರ್ಶಿಸಿ ಏರಿದ ಧ್ವನಿಯಲ್ಲಿ ಇದಕ್ಕೆ ಉತ್ತರ ನೀಡಿ ಎಂದು ಪ್ರಶ್ನಿಸಿದರು.

ಈ ಹಂತದಲ್ಲಿ ಪರಸ್ಪರರ ನಡುವೆ ಒಂದು ರೀತಿಯಲ್ಲಿ ವಾಗ್ಯುದ್ಧವೇ ನಡೆಯಿತು. ಉಭಯ ಸದನಗಳಲ್ಲಿಯೂ ಗದ್ದಲ-ಕೋಲಾಹಲ ಸೃಷ್ಟಿಯಾದ ಹಿನ್ನೆಲೆಯಲ್ಲಿ ಸ್ಪೀಕರ್ ಹಾಗೂ ಸಭಾಪತಿ ಪದೇ ಪದೇ ಮನವಿ ಮಾಡಿದರೂ ಅದು ಯಾವ ಪ್ರಯೋಜನಕ್ಕೂ ಬರಲಿಲ್ಲ.

‘ವಾಚ್ ಅಂದ್ರೆ ಹೆದರಿಕೆ’: ವಿಧಾನಸಭೆಯಲ್ಲಿ ವಿಪಕ್ಷ ನಾಯಕ ಜಗದೀಶ್ ಶೆಟ್ಟರ್ ನಿಲುವಳಿ ಸೂಚನೆಯಡಿ ಪೂರ್ವಭಾವಿ ಪ್ರಸ್ತಾಪಿಸಿ, ಆಡಳಿತ ಪಕ್ಷದವರಿಗೆ ವಾಚ್ ಅಂದ್ರೆ ಹೆದರಿಕೆ ಆರಂಭವಾಗಿದೆ. ಹೀಗಾಗಿ ವಿಷಯ ಪ್ರಸ್ತಾಪಕ್ಕೆ ಅವಕಾಶ ನೀಡುತ್ತಿಲ್ಲ. ಆದರ್ಶ ವ್ಯಕ್ತಿಯಾಗಬೇಕಿದ್ದ ಸಿದ್ದರಾಮಯ್ಯರ ದುಬಾರಿ ಮೊತ್ತದ ವಾಚ್ ಸಂಶಯಗಳನ್ನು ಹುಟ್ಟುಹಾಕಿದ್ದು, ಈ ಬಗ್ಗೆ ರಾಜ್ಯ ಸರಕಾರ ಸ್ಪಷ್ಟಣೆ ನೀಡಬೇಕೆಂದು ಕೋರಿದರು.

ಬೆಳ್ಳಿ ಕುರ್ಚಿಯು ಬಂತು: ಈ ವೇಳೆ ಮಧ್ಯ ಪ್ರವೇಶಿಸಿದ ಸ್ಪೀಕರ್ ಕಾಗೋಡು ತಿಮ್ಮಪ್ಪ, ಸಿಎಂಗೆ ನೀಡುವ ಉಡುಗೊರೆಗಳನ್ನು ವೈಯಕ್ತಿಕವಾಗಿ ಬಳಸಿಕೊಳ್ಳದೆ ಸಿಎಂ ಕಚೇರಿಯಲ್ಲಿಡಬೇಕು. ಕುಮಾರಸ್ವಾಮಿಯವರು ಸಿಎಂ ಆಗಿದ್ದ ವೇಳೆ ಅವರಿಗೆ ಬೆಳ್ಳಿ ಕುರ್ಚಿ ನೀಡಿದ್ದನ್ನು ಮಾಧ್ಯಮಗಳಲ್ಲಿ ಗಮನಿಸಿದ್ದೆ, ಅದೀಗ ಎಲ್ಲಿದೆ ಎಂದು ಚುಚ್ಚಿದರು.

ಇದರಿಂದ ವಿವಾದ ಹುಟ್ಟುಹಾಕಿದ್ದ ಜೆಡಿಎಸ್ ನಾಯಕ ಕುಮಾರಸ್ವಾಮಿ, ಒಂದು ರೀತಿಯಲ್ಲಿ ಕೆರಳಿದರು. ಈ ಹಂತದಲ್ಲಿ ಮಾತನಾಡಿದ ಅವರು, ಹೌದು ತಾನು ಸಿಎಂ ಆಗಿದ್ದ ವೇಳೆ ನೀಡಿದ ಬೆಳ್ಳಿ ಕುರ್ಚಿಯನ್ನು ಸಿದ್ಧಗಂಗಾ ಮಠದ ಡಾ.ಶಿವಕುಮಾರ ಸ್ವಾಮಿಗೆ ನೀಡಿದ್ದೇನೆಂದು ಸ್ಪಷ್ಟಣೆ ಕೊಟ್ಟರು.

ಆಗ ಸ್ಪೀಕರ್ ಕಾಗೋಡು ತಿಮ್ಮಪ್ಪ, ಮುಖ್ಯಮಂತ್ರಿಗೆ ನೀಡಿದ ಉಡುಗೊರೆಯನ್ನು ಮಠಕ್ಕೆ ನೀಡಲು ಕಾನೂನಿನಲ್ಲಿ ಅವಕಾಶವಿದೆಯೇ? ನೀವು ಯಾರನ್ನು ಕೇಳಿ ಬೆಳ್ಳಿ ಕುರ್ಚಿ ಮಠಕ್ಕೆ ನೀಡಿದ್ದೀರಿ..ಈ ಬಗ್ಗೆ ಸಂಪುಟದಲ್ಲಿ ತೀರ್ಮಾನ ಕೈಗೊಳ್ಳಲಾಗಿತ್ತೇ ಎಂದು ಸ್ಪಷ್ಟಣೆ ಬಯಸಿದರು.

ನಾನೇ ಕುರ್ಚಿ ನೀಡಿದ್ದು: ಈ ವೇಳೆ ಮಧ್ಯ ಪ್ರವೇಶಿಸಿದ ಆಡಳಿತ ಪಕ್ಷದ ಸದಸ್ಯ ಎ.ಎಸ್.ಪಾಟೀಲ್ ನಡಹಳ್ಳಿ, ಕುಮಾರಸ್ವಾಮಿ ಸಿಎಂ ಆಗಿದ್ದ ವೇಳೆ ಅವರಿಗೆ ಬೆಳ್ಳಿ ಕುರ್ಚಿ ನೀಡಿದ್ದು ನಾನೇ. ಆದರೆ, ಅವರು ಆ ಕುರ್ಚಿ ನಾನು ತೆಗೆದುಕೊಳ್ಳುವುದಿಲ್ಲ ಎಂದು ಘೋಷಿಸಿ ಅದನ್ನು ಸಿದ್ದಗಂಗಾ ಮಠಕ್ಕೆ ನೀಡಿದ್ದಾರೆಂದು ಸ್ಪಷ್ಟಪಡಿಸಿದರು.

ಶಕ್ತಿ ಇದ್ರೆ..ಈಜಿ ಪಾರಾಗ್ತಾರೆ: ಮಾಜಿ ಸ್ಪೀಕರ್ ಕೆ.ಆರ್.ರಮೇಶ್ ಕುಮಾರ್ ಮಾತನಾಡಿ, ಮುಖ್ಯಮಂತ್ರಿ ಸಿದ್ದರಾಮಯ್ಯರಿಗೆ ಶಕ್ತಿ ಇದ್ರೆ.. ದುಬಾರಿ ಮೊತ್ತದ ಕೈಗಡಿಯಾರ ಪ್ರಕರಣದಿಂದ ಈಜಿ ಹೊರ ಬರ್ತಾರೆ. ಆದರೆ, ಎಲ್ಲ ಸದಸ್ಯರು ನಮ್ಮನ್ನು ನಾವು ಪ್ರಶ್ನಿಸಿಕೊಳ್ಳಬೇಕು ಎಂದು ಮಾರ್ಮಿಕವಾಗಿ ಸಲಹೆ ನೀಡಿದರು.

ನಮ್ಮ ಖಾಸಗಿ ಜೀವನ ಯಾವ ರೀತಿಯಲ್ಲಿದೆ ಎಂದು ಆತ್ಮಾವಲೋಕನ ಅಗತ್ಯ. ಶಾಸಕರಾಗಿದ್ದಾಗ ನಮ್ಮ ಆದಾಯ-ಆಸ್ತಿ ಎಷ್ಟಿತ್ತು. ಆ ಬಳಿಕ ಎಷ್ಟಾಯಿತು ಎಂಬುದರ ಪ್ರಶ್ನೆ ಮಾಡಿಕೊಳ್ಳಬೇಕು. ಸದನದ ನಿಯಮಾವಳಿಗಳಿಗೆ ಬದ್ಧರಾಗಿ ಚರ್ಚೆ ನಡೆಸೋಣ ಎಂದು ಸ್ಪಷ್ಟಣೆ ನೀಡಿದರು.

ಸಂಶಯ ಪರಿಹರಿಸಿ: ಬಳಿಕ ಮಾತನಾಡಿದ ಸ್ಪೀಕರ್ ಕಾಗೋಡು ತಿಮ್ಮಪ್ಪ, ಕಬ್ಬನ್ ಪಾರ್ಕ್ ಪೊಲೀಸ್ ಠಾಣೆಯಲ್ಲಿ ಗಡಿಯಾರ ಕಳೆದ ಮೊಕದ್ದಮೆಯ ತನಿಖೆ ಎಲ್ಲಿಗೆ ಬಂತು ಎಂದು ಗೃಹ ಸಚಿವ ಪರಮೇಶ್ವರ್‌ರನ್ನು ಪ್ರಶ್ನಿಸಿದರು. ಇದಕ್ಕೆ ಉತ್ತರ ನೀಡಿದ ಪರಮೇಶ್ವರ್, ಪ್ರಕರಣದ ತನಿಖೆ ಪ್ರಗತಿಯಲ್ಲಿದೆ ಎಂದು ಸಮಜಾಯಿಷಿ ನೀಡಿದರು.

♦♦♦

ಇನ್ನೂ ಎಷ್ಟು ದಿನ ತನಿಖೆ ಮಾಡ್ತೀರಿ? ಇಷ್ಟೆಲ್ಲ ಗೊಂದಲಕ್ಕೆ ಕಬ್ಬನ್‌ಪಾರ್ಕ್ ಠಾಣಾ ಪೊಲೀಸರ ತನಿಖೆ ವಿಳಂಬವೇ ಮೂಲ ಕಾರಣ. ಹೀಗಾಗಿ ಶೀಘ್ರದಲ್ಲೇ ತನಿಖೆ ಪೂರ್ಣಗೊಳಿಸಿ ಕಳವು ಪ್ರಕರಣ, ಕದ್ದ ಮಾಲು ವಶಪಡಿಸಿಕೊಂಡ ಬಗ್ಗೆ ಮಾಹಿತಿ ನೀಡಿ. ಮುಖ್ಯಮಂತ್ರಿಗಳ ಗಡಿಯಾರ ಪ್ರಕರಣಕ್ಕೂ ಕದ್ದ ವಾಚಿನ ಪ್ರಕರಣಕ್ಕೂ ಸಂಬಂಧವಿಲ್ಲ ಎಂಬುದನ್ನು ಬಹಿರಂಗಪಡಿಸಿ.
 -ಕಾಗೋಡು ತಿಮ್ಮಪ್ಪ, ಸ್ಪೀಕರ್

♦♦♦

ನನ್ನ ತೇಜೋವಧೆಗೆ ಯತ್ನ: ಸಿದ್ದರಾಮಯ್ಯ

ಬೆಂಗಳೂರು, ಮಾ.1: ದುಬಾರಿ ಕೈಗಡಿಯಾರ ಪ್ರಕರಣದ ನೆಪದಲ್ಲಿ ವಿಪಕ್ಷಗಳು ತನ್ನ ತೇಜೋವಧೆಗೆ ವಿಫಲ ಯತ್ನ ನಡೆಸಿವೆ ಎಂದು ಮುಖ್ಯಮಂತ್ರಿ ಸಿದ್ದರಾಮಯ್ಯ ಇಂದಿಲ್ಲಿ ಆರೋಪಿಸಿದ್ದಾರೆ.

ಮಂಗಳವಾರ ವಿಧಾನಸಭೆಯಲ್ಲಿ ದುಬಾರಿ ಕೈಗಡಿ ಯಾರದ ವಿಚಾರದಲ್ಲಿ ಉಂಟಾದ ಗದ್ದಲದ ವೇಳೆ ಮಧ್ಯ ಪ್ರವೇಶಿಸಿ ಅವರು ಉತ್ತರ ನೀಡುತ್ತಿದ್ದರು.

ನನ್ನ ಸ್ನೇಹಿತರೊಬ್ಬರು ನೀಡಿದ ಗಡಿಯಾರವನ್ನು ಸರಕಾರದ ಆಸ್ತಿಯನ್ನಾಗಿ ಮಾಡಲಿದ್ದು, ಮಾರ್ಚ್ ಒಳಗೆ ಆದಾಯ ತೆರಿಗೆ ಇಲಾಖೆಗೆ ಗಡಿಯಾರದ ವಿವರಗಳನ್ನು ನೀಡುವುದಾಗಿ ಘೋಷಿಸಿದ ಬಳಿಕವೂ ವಿಪಕ್ಷಗಳು ನನ್ನ ತೇಜೋವಧೆಗೆ ಯತ್ನಿಸುತ್ತಿವೆ ಎಂದು ಆಕ್ಷೇಪಿಸಿದರು.

ಸ್ನೇಹಿತ ಡಾ.ಗಿರೀಶ್‌ಚಂದ್ರ ವರ್ಮ ಅವರು ಗಡಿಯಾರವನ್ನು ಕೊಡುಗೆ ನೀಡಿದ್ದು ಈ ಗಡಿಯಾರ ವಿವಾದಕ್ಕೆ ‘ಫೆರಾ’ ಕಾಯ್ದೆ ಅನ್ವಯ ಆಗದು. ವಿದೇಶಿ ಪ್ರಜೆಯಿಂದ ನಾನು ಉಡುಗೊರೆ ಸ್ವೀಕಾರ ಮಾಡಿದ್ದರೆ ಆ ಕಾಯ್ದೆ ವ್ಯಾಪ್ತಿಗೆ ಬರುತ್ತದೆ. ಆದರೆ, ಗಿರೀಶ್ ಚಂದ್ರಶರ್ಮ ಅವರು ಅನಿವಾಸಿ ಭಾರತೀಯ ಎಂದು ಸಿದ್ದರಾಮಯ್ಯ ಸ್ಪಷ್ಟಣೆ ನೀಡಿದರು.

ನೈತಿಕತೆ ಇಲ್ಲ: ಬಿಜೆಪಿ ಮುಖಂಡರಿಗೆ ನನಗೆ ಸ್ನೇಹಿತರು ನೀಡಿದ ದುಬಾರಿ ಮೊತ್ತದ ಕೈಗಡಿಯಾರದ ಬಗ್ಗೆ ಮಾತನಾಡುವ ನೈತಿಕತೆಯೇ ಇಲ್ಲ ಎಂದು ಆಕ್ಷೇಪಿಸಿದ ಸಿದ್ದರಾಮಯ್ಯ, ಪ್ರಧಾನಿ ನರೇಂದ್ರ ಮೋದಿ 10 ಕೋಟಿ ರೂ.ಮೊತ್ತದ ಸೂಟ್ ಅನ್ನು ವ್ಯಕ್ತಿಯೊಬ್ಬರಿಂದ ಕೊಡುಗೆಯಾಗಿ ಪಡೆದಿದ್ದರು ಎಂದು ಟೀಕಿಸಿದರು.

ಬಿಜೆಪಿಯವರಿಗೆ ನಾಚಿಕೆ, ಮಾನ-ಮಾರ್ಯಾದೆ ಯಾವುದು ಇಲ್ಲ. ಕ್ಷುಲ್ಲಕ ರಾಜಕೀಯಕ್ಕಾಗಿ ಇಲ್ಲ-ಸಲ್ಲದ ವಿಚಾರಗಳನ್ನು ಸದನದಲ್ಲಿ ಪ್ರಸ್ತಾಪಿಸಿ ಸಮಯವನ್ನು ಹಾಳುಮಾಡುತ್ತಿದ್ದಾರೆ. ಕೈಗಡಿಯಾರವನ್ನೇ ನೆಪವಾಗಿಟ್ಟುಕೊಂಡು ರಾಜಕೀಯ ಮಾಡುತ್ತಿದ್ದಾರೆ ಎಂದು ಸಿದ್ದರಾಮಯ್ಯ ವಿಪಕ್ಷಗಳ ವಿರುದ್ಧ ಹರಿಹಾಯ್ದದರು.