ದೇಶದ ಅಭಿವೃದ್ಧಿಗೆ ಗುಣಾತ್ಮಕ, ಸಮಾನ ಶಿಕ್ಷಣ ಬೇಕಾಗಿದೆ: ನಾರಾಯಣ ಮೂರ್ತಿ

ಮೈಸೂರು, ಎ.11: ಭಾರತದ ಶಾಲೆಗಳು ಹಾಗೂ ವಿಶ್ವವಿದ್ಯಾನಿಲಯಗಳು ಜಗತ್ತಿನಾದ್ಯಂತ ಮಕ್ಕಳಿಗೆ ಸ್ಫೂರ್ತಿ ನೀಡುವಂತಾಗಬೇಕು. ದೇಶದ ಸರ್ವತೋಮುಖ ಅಭಿವೃದ್ಧಿಗೆ ಗುಣಾತ್ಮಕ, ಸಮಾನ ಶಿಕ್ಷಣ ಅವಶ್ಯ ಎಂದು ಇನ್ಪೋಸಿಸ್ ಸಂಸ್ಥೆಯ ಸಂಸ್ಥಾಪಕ ಡಾ.ಎನ್.ಆರ್.ನಾರಾಯಣ ಮೂರ್ತಿ ಕರೆ ನೀಡಿದ್ದಾರೆ.
ಸೋಮವಾರ ನಗರದ ಮೈಸೂರು ವಿವಿಯ ಕಾಪರ್ಡ್ ಭವನದಲ್ಲಿ ನಡೆದ ವಿವಿಯ 96ನೆ ಘಟಿಕೋತ್ಸವದಲ್ಲಿ ಗೌರವ ಡಾಕ್ಟರೇಟ್‌ನ್ನು ಸ್ವೀಕರಿಸಿ ಅವರು ಮಾತನಾಡಿದರು.

2015ರ ಮಾನವ ಅಭಿವೃದ್ಧಿ ಸೂಚ್ಯಂಕದಲ್ಲಿ ಭಾರತ 130ನೆ ಸ್ಥಾನದಲ್ಲಿದೆ. ಆದ್ದರಿಂದ ಶಿಕ್ಷಣದ ಸಂವರ್ದನೆಯ ಮೂಲಕ ದೇಶ ಮೊದಲ 10 ಸ್ಥಾನಗಳಲ್ಲಿ ಬರಬೇಕು. ಹಣಕಾಸಿನ ತೊಂದರೆಯ ಕಾರಣವಿಲ್ಲದೆ, ಪ್ರತಿಯೊಂದು ಮಗುವೂ ತನ್ನ ಸಾಮರ್ಥ್ಯಕ್ಕನುಗುಣವಾಗಿ ಅತ್ಯುನ್ನತ ಸ್ಥಾನಕ್ಕೇರುವಂತೆ ಶಿಕ್ಷಕರ ಸಹಾಯ ಒದಗಬೇಕು ಎಂದರು. ಸಮಾರಂಭದ ಅಧ್ಯಕ್ಷತೆಯನ್ನು ರಾಜ್ಯಪಾಲ ವಾಜುಭಾಯಿ ವಾಲ ವಹಿಸಿದ್ದರು. ಪದ್ಮಭೂಷಣ ಪ್ರಶಸ್ತಿ ಪುರಸ್ಕೃತ ವಿಜ್ಞ್ಞಾನಿ ಡಾ.ವಿಜಯಕುಮಾರ್ ಸಾರಸ್ವತ್, ಉನ್ನತ ಶಿಕ್ಷಣ ಹಾಗೂ ಕಾನೂನು ಸಚಿವ ಟಿ.ಬಿ.ಜಯಚಂದ್ರ, ವಿವಿಯ ಉಪಕುಲಪತಿ ಪ್ರೊ.ಕೆ.ಎಸ್.ರಂಗಪ್ಪಮತ್ತಿತರರು ಉಪಸ್ಥಿತರಿದ್ದರು.

ಮೂರ್ತಿ, ಸಾರಸ್ವತ್‌ಗೆ ಡಾಕ್ಟರೇಟ್
ಮೈಸೂರು, ಎ.11: ಇನ್ಫೋಸಿಸ್ ಸಂಸ್ಥಾಪಕ ಅಧ್ಯಕ್ಷ ಡಾ.ಎನ್.ಆರ್.ನಾರಾಯಣ ಮೂರ್ತಿ, ಹಾಗೂ ಭಾರತ ಸರಕಾರದ ನೀತಿ ಆಯೋಗದ ಸದಸ್ಯ ಡಾ.ವಿಜಯ್‌ಕುಮಾರ್ ಸಾರಸ್ವತ್ ಅವರಿಗೆ ದೇಶದ ಪ್ರತಿಷ್ಠಿತ ಮೈಸೂರು ವಿಶ್ವವಿದ್ಯಾನಿಲಯದಿಂದ ಗೌರವ ಡಾಕ್ಟರೇಟ್ ಪ್ರದಾನ ಮಾಡಲಾಯಿತು.
 ವಿಶ್ವವಿದ್ಯಾನಿಲಯದ ಕಾರ್ಯಸೌಧ ಕ್ರಾಪರ್ಡ್ ಹಾಲ್‌ನಲ್ಲಿ ಕಿಕ್ಕಿರಿದ ಸಭಿಕರ ಕರತಾಡನದ ನಡುವೆ ಕುಲಾಧಿಪತಿಗಳು ಆದ ರಾಜ್ಯಪಾಲ ವಜೂಭಾಯಿ ರೂಢಬಾಯಿ ವಾಲಾ ಈ ಇಬ್ಬರಿಗೆ ಗಣ್ಯರಿಗೆ ಡಾಕ್ಟರೇಟ್ ನೀಡಿ ಗೌರವಿಸಿದರು.

ಎನ್.ಆರ್.ನಾರಾಯಣ ಮೂರ್ತಿ: ಎನ್.ಆರ್.ನಾರಾಯಣ ಮೂರ್ತಿ ಅವರು ಮೂಲತಃ ಮೈಸೂರಿನವರಾಗಿದ್ದು, ಇಂಜಿಯರಿಂಗ್ ಪದವಿಯನ್ನು ಮೈಸೂರಿನ ಎನ್‌ಐಇಯಲ್ಲಿ ಪಡೆದರು. ಭಾರತೀಯ ಮಾಹಿತಿ ತಂತ್ರಜ್ಞಾನ ಸಂಸ್ಥೆಯಾದ ಇನ್ಫೋಸಿಸ್‌ನ ಸಂಸ್ಥಾಪಕ. ಸುಮಾರು 20 ವರ್ಷಗಳ ಕಾಲ ಆ ಸಂಸ್ಥೆಯ ಮುಖ್ಯ ಕಾರ್ಯನಿರ್ವಾಹಕ ಅಧಿಕಾರಿಯಾಗಿ ಸೇವೆ ನಿರ್ವಹಿಸಿದ ಇವರು, ಈಗ ಇನ್ಫೋಸಿಸ್ ವ್ಯವಸ್ಥಾಪಕ ಮಂಡಳಿಯ ಅಧ್ಯಕ್ಷರಾಗಿದ್ದಾರೆ.

ಭಾರತವನ್ನು ವಿಶ್ವ ಮಾಹಿತಿ ತಂತ್ರಜ್ಞಾನ ಭೂಪಟದಲ್ಲಿ ಪ್ರಕಟವಾಗುವಂತೆ ಮಾಡಿದವರಲ್ಲಿ ಅಗ್ರಜರು. ಹಲವಾರು ಉದ್ಯಮ ಸಂಸ್ಥೆಗಳು, ಸರಕಾರಿ ಸಂಸ್ಥೆಗಳು ಮತ್ತು ಉನ್ನತ ವಿದ್ಯಾಸಂಸ್ಥೆಗಳ ನಿರ್ವಾಹಕ ಮಂಡಳಿಗಳ ಸದಸ್ಯರಾಗಿದ್ದಾರೆ. ‘ಇಂಟರ್‌ನ್ಯಾಷನಲ್ ಸ್ಕೂಲ್ ಆಫ್ ಇನ್‌ಫರ್ಮೇಶನ್ ಮ್ಯಾನೇಜ್‌ಮೆಂಟ್,’ (ಇನ್‌ಫೋಸಿಸ್) ಎಂಬ ಅತ್ಯಾಧುನಿಕ ವಿದ್ಯಾ ತರಬೇತಿ ಕಟ್ಟಡವನ್ನು ಆರ್.ಎನ್.ನಾರಾಯಣ ಮೂರ್ತಿಯವರು ಮೈಸೂರು ನಗರದಲ್ಲಿ, 2008ರ, ಆಗಸ್ಟ್-20ರಂದು ಪ್ರಾರಂಭಿಸಿದರು. ಪದ್ಮವಿಭೂಷಣ ಪ್ರಶಸ್ತಿ ಇವರನ್ನು ಅರಸಿ ಬಂದಿದೆ.
ಡಾ.ವಿಜಯ್‌ಕುಮಾರ್ ಸಾರಸ್ವತ್:
ಭಾರತ ಸರಕಾರದ ನೀತಿ ಆಯೋಗದ ಸದಸ್ಯರಾಗಿರುವ ಡಾ.ವಿಜಯ್ ಕುಮಾರ್ ಸಾರಸ್ವತ್ ಅವರು ಮಧ್ಯಪ್ರದೇಶದ ಗ್ವಾಲಿಯರ್ ಮಾಧವ್ ಇನ್‌ಸ್ಟಿಟ್ಯೂಟ್ ಆಫ್ ಟೆಕ್ನಾಲಾಜಿ ಮತ್ತು ಸೈನ್ಸ್ ವಿವಿಯಲ್ಲಿ ಇಂಜಿನಿಯರಿಂಗ್ ಪದವಿ ಮುಗಿಸಿ ಬೆಂಗಳೂರಿನ ಇಂಡಿಯನ್ ಇನ್‌ಸ್ಟಿಟ್ಯೂಟ್ ಆಫ್ ಸೈನ್ಸ್ ವಿವಿಯಲ್ಲಿ ಎಂಟೆಕ್ ಪದವಿ ಪಡೆದು, ಒಸ್ಮಾನಿಯಾ ವಿವಿಯಲ್ಲಿ ಇಂಜಿನಿಯರಿಂಗ್ ಡಾಕ್ಟರೇಟ್ ಪದವಿ ಪಡೆದಿದ್ದಾರೆ.
1972ರಲ್ಲಿ ಹೈದರಾಬಾದ್‌ನ ರಕ್ಷಣಾಸಂಶೋಧನೆ ಮತ್ತು ಅಭಿವೃದ್ಧಿ ಪ್ರಯೋಗಾಲಯ ದಲ್ಲಿ ಡಿಆರ್‌ಡಿಒ ಆಗಿ ತಮ್ಮ ವೃತ್ತಿ ಜೀವನ ಪ್ರಾರಂಭಿಸಿದ ಇವರು ಡಾ.ಎಪಿಜೆ ಅಬ್ದುಲ್ ಕಲಾಂ ಅವರ ವಿಜ್ಞಾನ ತಂಡದಲ್ಲಿದ್ದ ಒಬ್ಬ ವಿಜ್ಞಾನಿಯಾಗಿದ್ದರು.

ಚಿನ್ನದ ಪದಕ, ಬಹುಮಾನ ಪ್ರದಾನ
ಮೈಸೂರು: ಘಟಿಕೋತ್ಸವದಲ್ಲಿ ಪದವಿ ಪಡೆಯಲಿರುವ 5 ಶೈಕ್ಷಣಿಕ ನಿಕಾಯಗಳಾದ ಕಲಾ, ವಾಣಿಜ್ಯ, ವಿಜ್ಞಾನ ಮತ್ತು ತಂತ್ರಜ್ಞಾನ, ಕಾನೂನು ಮತ್ತು ಶಿಕ್ಷಣ ವಿಭಾಗದಲ್ಲಿ ಹೆಚ್ಚಿನ ಅಂಕ ಗಳಿಸಿದವರಿಗೆ ಚಿನ್ನದ ಪದಕ ಹಾಗೂ ನಗದು ಬಹುಮಾನ ನೀಡಿ ಗೌರವಿಸಲಾಯಿತು.

ಕಲಾ ವಿಭಾಗದಲ್ಲಿ ಶೇ.81.55 ಅಂಕಗಳಿಕೆಯೊಂದಿಗೆ ಬಿಎ ಪದವಿ ಉತ್ತೀರ್ಣರಾಗಿರುವ ಸೌಜನ್ಯಾ, 5 ಚಿನ್ನದ ಪದಕ ಹಾಗೂ 6 ನಗದು ಬಹುಮಾನ ಪಡೆದುಕೊಂಡಿದ್ದಾರೆ. ಸ್ನಾತಕೋತ್ತರ ವಿಭಾಗದಲ್ಲಿ ಎಂಎ(ಅರ್ಥಶಾಸ್ತ್ರ)ಯಲ್ಲಿ ಲಾಂಗಮ್ ರೆಬಿತರಣಿ ದೇವಿ ಶೇ.81.32 ಅಂಕ ಗಳಿಕೆಯೊಂದಿಗೆ 7 ಚಿನ್ನದ ಪದಕ ಹಾಗೂ 3 ನಗದು ಬಹುಮಾನಗಳನ್ನು ತನ್ನದಾಗಿಸಿಕೊಂಡಿದ್ದಾರೆ. ಉಳಿದಂತೆ ವಾಣಿಜ್ಯ ವಿಭಾಗದಲ್ಲಿ ಬಿ.ಕಾಂನಲ್ಲಿ ಶ್ರುತಿ.ಕೆ.ಜಿ ಶೇ.80.09 ಅಂಕಗಳೊಂದಿಗೆ ಒಂದು ಚಿನ್ನದಪದಕ ಹಾಗೂ ಮೂರು ನಗದು ಬಹುಮಾನ. ಎಂಬಿಎ (ಅಗ್ರಿ ಬ್ಯುಸಿನೆಸ್)ನಲ್ಲಿ ದಿವ್ಯಾ.ಎಸ್ ಶೇ.76.20 ಅಂಕಗಳಿಕೆಯೊಂದಿಗೆ 5 ಚಿನ್ನದ ಪದಕಗಳನ್ನು ಪಡೆದುಕೊಂಡಿದ್ದಾರೆ.
ಶಿಕ್ಷಣ ವಿಭಾಗದಲ್ಲಿ ಬಿಪಿಇಡಿಯಲ್ಲಿ ಸುಪ್ರೀತ್.ಸಿ.ಎಸ್ 4 ಚಿನ್ನದ ಪದಕ ಹಾಗೂ ಒಂದು ನಗದು ಬಹುಮಾನ, ಎಂಪಿಇಡಿಯಲ್ಲಿ ಮಂಜುನಾಥ ಟಿ.ಬಿ ನಾಲ್ಕು ಚಿನ್ನದ ಪದಕ, 2 ನಗದು ಬಹುಮಾನ, ಕಾನೂನು ವಿಭಾಗದಲ್ಲಿ ಎಲ್‌ಎಲ್‌ಎಂನಲ್ಲಿ ತನುಜಾ.ಎಚ್.ಬಿ ಎರಡು ಚಿನ್ನದ ಪದಕ ಹಾಗೂ 3 ನಗದು ಬಹುಮಾನ.
ವಿಜ್ಞಾನ ಮತ್ತು ತಂತ್ರಜ್ಞಾನ ವಿಭಾಗದಲ್ಲಿ ಬಿಎಸ್ಸಿಯಲ್ಲಿ ಶಾಂಭವಿ.ಸಿ.ಎನ್ ಹಾಗೂ ಪುಷ್ಪಾ ಕೆ. ತಲಾ 3 ಚಿನ್ನದ ಪದಕ ಹಾಗೂ ಎಂಎಸ್ಸಿದಲ್ಲಿ ಸುಮಾ.ಎಸ್ 12 ಚಿನ್ನದ ಪದಕ ಪಡೆದಿದ್ದಾರೆ.