ಚಲೋ ಉಡುಪಿ:ಭಾವಲಹರಿಯಲ್ಲಿ ವಿಕಾಸ ಅರ್ ಮೌರ್ಯ

ಗಿರಗಿಟ್ಲೆ

ಟಮ ಟಮ ಟಮ ಟಮ ತಮಟೆಯ ಸದ್ದಿಗೆ
ಪಟ ಪಟ ಪಟ ಪಟ ಪಟಾಕಿ ಸತ್ತಿದೆ
ಗುಡು ಗುಡು ಗುಡು ಗುಡು ಗುಡುಗೋ ಗತ್ತಿಗೆ
ಘಣ ಘಣ ಘಣ ಘಣ ಘಂಟೆಯು ನಡುಗಿದೆ
ಪಾದದ ಹೊಡೆತಕ್ಕೆ 
ತಲೆಯ ತುಂಬಾ ಗಿರಗಿಟ್ಲೆ

ಉರಿ ಉರಿ ಉರಿ ಉರಿ ಉರಿಗಣ್ಣೆದುರು
ಪಿಳಿ ಪಿಳಿ ಪಿಳಿ ಪಿಳಿ ಪಿಳಿಗಣ್ಮುಚ್ಚಿವೆ
ಕುದಿ ಕುದಿ ಕುದಿ ಕುದಿ ಕುದಿನೀರೆದುರು
ಘನ ಘನ ಘನ ಘನ ಘನಮಂಜು ಕರಗಿದೆ
ಕಪ್ಪಿರುವೆ ಕಡಿತಕ್ಕೆ 
ಮೈ ತುಂಬಾ ಗಿರಗಿಟ್ಲೆ

ಬಳ ಬಳ ಬಳ ಬಳ ಬಳೆಗರ್ಜನೆಗೆ
ಮಿರಿ ಮಿರಿ ಮಿರಿ ಮಿರಿ ಮೀಸೆಯು ಬೆವರಿದೆ
ರಣ ರಣ ರಣ ರಣ ರಣರಂಗದಲಿ
ಪಣ ಪಣ ಪಣ ಪಣ ಪಣ ತೊಟ್ಟಿಹರೋ
ಪಂಚಮರ ಪರುಸೆಗೆ
ದ್ವಿಜರೆಲ್ಲಾ ಗಿರಗಿಟ್ಲೆ

ಸಿಡಿ ಸಿಡಿ ಸಿಡಿ ಸಿಡಿ ಸಿಡಿಗುಂಡಿಗೆಗಳು
ಭರ ಭರ ಭರ ಭರ ಭರಸಿಡಿಲಾಗಿವೆ
ದಿಟ ದಿಟ ದಿಟ ದಿಟ ದಿಟದುಡಿವವರು
ಕಟ ಕಟ ಕಟ ಕಟ ಹಲ್ಕಡಿದವರೆ
ನೊಂದವರ ಕುಣಿತಕ್ಕೆ
ನೆಲವೆಲ್ಲಾ ಗಿರಗಿಟ್ಲೆ

ವಿಕಾಸ ಆರ್ ಮೌರ್ಯ