ಶಿವಮೊಗ್ಗದಲ್ಲಿ ಸಕ್ರಿಯವಾಗಿವೆ ’ಹನಿ ಟ್ರ್ಯಾಪ್’ ತಂಡಗಳು!

ಶಿವಮೊಗ್ಗ, ಜ.21: ಬೆಂಗಳೂರಿನಂತಹ ಮಹಾನಗರಗಳಲ್ಲಿ ಕಂಡುಬರುತ್ತಿದ್ದ ‘ಹನಿ ಟ್ರ್ಯಾಪ್’ ನಂತಹ ದಂಧೆ ಶಿವಮೊಗ್ಗದಂತಹ ನಗರಗಳಿಗೂ ವ್ಯಾಪಿಸಿರುವುದು ಇತ್ತೀಚೆಗೆ ಪೊಲೀಸರು ನಡೆಸಿದ ಕಾರ್ಯಾಚರಣೆಯಿಂದ ಬಯಲಾಗಿದೆ. ಹಾಗೆಯೇ ‘ಹನಿ ಟ್ರ್ಯಾಪ್’ ದಂಧೆ ನಡೆಸುವ ಹಲವು ತಂಡಗಳು ಶಿವಮೊಗ್ಗ ನಗರ ಹಾಗೂ ಜಿಲ್ಲೆಯಲ್ಲಿ ಸಕ್ರಿಯವಾಗಿ ಕಾರ್ಯಾಚರಿಸುತ್ತಿರುವ ಮಾಹಿತಿಗಳು ಕೇಳಿಬರ ಲಾರಂಭಿಸಿವೆ!
ಈ ಜಾಲದವರ ಕೈಗೆ ಸಿಲುಕಿ ಹಲವರು ಭಾರೀ ಪ್ರಮಾಣದಲ್ಲಿ ಹಣ ಕಳೆದುಕೊಂಡಿದ್ದಾರೆನ್ನಲಾಗಿದೆ. ಈ ಜಾಲಕ್ಕೆ ಸಿಲುಕಿದ ಬಹುತೇಕರು ಎಲ್ಲಿ ತಮ್ಮ ಸೆಕ್ಸ್ ವೀಡಿಯೊ ಬಹಿರಂಗವಾಗಲಿದೆಯೋ ಎಂಬ ಆತಂಕದಿಂದ, ಮಾನ-ಮರ್ಯಾದೆಗೆ ಅಂಜಿ ಪೊಲೀಸರ ಗಮನಕ್ಕೆ ತರಲು ಹಿಂದೇಟು ಹಾಕುತ್ತಿದ್ದಾರೆ. ಇದರಿಂದ ಈ ದಂಧೆ ನಡೆಸುವವರು ನಿರಾತಂಕವಾಗಿ ತಮ್ಮ ಕೃತ್ಯ ನಡೆಸಿಕೊಂಡು ಹೋಗುತ್ತಿದ್ದಾರೆ!
ಗೊತ್ತಿರಲಿಲ್ಲ!: ಶಿವಮೊಗ್ಗ ನಗರದಲ್ಲಿ ‘ಹನಿ ಟ್ರ್ಯಾಪ್’ ದಂಧೆ ಸಕ್ರಿಯವಾಗಿರುವ ಬಗ್ಗೆ ನಾಗರಿಕರಿಗಿರಲಿ ಸ್ವತಃ ಪೊಲೀಸ್ ಇಲಾಖೆಗೂ ಮಾಹಿತಿಯಿರಲಿಲ್ಲ. ಕಳೆದ ಕೆಲ ವಾರಗಳ ಹಿಂದೆ ನಗರದ ಖಾಸಗಿ ಆಸ್ಪತ್ರೆಯ ನರ್ಸ್‌ವೊಬ್ಬರು ತುಂಗಾನಗರ ಪೊಲೀಸ್ ಠಾಣೆಯಲ್ಲಿ ದೂರೊಂದು ದಾಖಲಿಸಿದ್ದರು. ‘ತನ್ನನ್ನು ಮದುವೆಯಾಗುವುದಾಗಿ ನಂಬಿಸಿ ದೈಹಿಕ ಸಂಬಂಧ ಹೊಂದಿದ ವ್ಯಕ್ತಿಯೋರ್ವ ಇದನ್ನು ವೀಡಿಯೊ ಚಿತ್ರೀಕರಣ ಮಾಡಿಕೊಂಡು ಬ್ಲ್ಯಾಕ್‌ಮೇಲ್ ನಡೆಸುತ್ತಿದ್ದಾನೆ. ತಾನು ಹೇಳಿದ ಪುರುಷರೊಂದಿಗೆ ಲೈಂಗಿಕ ಕ್ರಿಯೆಯಲ್ಲಿ ತೊಡಗುವಂತೆ ಒತ್ತಾಯಿಸುತ್ತಿ್ದಾನೆ’ ಎಂದು ನರ್ಸ್ ಪೊಲೀಸರಿಗೆ ದೂರಿದ್ದರು. ಇದರ ಆಧಾರದ ಮೇಲೆ ಪೊಲೀಸರು ನರ್ಸ್ ಆರೋಪಿಸಿದ್ದ ವ್ಯಕ್ತಿ ಸೇರಿದಂತೆ ಮೂವರನ್ನು ಬಂಧಿಸಿದ್ದರು. ಈ ವೇಳೆ ಆರೋಪಿಗಳು ಕಳೆದ ಕೆಲ ವರ್ಷಗಳಿಂದ ಗುಪ್ತವಾಗಿ ‘ಹನಿ ಟ್ರ್ಯಾಪ್’ ದಂಧೆ ನಡೆಸಿಕೊಂಡು ಬರುತ್ತಿರುವುದು ಬೆಳಕಿಗೆ ಬಂದಿತ್ತು. ಈ ದಂಧೆಯಲ್ಲಿ ಚಿಕ್ಕಮಗಳೂರು ಜಿಲ್ಲೆ ಎನ್.ಆರ್.ಪುರದ ಕೆಲವರು ಭಾಗಿಯಾಗಿದ್ದು ಪೊಲೀಸರಿಗೆ ಗೊತ್ತಾಗಿತ್ತು. ಶಿವಮೊಗ್ಗ ನಗರದಲ್ಲಿ ಈ ಪ್ರಕರಣ ಬೆಳಕಿಗೆ ಬರುತ್ತಿದ್ದಂತೆ ಅತ್ತ ನೆರೆಯ ಚಿಕ್ಕಮಗಳೂರು ಜಿಲ್ಲೆಯಲ್ಲಿಯೂ ‘ಹನಿ ಟ್ರ್ಯಾಪ್’ ತಂಡವೊಂದನ್ನು ಪೊಲೀಸರು ಪತ್ತೆ ಹಚ್ಚಿದ್ದರು. ನಾಲ್ವರು ಆರೋಪಿಗಳನ್ನು ಬಂಧಿಸಿದ್ದರು. ಇಬ್ಬರು ಮಹಿಳೆಯರನ್ನು ಕೂಡ ಅಲ್ಲಿನ ಪೊಲೀಸರು ವಶಕ್ಕೆ ಪಡೆದುಕೊಂಡಿದ್ದರು. ಅಲ್ಲಿನ ಪೊಲೀಸರು ತನಿಖೆಯನ್ನು ತೀವ್ರಗೊಳಿಸಿದ್ದು, ಇನ್ನಷ್ಟು ಜನರನ್ನು ಬಂಧಿಸಲು ಮುಂದಾಗಿದ್ದಾರೆ.

ಏನಿದು ದಂಧೆ?: ‘ಹನಿ ಟ್ರ್ಯಾಪ್’ ತಂಡದಲ್ಲಿರುವ ಯುವತಿ - ಮಹಿಳೆಯರು ಕಾರ್ಯಕ್ರಮ ಸೇರಿದಂತೆ ವಿವಿಧೆಡೆ ಹಣವಂತ ವ್ಯಕ್ತಿಗಳನ್ನು ಪರಿಚಯ ಮಾಡಿಕೊಳ್ಳುತ್ತಾರೆ. ತದನಂತರ ಇವರೊಂದಿಗೆ ಸಲಿಗೆ ಬೆಳೆಸಿಕೊಂಡು ತಾವಿರುವ ಸ್ಥಳಗಳಿಗೆ ಆಹ್ವಾನಿಸುತ್ತಾರೆ. ಅವರೊಂದಿಗೆ ನಡೆಸುವ ಲೈಂಗಿಕ ಚಟುವಟಿಕೆಯನ್ನು ಮೊದಲೇ ಕೋಣೆಯೊಂದರಲ್ಲಿ ಅಳವಡಿಸಿರುವ ಗುಪ್ತ ಕ್ಯಾಮರಾಗಳ ಮೂಲಕ ಸೆರೆ ಹಿಡಿಯುತ್ತಾರೆ. ನಂತರ ಸೆಕ್ಸ್ ದೃಶ್ಯಾವಳಿಗಳನ್ನು ಬಹಿರಂಗಪಡಿಸುವ ಬೆದರಿಕೆ ಹಾಕಿ, ಹಣಕ್ಕೆ ಬ್ಲ್ಯಾಕ್‌ಮೇಲ್ ನಡೆಸುತ್ತಾರೆ. ಇಂತಹ ಕೃತ್ಯಗಳಿಗೆ ‘ಹನಿ ಟ್ರ್ಯಾಪ್’ ಎಂದು ಹೆಸರಿಡಲಾಗಿದೆ. ಈ ತಂಡದಲ್ಲಿರುವ ಯುವತಿಯರು, ಮಹಿಳೆಯರ ಹಿಂದೆ ದೊಡ್ಡ ತಂಡವೇ ಕಾರ್ಯನಿರ್ವಹಣೆ ಮಾ
 ಗಿರಾಕಿಗಳನ್ನು ಹುಡುಕಿ ತರಲು ‘ಪಿಂಪ್’ಗಳು ಇದ್ದಾರೆ! ತಮ್ಮದೆ ಆದ ನೆಟ್‌ವರ್ಕ್ ರಚಿಸಿಕೊಂಡು ಅತ್ಯಂತ ಗುಪ್ತವಾಗಿ ಈ ತಂಡಗಳು ಕಾರ್ಯನಿರ್ವಹಣೆ ಮಾಡುತ್ತಿ ರುತ್ತವೆ. ದೊಡ್ಡ ಮಟ್ಟದಲ್ಲಿ ಹಣದ ವ್ಯವಹಾರ ನಡೆಸುತ್ತವೆ. ಹನಿ ಟ್ರ್ಯಾಪ್ ಜಾಲಕ್ಕೆ ಸಿಲುಕಿದವರು ಎಲ್ಲಿ ತಮ್ಮ ಸೆಕ್ಸ್ ವೀಡಿಯೊ ಬಯಲಾಗುವುದೋ ಎಂಬ ಆತಂಕ, ಮಾನ-ಮರ್ಯಾದೆಗೆ ಹೆದರಿ ಮಾಹಿತಿಯನ್ನು ಹೊರ ಹಾಕುವುದಿಲ್ಲ.

ಪೊಲೀಸರ ಗಮನಕ್ಕೆ ತರುವುದಿಲ್ಲ. ಜಾಲದವರು ಕೇಳಿದಷ್ಟು ಹಣ ಕೊಟ್ಟು ಸುಮ್ಮನಾಗುತ್ತಾರೆ. ಇದನ್ನೇ ಬಂಡವಾಳ ಮಾಡಿಕೊಂಡಿರುವ ಕೆಲ ದಂಧೆಕೋರರು ಭಾರೀ ಪ್ರಮಾಣದಲ್ಲಿ ‘ಹನಿ ಟ್ರ್ಯಾಪ್’ ದಂಧೆಗಿಳಿದಿದ್ದಾರೆ ಎಂದು ಹೇಳಲಾಗುತ್ತಿದೆ. ಸಾಕಷ್ಟಿದ್ದಾರೆ: ಶಿವಮೊಗ್ಗ ನಗರದಲ್ಲಿ ಹಲವು ಪ್ರಭಾವಿಗಳು, ಹಣವಂತರು ಈ ಜಾಲಕ್ಕೆ ಸಿಲುಕಿ ಒದ್ದಾಡುತ್ತಿದ್ದಾರೆ ಎನ್ನಲಾಗಿದೆ. ಮತ್ತೊಂದೆಡೆ ಹಲವು ‘ಹನಿ ಟ್ರ್ಯಾಪ್’ ತಂಡಗಳು ಕಾರ್ಯಾಚರಿಸುತ್ತಿರುವ ಮಾಹಿತಿ ಕೇಳಿಬರುತ್ತಿದೆ. ಪೊಲೀಸರ ವಿಸ್ತೃತ ತನಿಖೆಯ ನಂತರವಷ್ಟೇ ಈ ತಂಡಗಳ ಬಗ್ಗೆ ಹೆಚ್ಚಿನ ಮಾಹಿತಿ ಲಭಿಸಬೇಕಾಗಿದೆ.