ತಹಶೀಲ್ದಾರ್ ಸಹಿತ 15 ಅಧಿಕಾರಿಗಳಿಗೆ ದಂಡ
Update: 2017-05-16 22:42 IST
ಅಂಗಡಿಗಳ ಮೇಲೂ ದಾಳಿ: 104 ಪ್ರಕರಣ ದಾಖಲು
ವೀರಾಜಪೇಟೆ, ಮೇ 16: ವೀರಾಜಪೇಟೆ ಪಟ್ಟಣ ಪಂಚಾಯತ್ ವ್ಯಾಪ್ತಿಯ 100 ಮೀಟರ್ ಅಂತರದ ವ್ಯಾಪ್ತಿಯಲ್ಲಿ ಕಾನೂನು ಬಾಹಿರವಾಗಿ ಸಿಗರೇಟ್, ಬೀಡಿ, ಪಾನ್ ಪರಾಗ್ ಸೇರಿದಂತೆ ಇತರ ತಂಬಾಕು ವಸ್ತುಗಳನ್ನು ಬಹಿರಂಗವಾಗಿ ಮಾರಾಟ ಮಾಡುತ್ತಿದ್ದ ಅಂಗಡಿ ಮೇಲೆ ದಾಳಿ ನಡೆಸಲಾಗಿದೆ.
ತಾಲೂಕು ಕಚೇರಿಯ ಆವರಣದಲ್ಲಿ ಧೂಮಪಾನ ನಿಷೇಧದ ನಾಮಫಲಕ ಹಾಕದಿರುವುದರಿಂದ ತಂಬಾಕು ನಿಯಂತ್ರಣ ಮಂಡಳಿಯು ತಹಶೀಲ್ದಾರ್ ಮಹದೇವಸ್ವಾಮಿ ಅವರಿಗೆ ರೂ. 100 ದಂಡ ವಿಧಿಸಿದೆ.
ಮಂಗಳವಾರ ಬೆಳಗ್ಗೆ ಹೈ ಪವರ್ ಮಂಡಳಿಯ ಅಧಿಕಾರಿ ಡಾ.ಜಾನ್ ಕೆನಾಡಿಯ ಅವರ ನೇತೃತ್ವದಲ್ಲಿ ಈ ದಾಳಿ ನಡೆದಿದೆ. ಪಟ್ಟಣ ಪಂಚಾಯತ್ ಅಧಿಕಾರಿಗಳು, ಕ್ಷೇತ್ರ ಶಿಕ್ಷಣಾಧಿಕಾರಿ, ಅಬಕಾರಿ ಇಲಾಖೆ ಹಾಗೂ ನಗರ ಪೊಲೀಸ್ ಠಾಣೆ ಸೇರಿದಂತೆ ನಾಲ್ಕು ತಂಡಗಳನ್ನು ರಚಿಸಿ ಗುಪ್ತ ದಾಳಿ ನಡೆಸಲಾಯಿತು.
ಸಂಜೆಯ ತನಕ ಒಟ್ಟು 104 ಪ್ರಕರಣಗಳು ದಾಖಲಾಗಿವೆ. 18,750 ರೂ. ನಗದನ್ನು ದಂಡದ ರೂಪದಲ್ಲಿ ವಸೂಲಿ ಮಾಡಲಾಗಿದೆ. 22,000 ರೂ. ವೌಲ್ಯದ ಮಾದಕ ವಸ್ತುಗಳನ್ನು ವಶಪಡಿಸಿಕೊಂಡಿದ್ದಾರೆ.
ದಾಳಿ ನಡೆಸಲು ಪೊಲೀಸ್ ಇಲಾಖೆಯ ಅಧಿಕಾರಿ ಎನ್.ಕುಮಾರ್ ಆರಾಧ್ಯ, ನಗರ ಪೊಲೀಸ್ ಸಬ್ಇನ್ಸ್ಪೆಕ್ಟರ್ ಸಂತೋಷ್ ಕಶ್ಯಪ್, ಪಟ್ಟಣ ಪಂಚಾಯತ್ ರೆವಿನ್ಯೂ ಇನ್ಸ್ಪೆಕ್ಟರ್ ತಂಡ, ಅಬಕಾರಿ ಇಲಾಖೆಯ ತಂಡ, ಶಿಕ್ಷಣಾಧಿಕಾರಿಯ ತಂಡ ದಾಳಿಯಲ್ಲಿ ಸಹಕರಿಸಿದ್ದರಿಂದ ಇಷ್ಟೊಂದು ಪ್ರಕರಣ ಪತ್ತೆಯಾಗಲು ಕಾರಣವಾಗಿದೆ.
ವೀರಾಜಪೇಟೆ ಅರಣ್ಯ ಇಲಾಖೆ, ಕೃಷಿ ಇಲಾಖೆ, ಸಂಬಾರ ಮಂಡಳಿ, ಕಾಫಿ ಬೋರ್ಡ್, ಮೂರು ಕಾಲೇಜುಗಳ ಪ್ರಾಂಶುಪಾಲರು, ವಿವಿಧ ಇಲಾಖೆ ಸೇರಿದಂತೆ ಒಟ್ಟು 15ಮಂದಿ ಅಧಿಕಾರಿಗಳಿಗೆ ಧೂಮಪಾನ ನಿಷೇಧದ ನಾಮಫಲಕ ಅಳವಡಿಸದ ಕಾರಣ ದಂಡ ವಿಧಿಸಲಾಗಿದೆ ಎಂದು ಜಾನ್ ಕೆನಾಡಿಯ ತಿಳಿಸಿದ್ದಾರೆ.
ಈ ದಾಳಿಯ ಸಂಬಂಧ ಜಿಲ್ಲಾಧಿಕಾರಿ ಹಾಗೂ ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿ ಆದೇಶ ಹೊರಡಿಸಿ ಕಠಿಣ ಕ್ರಮ ಕೈಗೊಳ್ಳಲು ಮಾರ್ಗದರ್ಶನ ನೀಡಿದ್ದರು. ಈ ಆದೇಶದಂತೆ ಅಧಿಕಾರಿಗಳು ಸಹಕಾರ ನೀಡಿದ್ದಾರೆ. ದಾಳಿ ನಿರಂತರವಾಗಿ ಜಿಲ್ಲೆಯ ವಿವಿಧೆಡೆ ಮುಂದುವರಿಯಲಿದೆ ಎಂದು ಜಾನ್ ಕೆನಾಡಿಯ ತಿಳಿಸಿದ್ದಾರೆ.
ಯಾವುದೇ ಸರಕಾರಿ ಕಚೇರಿಯಾಗಲಿ ನಾಮಫಲಕ ಅಳವಡಿಸದಿರುವುದು, ಸಿಗರೇಟ್, ಬೀಡಿಯನ್ನು ಸೇದಿ ಅದರ ತುಂಡನ್ನು ಕಸದ ಬುಟ್ಟಿಗೆ ಎಸೆದಿರುವುದು ಕಂಡು ಬಂದರೂ ಒಂದು ತುಂಡು ಬೀಡಿಗೂ ತಲಾ ರೂ. 200ರಂತೆ ದಂಡ ವಿಧಿಸಲಾಗುವುದು. ಜಿಲ್ಲಾಧಿಕಾರಿ, ಪೊಲೀಸ್ ಅಧಿಕಾರಿಗಳ ಮಾರ್ಗದರ್ಶನದಂತೆ ವಿವಿಧ ದಿನಾಂಕಗಳನ್ನು ಗೊತ್ತುಪಡಿಸಿ ದಾಳಿ ನಡೆಯಲಿರುವುದಾಗಿ ಜಾನ್ ಕೆನಾಡಿಯ ತಿಳಿಸಿದರು.
ಪೊಲೀಸ್ ಇಲಾಖೆಯ ಅಧಿಕಾರಿ ಕುಮಾರ್ ಆರಾಧ್ಯ ಮಾತನಾಡಿ, ತಂಬಾಕು ನಿಯಂತ್ರಣ ಮಂಡಳಿಯ ಹೈ ಪವರ್ ಸಮಿತಿಗೆ ಈ ವಿಷಯದಲ್ಲಿ ಪೊಲೀಸ್ ಇಲಾಖೆ ಬಂದೋಬಸ್ತ್ ನೊಂದಿಗೆ ಪೂರ್ಣ ಸಹಕಾರ ನೀಡಲಿದೆ ಎಂದರು.