ಡೀಮ್ಡ್ ಫಾರೆಸ್ಟ್: ಜುಲೈ 1 ರೊಳಗೆ ವರದಿ ಸಲ್ಲಿಸಲು ಸೂಚನೆ

ತುಮಕೂರು.ಜೂ.29: ತುಮಕೂರು ಜಿಲ್ಲೆಯಲ್ಲಿ ಗುರುತಿಸಲಾಗಿರುವ 29,132 ಹೆಕ್ಟೇರ್ ಡೀಮ್ಡ್ ಅರಣ್ಯ ಪ್ರದೇಶದಿಂದ ಕೈಬಿಡುವ ಸಂಬಂಧ ಜುಲೈ 1 ರ ಶನಿವಾರದೊಳಗೆ ತಹಶೀಲ್ದಾರರು, ವಲಯ ಅರಣ್ಯಾಧಿಕಾರಿಗಳು ಶಾಸಕರೊಂದಿಗೆ ಚರ್ಚಿಸಿ ಅಂತಿಮ ವರದಿ ಸಲ್ಲಿಸುವಂತೆ ಜಿಲ್ಲಾ ಉಸ್ತುವಾರಿ ಸಚಿವ ಟಿ.ಬಿ.ಜಯಚಂದ್ರ ಸೂಚನೆ ನೀಡಿದ್ದಾರೆ.

ಜಿಲ್ಲಾಧಿಕಾರಿಗಳ ಕಚೇರಿಯಲ್ಲಿಂದು ರಾಜ್ಯದಲ್ಲಿರುವ ಅರಣ್ಯ ಜಾಗಗಳ ಬಗ್ಗೆ ಸುಪ್ರಿಂಕೋರ್ಟಿಗೆ ನೀಡಬೇಕಾಗಿರುವ ಮುಚ್ಚಳಿಕೆ ಪತ್ರ ಕುರಿತಂತೆ ಸಚಿವ ಸಂಪುಟದ ತೀರ್ಮಾನದಂತೆ ಅರಣ್ಯ, ಕಂದಾಯ ಅಧಿಕಾರಿಗಳ ಸಭೆ ನಡೆಸಿದ ಜಿಲ್ಲಾ ಉಸ್ತುವಾರಿ ಸಚಿವರು, ಜಿಲ್ಲಾ ಅರಣ್ಯಾಧಿಕಾರಿ, ತಹಶೀಲ್ದಾರ್ ಮತ್ತು ವಲಯ ಅರಣ್ಯಾಧಿಕಾರಿಗಳು ಸಲ್ಲಿಸಿರುವ ವರದಿಯಲ್ಲಿ ಸಣ್ಣಪುಟ್ಟ ಮಾರ್ಪಾಡುಗಳಿದ್ದು, ಅವುಗಳನ್ನು ಸರಿಪಡಿಸುವ ನಿಟ್ಟಿನಲ್ಲಿ ಮುಂದಿನ ಮೂರು ದಿನಗಳ ಒಳಗೆ ಸಂಬಂಧಪಟ್ಟ ತಾಲೂಕಿನ ಶಾಸಕರ ಸಮ್ಮುಖದಲ್ಲಿ ಅರಣ್ಯ ಮತ್ತು ಕಂದಾಯ ಇಲಾಖೆಯ ಅಧಿಕಾರಿಗಳು ಮತ್ತೊಮ್ಮೆ ಸ್ಥಳ ಪರಿಶೀಲನೆ ನಡೆಸಿ,ಜುಲೈ 1ರ ಶನಿವಾರದೊಳಗೆ ವರದಿ ನೀಡುವಂತೆ ನಿರ್ದೇಶನ ನೀಡಿದರು.

ಸುಪ್ರಿಂಕೋರ್ಟು ತನ್ನಲ್ಲಿ 1995ರಲ್ಲಿ ದಾಖಲಾದ ಅರಣ್ಯ ಜಾಗಕ್ಕೆ ಸಂಬಂಧಿಸಿ ತೀರ್ಪು ನೀಡುವ ಸಂಬಂಧ ಅರಣ್ಯ ಎಂದರೆ ಏನು ಎಂಬುದನ್ನು ಸ್ಪಷ್ಟ ಪಡಿಸಿದ್ದು, ಮೇಲ್ನೋಟಕ್ಕೆ ಅರಣ್ಯ ಜಾಗವೆಂದು ಕಂಡು ಬರುವುದೆಲ್ಲವೂ ಅರಣ್ಯ ಎಂದು ಹೇಳಿದೆ. ಇದರ ಹಿಂದೆ ಪರಿಸರ ಸಂರಕ್ಷಣೆಯ ಘನ ಉದ್ದೇಶವಿದ್ದು, ಇದನ್ನು ಪಾಲಿಸುವ ಉದ್ದೇಶದಿಂದ ರಾಜ್ಯಸರಕಾರ 1998 ಮತ್ತು 2002ರಲ್ಲಿ ಅರಣ್ಯ ಭೂಮಿಯ ಪರಿಷ್ಕೃತ ಪಟ್ಟಿ ನೀಡಲು ಸೂಚಿಸಿದ್ದ ಹಿನ್ನೆಲೆಯಲ್ಲಿ ಇದುವರೆಗೂ ಹಲವಾರು ಸಭೆಗಳು ನಡೆದು 2014 ರಲ್ಲಿ ಸರ್ವೋಚ್ಚ ನ್ಯಾಯಾಲಯಕ್ಕೆ ವರದಿ ಸಲ್ಲಿಸಿದ್ದು, ಸದರಿ ವರದಿಯನ್ನು ಮತ್ತೊಮ್ಮೆ ಪರಿಷ್ಕರಿಸಿ ಅಚಿತಿಮವಾಗಿ ಸಲ್ಲಿಸಲು ಆದೇಶಿಸಿದೆ.

ಈ ಹಿನ್ನೆಲೆಯಲ್ಲಿ ಅಧಿಕಾರಿಗಳು ಈಗಾಗಲೇ ಸಲ್ಲಿಸಿರುವ ವರದಿಯನ್ನು ಪರಿಶೀಲಿಸಿ, ಅದರಲ್ಲಿ ರೈತರು ಬಗರ್ ಹುಕ್ಕಂ ಸಾಗುವಳಿ ಮಾಡುತ್ತಿರುವ, ಈಗಾಗಲೇ ಮನೆ ನಿರ್ಮಿಸಿಕೊಂಡಿರುವ, ಶಾಲಾ ಕಾಲೇಜು ಇರುವ ಜಾಗಗಳನ್ನು ಕೈಬಿಟ್ಟ ಪಟ್ಟಿಯನ್ನು ಪರಿಷ್ಕರಿಸಿ ಸಲ್ಲಿಸುವ ಅಗತ್ಯವಿದೆ ಎಂದು ಸಚಿವ ಟಿ.ಬಿ.ಜಯಚಂದ್ರ ವಿವರಿಸಿದರು.

ಈ ಹಿಂದೆ ಅಂದರೆ 2014ರಲ್ಲಿ ಸಲ್ಲಿಸಿದ ವರದಿಯಂತೆ ತುಮಕೂರು ತಾಲೂಕಿನಲ್ಲಿ 5219, ಕುಣಿಗಲ್ 2053, ಗುಬ್ಬಿ 6438, ತಿಪಟೂರು 1058, ಚಿಕ್ಕನಾಯಕನಹಳ್ಳಿ 3318, ತುರುವೇಕೆರೆ 907, ಮಧುಗಿರಿ 6426, ಶಿರಾ 1606,ಕೊರಟಗೆರೆ 1507, ಪಾವಗಡ 3423 ಹಾಗೂ ಶಾಲಾ ಕಾಲೇಜು, ರಸ್ತೆ ಬದಿ ನೆಟ್ಟಿರುವ ಗಿಡಗಳು ಸೇರಿದಂತೆ ಒಟ್ಟು 38,139.63 ಹೆಕ್ಟೇರ್‌ನ್ನು ಡೀಮ್ಡ್ ಪಾರೆಸ್ಟ್ ಎಂದು ಗುರುತಿಸಲಾಗಿತ್ತು.

ಆದರೆ ಅರಣ್ಯ ಇಲಾಖೆ, ಕಂದಾಯ ಇಲಾಖೆಯ ಅಧಿಕಾರಿಗಳು ಸ್ಥಳಪರಿಶೀಲನೆ ನಡೆಸಿದಾಗ 38,139 ಹೆಕ್ಟೇರ್‌ನಲ್ಲಿ 29,132 ಹೆಕ್ಟೇರ್‌ನ್ನು ಅರಣ್ಯ ವ್ಯಾಪ್ತಿಯಿಂದ ಕೈಬಿಟ್ಟು 10,443 ಹೆಕ್ಟೇರ್‌ನ್ನು ಮಾತ್ರ ಅರಣ್ಯ ಜಾಗವೆಂದು ಡಿನೋಟಿಪೈ ಮಾಡಲು ಸರಕಾರಕ್ಕೆ ಸಲ್ಲಿಸಲಾಗಿದೆ. ಈ ವರದಿಯ ಬಗ್ಗೆಯೂ ಕೆಲ ಶಾಸಕರು ಅಸಮಾಧಾನ ವ್ಯಕ್ತ ಪಡಿಸಿರುವ ಹಿನ್ನೆಲೆಯಲ್ಲಿ ಮುಂದಿನ ಮೂರು ದಿನಗಳ ಒಳಗೆ ಪರಿಷ್ಕೃತ ವರದಿ ನೀಡುವಂತೆ ಸೂಚಿಸಲಾಗಿದೆ. ಒಂದು ವೇಳೆ ಅಧಿಕಾರಿಗಳು ಬದಲಾಯಿಸಿದ ಅಂಕಿ ಅಂಶ ನೀಡದಿದ್ದರೆ, ಈ ಹಿಂದೆ ನೀಡಿರುವ ವರದಿಯನ್ನು ಅಂಗೀಕರಿಸಲು ಸಚಿವ ಸಂಪುಟ ಉಪಸಮಿತಿ ತೀರ್ಮಾನಿಸಲಿದೆ. ಮುಂದಾಗುವ ತೊಂದರೆಗಳಿಗೆ ಸಂಬಂಧಪಟ್ಟ ಅಧಿಕಾರಿಗಳೇ ಹೊಣೆಯಾಗುತ್ತಾರೆ ಎಂದು ಕಾನೂನು ಸಚಿವರು ಎಚ್ಚರಿಕೆ ನೀಡಿದರು.

ವಿಧಾನಪರಿಷತ್ ಸದಸ್ಯ ರಮೇಶ್‌ಬಾಬು ಮಾತನಾಡಿ, ಅರಣ್ಯ ಮತ್ತು ಕಂದಾಯ ಇಲಾಖೆಯವರು ಡಿಮ್ಡ್ ಅರಣ್ಯದಿಂದ ಕೈಬಿಟ್ಟಿರುವ ಬಹುತೇಕ ಸರ್ವೆ ನಂ.ಗಳಲ್ಲಿ ಗಣಿಗಾರಿಕೆ ನಡೆಯುತ್ತಿದೆ. ಇದನ್ನು ಕೈಬಿಡುವ ಮೂಲಕ ಸರಕಾರ ಗಣಿಗಾರಿಕೆಗೆ ಬೆಂಬಲ ನೀಡುತ್ತಿದೆ ಎಂದು ಆರೋಪಿಸಿದ ಅವರು, ಇದು ಸುಪ್ರಿಂಕೋರ್ಟಿನ ನಿಯಮಗಳಿಗೆ ವಿರುದ್ದವಾಗಿದೆ ಎಂದರು.

ಸಭೆಯಲ್ಲಿ ಶಾಸಕರಾದ ಡಾ.ರಫೀಕ್ ಅಹಮದ್, ಬಿ.ಸುರೇಶಗೌಡ, ಎಂ.ಟಿ.ಕೃಷ್ಣಪ್ಪ, ಸುಧಾಕರಲಾಲ್, ರಮೇಶ್‌ಬಾಬು, ಕೆ.ಎಂ.ತಿವ್ಮ್ಮರಾಯಪ್ಪ, ಜಿಲ್ಲಾಧಿಕಾರಿ ಕೆ.ಪಿ.ಮೋಹನರಾಜ್, ಎ.ಡಿ.ಸಿ. ಅನಿತಾ, ಉಪವಿಭಾಗಾಧಿಕಾರಿಗಳಾ ತಬುಸ್ಸಮ್ ಜಹೇರ್, ಡಾ.ವೆಂಕಟೇಶಚ್ಯಿು, ಶಿಲ್ಪಾ, ಅರಣ್ಯ ಸಂರಕ್ಷಣಾಧಿಕಾರಿ ಚಕ್ರಪಾಣಿ ಹಾಗೂ ಎಲ್ಲಾ ತಾಲೂಕುಗಳ ತಹಶಿಲ್ದಾರರು, ಅರಣ್ಯ ಇಲಾಖೆಯ ಅಧಿಕಾರಿಗಳು ಭಾಗವಹಿಸಿದ್ದರು.