ಮಡಿಕೇರಿ: ಹಿರಿಯ ನಾಗರಿಕರ ಕ್ರೀಡಾಕೂಟ

ಮಡಿಕೇರಿ, ಸೆ. 12 :ಇಂದಿನ ಯುವ ಸಮೂಹವೇ ಮುಂದಿನ ದಿನಗಳಲ್ಲಿ ಹಿರಿಯ ನಾಗರೀಕರಾಗಿ ಪರಿವರ್ತನೆಯಾಗುವುದು ಪ್ರಕೃತಿ ಸಹಜ ಪ್ರಕ್ರಿಯೆಯಾಗಿದೆ. ಆದ್ದರಿಂದ ಯುವ ಜನತೆ ಯಾವುದೇ ಕಾರಣಕ್ಕೂ ಹಿರಿಯರನ್ನು ಕಡೆಗಣಿಸದೆ ಗೌರವದಿಂದ ಕಾಣಬೇಕು ಎಂದು ಮಹಿಳಾ ಮತ್ತು ಮಕ್ಕಳ ಕಲ್ಯಾಣ ಇಲಾಖೆಯ ಉಪನಿರ್ದೇಶಕರಾದ ಮುಮ್ತಾಜ್ ಕರೆ ನೀಡಿದ್ದಾರೆ.

ಜಿಲ್ಲಾಡಳಿತ, ಜಿಲ್ಲಾ ಪಂಚಾಯತ್, ಮಹಿಳಾ ಮತ್ತು ಮಕ್ಕಳ ಅಭಿವೃದ್ಧಿ ಇಲಾಖೆ, ವಿಕಲಚೇತನರ ಹಾಗೂ ಹಿರಿಯ ನಾಗರಿಕರ ಸಬಲೀಕರಣ ಇಲಾಖೆ ಹಾಗೂ ವಿವಿಧ ಸ್ವಯಂ ಸೇವಾ ಸಂಸ್ಥೆಗಳ ಸಂಯುಕ್ತಾಶ್ರಯದಲ್ಲಿ ನಗರದ ಗಾಂಧಿ ಮೈದಾನದಲ್ಲಿ ನಡೆದ ಜಿಲ್ಲಾ ಮಟ್ಟದ ಹಿರಿಯ ನಾಗರಿಕರ ಕ್ರೀಡಾಕೂಟ ಹಾಗೂ ಸಾಂಸ್ಕೃತಿಕ ಸ್ಪರ್ಧೆಗಳ ಕಾರ್ಯಕ್ರಮವನ್ನು ಉದ್ಘಾಟಿಸಿ ಅವರು ಮಾತನಾಡಿದರು.

ಇಂದು ಹಿರಿಯರು ತಮ್ಮ ಜೀವನದಲ್ಲಿ ನಡೆಯುವ ಕೆಲವೊಂದು ಸಂದರ್ಭಗಳನ್ನು ಒಪ್ಪಿಕೊಳ್ಳಲು ಸಾಧ್ಯವಿಲ್ಲ, ಅವುಗಳಲ್ಲಿ ಮುಪ್ಪು ಕೂಡ ಒಂದಾಗಿದೆ. ಅದರೆ ಅವುಗಳನ್ನು ಮರೆತು ಜೀವನದಲ್ಲಿ ದೊರೆಯಬಹುದಾದ ಎಲ್ಲಾ ಸಂದರ್ಭಗಳನ್ನು ಬಳಸಿಕೊಂಡು ಸಾಧನೆ ಮಾಡುವುದೇ ಜೀವನದ ಅತೀ ಮೌಲ್ಯಯುತ ಕ್ಷಣವಾಗಿದೆ ಎಂದು ಅಭಿಪ್ರಾಯಪಟ್ಟರು. ಕೂಡು ಕುಟುಂಬಗಳು ಬೇರ್ಪಡುತ್ತಾ ಇರುವುದರಿಂದ ಹಿರಿಯರು ಬೀದಿಗೆ ಬರುವ ಸಂದರ್ಭಗಳನ್ನು ಇಂದು ಹೆಚ್ಚಾಗಿ ಕಾಣಬಹುದಾಗಿದೆ. ನಮ್ಮೊಂದಿಗೆ ಇರುವವರನ್ನು ಒಬ್ಬಂಟಿಯಾಗಿ ನೋಡದೆ ಗೌರವಯುತವಾಗಿ ನೋಡಿಕೊಳ್ಳವುದು ಸಮುದಾಯದ ಜವಬ್ದಾರಿಯಾಗಿದೆ. ಹಿರಿಯರ ಬಗ್ಗೆ ಅಸಡ್ಡೆ ತೋರದೆ ಗೌರವವನ್ನು ನೀಡುವ ಮತ್ತು ಪ್ರೀತಿ ತೋರುವ ಗುಣವನ್ನು ಇಂದಿನ ಯುವ ಸಮೂಹ ಬೆಳೆಸಿಕೊಳ್ಳಬೇಕೆಂದು ಮುಮ್ತಾಜ್ ತಿಳಿಸಿದರು.

ಹಿರಿಯ ನಾಗರಿಕ ಫೋರಂನ ಕಾರ್ಯದರ್ಶಿಗಳಾದ ಲೀಲಾವತಿ ಮಾತನಾಡಿ, ನಮ್ಮಿಂದ ಏನೂ ಆಗದು ಎನ್ನುವ ಮನೋಭಾವನೆಯನ್ನು ಹಿರಿಯರು ಮೊದಲು ಬಿಡಬೇಕು ಎಂದು ಸಲಹೆ ನೀಡಿದರು. ತಮ್ಮ ಆರೋಗ್ಯವನ್ನು ಕಾಪಾಡಿಕೊಳ್ಳುವ ಜೊತೆಗೆ ಶಿಸ್ತಿನ ಜೀವನ ನಡೆಸುವುದು ಮುಖ್ಯವೆಂದರು. ತಮಗೆ ಎದುರಾಗುವ ಕಷ್ಟಗಳನ್ನು ಕಷ್ಟ ಎಂದು ಭಾವಿಸದೆ ಅದನ್ನು ಎದುರಿಸುವ ಮೂಲಕ ಸಮಾಜದಲ್ಲಿ ಗೌರವಯುತವಾಗಿ ಜೀವನ ನಡೆಸಬೇಕೆಂದು ಲೀಲಾವತಿ ಹೇಳಿದರು.

ಜಿಲ್ಲಾ ಪಂಚಾಯತ್ ಉಪಾಧ್ಯಕ್ಷರಾದ ಲೋಕೇಶ್ವರಿ ಗೋಪಾಲ್  ಮಾತನಾಡಿ, ಮುಪ್ಪನ್ನು ಲೆಕ್ಕಿಸದೆ ಛಲದಿಂದ ಜೀವನದ ಗುರಿ ಸಾಧಿಸಬೇಕೆಂದರು. ಆಧುನಿಕ ಯುಗದ ಯುವ ಸಮೂಹ ಹಿರಿಯರ ಸಲಹೆ ಸೂಚನೆಗಳಿಗೆ ಗೌರವ ನೀಡದೆ ದುಶ್ಚಟಗಳಿಗೆ ದಾಸರಾಗುತ್ತಿರುವುದು ಬೇಸರದ ವಿಚಾರವೆಂದು ಅಭಿಪ್ರಾಯಪಟ್ಟರು.

ಕಾರ್ಯಕ್ರಮದಲ್ಲಿ ಹಿರಿಯ ನಾಗರಿಕ ಫೋರಂನ ಪದಾಧಿಕಾರಿಗಳಾದ ಅರವಿಂದ ಮೊಣ್ಣಪ್ಪ, ದೇವರಾಜ್ ಮತ್ತಿತರ ಪ್ರಮುಖರು ಹಾಗೂ ಅಧಿಕಾರಿಗಳು ಹಾಜರಿದ್ದರು.     
ವಿವಿಧ ಆಟೋಟ ಸ್ಪರ್ಧೆಗಳು ಮತ್ತು ವೈವಿಧ್ಯಮಯ ಸಾಂಸ್ಕøತಿಕ ಪೈಪೋಟಿಗಳಲ್ಲಿ ಹಿರಿಯ ನಾಗರೀಕರು “ನಾವು ಯಾರಿಗೇನು ಕಮ್ಮಿ” ಎಂದು ಪಾಲ್ಗೊಂಡು ಗಮನ ಸೆಳೆದರು.