ಮೃಗಾಲಯಗಳ ಅಭಿವೃದ್ಧಿಯಲ್ಲಿ ಜನರ ಬಾಗವಿಕೆ ಬಹಳ ಮುಖ್ಯ: ಡಾ.ಡಿ.ಎನ್.ಸಿಂಗ್

ಮೈಸೂರು,ಡಿ.18- ಮೃಗಾಲಯಗಳ ಅಭಿವೃದ್ಧಿಯಲ್ಲಿ ಸಾರ್ವಜನಿಕರ ಭಾಗವಹಿಸುವಿಕೆ ಮುಖ್ಯವಾಗಿರುತ್ತದೆ ಎಂದು ನವದೆಹಲಿಯ ಕೇಂದ್ರ ಮೃಗಾಲಯ ಪ್ರಾಧಿಕಾರದ ಸದಸ್ಯ ಕಾರ್ಯದರ್ಶಿ ಡಾ.ಡಿ.ಎನ್.ಸಿಂಗ್ ಅಭಿಪ್ರಾಯಿಸಿದರು.

ನಗರದ ಖಾಸಗಿ ಹೋಟೆಲ್‍ನಲ್ಲಿ ಸೋಮವಾರ ಏರ್ಪಡಿಸಿದ್ದ “ಭಾರತ ಮೃಗಾಲಯಗಳು-2030 ದೃಷ್ಟಿಕೋನ” ಕುರಿತ ನಾಲ್ಕು ದಿನಗಳ ಸಮ್ಮೇಳನದ ಅಧ್ಯಕ್ಷತೆ ವಹಿಸಿ ಅವರು ಮಾತನಾಡಿದರು.

ದೇಶದ ಮೃಗಾಲಯಗಳ ವ್ಯವಸ್ಥೆಯಡಿಯಲ್ಲಿ ಗಮನಿಸಿದಾಗ ಎರಡು ರೀತಿಯ ವ್ಯವಸ್ಥೆಯನ್ನು ಕಾಣಸಿಗುತ್ತಿವೆ. ಕೆಲವೆಡೆ ಸ್ವಾತಂತ್ಯ್ರ ಬಳಿಕ ಮೃಗಾಲಯಗಳ ಅಭಿವೃದ್ಧಿ ಹೊಂದಿದ್ದರೆ, ಇನ್ನೂ ಕೆಲವೆಡೆ ಅಭಿವೃದ್ಧಿ ಮಂದಗತಿಯಲ್ಲಿದೆ. ಹಾಗಾಗಿ ಮೃಗಾಲಯಗಳ ಅಭಿವೃದ್ಧಿಯಲ್ಲಿ ಜನರ ಭಾಗವಹಿಸುವಕೆ ಮುಖ್ಯವಾಗುತ್ತದೆ. ಆದರೆ, ಜನರು ಮೃಗಾಲಯಕ್ಕೆ ಬರುವ ಮುನ್ನವೇ ಕೇಳುವುದು ಪ್ರಾಣಿಗಳಿಗೆ ಉತ್ತಮ ಆಹಾರ ನೀಡುತ್ತೀರಾ, ಪ್ರವಾಸಿಗರಿಗೆ ಒಳ್ಳೆಯ ವ್ಯವಸ್ಥೆ ಇದಿಯೇ ಎಂಬೆಲ್ಲಾ ಪ್ರಶ್ನೆಗಳಿಗೆ ಸಮರ್ಥವಾಗಿ ಉತ್ತರಿಸಬಲ್ಲವೇ ಎಂಬುದನ್ನು ನಾವುಗಳು ಆತ್ಮಾವಲೋಕನ ಮಾಡಿಕೊಳ್ಳಬೇಕಿದೆ ಎಂದರು. 

ಮ್ಯಾಕನಿಕಲ್ ಕೆಲಸ ಮಾಡಲು ಜೂ ಗೆ ಬರಬೇಡಿ: ಮ್ಯಾಕನಿಕಲ್ ಕೆಲಸ ಮಾಡಲು ಮೃಗಾಲಯಗಳಿಗೆ ಬರಬಾರದು. ಪ್ರಾಣಿಗಳ ಮೇಲೆ ಪ್ರೀತಿ ಇಲ್ಲದ ಅಧಿಕಾರಿಗಳಿದ್ದರೆ ಅಂತಹವರು ವರ್ಗಾವಣೆ ಪಡೆದುಕೊಳ್ಳಿ. ಮೃಗಾಲಯ ಅಭಿವೃದ್ಧಿಯಲ್ಲಿ ಅಧಿಕಾರಿಯಾದವರೂ ಮೊದಲು ಮಾಡಬೇಕಾದ ಕೆಲಸವೆಂದರೆ ತಮ್ಮ ಮೃಗಾಲಯದಲ್ಲಿ ಬರುವ ಜನರಿಗೆ ಕೊಡುವ ನೀರನ್ನು ಮೊದಲು ತಾವು ಕುಡಿಯಬೇಕು. ಅಲ್ಲದೆ, ಸಾರ್ವಜನಿಕರ ಶೌಚಾಲಯವನ್ನು ತಾವು ಬಳಸುವಂತಾಗಬೇಕು. ಆಗ ಮೃಗಾಲಯವು ತಾನಾಗಿಯೇ ಪ್ರವಾಸಿ ಸ್ನೇಹಿ ಮೃಗಾಲಯ ಆಗಲಿದೆ ಎಂದರು. 

ಮಹಾರಾಜರು ಮನರಂಜನೆಗಾಗಿ ಮೃಗಾಲಯವನ್ನು ಅಂದು ತೆರೆದರು. ಆದರೆ, ಇಂದು ಪ್ರಾಣಿಗಳ ಸಂಖ್ಯೆ ಕ್ಷಿಣಿಸಿದ್ದು, ಪ್ರಾಣಿಗಳ ಸಂರಕ್ಷಣೆ ದೃಷ್ಟಿಯಲ್ಲಿ ಮೃಗಾಲಯಗಳು ಕಾರ್ಯನಿರ್ವಹಿಸಬೇಕಿದೆ. ಹಾಗಾಗಿ ಪ್ರತಿಯೊಂದು ಮೃಗಾಲಯದ ಅಧಿಕಾರಿಗಳು ಪ್ರಾಣಿಗಳಿಗೆ ಪೌಷ್ಠಿಕ ಆಹಾರ, ನೀರು ನೀಡುತ್ತಿದ್ದೇವೆಯೇ ಹಾಗೂ ಪ್ರಾಣಿಗಳ ಆರೋಗ್ಯವನ್ನು ಉತ್ತಮವಾಗಿ ಕಾಪಾಡುತ್ತಿದ್ದೇವೆಯೇ ಎಂಬುದನ್ನು ಪ್ರಶ್ನಿಸಿಕೊಳ್ಳಬೇಕಿದೆ. ಮೃಗಾಲಯದಲ್ಲಿರುವ ಸಮಸ್ಯೆಗಳ ನಿವಾರಣೆಗೆ ನಿಮ್ಮ ಕೈಯಲ್ಲಿ ಆಗದಿದ್ದರೆ, ಪ್ರಾಧಿಕಾರಕ್ಕೆ ತಿಳಿಸಿ ನಾವು ಸದಾ ನಿಮ್ಮ ಸೇವೆಗೆ ಇದ್ದೇವೆ. 1992 ರಲ್ಲಿ ಪ್ರಾಧಿಕಾರವೇ ಹಾಕಿಕೊಂಡಿರುವ ನಿಯಂತ್ರಣ ಕಾಯ್ದೆಯ ಪ್ರಾಥಮಿಕ ನಿಯಮಗಳನ್ನು ಅರಿತುಕೊಳ್ಳುವುದು ಅತ್ಯಗತ್ಯವಾಗಿದೆ ಎಂದು ತಿಳಿಸಿದರು. 

ಸಮ್ಮೇಳನವನ್ನು ಉದ್ಘಾಟಿಸಿದ ಕರ್ನಾಟಕ ಮೃಗಾಲಯದ ಪ್ರಾಧಿಕಾರದ ಅಧ್ಯಕ್ಷೆ ಮಲ್ಲಿಗೆ ವೀರೇಶ್ ಮಾತನಾಡಿ, 125 ವರ್ಷ ಕಳೆದಿರುವ ಮೈಸೂರಿನ ಶ್ರೀ ಜಯಚಾಮರಾಜೇಂದ್ರ ಮೃಗಾಲಯ ಸಾಕಷ್ಟು ಅಭಿವೃದ್ಧಿಯನ್ನು ಕಂಡಿದೆ. ಸ್ವಚ್ಛತೆ, ಹಸಿರೀಕರಣ ಹಾಗೂ ಪ್ರಾಣಿ ಸಂರಕ್ಷಣೆಯಲ್ಲಿ ದೇಶದ ಮೊದಲ ಸ್ಥಾನದಲ್ಲಿದೆ. ಅಲ್ಲದೆ ಪ್ರವಾಸಿ ನಗರವಾಗಿರುವ ಮೈಸೂರಿನ ಆಕರ್ಷಣೀಯಲ್ಲಿ ಪ್ರಮುಖವಾಗಿ ಪ್ರವಾಸಿಗರನ್ನು ಆಕರ್ಷಿಸಿದೆ ಎಂದು ತಿಳಿಸಿದರು. 

ಕೇಂದ್ರ ಮೃಗಾಲಯ ಪ್ರಾಧಿಕಾರದ ಸದಸ್ಯ ಸಿ.ಎಸ್.ಯಾಲಕ್ಕಿ ಮಾತನಾಡಿ, ಪ್ರಾಧಿಕಾರದಿಂದಲೇ ಮೃಗಾಲಯದ ನಿರ್ವಹಣೆ ಅಸಾಧ್ಯದ ಮಾತಾಗಿದೆ. ಮೃಗಾಲಯದ ನಿರ್ವಹಣೆ ಮಾಡುವುದು ಸವಾಲಿನ ಕೆಲಸವಾಗಿರುವುದನ್ನು ಗಂಭೀರವಾಗಿ ಪರಿಗಣಿಸಬೇಕಿದೆ. ಪ್ರಾಣಿಗಳಿಗೆ ಉತ್ತಮ ಆಹಾರ, ಆರೋಗ್ಯ ಕಾಪಾಡುವುದು ನಮ್ಮ ಆದ್ಯ ಕರ್ತವ್ಯವಾಗಬೇಕಿದೆ. ಇನ್ನೂ ಬರುವ ಪ್ರವಾಸಿಗರಿಗೆ ಕುಡಿಯುವ ನೀರಿನ ಜತೆಗೆ ಉತ್ತಮ ರೀತಿಯ ವ್ಯವಸ್ಥೆ ಕಲ್ಪಿಸಿದರೆ, ತಾನಾಗಿಯೇ ಪ್ರವಾಸೋದ್ಯಮ ಅಭಿವೃದ್ಧಿಯಾಗಲಿದೆ ಎಂದು ಹೇಳಿದರು. 

ದೇಶದ ಮೃಗಾಲಯ ಈಗಿರುವ ಪರಿಸ್ಥಿತಿ ಆತ್ಮಾವಲೋಕನ, ಪ್ರಾಣಿಗಳ ಹಿತದೃಷ್ಟಿಯೊಂದಿಗೆ ಮೃಗಾಲಯಕ್ಕೆ ಹೆಚ್ಚಿನ ಪ್ರವಾಸಿಗರನ್ನು ಸೆಳೆಯುವುದು. ಮೃಗಾಲಯದ ಮೂಲಕ ಪ್ರಾಣಿ ಸಂತತಿ ವೃದ್ಧಿಸುವ ಚಿಂತನೆ ಹಾಗೂ ಮುಂದಿನ 2030 ವರೆಗೆ ಕೈಗೊಳ್ಳಬೇಕಾದ ಕ್ರಮಗಳ ಕುರಿತು ಸಮಗ್ರ ಚರ್ಚೆ ಹಾಗೂ ಅವುಗಳನ್ನು ಕಾರ್ಯರೂಪಕ್ಕೆ ತರುವಲ್ಲಿ ಇರುವ ಸವಾಲುಗಳನ್ನು ಸಮ್ಮೇಳನದಲ್ಲಿ ಚರ್ಚಿಸಿ ನಿರ್ಧರಿಸಲಿದೆ. 30 ಮಂದಿ ಮೃಗಾಲಯದ ನಿರ್ದೇಶಕರು, ಹಿರಿಯ ಅಧಿಕಾರಿಗಳು ಹಾಗೂ 20 ಮಂದಿ ಸಂಪನ್ಮೂಲ ತಜ್ಞರು ಕೇಂದ್ರ ಮೃಗಾಲಯ ಪ್ರಾಧಿಕಾರ ಸಹಯೋಗದಲ್ಲಿ ನಡೆಯುವ ಈ ಸಮ್ಮೇಳನದಲ್ಲಿ ಭಾಗವಹಿಸಿದ್ದರು. 

ಇಂದು ಮತ್ತು ನಾಳೆ ನಗರದ ಖಾಸಗಿ ಹೋಟೆಲ್‍ನಲ್ಲಿ ಸಮ್ಮೇಳನ ನಡೆಯಲಿದ್ದು, ನ.20 ಮತ್ತು 21 ರಂದು ಕಬಿನಿಯ ಖಾಸಗಿ ಹೋಟೆಲ್‍ನಲ್ಲಿ ನಡೆಯಲಿದೆ. 

“ಮೈಜೂ ಆಪ್” ಬಿಡುಗಡೆ: ಪ್ರವಾಸಿಗರಿಗಾಗಿ ಇದೇ ಮೊಟ್ಟಮೊದಲ ಬಾರಿಗೆ ಮೃಗಾಲಯದ ಸಮಗ್ರ ಮಾಹಿತಿಯನ್ನು ನೀಡುವ ಮೈಜೂ ಆಪ್ ಅನ್ನು ಇದೇ ವೇಳೆ ಬಿಡುಗಡೆಗೊಳಿಸಲಾಯಿತು.