ಕೋಲಾರ: ಮಾನವತಾವಾದ ಪಸರಿಸಿದ ಮಹಾನ್ ಸಾಹಿತಿ ಕುವೆಂಪು; ಜೆ.ಜೆ. ನಾಗರಾಜ್

ಕೋಲಾರ, ಡಿ.29 :  ಮನುಜಮತ ವಿಶ್ವಪಥದ ಪರಿಕಲ್ಪನೆಯ ಮೂಲಕ ಮಾನವತಾವಾದವನ್ನು ಪಸರಿಸಿದ ಮಹಾನ್ ಸಾಹಿತಿ ಕುವೆಂಪು. ಕನ್ನಡದ ಎಲ್ಲಾ ಪ್ರಶಸ್ತಿ ಪುರಸ್ಕಾರಗಳಿಗೆ ಭಾಜನಾಗುವುದರ ಮೂಲಕ ಸಾಹಿತಿಗಳಿಗೆ ಹಜ್ಜೆಗುರುತಾದರು ಎಂದು  ಜಿಲ್ಲಾ ಕನ್ನಡ ಸಾಹಿತ್ಯ ಪರಿಷತ್ ನಿಕಟಪೂರ್ವ ಅಧ್ಯಕ್ಷ ಜೆ.ಜೆ. ನಾಗರಾಜ್ ತಿಳಿಸಿದರು.

ರಾಷ್ಟ್ರಕವಿ ಕುವೆಂಪುರವರ ಜನ್ಮ ದಿನಾಚರಣೆಯ ಅಂಗವಾಗಿ ಕನ್ನಡ ಜಾನಪದ ಕಲಾ ಸಂಘ ಜನ್ನಘಟ್ಟ, ಹಳ್ಳಿಹಾಡು  ಸಾಂಸ್ಕೃತಿಕ ಮತ್ತು ಜಾನಪದ ಕಲಾ ಸಂಘ ಮತ್ತಿಕುಂಟೆ ಇವರು ನಗರದ ಸರ್ಕಾರಿ ಬಾಲಕೀಯರ ಪದವಿಪೂರ್ವ ಕಾಲೇಜಿನಲ್ಲಿ ಕುಂವೆಂಪು ಗೀತ ಗಾಯನ, ವಿಶೇಷ ಉಪನ್ಯಾಸ ಮತ್ತು ಚರ್ಚಾಸ್ಪರ್ಧೆಯಲ್ಲಿ ಭಾಗವಹಿಸಿದ ವಿದ್ಯಾರ್ಥಿಗಳಿಗೆ ಬಹುಮಾನ ವಿತರಿಸಿ ಮಾತನಾಡುತ್ತಿದ್ದರು.

ಕುವೆಂಪು ದೇವರ ಇರುವಿಕೆಯನ್ನು ಒಪ್ಪುತ್ತಾ ಪ್ರಕೃತಿ ದೇವತೆಗೆ ಆದ್ಯತೆ ನೀಡಿದ್ದರು. ಕನ್ನಡ ನಾಡು ನುಡಿ ವಿಚಾರವಾಗಿ ರಾಜಿ ಮಾಡಿಕೊಳ್ಳದೆ ಮಾತನಾಡುತ್ತಾ ಸರ್ಕಾರಕ್ಕೆ ವಿರೋಧ ಮಾಡಿಕೊಂಡವರು. ತಮಗೆ ನೋಟಿಸ್ ನೀಡಿದ ಸರ್ಕಾರಕ್ಕೆ ‘ಅಖಂಡ ಕರ್ಣಾಟಕ’ ಪದ್ಯ ಬರೆದು ಉತ್ತರಿಸಿದ ಕನ್ನಡದ ವೀರ. ರಾಮಕೃಷ್ಣ ಪರಮಹಂಸ ಹಾಗೂ ವಿವೇಕಾನಂದರು ಇವರ ಬದುಕಿನ ಮೇಲೆ ಅಪಾರ ಪ್ರಭಾವ ಬೀರಿದ್ದರಿಂದ ಬದುಕನ್ನು ಶಾಂತಿಯಿಂದ ಕೂಡಿರಬೇಕೆಂದು ಕರೆ ನೀಡಿದರು.

ಅನೇಕ ನಾಟಕಗಳು ರಚಿಸುವುದರ ಮೂಲಕ ಶೋಷಿತರ ಬದುಕಿನ ದೊಡ್ಡ ಶಕ್ತಿಯಾಗಿ ಸಾಹಿತಿಯಾಗಿ ಹೊರಹೊಮ್ಮುತ್ತಾರೆ. ಅವರ ಶೂದ್ರತಪಸ್ವಿ, ಬೆರಳ್‍ಗೆ ಕೊರಳ್, ಜಲಗಾರ ನಾಟಕಗಳು ಮನುಷ್ಯನ ವಿವೇಚ್ಯ ಶಕ್ತಿಗೆ ಕನ್ನಡಿ ಹಿಡಿಯುತ್ತದೆ. ಪ್ರಕೃತಿಕವಿ ಕುವೆಂಪು ಇಂದು ನಮಗೆ ಅನಿವಾರ್ಯವಾಗಿದ್ದಾರೆ. ಇಂದು ನಮಗೆ ವಿಶ್ವಜ್ಞಾನದ ಅಂಬೇಡ್ಕರ್, ವಿಶ್ವಶಾಂತಿ ದಿನದ ಗಾಂಧೀಜಿ, ವಿಶ್ವ ಮಾನವ ಸಂದೇಶದ ಕುವೆಂಪು ಅನಿವಾರ್ಯವಾಗಿದ್ದಾರೆ ಎಂದರು.

ಮಾನವ ಹಕ್ಕುಗಳ ಜಾಗೃತಿ ಸಮಿತಿಯ ರೈತ ಸಮಿತಿಯ ಜಿಲ್ಲಾಧ್ಯಕ್ಷ ಶಿವಕುಮಾರಗೌಡ ಮಾತನಾಡಿ ಕನ್ನಡಕ್ಕಾಗಿ ಕೈಎತ್ತು ನಿನ್ನ ಕೈ ಕಲ್ಪವೃಕ್ಷವಾಗುತ್ತದೆ ಎಂಬ ನುಡಿ ನೀಡಿದ ಕುವೆಂಪು ಇಂದು ನಮ್ಮ ನಾಡಿಗೆ ಆದರ್ಶವಾಗಿದಾರೆ. ನಾವೆಲ್ಲಾ ಮಾನವರಾಗೋಣ ಎಂಬ ಕರೆ ನೀಡಿದ್ದು, ಅನಿಕೇತನದ ಮೂಲಕ ಅವರ ಆಶಯಗಳು ನಮ್ಮದಾಗಲಿ ಎಂದರು.

ಅವಾಡ್ರ್ಸ್ ಸಂಸ್ಥೆಯ ಅಧ್ಯಕ್ಷ ನರಸಾಪುರ ನಾರಾಯಣಸ್ವಾಮಿ ಮಾತನಾಡಿ ಕರ್ನಾಟಕದ ಇತಿಹಾಸದಲ್ಲಿ ಮಹತ್ತರ ದಿನ ಈ ದಿನವಾಗಿದೆ. ಜಾತಿ, ಧರ್ಮ, ಮತಗಳಾಚೆ ಹೋಗಬೇಕೆನ್ನುವುದು ಕುವೆಂಪು ಅವರ ಆಶಯವಾಗಿತ್ತು. ಅವರ ಸಾಹಿತ್ಯ ವಿಚಾರಗಳು ಅತ್ಯಂತ ಶ್ರೇಷ್ಠ ಮಟ್ಟದ್ದಾಗಿದ್ದರಿಂದ ಅವರನ್ನು ‘ರಸಋಷಿ’ ಎಂದು ಕರೆಯುಲಾಗಿದೆ. ವಿದ್ಯಾರ್ಥಿಗಳು, ಮಹಿಳೆಯರು ದೇಶವನ್ನು ಕಟ್ಟಬೇಕಾಗಿದೆ. ಮುಂದೆ ‘ಮಹಿಳಾ ಯುಗ’ ಬರಬೇಕಾಗಿದೆ. ಸಮಾನತೆ ಬೇಕೆಂದು ಕುವೆಂಪು ಆಶಯವಾಗಿತ್ತು ಎಂದರು.

ಕಲಾವಿದ ಜನ್ನಘಟ್ಟ ಕೃಷ್ಣಮೂರ್ತಿ ಮಾತನಾಡಿ ಸಾಹಿತಿಗಳ ಜನ್ಮದಿನೋತ್ಸವವನ್ನು ಶಾಲಾ ಕಾಲೇಜುಗಳಲ್ಲಿ ಅರ್ಥಪೂರ್ಣವಾಗಿ ಆಚರಿಸಬೇಕು. ವಿದ್ಯಾರ್ಥಿಗಳ ಜ್ಞಾನ ವಿಸ್ತಾರಗಳು ಎಂಥಾ ಕಾರ್ಯಕ್ರಮಗಳಾಗುತ್ತವೆ ಎಂಬುದರ ಮೇಲೆ ನಿರ್ಧಾರವಾಗುತ್ತದೆ ಎಂದರು.

ಇದೇ ಸಂದರ್ಭದಲ್ಲಿ ಕುವೆಂಪುರವರ ಭಾವಗೀತೆಗಳನ್ನು ಹಾಡಿದರು. ಗೀತ ಗಾಯವನ್ನು ಎಂ.ವಿ. ಕೃಷ್ಣಪ್ಪ  ಹಾಡಿದರು. ವಿದ್ಯಾರ್ಥಿನಿಯರಿಂದ ಕುವೆಂಪು ಕುರಿತು ಚರ್ಚಾ ಸ್ಪರ್ಧೆ ಏರ್ಪಸಲಾಗಿದ್ದು, ವಿಜೇತರಿಗೆ ಬಹುಮಾನ ವಿತರಿಸಲಾಯಿತು. ವೇದಿಕೆಯ ಅಧ್ಯಕ್ಷತೆಯನ್ನು ಕಾಲೇಜು ಪ್ರಾಂಶುಪಾಲ ಕೃಷ್ಣಮೂರ್ತಿ, ಸ್ವಾಗತವನ್ನು ಉಪನ್ಯಾಸಕ ಅಶ್ವಥಗೌಡ, ಕಾವ್ಯ ವಂದಿಸಿದರು.