ಶಿವಮೊಗ್ಗ: ವಿಕಿಪೀಡಿಯಾದಲ್ಲಿ ಕನ್ನಡ ಬಳಕೆ ಕುರಿತಂತೆ ಕಾರ್ಯಾಗಾರ

ಶಿವಮೊಗ್ಗ, ಜ.6: ವಿಕಿಪೀಡಿಯಾ ಒಂದು ಸ್ವಯಂ ಸೇವಾ ಸಂಸ್ಥೆಯ ರಚನೆಯಾಗಿದ್ದು, ಇದನ್ನು ಯಾರು ಬೇಕಾದರೂ ಬದಲಾಯಿಸಬಹುದು. ಇದೊಂದು ಸ್ವತಂತ್ರ ವಿಶ್ವಕೋಶವಾಗಿದೆ ಎಂದು ಅಂತರಜಾಲ ತಜ್ಞ ಯು.ಟಿ. ಪವನಜ ಹೇಳಿದ್ದಾರೆ.

ವಿಕಿಪೀಡಿಯಾದಲ್ಲಿ ಕನ್ನಡ ಎಂಬ ವಿಚಾರವಾಗಿ ಎಟಿಎನ್‍ಸಿಸಿಯಲ್ಲಿ ಶನಿವಾರ ಏರ್ಪಡಿಸಲಾಗಿದ್ದ ಕಾರ್ಯಕ್ರಮದಲ್ಲಿ ಅವರು ಮಾತನಾಡಿದರು. 
2003 ರಲ್ಲಿ ಕನ್ನಡ ವಿಕಿಪೀಡಿಯಾ ಆರಂಭವಾಗಿದ್ದು. ಇದರಲ್ಲಿ ಯಾರು ಬೇಕಾದರೂ ಬರೆಯಬಹುದು. ಆದರೆ, ಅದು ಸಂಶೋಧನಾತ್ಮಕ ಮಾಹಿತಿಯನ್ನು ಒಳಗೊಂಡಿರಬೇಕು. ಉತ್ತಮ ಶೈಲಿಯಲ್ಲಿ, ಪ್ರಪಂಚಕ್ಕೆಲ್ಲ ಉಪಯೋಗವಾಗುವಂತಹ ವಿಚಾರಗಳನ್ನು ಮಾತ್ರ ಇದರಲ್ಲಿ ಬರೆಯಬಹುದು. ವೈಯಕ್ತಿಕ ಅಭಿಪ್ರಾಯ, ವಿಮರ್ಶೆ, ಕಥೆ, ಕವನ ಮುಂತಾದವುಗಳಿಗೆ ಆಸ್ಪದವಿಲ್ಲ ಎಂದರು.

ವಿಕಿಪೀಡಿಯಾದಲ್ಲಿ ಲೇಖನ ಬರೆಯುವಾಗ ಅದು ರಂಜನೀಯವಾಗಿರಬಾರದು. ಹೊಗಳಿಕೆ ಅಥವಾ ತೆಗಳಿಕೆ, ವಿಶೇಷಣ ಸಲ್ಲದು. ಕಾವ್ಯಮಯ ಶೀರ್ಷಿಕೆ, ಉಪಮೆ, ಕಥಾರೂಪ ಇರಬಾರದು. ವಿಶ್ವದ 294 ಭಾಷೆಯಲ್ಲಿ ವಿಕಿಪೀಡಿಯಾ ಲಭ್ಯವಿದ್ದು, ಇದರಲ್ಲಿ ಭಾರತದ 23 ಭಾಷೆಗಳಿವೆ ಎಂದರು.

ವಿಕಿಪೀಡಿಯಾದಲ್ಲಿ ಹೊಸ ಮಾಹಿತಿ, ಸಾಹಿತ್ಯ, ಸಂಸ್ಕೃತಿ ಬಗ್ಗೆ ಬರೆಯಬಹುದು. ಪುಸ್ತಕ, ಬ್ಲಾಗ್, ಪತ್ರಿಕೆಯಲ್ಲಾಗಲಿ ಬರೆದಂತೆ ಇಲ್ಲಿ ಬರೆಯಲಾಗದು. ಏಕೆಂದರೆ ಇದು ಅಂತರಜಾಲದಲ್ಲಿ ವಿಶ್ವದಾದ್ಯಂತ ಸಿಗುವ ಮಾಹಿತಿ ಕೋಶವಾಗಿದೆ. ವಿಷಯಾಧಾರಿತವಾಗಿ ಬರೆಯುವವರಿಗೆ ಇದು ಒಳ್ಳೆಯ ಅವಕಾಶವನ್ನು ತೆರೆದಿಟ್ಟಿದೆ ಎಂದ ಅವರು ಕನ್ನಡದಲ್ಲಿ ಜಗತ್ತಿನ ಜ್ಞಾನವನ್ನು ಹೆಚ್ಚಿನ ಪ್ರಮಾಣದಲ್ಲಿ ಪ್ರಚುರಗೊಳಿಸಬೇಕು ಎಂದಾದಲ್ಲಿ ಈ ಮಾಧ್ಯಮವನ್ನು ಸಮರ್ಪಕವಾಗಿ ಬಳಸಿಕೊಳ್ಳಬೇಕೆಂದು ಕರೆ ನೀಡಿದರು.

ಇಲ್ಲಿ ಬರೆಯುವಾಗ ಶುದ್ಧ ಭಾಷೆ ವ್ಯಾಕರಣ ಸಹಿತದ ಸಾಲುಗಳು ಇರಬೇಕು. ಮಾಹಿತಿ ಸಾಹಿತ್ಯವನ್ನು ಇದು ನಿರ್ಮಿಸುವಂತಿರಬೇಕು. ವಿಶೇಷವಾಗಿ ವಿಜ್ಞಾನ ಮತ್ತು ತಂತ್ರಜ್ಞಾನಗಳು, ಲೇಖನಗಳು ಇದರಲ್ಲಿ ಹೆಚ್ಚು ಜನಪ್ರಿಯವಾಗುತ್ತಿವೆ. ಮೆಕ್ಯಾನಿಕಲ್ ಇಂಜಿನಿಯರಿಂಗ್ ಕುರಿತಂತೆ ವಿಶ್ವದಲ್ಲಿ ಈವರೆಗೆ ಕನ್ನಡದಲ್ಲಿ ಲಭ್ಯವಿರದ ಸುಮಾರು 80 ರಷ್ಟು ಲೇಖನಗಳನ್ನು ಇದರಲ್ಲಿ ಅಳವಡಿಸಲಾಗಿದೆ ಎಂದರು.

ಅಗತ್ಯ ಮಾಹಿತಿಗಳು ಕನ್ನಡದಲ್ಲೇ ನಮಗೆ ಈ ವಿಶ್ವಕೋಶದ ಮೂಲಕ ಲಭ್ಯವಾಗುತ್ತಿವೆ. ಆದರೆ ಇದರಲ್ಲಿ ಲೇಖನ ಬರೆಯುವವರು ಯಾವುದೇ ಇತರ ಆಕರಗಳಿಂದ ಮಾಹಿತಿಯನ್ನು ಪಡೆದು ಹಾಗೆಯೇ ಬರೆಯಬಾರದು. ಕೃತಿಚೌರ್ಯ ಇದರಲ್ಲಿ ನಿಷಿದ್ಧವಾಗಿದ್ದು, ಎಚ್ಚರಿಕೆಯಿಂದ ಬರೆಯುವವರನ್ನು ಇದರಲ್ಲಿ ಕಾಣಬಹುದು. ಕನ್ನಡವನ್ನು ಜನರು ಹೆಚ್ಚು ಬಳಸಬೇಕು ಎನ್ನುವವರು ಇದರ ಲಾಭ ಪಡೆಯಬಹುದು. ಕನ್ನಡದಲ್ಲಿ ಈ ವಿಶ್ವಕೋಶ ಲಭ್ಯವಾಗುವ ಮೂಲಕ ಎಲ್ಲಾ ವಿಚಾರಗಳನ್ನು, ಮಾಹಿತಿಗಳನ್ನು ನಿಖರವಾಗಿ ಪಡೆಯಲು ಸಾಧ್ಯವಾಗಿದೆ ಎಂದರು.