ಶಿಕಾರಿಪುರ : ಅಂಬಿಗರ ಚೌಡಯ್ಯ ಜಯಂತಿ ಆಚರಣೆ

ಶಿಕಾರಿಪುರ,ಜ.21 ಸಮಾಜದಲ್ಲಿನ ಮೇಲು ಕೀಳು ಎಂಬ ಬೇಧಬಾವ ಹೋಗಲಾಡಿಸಿ ಪ್ರತಿ ವೃತ್ತಿಗೆ ನಿರ್ದಿಷ್ಟ ಮೌಲ್ಯವಿದೆ ಎಂಬುದನ್ನು 12 ನೇ ಶತಮಾನದಲ್ಲಿ ಹಲವು ಶರಣರು ಸಾಬೀತುಪಡಿಸಿ ಸಾಮಾಜಿಕ ಬದಲಾವಣೆಗಾಗಿ ಶ್ರಮಿಸಿದ್ದು ಅವರ ಮೇಲ್ಪಂಕ್ತಿ ಎಲ್ಲರಿಗೂ ಆದರ್ಶವಾಗಬೇಕು ಎಂದು ಶಾಸಕ ಬಿ.ವೈ ರಾಘವೇಂದ್ರ ತಿಳಿಸಿದರು.

ರವಿವಾರ ಪಟ್ಟಣದ ತಾ.ಪಂ ಸಭಾಂಗಣದಲ್ಲಿ ತಾಲೂಕು ಆಡಳಿತ,ತಾ.ಪಂ,ತಾ.ಗಂಗಾಮತಸ್ಥ ಸಮಾಜ(ರಿ) ವತಿಯಿಂದ ನಡೆದ ಶ್ರೀ ನಿಜಶರಣ ಅಂಬಿಗರ ಚೌಡಯ್ಯ ಜಯಂತಿ ಕಾರ್ಯಕ್ರಮವನ್ನು ಉದ್ಘಾಟಿಸಿ ಅವರು ಮಾತನಾಡಿದರು.

ಶರಣರು ಕೇವಲ ನಿರ್ದಿಷ್ಟ ಜಾತಿಗೆ ಸೀಮಿತವಾಗಬಾರದು,ಜಾತಿಯನ್ನು ಮೀರಿ ಸಮಾಜಕ್ಕೆ ನೀಡಿದ ಕೊಡುಗೆಯನ್ನು ಸ್ಮರಿಸಿ ಜಯಂತಿ ಆಚರಣೆ ಮೂಲಕ ಇಂದಿನ ಪೀಳಿಗೆಗೆ ಶರಣರ ಮೇಲ್ಪಂಕ್ತಿಯನ್ನು ಅನುಸರಿಸುವ ದಿಸೆಯಲ್ಲಿ ಸರ್ಕಾರ 62 ಶರಣರ ಜಯಂತಿ ಆಚರಣೆ ಜಾರಿಗೊಳಿಸಿದೆ ಎಂದ ಅವರು 12 ನೇ ಶತಮಾನದಲ್ಲಿ ಬಸವಣ್ಣ ಅಲ್ಲಮ್ಮಪ್ರಭು ಮತ್ತಿತರ ಶರಣ ಶರಣೆಯರ ಸಾನಿದ್ಯದಲ್ಲಿ ಸಮಾನ ಜೀವನ ನಿರ್ಮಾಣಕ್ಕಾಗಿ ಅಂಬಿಗರ ಚೌಡಯ್ಯನವರು ಹೊಳೆ ದಾಟಿಸುವ ವೃತ್ತಿಯ ಮೂಲಕ ತೊಡಗಿಸಿಕೊಂಡಿದ್ದರು ಎಂದು ತಿಳಿಸಿದರು.

ಸಮಾಜದಲ್ಲಿ ಮೇಲು ಕೀಳು ಎಂಬ ತಾತ್ಸಾರ ಮನೋಭಾವ ವಿಪರೀತವಾಗಿದ್ದ ಅವಧಿಯಲ್ಲಿ ಬದಲಾವಣೆಗಾಗಿ ಅಂಬಿಗರ ಚೌಡಯ್ಯ ಶ್ರಮಿಸಿದ್ದಾರೆ ಎಂದ ಅವರು ಪ್ರತಿ ವೃತ್ತಿಗೆ ತನ್ನದೇ ಆದ ವೌಲ್ಯವಿದ್ದು ಪರರಿಗಾಗಿ ಜೀವದ ಹಂಗು ತೊರೆದು ಹೊಳೆ ದಾಟಿಸುವ ಕಾಯಕದ ಜತೆಗೆ ಆಹಾರವನ್ನು ಒದಗಿಸುತ್ತಿರುವ ಗಂಗಾಮತಸ್ಥರು ವಿಶ್ವಾಸ,ನಂಬಿಕೆಗೆ ಅರ್ಹರಾಗಿದ್ದಾರೆ.ಶರಣರ ಕನಸು ಸಂದೇಶ ಇಂದು ಅತ್ಯಂತ ಪ್ರಸ್ತುತವಾಗಿದ್ದು ಸದೃಡ ಸಮಾಜ ನಿರ್ಮಾಣದಲ್ಲಿ ಅವರ ಜೀವನ ಪದ್ದತಿಯನ್ನು ಪ್ರತಿಯೊಬ್ಬರೂ ಅನುಸರಿಸಬೇಕಾಗಿದೆ ಎಂದು ತಿಳಿಸಿದರು.

ಸತತ 3 ವರ್ಷದಿಂದ ಭೀಕರ ಬರಗಾಲ ಆವರಿಸಿದ್ದು ಕೆರೆಕಟ್ಟೆಗಳು ಬರಿದಾಗಿ ವೃತ್ತಿನಿರತರಿಗೆ ಬಯ ಸಹಜ ಎಂದ ಅವರು ಚಳಿ ಹೆಚ್ಚಾಗಿರುವುದರಿಂದ ಈ ಬಾರಿ ಉತ್ತಮ ಮಳೆಯಾಗಲಿದೆ ಎಂಬ ತಜ್ಞರ ಅಭಿಪ್ರಾಯದ ರೀತಿ ಆಶಾಬಾವನೆಯಿಂದ ಬದುಕಲು ಸಲಹೆ ನೀಡಿದರು.

ವಿಶೇಷ ಉಪನ್ಯಾಸಕರಾಗಿ ಕುಸ್ಕೂರು ಸರ್ಕಾರಿ ಹಿರಿಯ ಪ್ರಾಥಮಿಕ ಶಾಲೆಯ ಸಹ ಶಿಕ್ಷಕ ರಾಜು ಮಾತನಾಡಿ,ಪ್ರತಿ ಶರಣರು ಸತ್ಯವನ್ನು ಬದುಕಾಗಿಸಿ,ಬದುಕು ಸತ್ಯವಾಗಿಸಿ ಉಸಿರಾಗಿಸಿಕೊಂಡು ಪ್ರಾಣವನ್ನು ಪಣಕ್ಕಿಟ್ಟು ಸಮಾಜದ ಬದಲಾವಣೆಗಾಗಿ ಶ್ರಮಿಸಿದ್ದಾರೆ ಎಂದರು. ತಳ ಸಮುದಾಯಕ್ಕೆ ಸೇರಿದ ಶರಣಶರಣೆಯರು ಬಸವಣ್ಣನವರ ನೇತೃತ್ವದಲ್ಲಿ ಕಾಯಕ ಚಳುವಳಿ ಮೂಲಕ ಸಂಘಟಿತರಾಗಿ ಜಡ್ಡುಗಟ್ಟಿದ್ದ ವೈದಿಕ ಸಂಪ್ರದಾಯದ ಸಮಾಜಕ್ಕೆ ಹೊಸ ಚೈತನ್ಯವನ್ನು ದೊರಕಿಸಿಕೊಡುವಲ್ಲಿ ಸಫಲರಾದರು ಎಂದು ತಿಳಿಸಿದರು.

ಅಧ್ಯಕ್ಷತೆಯನ್ನು ತಾ.ಗಂಗಾಮತಸ್ಥರ ಸಮಾಜದ ಅಧ್ಯಕ್ಷ ನಿವೃತ್ತ ಯೋಧ ಬಸವರಾಜ್ ಕಪ್ಪನಹಳ್ಳಿ ವಹಿಸಿ ಮಾತನಾಡಿದರು.ವೇದಿಕೆಯಲ್ಲಿ ಜಿ.ಪಂ ಸದಸ್ಯ ನರಸಿಂಗನಾಯ್ಕ,ರೇಣುಕಾ,ತಾ.ಪಂ ಸದಸ್ಯೆ ಶಿಲ್ಪ, ತಹಸೀಲ್ದಾರ್ ಶಿವಕುಮಾರ್,ರಶ್ಮಿ,ಶೈಲಜಾ,ಇಒ ಆನಂದಕುಮಾರ್ ಮುಖಂಡ ವಸಂತಗೌಡ, ಚನ್ನವೀರಪ್ಪ, ರುದ್ರಮುನಿ,ಸತ್ಯನಾರಾಯಣ,ಪರಶುರಾಮ ಮತ್ತಿತರರು ಉಪಸ್ಥಿತರಿದ್ದರು.