54 ಇಂಚಿನ ಎದೆಯವರ ಪಕ್ಷ ರಾಜ್ಯದಲ್ಲಿ 50 ಸೀಟು ಗೆಲ್ಲುವುದಿಲ್ಲ : ಜಿಗ್ನೇಶ್ ಮೇವಾನಿ

ಚಿಕ್ಕಮಗಳೂರು, ಮೇ 3: ಪ್ರಧಾನಿ ನರೇಂದ್ರ ಮೋದಿ ಅವರು ಪ್ರಧಾನಿ ಆಗುವುದಕ್ಕೂ ಮುನ್ನ ದೇಶದ ಯುವಜನರು 'ಅಚ್ಛೇದಿನ್' ಬರುವ ಕನಸು ಕಂಡಿದ್ದರು. ಎಲ್ಲರಿಗೂ ಉದ್ಯೋಗ ಸಿಗುವ ನಿರೀಕ್ಷೆ ಹೊಂದಿದ್ದರು, ರೈತರು ಸಾಲ ಮನ್ನಾದ ಕನಸು ಕಂಡಿದ್ದರು. ಆದರೆ ಮೋದಿ ಅಧಿಕಾರಕ್ಕೆ ಬಂದ ನಂತರ ಕೊಟ್ಟ ಭರವಸೆಗಳ ಬಗ್ಗೆ ಅವರು ಮಾತನಾಡದೇ ಕೇವಲ ಗೋವು, ಗೋ ಮೂತ್ರದ ಬಗ್ಗೆ ಮಾತನಾಡುತ್ತಿದ್ದಾರೆ. ಅವರು ಕೊಟ್ಟ ಭರವಸೆಗಳ ಬಗ್ಗೆ ಪ್ರಶ್ನಿಸಿದರೇ ಮಾತನಾಡಲೂ ಅವಕಾಶ ನೀಡುತ್ತಿಲ್ಲ ಎಂದು ಗುಜರಾತ್ ಶಾಸಕ ಜಿಗ್ನೇಶ್ ಮೇವಾನಿ ವಾಗ್ದಾಳಿ ನಡೆಸಿದ್ದಾರೆ.

ಚಿಕ್ಕಮಗಳೂರು ನಗರದ ಅಂಡೇಛತ್ರದಲ್ಲಿ ಗುರುವಾರ ಸಂಜೆ ಏರ್ಪಡಿಸಲಾಗಿದ್ದ ಸಂವಿಧಾನ ಉಳಿಸಿ ಸ್ವಾಭಿಮಾನಿ ಸಮಾವೇಶ ಕಾರ್ಯಕ್ರಮದಲ್ಲಿ ಭಾಗವಹಿಸಿ ಮಾತನಾಡಿದ ಅವರು, ಮೋದಿ ಅವರು ಅಧಿಕಾರಕ್ಕೆ ಬರುವ ಮುನ್ನ ದೇಶದ ಜನರಿಗೆ ನೀಡಿದ ಭರವಸೆಗಳನ್ನು ಹುಸಿಗೊಳಿಸಿದ್ದಾರೆ. ಈ ಬಗ್ಗೆ ದೇಶಾದ್ಯಂತ ಜನತೆ ಪ್ರಧಾನಿ ಅವರನ್ನು ಪ್ರಶ್ನಿಸಲಾರಂಭಿಸಿದ್ದಾರೆ. ಪ್ರಶ್ನೆಗಳಿಗೆ ಉತ್ತರಿಸಲಾಗದ ಮೋದಿ ಅವರು ದಿವ್ಯ ಮೌನಕ್ಕೆ ಶರಣಾಗಿದ್ದಾರೆ. ಪ್ರಶ್ನಿಸುವವರನ್ನು ಪೊಲೀಸರು, ಸರಕಾರಿ ಅಧಿಕಾರಿಗಳ ಮೂಲಕ ಹತ್ತಿಕ್ಕುತ್ತಿದ್ದಾರೆ. ದೇಶದಲ್ಲಿ ಮೋದಿ ಅವರ ಯುಗಾಂತ್ಯ ಆರಂಭವಾಗಿದ್ದು, ಕರ್ನಾಟಕದಲ್ಲಿ ಮೋದಿ ಅವರ ಅವಸಾನಕ್ಕೆ ಮೊದಲ ಮೊಳೆ ಬೀಳಲಿದೆ ಎಂದ ಅವರು, ದೇಶದಲ್ಲಿ 420 ರಾಜಕಾರಣಿ ಎಂಬವರಿದ್ದರೇ ಅದು ನರೇಂದ್ರ ಮೋದಿ ಮಾತ್ರ. ಮೋದಿ ಅವರದ್ದು ನಿಜವಾಗಿಯೂ 54 ಇಂಚಿನ ಎದೆಯಾಗಿದ್ದರೇ ಕರ್ನಾಟಕದಲ್ಲಿ 50 ಸೀಟು ಗೆದ್ದು ತೋರಿಸಲಿ ಎಂದು ಜಿಗ್ನೇಶ್ ಸವಾಲು ಹಾಕಿದರು.

ಮೋದಿ ಅವರು ಹೋದಲ್ಲೆಲ್ಲಾ ಸುಳ್ಳುಗಳನ್ನೇ ಹೇಳುತ್ತಿದ್ದಾರೆ. ಇದರ ವಿರುದ್ಧ ದೇಶದಲ್ಲಿ ಜನಾಕ್ರೋಶದ ಅಲೆ ಎದ್ದಿರುವುದು ಅವರಲ್ಲಿ ಭೀತಿಗೆ ಕಾರಣವಾಗಿದೆ. ಈ ಕಾರಣಕ್ಕೆ ಮೋದಿ ಅವರ 'ಮನ್ ಕೀ ಬಾತ್‍'ನಲ್ಲಿ ಧಮ್ ಇಲ್ಲದಂತಾಗಿದೆ. ಅವರ ಭಾಷಣದಲ್ಲಿ ದೇಶದ ಸಮಸ್ಯೆಗಳ ಕುರಿತು ಮಾತಿಲ್ಲ. ಅವರಿಗೆ ಹೇಳಲೂ ಏನೂ ಇಲ್ಲ, ದೇಶದಲ್ಲಿ ಸಮಸ್ಯೆಗಳೇ ಇಲ್ಲ ಎಂಬಂತೆ ಮಾತನಾಡುತ್ತಿದ್ದಾರೆ. ಸುಳ್ಳುಗಳನ್ನೇ ಪದೆ ಪದೇ ಹೇಳುತ್ತಿದ್ದಾರೆ. ಗೋವು, ಗೋಮೂತ್ರದ ಬಗ್ಗೆ ಮಾತನಾಡುತ್ತಿದ್ದಾರೆ. ಸಂವಿಧಾನ ಬದಲಾಯಿಸುವ ಮಾತನಾಡುತ್ತಿದ್ದಾರೆ ಎಂದು ಆರೋಪಿಸಿದ ಅವರು, ನಮಗೆ ಮಾತನಾಡಲು ಸಾಕಷ್ಟು ವಿಷಯಗಳಿವೆ. ರೈತರು, ಕಾರ್ಮಿಕರು, ಬಡವರು, ಮಹಿಳೆಯರ ಸಮಸ್ಯೆಗಳ ಬಗ್ಗೆ ನಾವು ಮಾತನಾಡುತ್ತಿದ್ದೇವೆ. ಈ ವರ್ಗದವರಿಗೆ ಮೋದಿ ಕೊಟ್ಟ ಮಾತೇನಾಯಿತೆಂಬುದರ ಬಗ್ಗೆ ಮಾತ್ರ ಮಾತನಾಡುತ್ತಿದ್ದೇವೆಯೇ ಹೊರತು ಸುಳ್ಳುಗಳನ್ನು ಪೊಣಿಸಿ ಮಾತನಾಡುತ್ತಿಲ್ಲ. ದೇಶದ ಮೂಲೆ ಮೂಲೆಯಲ್ಲೂ ಇದನ್ನೇ ಮಾತನಾಡುತ್ತೇವೆ. ಮೋದಿ ಕೊಟ್ಟ ಉದ್ಯೋಗದ ಭರವಸೆ ಏನಾಯಿತು? ಮಹಿಳೆಯರ ಮೇಲೆ ನಿರಂತರ ದೌರ್ಜನ್ಯ ತಡೆಯಲು ಸಾಧ್ಯವಾಗುತ್ತಿಲ್ಲ ಯಾಕೆ? ರೈತರ ಸಾಲ ಮನ್ನಾ ಯಾಕಿಲ್ಲ? ಬೇಳೆ, ಡೀಸೆಲ್, ಪೆಟ್ರೋಲ್ ಬೆಲೆ ಹೆಚ್ಚಳವಾಗುತ್ತಿದೆ ಯಾಕೆ, ದಲಿತರು, ಅಲ್ಪಸಂಖ್ಯಾತರ ಮೇಲಿನ ಹತ್ಯೆ, ಹಲ್ಲೆಗಳ ಬಗ್ಗೆ ಮೌನವೇಕೆ? ಎಂಬ ಪ್ರಶ್ನೆಗಳಿಗೆ ಪ್ರಧಾನಿ ಮೋದಿ ಉತ್ತರ ನೀಡಬೇಕೆಂದರು.

ರೈತರ ಸಾಲ ಮನ್ನಾ ಮಾಡಿ ಎಂದರೆ ದೇಶ ದಿವಾಳಿಯಾಗುತ್ತದೆ ಎನ್ನುವ ಮೋದಿ, ನೀರವ್ ಮೋದಿಯಂತಹ ಉದ್ಯಮಿಗಳು ಸರಕಾರಿ ಸ್ವಾಮ್ಯದಲ್ಲಿನ 80 ಸಾವಿರ ಕೋ. ರೂ. ಸಾಲ ಪಡೆದು ದೇಶ ಬಿಟ್ಟು ಓಡಿ ಹೋಗಲು ಬಿಟ್ಟರು. ಉದ್ಯೋಗ ಸೃಷ್ಟಿ ಮಾಡಿ ಎಂದರೆ ಪಕೋಡ ಮಾರಿ ಎಂದರು. ರೈತರ ಆತ್ಮಹತ್ಯೆ ತಡೆಯಿರಿ ಎಂದರೆ ಪ್ರಧಾನಿ ಉಪವಾಸ ಮಾಡಿದರು. ಮೋದಿ ಅವರ ಸುಳ್ಳುಗಳನ್ನು ಕೇಳಲು ಇನ್ನು ಜನ ಸಿದ್ಧರಿಲ್ಲ. ಮೋದಿ ಅವರ ಮುಖದಲ್ಲಿ ಸೋಲು ಕಾಣುತ್ತಿದೆ. ಗುಜರಾತಿ ವ್ಯಕ್ತಿಯಿಂದಲೇ ಮೋದಿಗೆ ಸೋಲಾಗಿದೆ ಎಂದು ಮೇವಾನಿ ನುಡಿದರು.

ನಾನು ಯಾವುದೇ ರಾಜಕೀಯ ಪಕ್ಷದ ವಕ್ತಾರನಲ್ಲ. ನನಗೆ ಕೆಲ ರಾಜಕೀಯ ಪಕ್ಷಗಳೊಂದಿಗೆ ಭಿನ್ನಾಭಿಪ್ರಾಯವಿದೆ. ಆದರೆ ನನಗೆ ಈ ಪಕ್ಷಗಳು ಮತ್ತು ಭಿನ್ನಾಭಿಪ್ರಾಯಕ್ಕಿಂತ ಮೊದಲು ಸಂವಿಧಾನಕ್ಕೆ ಸಂಚಕಾರವಾಗಿರುವ ಬಿಜೆಪಿಯನ್ನು ಬೇರು ಸಹಿತ ಕಿತ್ತೆಸೆಯಬೇಕಿದೆ. ಮೋದಿಯ ವಿರುದ್ಧ ದೇಶದಲ್ಲಿ ಜನಾಂದೋಲ ಆರಂಭವಾಗಬೇಕಿದೆ ಇದಕ್ಕಾಗಿ ದೇಶಾದ್ಯಂತ ನನ್ನಂತವರ ಹೋರಾಟವಾಗಿರಲಿದೆ. ಕರ್ನಾಟಕದ ಚುನಾವಣೆ ಇದಕ್ಕೆ ನಾಂದಿಯಾಗಲಿದೆ. ಇಲ್ಲಿಂದಲೇ ಬಿಜೆಪಿ ಅವಸಾನ ಆರಂಭವಾಗಲಿದೆ. ಕರ್ನಾಟಕದಲ್ಲಿ ಈ ಚುನಾವಣೆಯಲ್ಲಿ ಪ್ರತೀ ಕ್ಷೇತ್ರದಲ್ಲಿ ಶೇ.70 ಮತಚಲಾವಣೆಯಾಗಬೇಕು ಮತ್ತು ಈ ಮತಗಳು ಸಂವಿಧಾನದ ಪರ ಇರುವ ಅಭ್ಯರ್ಥಿಗಳಿಗೆ ಹಾಕಬೇಕೆಂದು ಅವರು ಕರೆ ನೀಡಿದರು.

ಕಾರ್ಯಕ್ರಮದಲ್ಲಿ ನಟ ಪ್ರಕಾಶ್ ರೈ 'ರೆಡ್ ಅಲರ್ಟ್ - ದೇಶ ಆಪತ್ತಿನಲ್ಲಿ' ಎಂಬ ಕಿರು ಹೊತ್ತಿಗೆ ಬಿಡುಗಡೆ ಮಾಡಿ ಮಾತನಾಡಿದರು. ಕೋಮುಸೌಹಾರ್ದ ವೇದಿಕೆಯ ಕೆ.ಎಲ್.ಅಶೋಕ್, ಗೌಸ್ ಮೊಹಿದ್ದೀನ್, ಇರ್ಷಾದ್ ಅಹ್ಮದ್, ಕಲ್ಕುಳಿ ವಿಠಲ್ ಹೆಗ್ಡೆ ಮಾತನಾಡಿದರು.