ಜಿಪಂ ನರೇಗಾ, ಜಾಬ್ ಕಾರ್ಡ್ ಹಗರಣ ತನಿಖೆಗೆ ಲೋಕಾಯುಕ್ತಕ್ಕೆ ದೂರು: ರವೀಶ್ ಕ್ಯಾತನಬೀಡು

ಚಿಕ್ಕಮಗಳೂರು, ಜೂ.23: ಕಳೆದ 10 ವರ್ಷಗಳಿಂದ ಜಿಲ್ಲಾ ಪಂಚಾಯತ್‍ನಲ್ಲಿ ನರೇಗಾ ಯೋಜನೆ, ಜಾಬ್ ಕಾರ್ಡುಗಳ ಖರೀದಿ, ಬೋರ್‍ವೆಲ್‍ಗಳ ನಿರ್ಮಾಣ ಹಾಗೂ ಟ್ಯಾಂಕರ್ ಗಳ ಮೂಲಕ ಕುಡಿಯುವ ನೀರು ಸರಬರಾಜಿನಲ್ಲಿ ವ್ಯಾಪಕ ಭ್ರಷ್ಟಾಚಾರ ನಡೆದಿದೆ. ಈ ಬಗ್ಗೆ ಜಿಪಂ ಆಡಳಿತಾರೂಢ ಬಿಜೆಪಿ ಪಕ್ಷದವರೇ ಆರೋಪ ಮಾಡುತ್ತಿದ್ದು, ಸದಸ್ಯರ ಆಡಳಿತ ವೈಫಲ್ಯವನ್ನು ಎತ್ತಿ ತೋರಿಸಲಾಗುತ್ತಿದೆ. ಜಿಪಂ ಅವ್ಯವಹಾರಗಳ ಸಮಗ್ರ ತನಿಖೆಗಾಗಿ ಲೋಕಾಯುಕ್ತಕ್ಕೆ ದೂರು ಸಲ್ಲಿಸಲಾಗುವುದು ಎಂದು ಕಾಂಗ್ರೆಸ್ ಜಿಲ್ಲಾ ಉಪಾಧ್ಯಕ್ಷ ಹಾಗೂ ಶಾಶ್ವತ ನೀರಾವರಿ ಹೋರಾಟ ಸಮಿತಿ ಸದಸ್ಯ ರವೀಶ್ ಕ್ಯಾತನಬೀಡು ತಿಳಿಸಿದ್ದಾರೆ.

ಶನಿವಾರ ನಗರದಲ್ಲಿ ಕರೆಯಲಾಗಿದ್ದ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಅವರು, ಜಿಪಂನಲ್ಲಿ ನರೇಗಾ ಯೋಜನಯಡಿಯಲ್ಲಿ ನಡೆಯುತ್ತಿರುವ ಅವ್ಯವಹಾರ ಹಾಗೂ ಸಿಇಒ ಅವರ ಸರ್ವಾಧಿಕಾರ ಧೋರಣೆ ಬಗ್ಗೆ ಜಿಲ್ಲಾ ಪಂಚಾಯತ್ ಸದಸ್ಯರೇ ದೂರುತ್ತಿದ್ದಾರೆ. ಆದರೆ ಈ ಅವ್ಯವಹಾರಗಳಿಗೆ ಕಡಿವಾಣು ಹಾಕುವಲ್ಲಿ ಆಡಳಿತಾರೂಢ ಪಕ್ಷವಾದ ಬಿಜೆಪಿ ವಿಫಲವಾಗಿದೆ. ಈ ವೈಪಲ್ಯದಿಂದಾಗಿ ಜಿಲ್ಲಾ ಪಂಚಾಯತ್‍ನಲ್ಲಿ ನಡೆಯುತ್ತಿರುವ ಹಗರಣಗಳು ಒಂದೊಂದಾಗಿ ಬೆಳಕಿಗೆ ಬರುತ್ತಿದೆ ಎಂದು ಆರೋಪಿಸಿದ ಅವರು, ಜಿಪಂನಲ್ಲಿ ಕಾರ್ಯನಿರ್ವಹಿಸುವ ಸಿಇಒರಿಂದ ಹಿಡಿದು ಎಲ್ಲ ಅಧಿಕಾರಿಗಳು ಭಷ್ಟಾಚಾರದ ಕೇಂದ್ರಬಿಂದುಗಳಾಗಿದ್ದಾರೆಂದು ದೂರಿದರು.

ತಾಲೂಕಿನ ನಿಢಘಟ್ಟ, ದೇವನೂರು, ಚಿಕ್ಕದೇವನೂರು ಗ್ರಾಪಂ ವ್ಯಾಪ್ತಿಯಲ್ಲಿ ತೀವ್ರ ಕುಡಿಯುವ ನೀರಿನ ಅಭಾವ ಇರುವ ಹಿನ್ನೆಲೆಯಲ್ಲಿ ವಿಧಾನಸಭೆ ಚುನಾವಣೆಗೂ ಮುನ್ನ ಈ ಭಾಗದ ರೈತ ಮುಖಂಡರು ಹಿಂದಿನ ಸರಕಾರದ ಗ್ರಾಮೀಣಾಭಿವೃದ್ಧಿ ಸಚಿವರನ್ನು ಭೇಟಿ ಮಾಡಿ ಸಮಸ್ಯೆ ಬಗ್ಗೆ ಮನವರಿಕೆ ಮಾಡಿದ್ದರು. ಇದರ ಫಲವಾಗಿ ನಿಢಘಟ್ಟ ಗ್ರಾಪಂಗೆ 30 ಲಕ್ಷ, ದೇವನೂರು ಮತ್ತು ಚಿಕ್ಕದೇವನೂರು ಗ್ರಾಪಂ ವ್ಯಾಪ್ತಿಗೆ ತಲಾ 15 ಲಕ್ಷ ರೂ. ಸೇರಿದಂತೆ ಒಟ್ಟು 60 ಲಕ್ಷ ರೂ. ವಿಶೇಷ ಅನುದಾನ ಅನುದಾನ ಬಿಡುಗಡೆ ಮಾಡಿದ್ದರು. ಆದರೆ ಈ ಅನುದಾನದಲ್ಲಿ ಬೋರ್‍ವೆಲ್ ಕೊರೆಯಲು ನೀತಿ ಸಂಹಿತೆ ಅಡ್ಡಿಯಾಗದಿದ್ದರೂ ಚುನಾವಣಾ ನೀತಿ ಸಂಹಿತೆ ನೆಪದಲ್ಲಿ ಉದ್ದೇಶಪೂರ್ವಕವಾಗಿ ಶಾಸಕ ಸಿ.ಟಿ.ರವಿ ಹಸ್ತಕ್ಷೇಪ ಮಾಡಿ, ಅಡ್ಡಗಾಲು ಹಾಕಿದ್ದರಿಂದ ಕಾಮಗಾರಿ ನಡೆಯಲಿಲ್ಲ. ಶಾಸಕರು ಈ ಕಾಮಗಾರಿಯನ್ನು ತಾವು ಹೇಳಿದ ಗುತ್ತಿಗೆ ದಾರರಿಗೆ ಮಾತ್ರ ನೀಡಬೇಕೆಂದು ಪಟ್ಟ ಹಿಡಿದು ಯೋಜನೆ ಅನುಷ್ಠಾನಕ್ಕೆ ತಡೆ ಮಾಡಿದ್ದಾರೆಂದು ಅವರು ಇದೇ ವೇಳೆ ದೂರಿದರು.

ವಿಧಾನಸಭೆ ಚುನಾವಣೆ ವೇಳೆ ವಿವಿಧ ರಾಜಕೀಯ ಪಕ್ಷಗಳ ಮುಖಂಡರು ನೀರಿನ ಸಮಸ್ಯೆ ಇದ್ದ ಲಕ್ಯಾ, ಸಖರಾಯಪಟ್ಟಣ ಹೋಬಳಿ ವ್ಯಾಪ್ತಿಯ ವಿವಿಧ ಗ್ರಾಮಗಳಲ್ಲಿ ಮತಗಳಿಕೆ ಉದ್ದೇಶದಿಂದ ಸ್ವಂತ ಖರ್ಚಿನಲ್ಲಿ ಕೆಲವು ಬೋರ್‍ವೆಲ್‍ಗಳನ್ನು ಕೊರೆಸಿದ್ದಾರೆ. ಈ ಪೈಕಿ ರಘುರಾಮ್ ಎಂಬವರು ಸ್ವಂತ ಖರ್ಚಿನಲ್ಲಿ ಕೊರೆಸಿದ್ದ ಬೋರ್‍ವೆಲ್‍ಗಳಿಗೆ ಶಾಸಕ ಸಿಟಿ ರವಿ ಅವರ ಸಹಕಾರದೊಂದಿಗೆ ಹಿಂದಿನ ಸರಕಾರ ನೀಡಿದ 60 ಲಕ್ಷ ರೂ. ಅನುದಾನದಲ್ಲೇ ಬಿಲ್ ಮಾಡಿಕೊಳ್ಳಲು ಹುನ್ನಾರ ನಡೆಸಿದ್ದಾರೆ. ಅಲ್ಲದೇ ಚುನಾವಣಾ ವೇಳೆ ಕೆಲ ಗ್ರಾಮಗಳಿಗೆ ಟ್ಯಾಂಕರ್ ಮೂಲಕ ನೀರು ಪೂರೈಕೆ ಮಾಡಿದ್ದು, ಅದಕ್ಕೂ ಅನುದಾನಲ್ಲಿ ಬಿಲ್ ಮಾಡಿಕೊಳ್ಳಲು ಮುಂದಾಗಿದ್ದಾರೆ. ಅಧಿಕಾರಿಗಳುನ ಯಾವುದೇ ಕಾರಣಕ್ಕೂ ಇದಕ್ಕೆ ಅವಕಾಶ ನೀಡಬಾರದು. ಬಿಲ್ ಮಾಡಿದಲ್ಲಿ ಉಗ್ರ ಪ್ರತಿಭಟನೆ ಹಮ್ಮಿಕೊಳ್ಳುವುದಾಗಿ ರವೀಶ್ ಎಚ್ಚರಿಸಿದರು.

ನರೇಗಾ ಯೋಜನೆಯಡಿಯಲ್ಲಿ ಜಿಪಂ ಅಧಿಕಾರಿಗಳು ಹಾಗೂ ಹೊರ ಗುತ್ತಿಗೆ ಇಂಜಿನಿಯರ್‍ಗಳು ವ್ಯಾಪಕ ಅವ್ಯವಹಾರ ನಡೆಸಿರುವುದು ಬೆಳಕಿಗೆ ಬಂದಿದೆ. ನರೇಗಾ ಜಾಬ್ ಕಾಡ್ ಖರೀದಿಯಲ್ಲಿ ದೊಡ್ಡ ಹಗರಣ ನಡೆದಿದೆ. ಈ ಸಂಬಂಧ ಜಿಪಂ ಸದಸ್ಯರು ಸಿಇಒ ಅವರನ್ನೇ ಹೊಣೆಗಾರರನ್ನಾಗಿಸಿದ್ದಾರೆ. ಜಾಬ್‍ಕಾರ್ಡ್‍ಗಳನ್ನು ಟೆಂಡರ್ ಮೂಲಕ ಖರೀದಿಸಿದ್ದೇವೆಂದು ಸಿಇಒ ಒಮ್ಮೆ ಹೇಳಿದರೆ, ಮತ್ತೊಮ್ಮೆ ಸರಕಾರಿ ಮುದ್ರಣಾಲಯದಿಂದ ಖರೀದಿಸಿದ್ದೇವೆಂದು ಗೊಂದಲ ಮೂಡಿದ್ದಾರೆ. ಇದರ ತನಿಖೆಗಾಗಿ ಜಿಪಂ ತನಿಖಾ ಸಮಿತಿ ನೇಮಿಸಿದ್ದು, ಸಮಿತಿ ಇದನ್ನು ದೃಢಪಡಿಸಿದೆ. ಆದರೆ ತನಿಖೆ ಹಳ್ಳ ಹಿಡಿದಿದೆ ಎಂದು ಆರೋಪಿಸಿದ ಅವರು, ಜಿಪಂ ವತಿಯಿಂದ ಎಲ್ಲ ಗ್ರಾಪಂಗಳಲ್ಲಿ ಅಳವಡಿಸಿರುವ ಸಿಸಿ ಕ್ಯಾಮರಾ ಕಳಪೆಯಾಗಿದ್ದು, ಕಾರ್ಯನಿರ್ವಹಿಸುತ್ತಿಲ್ಲ. ಬಯೋಮೆಟ್ರಿಕ್, ಸೋಲಾರ್ ದೀಪ, ಸೋಲಾರ್ ವ್ಯವಸ್ಥೆ, ಪುಸ್ತಕ ಖರೀದಿಯಲ್ಲೂ ಅಕ್ರಮ ನಡೆದಿದೆ. ಜಿಲ್ಲಾದ್ಯಂತ ವಿವಿಧ ಗ್ರಾಪಂ ವ್ಯಾಪ್ತಿಯಲ್ಲಿ ನಡೆದ ನರೇಗಾ ಯೋಜನೆ ಕಾಮಗಾರಿಗಳಲ್ಲೂ ಬ್ರಹ್ಮಾಂಡ ಅವ್ಯವಹಾರ ನಡೆದಿರುವುದು ದೃಢಪಟ್ಟಿದೆ. ಈ ಎಲ್ಲ ಅಕ್ರಮಗಳ ತನಿಖೆಗಾಗಿ ಲೋಕಾಯುಕ್ತರಿಗೆ ಶೀಘ್ರ ದೂರು ನೀಡಲಾಗುವುದು ಎಂದರು.

ಸುದ್ದಿಗೋಷ್ಠಿಯಲ್ಲಿ ಕಾಂಗ್ರೆಸ್ ಜಿಲ್ಲಾ ಉಪಾಧ್ಯಕ್ಷ ನಟರಾಜ್ ಎಸ್.ಕೊಪ್ಪಲು ಉಪಸ್ಥಿತರಿದ್ದರು.

ನರೇಗಾ ಯೋಜನೆಯಡಿ ಜಿಲ್ಲೆಯ 7 ತಾಲೂಕು ವ್ಯಾಪ್ತಿಯ 116 ಗ್ರಾಪಂ ವ್ಯಾಪ್ತಿಯಲ್ಲಿ 5 ಕೋಟಿ ರೂ. ನಷ್ಟು ಅವ್ಯವಹಾರ ನಡೆದಿದೆ. 2016-17ನೇ ಸಾಲಿನಲ್ಲೇ ಈ ಸಂಬಂಧ 96,16,971 ರೂ. ಅವ್ಯವಹಾರದ ಹಣವನ್ನು ವಸೂಲಿ ಮಾಡುವಂತೆ ಸಾಮಾಜಿಕ ಲೆಕ್ಕ ಪರಿಶೋಧಾನಧಿಕಾರಿಗಳ ತಂಡ ಸೂಚಿಸಿದೆ. ಒಂದು ವರ್ಷದ ಅವ್ಯವಹಾರವೇ ಇಷ್ಟಾದರೇ, ಇನ್ನು 5 ವರ್ಷಗಳಲ್ಲಿ ಈ ಯೋಜನೆಯಡಿಯಲ್ಲಿ ನಡೆದಿರುವ ಅವ್ಯವಹಾರ ಎಷ್ಟಿರಬಹುದು? ಈ ಬಗ್ಗೆ ತನಿಖೆಯಾಗಬೇಕು. ಈ ಹಿಂದಿನ ಸರಕಾರ ಈ ಅಕ್ರಮದ ತನಿಖೆಗಾಗಿ ನೇಮಿಸಿದ ತನಿಖಾ ತಂಡವನ್ನು ಜಿಪಂ ಸದಸ್ಯರು ಹಾಗೂ ಅಧಿಕಾರಿಗಳು ದಿಕ್ಕು ತಪ್ಪಿಸಿದ್ದಾರೆ. ಜಿಪಂ ಅಕ್ರಮಗಳ ಪರವಾಗಿ ಅಧಿಕಾರಿಗಳು ಮತ್ತು ಜಿಪಂ ಸದಸ್ಯರು ವಕಾಲತ್ತು ವಹಿಸಿ ಅಕ್ರಮ ಮುಚ್ಚಿ ಹಾಕಲು ಹುನ್ನಾರ ನಡೆಸಿದ್ದಾರೆ. ಈ ಸಂಬಂಧ ರಾಜ್ಯ ಸರಕಾರದ ಗಮನಸೆಳೆದು, ತನಿಖೆಗೆ ಮನವಿ ಮಾಡಿದ್ದೆವೆ. ಅಕ್ರಮ ಎಸಗಿದವರ ವಿರುದ್ಧ ಕ್ರಮಿನಲ್ ಪ್ರಕರಣ ದಾಖಲಿಸಲು ಒತ್ತಾಯಿಸಿದ್ದೇವೆ.
- ನಟರಾಜ್ ಎಸ್.ಕೊಪ್ಪಲು, ಕಾಂಗ್ರೆಸ್ ಜಿಲ್ಲಾ ಉಪಾಧ್ಯಕ್ಷ