ಹಾಲು ಕಲಬೆರಕೆ ಪ್ರಕರಣ: ಚಿಕ್ಕಮಗಳೂರು ತಾಲೂಕಿನ ಐವರು ಆರೋಪಿಗಳ ಬಂಧನ

ಚಿಕ್ಕಮಗಳೂರು, ಆ.17: ಹಾಲು ಕಲಬೆರಕೆ ಪ್ರಕರಣ ಸಂಬಂಧ ನಗರದ ಗ್ರಾಮಾಂತರ ಠಾಣೆಯ ಪೊಲೀಸರು ತಾಲೂಕಿನ ಐವರು ಆರೋಪಿಗಳನ್ನು ಬಂಧಿಸಿದ್ದು, ಆರೋಪಿಗಳನ್ನು ನ್ಯಾಯಾಂಗ ಬಂಧನಕ್ಕೆ ಒಪ್ಪಿಸಲಾಗಿದೆ ಎಂದು ಎಸ್ಪಿ ಕಚೇರಿಯ ಪತ್ರಿಕಾ ಪ್ರಕಟನೆ ತಿಳಿಸಿದೆ.

ಹಾಲು ಕಲಬೆರಕೆ ಪ್ರಕರಣ ಸಂಬಂಧ ಚಿಕ್ಕಮಗಳೂರು ತಾಲೂಕಿನ ಕುರುಬರಹಳ್ಳಿ ನಿವಾಸಿ ಶ್ರೀನಿವಾಸ ಕೆ.ಟಿ ಬಿನ್ ತಿಮ್ಮೇಗೌಡ (30), ಮಾಚೇನಹಳ್ಳಿಯ ನಿವಾಸಿ ಅಶೋಕ ಎಂ.ಎಚ್ ಬಿನ್ ಹಾಲಪ್ಪ(39), ನರಸೀಪುರ ಗ್ರಾಮದ ಸಣ್ಣಸ್ವಾಮಿ ಬಿನ್ ಲೇಟ್ ಸಣ್ಣಸಿದ್ದೇಗೌಡ (53), ಕುರುಬರ ಬೂದಿಹಾಳ್ ಗ್ರಾಮದ ಉದಯ್‍ಕುಮಾರ್ ಕೆ.ಎಸ್. ಅಲಿಯಾಸ್ ಉದಯ ಬಿನ್ ಶ್ರೀನಿವಾಸಮೂರ್ತಿ (28), ನರಸೀಪುರ ಗ್ರಾಮದ ದಯಾನಂದ ಎನ್.ಎಸ್ ಬಿನ್ ಶಿವೇಗೌಡ (23) ಎಂಬ ಐವರು ಆರೋಪಿಗಳನ್ನು ಬಂಧಿಸಲಾಗಿದೆ. 

ಹಾಸನ ಸಹಕಾರಿ ಹಾಲು ಉತ್ಪಾದಕರ ಸಂಘಗಳ ಒಕ್ಕೂಟ ನಿಯಮಿತ ಇದರ ವ್ಯವಸ್ಥಾಪಕ ನಿರ್ದೇಶಕ ಗೋಪಾಲಯ್ಯ ಅವರು ನಗರದ ಗ್ರಾಮಾಂತರ ಠಾಣೆಗೆ ನೀಡಿದ ದೂರಿನಲ್ಲಿ, ಅರಸೀಕೆರೆ ಶೀಥಲೀಕರಣ ಕೇಂದ್ರದಲ್ಲಿ ಹಾಲನ್ನು ಮೊಬೈಲ್ ಟೆಸ್ಟಿಂಗ್ ವ್ಯಾನ್‍ನಲ್ಲಿ ತಪಾಸಣೆಗೆ ಒಳಪಡಿಸಿದಾಗ ಹಾಲಿನಲ್ಲಿ ಕಲಬೆರಕೆ ಮಾಡಿರುವುದು ಕಂಡು ಬಂದಿದೆ. ಕಳೆದ 2-3 ವರ್ಷಗಳಿಂದ ಚಿಕ್ಕಮಗಳೂರು ತಾಲೂಕಿನ ಕುರುಬರಹಳ್ಳಿ, ಮಾಚೇನಹಳ್ಳಿ, ಕೆ.ಬಿ.ಹಾಳ್, ನರಸೀಪುರ ಮತ್ತಿತರ ಸುತ್ತಮುತ್ತಲಿನ ಹಾಲು ಉತ್ಪಾದಕರ ಸಂಘಗಳಲ್ಲಿ ಹಾಲು ಕಲಬೆರಕೆ ನಡೆಸಿ ಬಾರೀ ಅವ್ಯವಹಾರ ನಡೆಸಲಾಗಿದೆ. ಇದಕ್ಕೆ ಸಂಬಂಧಿಸಿದಂತೆ ಕುರುಬರಹಳ್ಳಿ ಹಾಲು ಉತ್ಪಾದಕರ ಮಹಿಳಾ ಸಂಘದ ಕಾರ್ಯದರ್ಶಿ ಪಾರ್ವತಮ್ಮ ಅವರ ಮಗ ಶ್ರೀನಿವಾಸ್ ಎಂಬಾತ ತಾಲೂಕಿನ ಕೆ.ಬಿ.ಹಾಳ್, ಮಾಚೇನಹಳ್ಳಿ ಮತ್ತಿತರ ಸಂಘಗಳ ಕಾರ್ಯದರ್ಶಿಗಳು, ಹಾಲು ಸರಬರಾಜು ಮಾರ್ಗದ ಮಾಲಕರು, ವಾಹನ ಚಾಲಕರು ಹಾಗೂ ಕೆಎಂಎಫ್‍ನ ಅರಸೀಕೆರೆ ಶೀಥಿಲೀಕರಣ ಕೇಂದ್ರದ ಕೆಲ ಸಿಬ್ಬಂದಿ ಮತ್ತು ಗುತ್ತಿಗೆ ನೌಕರರು ಶಾಮೀಲಾಗಿ ಪಿತೂರಿ ನಡೆಸಿ ಸಹಕಾರಿ ಸಂಘಗಳಲ್ಲಿ ಕಲಬೆರಕೆಯ ಹಾಲನ್ನು ತಯಾರಿಸಿದ್ದಾರೆ. ಆ ಹಾಲನ್ನು ಅರಸೀಕರೆ ಶೀಥಿಲೀಕರಣ ಕೇಂದ್ರದಲ್ಲಿ ಅಲ್ಲಿನ ಸಿಬ್ಬಂದಿ ಕಲಬೆರಕೆ ಹಾಲನ್ನು ಯಾವುದೇ ತಪಾಸಣೆಗೆ ಒಳಪಡಿಸದೇ ನೇರವಾಗಿ ಹಾಸನದ ಕೆಎಂಎಫ್‍ಗೆ ಕಳುಹಿಸಿ ವಂಚಿಸಿರುತ್ತಾರೆಂದು ಆರೋಪಿಸಿದ್ದರು. 

ಈ ದೂರಿನನ್ವಯ ಚಿಕ್ಕಮಗಳೂರು ಗ್ರಾಮಾಂತರ ಪೊಲೀಸ್ ಠಾಣೆಯಲ್ಲಿ ಐಪಿಸಿ ಸೆಕ್ಸನ್ 284/2018 ಕಲಂನಡಿಯಲ್ಲಿ 417, 418, 420, 426, 407, 408, 409, 272, 273, 120(ಬಿ) ಸಹಿತ 34 ಮತ್ತು  37 ಐಪಿಸಿ ರೀತಿಯ ಪ್ರಕರಣ ದಾಖಲಿಸಿ ತನಿಖೆಯನ್ನು ಗ್ರಾಮಾಂತರ ಠಾಣೆಯ ಪಿಎಸ್ಸೈ ನೇತೃತ್ವದಲ್ಲಿ ಕೈಗೊಳ್ಳಲಾಗುತ್ತಿದ್ದು, ಇದುವರೆಗೂ ತಾಲೂಕಿನ ಐವರು ಆರೋಪಿಗಳನ್ನು ಬಂಧಿಸಲಾಗಿದೆ ಎಂದು ಪ್ರಕಟನೆಯಲ್ಲಿ ತಿಳಿಸಲಾಗಿದೆ. 

ಈ ಆರೋಪಿಗಳು 2015ನೇ ಸಾಲಿನಿಂದ ಮಾರ್ಚ್-2018ರವರೆಗೆ ಈ ಕೃತ್ಯವನ್ನು ನಡೆಸಿರುವುದನ್ನು ಒಪ್ಪಿಕೊಂಡಿದ್ದು, ಸ್ಕಿಮ್‍ಡ್ ಮಿಲ್ಕ್ ಪೌಡರನ್ನು ನೀರಿಗೆ ಮಿಶ್ರಣ ಮಾಡಿ ಹಾಲಿನೊಂದಿಗೆ ಬೆರಸುತ್ತಿದ್ದರೆಂದು ಎಸ್ಪಿ ಕಚೇರಿ ಪ್ರಕಟನೆಯಲ್ಲಿ ತಿಳಿಸಲಾಗಿದ್ದು, ಈ ಕೃತ್ಯದಿಂದ ಆಗಿರುವ ನಷ್ಪದ ಬಗ್ಗೆ ತನಿಖೆಯಿಂದ ಹೆಚ್ಚಿನ ಮಾಹಿತಿ ತಿಳಿದು ಬರಬೇಕಿದೆ ಎಂದು ತಿಳಿಸಿದ್ದಾರೆ.

ಕೃತ್ಯಕ್ಕೆ ಸಂಬಂಧಿಸಿದಂತೆ ಕುರುಬರಹಳ್ಳಿ, ಮಾಚೇನಹಳ್ಳಿ, ಕೆ.ಬಿ.ಹಾಳ್, ನರಸೀಪುರ, ಬೆಳವಾಡಿ, ಅರಸೀಕರೆ ತಾಲೂಕಿನ ಮಲ್ಲಿದೇವಿಹಳ್ಳಿ ಹಾಲು ಉತ್ಪಾದಕರ ಮಹಿಳಾ ಸಹಕಾರಿ ಸಂಘಗಳ ಕಾರ್ಯದರ್ಶಿಗಳು ಹಾಗೂ ಸದರಿ ಸಂಘಗಳಲ್ಲಿ ಕಾರ್ಯದರ್ಶಿಯ ಪರವಾಗಿ ಕೆಲಸ ಮಾಡುವ ಕುರುಬರಹಳ್ಳಿಯ ಶ್ರೀನಿವಾಸ, ಮಾಚೇನಹಳ್ಳಿಯ ಅಶೋಕ, ಕೆ.ಬಿ ಹಾಳ್‍ನ ಉದಯ್‍ಕುಮಾರ್, ನರಸೀಪುರದ ಸಣ್ಣ ಸ್ವಾಮಿ, ಬೆಳವಾಡಿಯ ಪುಟ್ಟೇಗೌಡ, ಅರಸೀಕೆರೆ ಮಲ್ಲಿದೇವಿಹಳ್ಳಿಯ ಮದನ್ ಪ್ರಕರಣದ ಪ್ರಮುಖ ಆರೋಪಿಗಳೆಂದು ತಿಳಿಸಲಾಗಿದ್ದು, ಹಾಲಿನ ಕ್ಯಾನುಗಳನ್ನು ಸರಬರಾಜು ಮಾಡುವ ವಾಹನದ ಗುತ್ತಿಗೆದಾರರು, ಚಾಲಕರು, ಕಂಡಕ್ಟರ್ ಗಳು, ಶೀಥಿಲೀಕರಣ ಕೇಂದ್ರದ ನೌಕರರು ಪ್ರಕರಣದಲ್ಲಿ ಶಾಮೀಲಾಗಿರುವ ಬಗ್ಗೆ ತನಿಖೆಯಿಂದ ಹೆಚ್ಚಿನ ಮಾಹಿತಿ ತಿಳಿದು ಬರಲಿದೆ ಎಂದು ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿ ಕಚೇರಿಯ ಪ್ರಕಟನೆ ತಿಳಿಸಿದೆ