ತುಮಕೂರು: ಸ್ಥಳೀಯ ಸಂಸ್ಥೆ ಚುನಾವಣೆ; ಶೇ.74.26 ರಷ್ಟು ಮತದಾನ

ತುಮಕೂರು,ಆ.31: ತುಮಕೂರು ಮಹಾನಗರ ಪಾಲಿಕೆ ಶೇ.50 ರಷ್ಟು, ಚಿ.ನಾ.ಹಳ್ಳಿ ಪುರಸಭೆ- ಶೇ.79.80ರಷ್ಟು, ಗುಬ್ಬಿ ಪಟ್ಟಣ ಪಂಚಾಯತ್ ಶೇ.79.10ರಷ್ಟು, ಕೊರಟಗೆರೆ ಪಟ್ಟಣ ಪಂಚಾಯತ್ ಶೇ.81.41 ರಷ್ಟು ಹಾಗೂ ಮಧುಗಿರಿ ಪುರಸಭೆ ಶೇ.81.04 ರಷ್ಟು ಸೇರಿದಂತೆ ಜಿಲ್ಲೆಯ 5 ಸ್ಥಳೀಯ ಸಂಸ್ಥೆಗಳಿಗೆ ನಡೆದ ಚುನಾವಣೆಯಲ್ಲಿ ಒಟ್ಟರೇ ಸರಾಸರಿ ಶೇ.74.26ರಷ್ಟು ಮತದಾನವಾಗಿದೆ.

ತುಮಕೂರು ಮಹಾನಗರ ಪಾಲಿಕೆ, ಕೊರಟಗೆರೆ, ಗುಬ್ಬಿ ಪಟ್ಟಣ ಪಂ. ಹಾಗೂ ಚಿಕ್ಕನಾಯಕನಹಳ್ಳಿ, ಮಧುಗಿರಿ ಪುರಸಭೆಗೆ ಶುಕ್ರವಾರ ಮತದಾನ ಶಾಂತಿಯುತವಾಗಿ ನಡೆಯಿತು. ಖುದ್ದು ಜಿಲ್ಲಾಧಿಕಾರಿ ವಿವಿಧ ಮತಗಟ್ಟೆಗಳಿಗೆ ಭೇಟಿ ನೀಡಿ ಪರಿಶೀಲನೆ ನಡೆಸಿದರು.

ತುಮಕೂರು ಮಹಾನಗರ ಪಾಲಿಕೆ ಮತದಾನ ಬೆಳಗ್ಗಿನಿಂದಲೇ ಚುರುಕುಗೊಂಡಿತ್ತು. ನಗರ ರಾಮಕೃಷ್ಣ ವಿವೇಕಾನಂದ ಆಶ್ರಮದ ಶ್ರೀವೀರೇಶಾನಂದ ಸರಸ್ವತಿ ಸ್ವಾಮೀಜಿ, ಚಿಕ್ಕಪೇಟೆಯ ಹೀರೆಮಠದ ಡಾ.ಶಿವಾನಂದ ಶಿವಾಚಾರ್ಯ ಸ್ವಾಮೀಜಿ, ಮಾಜಿ ಸಚಿವ ಸೊಗಡು ಶಿವಣ್ಣ, ಮಾಜಿ ಸಂಸದ ಜಿ.ಎಸ್.ಬಸವರಾಜು, ಶಾಸಕ ಜಿ.ಬಿ.ಜ್ಯೋತಿಗಣೇಶ್, ಮಾಜಿ ಶಾಸಕ ಡಾ.ಎಸ್.ರಫಿಕ್ ಅಹಮದ್ ಮತದಾನ ಮಾಡಿದರು.

ಪ್ರತಿಷ್ಠೆಯ ಕಣವಾಗಿರುವ ತುಮಕೂರು ಮಹಾನಗರ ಪಾಲಿಕೆ ಅಧಿಕಾರದ ಗದ್ದುಗೆ ಹಿಡಿಯಲು ಕಾಂಗ್ರೆಸ್, ಜೆಡಿಎಸ್, ಬಿಜೆಪಿ ತಂತ್ರ, ಪ್ರತಿತಂತ್ರ ರೂಪಿಸಿದ್ದವು. ಈಗ ಎಲ್ಲರ ಚಿತ್ತ ಮತ ಎಣಿಕೆಯತ್ತ ನೆಡುವಂತೆ ಮಾಡಿದೆ. ಹಾಲಿ ಶಾಸಕರಿಗೆ ಪ್ರತಿಷ್ಠೆಯ ಕಣವಾದರೆ, ಮಾಜಿ ಶಾಸಕರಿಗೆ ಸವಾಲು, ಇನ್ನು ಜೆಡಿಎಸ್‍ಗೆ ತನ್ನ ಶಕ್ತಿ ಹೆಚ್ಚಿಸಿಕೊಳ್ಳುವ ತವಕ. ಈ ಹಿಂದಿನ ನರಗಸಭಾ ಚುನಾವಣೆಯಲ್ಲಿ ಜೆಡಿಎಸ್ ಹೆಚ್ಚು ಸ್ಥಾನಗಳಲ್ಲಿ ಗೆಲುವು ಸಾಧಿಸಿತ್ತು. ಈ ಬಾರಿ ಸ್ವತಂತ್ರವಾಗಿ ಅಧಿಕಾರ ಹಿಡಿಯುವ ತವಕದಲ್ಲಿದೆ. ಇನ್ನು ವಿಧಾನ ಸಭಾ ಸೋಲಿನ ಕಹಿ ಮರೆತು ಸ್ಮಾರ್ಟ್ ಸಿಟಿಯ ಅಧಿಕಾರಕ್ಕಾಗಿ ಕೈ ಪಡೆ ತುದಿಗಾಲಲ್ಲಿ ನಿಂತಿದೆ.

ಕಳೆದ ಚುನಾವಣೆಯಲ್ಲಿ ಕೆಜೆಪಿ-5, ಬಿಜೆಪಿ-3 ವಾರ್ಡ್‍ಗಳಲ್ಲಿ ಗೆಲುವು ಸಾಧಿಸಿದ್ದವು. ಪಕ್ಷ ವಿಲೀನವಾಗಿದ್ದರೂ ಗೊಂದಲ ಮಾತ್ರ ದೂರವಾಗಿಲ್ಲ, ಮಾಜಿ ಸಚಿವರ ಗುಂಪು, ಬಸವರಾಜು ಗುಂಪು ಎನ್ನುವ ಮನಸ್ಥಿತಿ ಇನ್ನೂ ಮುಂದುವರೆದಿದೆ. ಇವೆಲ್ಲವನ್ನು ಮೀರಿ ಈ ಬಾರಿ ಶತಾಯಗತಾಯ ಸ್ವತಂತ್ರವಾಗಿ ಪಾಲಿಕೆ ಅಧಿಕಾರ ಹಿಡಿಯಲೇಬೇಕು ಎನ್ನುವ ಉದ್ದೇಶದಿಂದ ಬಹುತೇಕ ಹೊಸ ಮುಖಗಳಿಗೆ ಬಿಜೆಪಿ ಮಣೆ ಹಾಕಿದೆ.

ಕೆಲ ವಾಡ್‍ಗಳಲ್ಲಿ ಪಕ್ಷೇತರ ಅಭ್ಯರ್ಥಿಗಳ ಪರ ಮತದಾರರ ಒಲವು ವ್ಯಕ್ತವಾಗಿದೆ. ಇನ್ನು ಪಾಲಿಕೆ ಮಾಜಿ ಮೇಯರ್ ಗಳಾದ ರವಿಕುಮಾರ್, ಲಲಿತಾ, ಗೀತಾ ರುದ್ರೇಶ್, ಸುಧೀಶ್ವರ್, ಮಾಜಿ ಉಪಮೇಯರ್ ಗಳಾದ, ಧನಲಕ್ಷ್ಮೀ ರವಿ, ಟಿ.ಆರ್.ನಾಗರಾಜುಗೆ ಗೆಲುವು ಅನಿವಾರ್ಯ ಹಾಗೂ ಅಸ್ಥಿತ್ವದ ಪ್ರಶ್ನೆಯಾಗಿದೆ. ಇನ್ನು 3, 19, 22, 28, 26, 18ನೇ ವಾರ್ಡ್‍ಗಳು ತೀವ್ರ ಸ್ಪರ್ಧೆಯ ಕ್ಷೇತ್ರಗಳಾಗಿವೆ. ಈ ಹಿಂದಿನ ಚುನಾವಣೆಯಲ್ಲಿ 5ನೇ ವಾರ್ಡ್‍ನಿಂದ ಸ್ಪರ್ಧಿಸಿದ್ದ ಬಿ.ಎಸ್.ನಾಗೇಶ್ 3ನೇ ವಾಡ್‍ನಿಂದ ಕಣಕ್ಕಿಳಿದಿದ್ದು, ಪ್ರಮುಖ ಮೂರು ಪಕ್ಷಗಳ ನಡುವೆ ನೇರಾನೇರ ಸ್ಪರ್ಧೆ ಏರ್ಪಟ್ಟಿದೆ. ಇಲ್ಲಿ ಕಾಂಗ್ರೆಸ್‍ನಿಂದ ಹಾಲಿ ಸದಸ್ಯ ಎನ್.ಮಹೇಶ್, ಜೆಡಿಎಸ್‍ನಿಂದ ಮಾಜಿ ನಗರಸಭಾ ಸದಸ್ಯ ಲಕ್ಷ್ಮೀನರಸಿಂಹಮೂರ್ತಿ ಕಣದಲ್ಲಿದ್ದಾರೆ.

ಮತದಾನದ ಅಂತ್ಯಕ್ಕೆ ಚಿ.ನಾ.ಹಳ್ಳಿ ಪುರಸಭೆ ನಡೆದ ಚುನಾವಣೆಯಲ್ಲಿ ಒಟ್ಟು 18639 ಮತದಾರ ಪೈಕಿ 14873 ಮತ ಚಲಾಯಿಸಿದ್ದು, ಶೇ.79.80ರಷ್ಟು ಮತದಾನವಾಗಿದೆ. 

ಗುಬ್ಬಿ ಪಟ್ಟಣ ಪಂ. ಚುನಾವಣೆಯಲ್ಲಿ ಒಟ್ಟು 15740 ಮತದಾರರಲ್ಲಿ 12450 ಮಂದಿ ಮತ ಚಲಾಯಿಸಿದ್ದು. ಶೇ.79.10ರಷ್ಟು ಮತದಾನವಾಗಿದೆ.

ತುಮಕೂರು ಮಹಾನಗರ ಪಾಲಿಕೆ ವ್ಯಾಪ್ತಿಯ ಒಟ್ಟು 2,46,621 ಮತದಾರರಿದ್ದು ಶೇ.50 ರಷ್ಟು ಮತದಾನವಾಗಿದೆ.

ಮಧುಗಿರಿ ಪುರಸಭಾ ಚುನಾವಣೆಯಲ್ಲಿ ಒಟ್ಟು 23,508 ಮತದಾರರಲ್ಲಿ 19,058 ಮತದಾನ ಮಾಡಿದ್ದು, ಶೇ.81.04 ರಷ್ಟು ಮತದಾನವಾಗಿದೆ
ಕೊರಟಗೆರೆ ಪಟ್ಟಣ ಪಂ. ಚುನಾವಣೆಯಲ್ಲಿ 12598 ಮತದಾರರಲ್ಲಿ 10256  ಮಂದಿ ಮತದಾನ ಮಾಡಿದ್ದು, ಶೇ.81.41 ರಷ್ಟು ಮತದಾನವಾಗಿದೆ.