ತುಮಕೂರಿನಲ್ಲಿ ಮತ್ತೊಂದು ಕೊರೋನ ಸೋಂಕು ದೃಢ

ತುಮಕೂರು, ಮಾ.30: ಜಿಲ್ಲೆಯಲ್ಲಿ ಕೊರೋನ ವೈರಸ್ ಸೋಂಕು ದೃಢಗೊಂಡಿರುವ ಎರಡನೇ ಪ್ರಕರಣ ವರದಿಯಾಗಿದೆ ಎಂದು ಜಿಲ್ಲಾಧಿಕಾರಿ ರಾಕೇಶ್ ಕುಮಾರ್ ತಿಳಿಸಿದ್ದಾರೆ.

ಇತ್ತೀಚೆಗೆ ಕೊರೋನ ಸೋಂಕು ದೃಢಗೊಂಡು ಬಳಿಕ ಮೃತಪಟ್ಟಿದ್ದ ಶಿರಾ ಮೂಲದ ವೃದ್ಧ ವ್ಯಕ್ತಿಯ 13 ವರ್ಷದ ಮಗನಲ್ಲಿ ಈ ವೈರಸ್ ಸೋಂಕು ಪತ್ತೆಯಾಗಿದೆ. ಮುಂಜಾಗ್ರತಾ ಕ್ರಮವಾಗಿ ಬಾಲಕನನ್ನು ಬೆಂಗಳೂರಿನ ಆಸ್ಪತ್ರೆಗೆ ಕರೆದೊಯ್ಯಲಾಗಿದೆ. ವೃದ್ಧ ವ್ಯಕ್ತಿಯ ಸಂಪರ್ಕದಲ್ಲಿದ್ದವರ ಸ್ಯಾಂಪಲ್ ವರದಿ ನೆಗೆಟಿವ್ ಬಂದಿದೆ ಎಂದು ಅವರು ಮಾಹಿತಿ ನೀಡಿದ್ದಾರೆ.

ಮಾಹಿತಿಯ ಪ್ರಕಾರ ಕೊರೋನಗೆ ಬಲಿಯಾದ ಶಿರಾ ಮೂಲದ ವೃದ್ಧ ವ್ಯಕ್ತಿ ಮಾ.17ರಂದು ಆ ವ್ಯಕ್ತಿಯು ತಿಪಟೂರಿಗೆ ಸಂಚಾರ ಮಾಡಿದ್ದರು. ಅಲ್ಲಿ ಕೆಲವು ವ್ಯಕ್ತಿಗಳ ಜೊತೆ ಸಂಪರ್ಕವನ್ನು ಹೊಂದಿದ್ದರು ಎಂದು ತಿಳಿದುಬಂದಿದೆ. ಈ ಹಿನ್ನಲೆಯಲ್ಲಿ ತಿಪಟೂರಿನಲ್ಲಿ 11 ಜನರನ್ನು ಪ್ರಾಥಮಿಕವಾಗಿ ಐಸೋಲೇಶನ್ ಮಾಡಲಾಗಿದೆ. ಅವರ ಸ್ಯಾಂಪಲ್ ಕೂಡ ಟೆಸ್ಟ್ ಗಾಗಿ ಲ್ಯಾಬೋರೇಟರಿಗೆ ಕಳಿಸಲಾಗಿದೆ.

ಒಟ್ಟಾರೆಯಾಗಿ ಜಿಲ್ಲೆಯಲ್ಲಿ 30 ಸ್ಯಾಂಪಲ್ ಗಳನ್ನು ಕಳುಹಿಸಿಕೊಡಲಾಗಿದ್ದು, ಅದರ ರಿಪೋರ್ಟ್ ಬರುವುದು ಮಾತ್ರ ಬಾಕಿ ಇವೆ ಎಂದು ಜಿಲ್ಲಾಧಿಕಾರಿ ತಿಳಿಸಿದರು.