ಬಾಗಲಕೋಟೆ: ಮೂವರು ಮಕ್ಕಳಲ್ಲಿ ದೃಢಪಟ್ಟ ಕೊರೋನ ವೈರಸ್ ಸೋಂಕು

ಬಾಗಲಕೋಟೆ, ಎ. 9: ಕೊರೋನ ವೈರಸ್ ಸೋಂಕಿತರು ಗುಣಮುಖರಾಗಿ ಹೊರ ಬರುತ್ತಿರುವ ಬೆನ್ನಲ್ಲೇ ಗುರುವಾರ ಬಾಗಲಕೋಟೆ ಜಿಲ್ಲೆಯಲ್ಲಿ ಹೊಸದಾಗಿ ಮೂವರು ಮಕ್ಕಳಲ್ಲಿ ಸೋಂಕು ದೃಢಪಟ್ಟಿದೆ. ಇದರಿಂದ, ಜಿಲ್ಲೆಯ ಜನರಲ್ಲಿ ಮತ್ತಷ್ಟು ಆತಂಕ ಮನೆ ಮಾಡಿದೆ.

165ನೆ ಪ್ರಕರಣದ ಮಹಿಳೆಯ ನಾಲ್ಕು ವರ್ಷದ ಮಗ, ಅವರ ಮೈದುನನ 13 ವರ್ಷದ ಮಗ ಹಾಗೂ 9 ವರ್ಷದ ಮಗಳಿಗೆ ಸೋಂಕು ದೃಢಪಟ್ಟಿದೆ.

ಬಾಗಲಕೋಟೆಯಲ್ಲಿ ಸೋಂಕಿನಿಂದ ಮೃತಪಟ್ಟ 75 ವರ್ಷದ ವೃದ್ಧನ ಪಕ್ಕದ ಮನೆಯವರಾದ ಇವರು ಮೂಲತಃ ಗುಜರಾತ್ ರಾಜ್ಯದವರು. ನಗರದಲ್ಲಿಯೇ ನೆಲೆಸಿದ್ದಾರೆ. ವೃದ್ಧನ ಕುಟುಂಬದೊಂದಿಗೆ ಸಂಪರ್ಕ ಇದ್ದ ಕಾರಣ ಮಹಿಳೆಗೆ ತಗುಲಿತ್ತು. 

ಮಹಿಳೆಯ ಪತಿ, ಮೈದುನ ಹಾಗೂ ಅವರ ಹೆಂಡತಿಯ ತಪಾಸಣೆಯನ್ನೂ ನಡೆಸಲಾಗಿತ್ತು. ಅವರ ಪರೀಕ್ಷಾ ವರದಿಗಳು ನೆಗೆಟಿವ್ ಬಂದಿವೆ. ಮೂವರು ಮಕ್ಕಳಲ್ಲಿ ಮೇಲ್ನೋಟಕ್ಕೆ ಸೋಂಕಿನ ಲಕ್ಷಣಗಳು ಕಂಡು ಬಂದಿವೆ. ಹೀಗಾಗಿ, ಐಸೊಲೇಶನ್ ವಾರ್ಡ್‍ನಲ್ಲಿಟ್ಟು ಚಿಕಿತ್ಸೆ ಆರಂಭಿಸಿದ್ದೇವೆ ಎಂದು ಜಿಲ್ಲಾ ಆಸ್ಪತ್ರೆಯ ವೈದ್ಯಾಧಿಕಾರಿಗಳು ತಿಳಿಸಿದ್ದಾರೆ.