ರಮಝಾನ್ ಮುಗಿಯುವ ತನಕ ಬಟ್ಟೆ, ಪಾದರಕ್ಷೆ, ಟೈಲರ್ ಅಂಗಡಿಗಳು ಬಂದ್: ವಿಟ್ಲ ಮುಸ್ಲಿಂ ವರ್ತಕರ ತೀರ್ಮಾನ

ವಿಟ್ಲ: ವ್ಯಾಪಾರ ವ್ಯವಹಾರಗಳಿಗೆ ಬೆಳಿಗ್ಗೆ 07 ರಿಂದ ಸಂಜೆ 07ರ ತನಕ ಜಿಲ್ಲಾಡಳಿತ ಅವಕಾಶ ಕಲ್ಪಿಸಿದುದರಿಂದ ಕೊರೋನ ಜಾಗೃತಿಗೆ ಸಮಸ್ಯೆಯಾಗಬಹುದು ಎಂಬ ನೆಲೆಯಲ್ಲಿ ವಿಟ್ಲದ ಎಲ್ಲಾ ಮುಸ್ಲಿಂ ವ್ಯಾಪಾರಸ್ಥರು ಸರಕಾರದ ಜಾಗೃತಿ ಅಭಿಯಾನಕ್ಕೆ ಬೆಂಬಲ ಘೋಷಿಸುವ ಸಲುವಾಗಿ ರಮಝಾನ್ ತಿಂಗಳು ಮುಕ್ತಾಯವಾಗುವ ತನಕ ತಮ್ಮ ವ್ಯವಹಾರದಲ್ಲಿ ಸಾಮಾಜಿಕ ಅಂತರ ಕಾಯ್ದುಕೊಳ್ಳಲು ತೀರ್ಮಾನಿಸಿದ್ದಾರೆ.

ಮುಂದಿನ ದಿನಗಳಲ್ಲಿ ಹಬ್ಬದ ಖರೀದಿಗೆ ಗ್ರಾಹಕರು ಮಳಿಗೆಗಳಲ್ಲಿ ಮುಗಿಬೀಳಬಾರದು, ಹಬ್ಬವನ್ನು ಆದಷ್ಟು ಸರಳವಾಗಿ ಆಚರಿಸಿ ಅದರ ವೆಚ್ಚವನ್ನು ಬಡ/ಅಶಕ್ತರ ಸೇವಾ ಯೋಜನೆಗೆ ಸದುಪಯೋಗಪಡಿಸಬೇಕೆಂಬ ನೆಲೆಯಲ್ಲಿ ಹಾಗೂ ಕೊರೋನ ವಾರಿಯರ್ಸ್ ಗಳಾದ ವೈದ್ಯರು ಮತ್ತು ಆರೋಗ್ಯ ಇಲಾಖೆಯ ಕಾರ್ಯಕರ್ತರು, ಆಶಾ ಕಾರ್ಯಕರ್ತರು, ಪೊಲೀಸ್ ಇಲಾಖೆ, ಜಿಲ್ಲಾಡಳಿತ, ಪಟ್ಟಣ ಪಂಚಾಯತ್ ಮೊದಲಾದವರ ಸೇವೆಯನ್ನು ಗೌರವಿಸುತ್ತಾ ಅವರ ಕೆಲಸ ಕಾರ್ಯಗಳು ನೆರವೇರಲು ಸಹಕಾರಿಯಾಗಲೆಂಬ ನೆಲೆಯಲ್ಲಿ ವಿಟ್ಲದ ಮುಸ್ಲಿಂ ವ್ಯಾಪಾರಸ್ಥರು ಬಂದ್ ಮಾಡಲು ತೀರ್ಮಾನಿಸಿದ್ದಾರೆ ಎಂದು ಪ್ರಕಟಣೆ ತಿಳಿಸಿದೆ.

ತೀರ್ಮಾನಗಳು ಇಂತಿವೆ:-

● ರಂಝಾನ್ ಹಬ್ಬದ ಖರೀದಿಗೆ ಜನಜಂಗುಳಿ ಸೇರಬಹುದಾದ ಟೆಕ್ಸ್ ಟೈಲ್ಸ್, ರೆಡಿಮೇಡ್ ವಸ್ತ್ರದ ಅಂಗಡಿ, ಫ್ಯಾನ್ಸಿ-ಕಾಸ್ಮೆಟಿಕ್ಸ್ ಅಂಗಡಿ, ಫೂಟ್ ವೇರ್ ಶಾಪ್ ಗಳನ್ನು ಹಾಗೂ ಟೈಲರ್ ಅಂಗಡಿಯನ್ನು ರಮಝಾನ್ ತಿಂಗಳು ಮುಗಿಯುವ ತನಕ ಸಂಪೂರ್ಣ ಬಂದ್ ಮಾಡುವುದು.

● ಮೊಬೈಲ್ ಶಾಪ್, ಜ್ಯುವೆಲ್ಲರಿ, ಬ್ಯಾಗ್, ವಾಚ್, ಫರ್ನಿಚರ್ಸ್, ಎಲೆಕ್ಟ್ರಾನಿಕ್ಸ್ ಮೊದಲಾದ ಅಂಗಡಿಗಳನ್ನು ಬೆಳಿಗ್ಗೆ 07 ರಿಂದ ಮಧ್ಯಾಹ್ನ 12ರ ತನಕ ಮಾತ್ರ ಸುರಕ್ಷಿತ ಅಂತರ ನಿಯಮವನ್ನು ಕಾಯ್ದುಕೊಂಡು ತೆರೆಯುವುದು.

● ದಿನಬಳಕೆ ವಸ್ತುಗಳಾದ ದಿನಸಿ, ತರಕಾರಿ, ಹಣ್ಣುಹಂಪಲು, ಮೀನು, ಮಾಂಸ, ಹಾಲು, ಮೆಡಿಕಲ್, ಹಾರ್ಡ್'ವೇರ್, ಮೆಕ್ಯಾನಿಕ್ ವರ್ಕ್ಸ್ ಅಂಗಡಿಗಳನ್ನು ಸರಕಾರ/ಜಿಲ್ಲಾಡಳಿತದ ನಿಯಮ ಪ್ರಕಾರ ತೆರೆದಿಡುವುದು.

● ಮನೆ ಸದಸ್ಯರು, ಕುಟುಂಬಿಕರಿಗೆ ಪ್ರಸ್ತುತ ಸನ್ನಿವೇಶಗಳ ಮನವರಿಕೆ ಮಾಡಿಕೊಂಡು ಈದ್ ಶಾಪಿಂಗ್ ಕೈಗೊಳ್ಳದೇ ಇರುವಂತೆ ಪ್ರೇರೇಪಿಸುವುದು. ಮಾರುಕಟ್ಟೆಗೆ ಪ್ರವೇಶಿಸದಂತೆ ತಿಳಿಹೇಳುವುದು. ಸರಕಾರದ ನಿಯಮಗಳನ್ನು ಚಾಚೂ ತಪ್ಪದಂತೆ ಪಾಲಿಸುವಂತೆ ಹಾಗೂ ಖಾಝಿಗಳ/ಉಲಮಾಗಳ ಸಲಹೆಗಳನ್ನು ಗೌರವಿಸುವಂತೆ ವಿನಂತಿಸುವುದು. ಪ್ರತಿ ಮೊಹಲ್ಲಾ/ಜಮಾಅತ್ ವ್ಯಾಪ್ತಿಯಲ್ಲಿ ಅಲ್ಲಿನ ಜಮಾಅತ್ ಕಮಿಟಿ ಹಾಗೂ ಯುವಸಮೂಹದ ಸಂಘಸಂಸ್ಥೆಗಳು ಈದ್ ಶಾಪಿಂಗ್ ಕುರಿತು ಜಾಗೃತಿ ಮೂಡಿಸುವುದು.