ಬ್ಲಾಕ್‍ ಚೈನ್ ತಂತ್ರಜ್ಞಾನ ಜೋಡಿಸಿದ ಮುಂಚೂಣಿ ರಾಜ್ಯವಾಗಿ ಕರ್ನಾಟಕ

ಬೆಂಗಳೂರು,  ಸೆ.12: ಬ್ಲಾಕ್‍ಚೈನ್ ತಂತ್ರಜ್ಞಾನವನ್ನು ಶೈಕ್ಷಣಿಕ ಕ್ಷೇತ್ರದಲ್ಲಿ ಅಳವಡಿಸಿಕೊಳ್ಳುವ ನಿಟ್ಟಿನಲ್ಲಿ ಕರ್ನಾಟಕ ರಾಜ್ಯವು ದೇಶದಲ್ಲಿಯೇ ಪ್ರಥಮವಾಗಿ ಮುಂಚೂಣಿಯಲ್ಲಿದ್ದು, ಶೈಕ್ಷಣಿಕ ಪ್ರಮಾಣ ಪತ್ರಗಳನ್ನು ಬ್ಲಾಕ್ ಚೈನ್ ತಂತ್ರಜ್ಞಾನವನ್ನು ಬಳಸಿಕೊಂಡು ಸರಪಳಿಯಂತೆ ಜೋಡಿಸುವ ಮೂಲಕ ಪ್ರಮಾಣ ಪತ್ರ ಸರಪಳಿಯನ್ನು(ಸರ್ಟಿಫಿಕೇಟ್ ಚೈನ್) ರೂಪಿಸಲಾಗಿದೆ.

ಈ ನವೀನ ತಂತ್ರಜ್ಞಾನವನ್ನು ಕರ್ನಾಟಕ ಪ್ರೌಢ ಶಿಕ್ಷಣ ಪರೀಕ್ಷಾ ಮಂಡಳಿಯು ಎನ್.ಐ.ಸಿ(ನ್ಯಾಷನಲ್ ಎನ್ ಫಾರ್ ಮೆಟ್ರಿಕ್ಸ್ ಸೆಂಟರ್) ಸಹಯೋಗದೊಂದಿಗೆ ಅಭಿವೃದ್ಧಿಪಡಿಸಿದೆ. ಇದರ ಮೂಲಕ ಮಂಡಳಿಯ ಶೈಕ್ಷಣಿಕ ಪ್ರಮಾಣಪತ್ರಗಳನ್ನು ಜೋಡಿಸುವ ಕೆಲಸ ಮಾಡಲಾಗುತ್ತದೆ.

ಸರ್ಟಿಫಿಕೇಟ್ ಚೈನ್ ತಂತ್ರಾಂಶದಲ್ಲಿ ಪ್ರಮಾಣಪತ್ರಗಳನ್ನು ವಿವಿಧ ಸ್ಥಳಗಳಲ್ಲಿನ ಸರ್ವರ್‍ಗಳ ಪಾಲುದಾರರೊಂದಿಗೆ ದಾಖಲಿಸಲಾಗುತ್ತದೆ. ಭಾರತ ಮತ್ತು ವಿದೇಶಗಳಲ್ಲಿ ಉನ್ನತ ಶಿಕ್ಷಣದ ಪ್ರವೇಶ ಪ್ರಕ್ರಿಯೆಯಲ್ಲಿ ಎದುರಾಗಿರುವ ಒಂದು ಸವಾಲಿನ ಕೆಲಸವೆಂದರೆ ಅಭ್ಯರ್ಥಿಗಳ ಆಯ್ಕೆ ಮತ್ತು ಅಭ್ಯರ್ಥಿಗಳು ನೀಡಿದ ಪ್ರಮಾಣಪತ್ರಗಳ ಪರಿಶೀಲನೆ. ಈ ಪರಿಶೀಲನಾ ಕಾರ್ಯಕ್ಕೆ ಸಂಬಂಧಪಟ್ಟ ಮಂಡಳಿಗಳು ಅಥವಾ ವಿಶ್ವವಿದ್ಯಾಲಯಗಳು ಅತಿ ಹೆಚ್ಚು ಸಮಯ ಮತ್ತು ಸಂಸ್ಕರಣೆ ಸಮಯವನ್ನು ತೆಗೆದುಕೊಳ್ಳುತ್ತದೆ.

ಸರ್ಟಿಫಿಕೇಟ್ ಚೈನ್ ತಂತ್ರಜ್ಞಾನವನ್ನು ನ್ಯಾಷನಲ್ ಇನ್ಸಾರ್‍ಮೆಟಿಕ್ಸ್ ಸೆಂಟರ್ ನ ಸೆಂಟರ್ ಆಫ್ ಎಕ್ಸಲೆನ್ಸ್ ಫಾರ್ ಬ್ಲಾಕ್ ಜೈನ್‍ರವರು, ವಿನ್ಯಾಸಗೊಳಿಸಿ ಮತ್ತು ಅಭಿವೃದ್ಧಿಪಡಿಸಿದ್ದಾರೆ. ಪ್ರಸ್ತುತ ಕರ್ನಾಟಕ ಪ್ರೌಢ ಶಿಕ್ಷಣ ಪರೀಕ್ಷಾ ಮಂಡಳಿ 2019-2020 ನೇ ಸಾಲಿನ ಪ್ರಮಾಣಪತ್ರಗಳನ್ನು ಸರ್ಟಿಫಿಕೇಟ್ ಚೈನ್‍ನಲ್ಲಿ ದಾಖಲಿಸಲಾಗುತ್ತಿದೆ ಮತ್ತು ಕ್ರಮೇಣ ಹಿಂದಿನ ವರ್ಷಗಳ ಪ್ರಮಾಣಪತ್ರಗಳ ಮಾಹಿತಿಯನ್ನು ಅಳವಡಿಸಲಾಗುತ್ತದೆ.

ದತ್ತಾಂಶ ಸಂರಕ್ಷಿಸಲು ಸಾಧ್ಯ: ಬ್ಲಾಕ್ ಚೈನ್ ತಂತ್ರಜ್ಞಾನದಲ್ಲಿ ಮಾಹಿತಿಯನ್ನು ಅಪ್‍ಡೇಟ್ ಮಾಡುವಾಗ ಹಳೆಯ ಮಾಹಿತಿಯನ್ನು ಅಳಿಸಲಾಗುವುದಿಲ್ಲ. ಹಳೆಯ ಮಾಹಿತಿಯ ಜೊತೆಗೆ ಹೊಸ ಮಾಹಿತಿಯು ಡೇಟಾ ಬ್ಲಾಕ್‍ಗಳ ಮೂಲಕ ಹಳೆಯ ಮಾಹಿತಿಯೊಡನೆ ಶೇಖರಣೆಯಾಗುತ್ತದೆ. ಹೊಸ ಮಾಹಿತಿಯನ್ನು ಅಳವಡಿಸುವ ಹಾಗೂ ದತ್ತಾಂಶವನ್ನು ಮಾರ್ಪಡಿಸುವಾಗ ದತ್ತಾಂಶದ ಅಧಿಕೃತ ಅಧಿಕಾರಿಯ ಡಿಜಿಟಲ್ ಸಹಿ ನೀಡಿ ಅಪ್‍ಡೇಟ್ ಮಾಡಬೇಕಾಗುತ್ತದೆ. ಈ ವಿಧಾನದಿಂದ ದತ್ತಾಂಶವನ್ನು ಸುರಕ್ಷಿತವಾಗಿ ಸಂರಕ್ಷಿಸಬಹುದಾಗಿರುತ್ತದೆ.

ಪ್ರಯೋಜನಗಳೇನು: ಸರ್ಟಿಫಿಕೇಟ್ ಚೈನ್‍ನನ್ನು ವಿವಿಧ ಶಿಕ್ಷಣ ಸಂಸ್ಥೆಗಳು ಉನ್ನತ ವ್ಯಾಸಂಗ ಪ್ರವೇಶಕ್ಕಾಗಿ ಹಾಗೂ ವಿವಿಧ ಕಂಪನಿಗಳು ಉದ್ಯೋಗ ನೀಡುವ ಸಂದರ್ಭದಲ್ಲಿ ಉದ್ಯೋಗಿಗಳ ಅಂಕಪಟ್ಟಿಗಳನ್ನು ನೇರವಾಗಿ ಪರಿಶೀಲಿಸಲು ಬಳಸಬಹುದು. ದತ್ತಾಂಶಗಳನ್ನು ಬದಲಿಸಲಾಗದ ತಂತ್ರಜ್ಞಾನ, ಸಂಪೂರ್ಣ ಸ್ವಯಂಚಾಲಿತ-ಮಾನವ ಹಸ್ತಕ್ಷೇಪ ರಹಿತ, ದತ್ತಾಂಶದ ಸಂಪೂರ್ಣ ಮಾಹಿತಿ ಮತ್ತು ಪ್ರಮಾಣಪತ್ರ ಕಾಗದರಹಿತ ಬಳಕೆಗೆ ಕಾರಣವಾಗುತ್ತದೆ.

ಪ್ರಮಾಣ ಪತ್ರಗಳ ಪರಿಶೀಲನೆಗೆ ಮೂರನೇ ವ್ಯಕ್ತಿಯ ಅವಲಂಬನೆಯನ್ನು ನಿವಾರಿಸುತ್ತದೆ ಹಾಗೂ ಪರಿಶೀಲನಾ ಕಾರ್ಯದ ಸಮಯವನ್ನು ಗಮನಾರ್ಹವಾಗಿ ಕಡಿಮೆ ಮಾಡಿ ಕಾಗದರಹಿತ ಆಡಳಿತವನ್ನು ಉತ್ತೇಜಿಸುತ್ತದೆ. ಮಂಡಳಿಯು ಉಚಿತವಾಗಿ ಡಿಜಿಲಾಕರ್ ಮೂಲಕ ನೀಡುತ್ತಿರುವ ಸೇವೆಯು ಬ್ಲಾಕ್ ಚೈನ್ ತಂತ್ರಜ್ಞಾನದ ಮೂಲಕ ಎನ್.ಐ.ಸಿ ಸರ್ವರ್ ಶೇಖರಿಸಲಾದ ದತ್ತಾಂಶಗಳನ್ನು ಬಳಸುವುದರಿಂದ ಉನ್ನತ ಮಟ್ಟದ ಸುರಕ್ಷತೆಯನ್ನು ಕಾಯ್ದುಕೊಳ್ಳುವುದು ಈ ತಂತ್ರಾಂಶದ ಹೆಗ್ಗಳಿಕೆಯಾಗಿದೆ.