ಮೂರನೇ ದಿನದ ವಿಧಾನಸಭೆ ಕಲಾಪವೂ ‘ಅಶ್ಲೀಲ ಸಿಡಿ' ಪ್ರಕರಣದ ಗದ್ದಲಕ್ಕೆ ಆಹುತಿ

ಬೆಂಗಳೂರು, ಮಾ. 24: ಅಶ್ಲೀಲ ಸಿಡಿ ಪ್ರಕರಣದ ತನಿಖೆ ಹೈಕೋರ್ಟ್ ಸಿಜೆ ಉಸ್ತುವಾರಿಯಲಿ ನಡೆಸಬೇಕು. ರಮೇಶ್ ಜಾರಕಿಹೊಳಿ ವಿರುದ್ಧ ಪ್ರಕರಣ ದಾಖಲಿಸಬೇಕು. ಸಂತ್ರಸ್ತೆಗೆ ಯುವತಿಗೆ ರಕ್ಷಣೆ ನೀಡಬೇಕು. ಕೋರ್ಟ್ ಮೆಟ್ಟಿಲೇರಿದ ಆರು ಮಂದಿ ಸಚಿವರು ರಾಜೀನಾಮೆ ನೀಡಬೇಕು ಎಂದು ಆಗ್ರಹಿಸಿ ಮೂರನೇ ದಿನವೂ ಪ್ರತಿಪಕ್ಷ ಕಾಂಗ್ರೆಸ್ ಧರಣಿ ಸತ್ಯಾಗ್ರಹ ಮುಂದುವರಿಸಿತು.

ಬುಧವಾರ ಬೆಳಗ್ಗೆ 11ಗಂಟೆಯ ಸುಮಾರಿಗೆ ವಿಧಾನಸಭೆ ಕಲಾಪ ಆರಂಭವಾಯಿತು. ಈ ವೇಳೆ ಸ್ಪೀಕರ್ ಪೀಠದ ಮುಂದಿನ ಬಾವಿಗಿಳಿದು ಧರಣಿ ಮುಂದುವರಿಸಿದ ಕಾಂಗ್ರೆಸ್ ಸದಸ್ಯರು, ‘ಬೇಡವೇ ಬೇಡ ಬಾಂಬೆ ಮಿಠಾಯಿ, 20 ಸಿಡಿ ಸರಕಾರಕ್ಕೆ, ಲಂಚ-ಮಂಚದ ಸರಕಾರಕ್ಕೆ, ಭ್ರಷ್ಟ, ಬ್ಲೂ ಬಾಯ್ಸ್ ಸರಕಾರಕ್ಕೆ ಧಿಕ್ಕಾರ. ಕೋರ್ಟ್ ಮೆಟ್ಟಿಲೇರಿದ ಆರು ಮಂದಿ ಸಚಿವರು ರಾಜೀನಾಮೆ ನೀಡಬೇಕು' ಎಂದು ಆಕ್ರೋಶ ವ್ಯಕ್ತಪಡಿಸಿದರು.

ಪ್ರತಿಪಕ್ಷ ಕಾಂಗ್ರೆಸ್ ಸದಸ್ಯರ ಧರಣಿ, ಧಿಕ್ಕಾರ, ಗದ್ದಲ ಮತ್ತು ಕೋಲಾಹಲದ ಮಧ್ಯೆ ಹಣಕಾಸು ಸಚಿವರು ಆಗಿರುವ ಮುಖ್ಯಮಂತ್ರಿ ಬಿ.ಎಸ್.ಯಡಿಯೂರಪ್ಪ, 2021-22ನೆ ಸಾಲಿನ ಆಯವ್ಯಯದ ಮೇಲಿನ ಉಭಯ ಪಕ್ಷಗಳ ಸದಸ್ಯರ ಚರ್ಚೆಗೆ ಉತ್ತರ ನೀಡಿ, ಬಜೆಟ್ ಅನ್ನು ಮಂಡಿಸಿ ಸದನದಲ್ಲಿ ಅಂಗೀಕಾರ ಪಡೆದುಕೊಂಡರು.

ಸ್ಪೀಕರ್ ವಿಶ್ವೇಶ್ವರ ಹೆಗಡೆ ಕಾಗೇರಿ ಅವರು ಧರಣಿ ಕೈಬಿಡುವಂತೆ ಹಲವು ಬಾರಿ ಮನವಿ ಮಾಡಿದರೂ ಪ್ರತಿಪಕ್ಷ ಸದಸ್ಯರು ಅದಕ್ಕೆ ಸ್ಪಂದಿಸಲಿಲ್ಲ. ಆಗ ಸ್ಪೀಕರ್ ಪ್ರಶ್ನೋತ್ತರ ಕಲಾಪವನ್ನು ಕೈಗೆತ್ತಿಕೊಂಡು ಪ್ರಶ್ನೋತ್ತರ ಮಂಡನೆಯಾಗಿದೆ ಎಂದು ಹೇಳಿ, ನಂತರ ಶಾಸಕ ರಘುಪತಿ ಭಟ್‍ಗೆ ಸರಕಾರಿ ಭರವಸೆಗಳ ಸಮಿತಿ 9ನೆ ವರದಿ ಮಂಡಿಸಿದ ನಂತರ, ಬಜೆಟ್ ಚರ್ಚೆ ಮುಗಿದಿದೆ ಎಂದು ಹೇಳಿ, ಸಿಎಂಗೆ ಬಜೆಟ್ ಮೇಲೆ ಉತ್ತರ ನೀಡುವಂತೆ ಸೂಚಿಸಿದರು.

ವಿಪಕ್ಷಗಳ ಬೇಡಿಕೆ ಅರ್ಥಹೀನ: ‘ಸಿಡಿ ಪ್ರಕರಣ ಸಂಬಂಧ ಎಸ್‍ಐಟಿ ತನಿಖೆ ಪ್ರಗತಿಯಲ್ಲಿದೆ. ಹೀಗಿರುವಾಗ ಕಲಾಪದ ಅಮೂಲ್ಯ ಸಮಯವನ್ನು ಜನರ ಸಮಸ್ಯೆಗಳ ಚರ್ಚೆಗೆ ಸದುಪಯೋಗ ಮಾಡಿಕೊಳ್ಳದೆ ಪ್ರತಿಪಕ್ಷ ಕಾಂಗ್ರೆಸ್ ಧರಣಿ ಮಾಡುವ ಮೂಲಕ ವ್ಯರ್ಥ ಮಾಡುತ್ತಿರುವುದು ಸರಿಯಲ್ಲ. ಅಲ್ಲದೆ, ಹೈಕೋರ್ಟ್ ಸಿಜೆ ಉಸ್ತುವಾರಿಯಲ್ಲಿ ತನಿಖೆ ಬೇಡಿಕೆ ಅಥಹೀನ' ಎಂದು ಯಡಿಯೂರಪ್ಪ, ವಿಪಕ್ಷಗಳ ಆಗ್ರಹವನ್ನು ತಳ್ಳಿಹಾಕಿದರು.

‘ಸಚಿವರು ರಕ್ಷಣೆ ಕೋರಿ ಕೋರ್ಟ್‍ಗೆ ಹೋಗುವುದರಲ್ಲಿ ತಪ್ಪಿಲ್ಲ. ಜನತೆ ತೆರಿಗೆ ಹಣದಲ್ಲಿ ನಡೆಸುತ್ತಿರುವ ಕಲಾಪದಲ್ಲಿ ಧರಣಿ-ಗದ್ದಲದ ಮೂಲಕ ಕಾಲಹರಣ ಮಾಡುತ್ತಿರುವುದು, ಮಹತ್ವದ ಬಜೆಟ್ ಅಧಿವೇಶನಕ್ಕೆ ಪ್ರತಿಪಕ್ಷ ಸಹಕಾರ ನೀಡದಿರುವುದು ಖಂಡನೀಯ. ರಾಜ್ಯದ ಜನತೆ ನಿಮಗೆ ತಕ್ಕ ಪಾಠ ಕಲಿಸಲಿದ್ದಾರೆ' ಎಂದು ಯಡಿಯೂರಪ್ಪ ಎಚ್ಚರಿಕೆ ನೀಡಿದರು.

ರಕ್ಷಣೆ ಪಡೆಯುವ ಅಧಿಕಾರವಿದೆ: ‘ಸಚಿವರಿಗೆ ಈಗಾಗಲೇ ಕೋರ್ಟ್ ರಕ್ಷಣೆ ನೀಡಿದೆ. ಆ ತೀರ್ಪನ್ನು ಪ್ರಶ್ನಿಸುವ ಅಧಿಕಾರ ಯಾರಿಗೂ ಇಲ್ಲ' ಎಂದು ನಿವೃತ್ತ ಲೋಕಾಯುಕ್ತ ನ್ಯಾಯಮೂರ್ತಿ ಎನ್. ಸಂತೋಷ್ ಹೆಗ್ಡೆ ಹೇಳಿಕೆಯನ್ನು ಉಲ್ಲೇಖಿಸಿದ ಯಡಿಯೂರಪ್ಪ, ಯಾರೊಬ್ಬರ ಚಾರಿತ್ರ್ಯಹರಣವೂ ಸರಿಯಲ್ಲ ಎಂದು ಆಕ್ಷೇಪಿಸಿದರು.

'ರಾಜಕೀಯ ಸದನದಿಂದ ಹೊರಗೆ ಮಾಡಿ':
ಸುಗಮ ಕಲಾಪಕ್ಕೆ ಸಹಕಾರ ನೀಡದ ಪ್ರತಿಪಕ್ಷದ ಕ್ರಮ ಬೇಸರ ತರಿಸಿದೆ. ಸದನದಲ್ಲಿ ಗದ್ದಲ ಮಾಡುವ ಮೂಲಕ ಹೊಣೆಗಾರಿಕೆ ಇಲ್ಲದ ನಡವಳಿಕೆ ಖೇದಕರ. ಪ್ರಜಾಪ್ರಭುತ್ವ ವ್ಯವಸ್ಥೆಯಲ್ಲಿ ನಿಮ್ಮ ರಾಜಕೀಯ ಏನೇ ಇದ್ದರೂ ಸದನದ ಹೊರಗೆ ಮಾಡಲು ಅವಕಾಶವಿದೆ. ಸದನ ಕಲಾಪ ನಡೆಸಲು ಅವಕಾಶ ನೀಡದೆ ಅಸಹಕಾರ ವ್ಯಕ್ತಪಡಿಸಿದ್ದು ಸರಿಯಲ್ಲ.
-ವಿಶ್ವೇಶ್ವರ ಹೆಗಡೆ ಕಾಗೇರಿ, ಸ್ಪೀಕರ್