ಐಎಂಎ ಬಹುಕೋಟಿ ಹಗರಣ: ರೋಷನ್ ಬೇಗ್ಗೆ ಸೇರಿದ 16.81 ಕೋಟಿ ರೂ.ಮೌಲ್ಯದ ಆಸ್ತಿ ಜಪ್ತಿ
Update: 2021-07-09 18:49 IST
ಬೆಂಗಳೂರು, ಜು.9: ಹೈಕೋರ್ಟ್ ಆದೇಶ ನೀಡಿದ ಬೆನ್ನಲ್ಲೇ ಐಎಂಎ ಬಹುಕೋಟಿ ಹಗರಣದಲ್ಲಿ ಆರೋಪಿಯಾಗಿರುವ ಮಾಜಿ ಸಚಿವ ಆರ್.ರೋಷನ್ ಬೇಗ್ ಅವರಿಗೆ ಸೇರಿದ 16.81 ಕೋಟಿ ರೂ.ಮೌಲ್ಯದ ಆಸ್ತಿಯನ್ನು ಸರಕಾರ ಜಪ್ತಿ ಮಾಡಿದೆ.
ರೋಷನ್ ಬೇಗ್ ಅವರು 2018ರಲ್ಲಿ ಚುನಾವಣಾ ಆಯೋಗಕ್ಕೆ ಸಲ್ಲಿಸಿದ್ದ ವಿವರದಲ್ಲಿದ್ದ ಆಸ್ತಿಯನ್ನು ಕೆಪಿಐಡಿ ಕಾಯ್ದೆಯ ಸೆಕ್ಷನ್ 3ರ ಅಡಿಯಲ್ಲಿ ರಾಜ್ಯ ಸರಕಾರ ಜಪ್ತಿ ಮಾಡಿದೆ. ರೋಷನ್ ಬೇಗ್ ಕುಟುಂಬದವರ ಒಟ್ಟು 16.81 ಕೋಟಿ ರೂಪಾಯಿ ಮೊತ್ತದ ಆಸ್ತಿಯನ್ನು ಸೀಜ್ ಮಾಡಲಾಗಿದೆ.
ಬ್ಯಾಂಕ್ ಖಾತೆ: ಕೋ ಆಪರೇಟಿವ್ ಬ್ಯಾಂಕ್ನಲ್ಲಿ 33 ಲಕ್ಷ ರೂ., ಕಾಪೆರೇಷನ್ ಬ್ಯಾಂಕ್-4,265 ರೂ., ಕೆನರಾ ಬ್ಯಾಂಕ್-16 ಲಕ್ಷ ರೂ., ಹೆಚ್ಡಿಎಫ್ಸಿ ಬ್ಯಾಂಕ್-1.08 ಕೋಟಿ ರೂ., ಸಿಂಡಿಕೇಟ್ ಬ್ಯಾಂಕ್ 88 ಸಾವಿರ ರೂ., ಕೆನರಾ ಬ್ಯಾಂಕ್-76 ಲಕ್ಷ ರೂಪಾಯಿ. ಒಟ್ಟು 2.32 ಕೋಟಿ ರೂ.ಗಳನ್ನು 6 ಬ್ಯಾಂಕ್ ಅಕೌಂಟ್ಗಳಿಂದ ಜಪ್ತಿ ಮಾಡಲಾಗಿದೆ.
ನಿವೇಶನ: ಹೆಚ್ಬಿಆರ್ ಲೇಔಟ್-4 ಸಾವಿರ ಚದರ ಅಡಿ ಸೈಟ್. ಫ್ರೇಜರ್ ಟೌನ್-5,545 ಸಾವಿರ ಚದರ ಅಡಿ ಸೈಟ್. ಫ್ರೇಜರ್ ಟೌನ್-1,844 ಸಾವಿರ ಚದರ ಅಡಿಯ ಸೈಟ್ ಆಗಿದ್ದು, ಜಪ್ತಿಯಾದ ಸೈಟ್ನ ಒಟ್ಟು ಮೌಲ್ಯ 8.91 ಕೋಟಿ ರೂ.ಆಗಿದೆ.
ವಾಣಿಜ್ಯ ಸಂಕೀರ್ಣ: ಹೊಸೂರು ರಸ್ತೆಯ 30,217 ಚ. ಅಡಿಗಳ ಕಮರ್ಷಿಯಲ್ ಫ್ಲಾಟ್, ರೆಸಿಡೆನ್ಸಿ ರಸ್ತೆ ಪ್ರೆಸ್ಟೀಜ್ ಟವರ್ನಲ್ಲಿರುವ 1979 ಚ.ಅಡಿಯ ಫ್ಲಾಟ್ಗಳ ಮೌಲ್ಯ 1.73 ಕೋಟಿ ರೂ.ಆಗಿದೆ. ಜಪ್ತಿಯಾದ 2 ಮನೆಗಳ ಮೌಲ್ಯ 3.64 ಕೋಟಿ ರೂಪಾಯಿ ಆಗಿರುತ್ತದೆ. ಜಪ್ತಿಯಾದ ಚಿನ್ನಾಭರಣ ಮತ್ತು ಬೆಳ್ಳಿ ವಸ್ತುಗಳ ಮೌಲ್ಯ 42.4 ಲಕ್ಷ ರೂ., ಜಪ್ತಿಯಾದ ವಿವಿಧ ಕಂಪೆನಿಗಳ ಶೇರುಗಳ ಮೌಲ್ಯ 6.80 ಲಕ್ಷ ರೂಪಾಯಿ ಆಗಿರುತ್ತದೆ.