ಶಾಸಕ ಯತ್ನಾಳ್ ಕೊಠಡಿಗೆ ಅವಹೇಳನಕಾರಿ ಪೋಸ್ಟರ್

ಬೆಂಗಳೂರು, ಆ.24:ಬಿಜೆಪಿ ಶಾಸಕ ಬಸನಗೌಡ ಪಾಟೀಲ ಯತ್ನಾಳ್ ಕುರಿತು ಶಾಸಕರ ಭವನದಲ್ಲಿನ ಕೊಠಡಿ ಬಾಗಿಲಿಗೆ ಅವಹೇಳನಕಾರಿ ಪೋಸ್ಟರ್ ಅಂಟಿಸಿರುವ ಘಟನೆ ನಡೆದಿದೆ.

ಒಸಾಮಾ ಬಿನ್ ಲಾಡೆನ್​ಗೆ ಬಸನಗೌಡ ಪಾಟೀಲ್ ಯತ್ನಾಳ್ ಅವರನ್ನು ಹೋಲಿಸಿ ಭಿತ್ತಿಪತ್ರ ಅಂಟಿಸಲಾಗಿದ್ದು, ಈ ಚಿತ್ರಗಳಲ್ಲಿ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿವೆ.

ಶಾಸಕರ ಭವನ 5ನೇ ಬ್ಲಾಕ್ ನಲ್ಲಿನ ಯತ್ನಾಳ್ ಕೊಠಡಿ ಸಂಖ್ಯೆ 2001ರಲ್ಲಿ ಕೊಠಡಿಯಲ್ಲಿ ಯಾರೂ ಇಲ್ಲದ ವೇಳೆ ಬಂದ ವ್ಯಕ್ತಿಗಳು ಬಾಗಿಲು, ಗೋಡೆ ಮೇಲೆ ಪೋಸ್ಟರ್​ ಅಂಟಿಸಿದ್ದಾರೆ.

ಇತ್ತೀಚೆಗೆ ಯತ್ನಾಳ್ ಅವರು ಕಾಂಗ್ರೆಸ್ ನಾಯಕ ರಾಹುಲ್ ಗಾಂಧಿ ವಿರುದ್ಧ ಅವಾಚ್ಯ ಶಬ್ದ ಬಳಸಿದ್ದರು. ಇದನ್ನು ವಿರೋಧಿಸಿ ಪೋಸ್ಟರ್ ಅಂಟಿಸಲಾಗಿದೆ ಎಂದು ಹೇಳಲಾಗುತ್ತದೆ.