ಆರೆಸ್ಸೆಸ್ ಮುಖಂಡರ ಕೆಲ ವಿಚಾರಗಳು ಸರಿ ಇರುತ್ತವೆ: ಸಭಾಪತಿ ಬಸವರಾಜ ಹೊರಟ್ಟಿ

ಕೊಪ್ಪಳ, ಅ. 17: `ರಾಷ್ಟ್ರೀಯ ಸ್ವಯಂ ಸೇವಕರ ಸಂಘ(ಆರೆಸ್ಸೆಸ್) ಮುಖಂಡರು ಹೇಳುವ ಕೆಲ ವಿಚಾರಗಳು ಸರಿ ಇರುತ್ತವೆ' ಎಂದು ವಿಧಾನ ಪರಿಷತ್ ಸಭಾಪತಿ ಬಸವರಾಜ ಹೊರಟ್ಟಿ ತಿಳಿಸಿದ್ದಾರೆ.

ರವಿವಾರ ನಗರದಲ್ಲಿ ಮಾಧ್ಯಮ ಪ್ರತಿನಿಧಿಗಳ ಜತೆ ಮಾತನಾಡಿದ ಅವರು, `ಆರೆಸ್ಸೆಸ್ ವಿಚಾರವಾಗಿ ನಾನು ರಾಜಕಾರಣವನ್ನು ಮಾತನಾಡುವುದಿಲ್ಲ. ಆರೆಸ್ಸೆಸ್ ಮುಖಂಡರ ಕೆಲ ವಿಚಾರಗಳು ಸರಿ ಇರುತ್ತವೆ. ಆದರೆ, ನಾನು ವೈಯಕ್ತಿಕವಾಗಿ ಏನೂ ಪ್ರತಿಕ್ರಿಯೆ ನೀಡಿರುವುದಿಲ್ಲ' ಎಂದು ಸ್ಪಷ್ಟಪಡಿಸಿದರು.

`ಈ ಹಿಂದೆ ರಾಜಕಾರಣ ಎಂದರೆ ಅದು ತತ್ವದ ಆಧಾರದ ಮೇಲೆ ಇತ್ತು. ಇಂದಿನ ರಾಜಕಾರಣ ಬರೀ ಟೀಕೆಗೆ ಸೀಮಿತವಾಗಿದೆ. ಇದು ಜನರಿಗೆ ಬೇಸರ ತರಿಸಿದೆ. ಬರೀ ಟೀಕೆಯಿಂದ ಪ್ರಯೋಜನ ಆಗುವುದಿಲ್ಲ. ನಾವು ಏನು ಕೆಲಸ ಮಾಡುತ್ತೇವೆ ಎಂಬುದು ಮುಖ್ಯ' ಎಂದು ಹೊರಟ್ಟಿ ತಿಳಿಸಿದರು.