ಎಲ್ಲ ಮಹಿಳೆಯರಿಗೂ ಸುರಕ್ಷಿತ, ಕಾನೂನುಬದ್ಧ ಗರ್ಭಪಾತದ ಹಕ್ಕಿದೆ: ಸುಪ್ರೀಂಕೋರ್ಟ್

ಹೊಸದಿಲ್ಲಿ,ಸೆ.29: ವಿವಾಹಿತೆ ಅಥವಾ ಅವಿವಾಹಿತೆಯಾಗಿರಲಿ,ಎಲ್ಲ, ಮಹಿಳೆಯರೂ ಗರ್ಭಪಾತ ಹಕ್ಕುಗಳನ್ನು ಹೊಂದಿದ್ದಾರೆ ಎಂಬ ಮಹತ್ವದ ತೀರ್ಪನ್ನು 
ಗುರುವಾರ ನೀಡಿರುವ ಸರ್ವೋಚ್ಚ ನ್ಯಾಯಾಲಯವು,ಅತ್ಯಾಚಾರದ ವ್ಯಾಖ್ಯೆಯಲ್ಲಿ ಗಂಡಂದಿರಿಗೆ ನೀಡಲಾಗಿರುವ ವಿನಾಯಿತಿಯು ‘ಕಾನೂನಿನ ಕಲ್ಪನೆ ’ಯಾಗಿದೆ ಎಂದು ಹೇಳುವ ಮೂಲಕ ವೈವಾಹಿಕ ಅತ್ಯಾಚಾರವನ್ನು ವ್ಯಾಖ್ಯಾನಿಸುವ ನಿಟ್ಟಿನಲ್ಲಿಯೂ ಹೆಜ್ಜೆಯನ್ನಿಟ್ಟಿದೆ.
‌
ಪತಿಯಿಂದ ಬಲಾತ್ಕಾರದ ಲೈಂಗಿಕ ಕ್ರಿಯೆಯು ಬೇರೊಂದು ಪ್ರಕರಣದ ವಿಷಯವಾಗಿರುವುದರಿಂದ ಅದನ್ನು ನಿರ್ದಿಷ್ಟವಾಗಿ ಅಪರಾಧೀಕರಿಸುವ ಗೋಜಿಗೆ ನ್ಯಾಯಾಲಯವು ಹೋಗಲಿಲ್ಲವಾದರೂ,ಇಂತಹ ಪ್ರಕರಣಗಳಲ್ಲಿ ವೈದ್ಯಕೀಯ ಗರ್ಭಪಾತ (ಎಂಟಿಪಿ) ಕಾಯ್ದೆಯಡಿ ಗರ್ಭಪಾತಕ್ಕೆ ಅವಕಾಶ ನೀಡಲಾಗುತ್ತದೆ ಎಂದು ಹೇಳಿತು. ಲೈಂಗಿಕ ದೌರ್ಜನ್ಯ,ಅತ್ಯಾಚಾರ ಅಥವಾ ನಿಷಿದ್ಧ ಲೈಂಗಿಕ ಕ್ರಿಯೆಗಾಗಿ ಪ್ರಕರಣವನ್ನು ದಾಖಲಿಸಲು ಯಾವುದೇ ಪೂರ್ವಾಗತ್ಯವಿಲ್ಲ ಎಂದು ತಿಳಿಸಿತು.

ತನ್ನ ಸಮ್ಮತಿಯಿಲ್ಲದೆ ಪತಿಯು ನಡೆಸಿದ ಲೈಂಗಿಕ ಕ್ರಿಯೆಯಿಂದ ಮಹಿಳೆ ಗರ್ಭವತಿಯಾಗಬಹುದು. ಅಸ್ತಿತ್ವದಲ್ಲಿರುವ ಭಾರತೀಯ ಕಾನೂನುಗಳು ಕೌಟುಂಬಿಕ ಹಿಂಸಾಚಾರದ ರೂಪಗಳನ್ನು ಗುರುತಿಸುತ್ತವೆ ಎಂದು ನ್ಯಾ.ಡಿ.ವೈ.ಚಂದ್ರಚೂಡ ನೇತೃತ್ವದ ಪೀಠವು ಹೇಳಿತು.
  
ವಿವಾಹಿತ ಮಹಿಳೆಯರೂ ಲೈಂಗಿಕ ದೌರ್ಜನ್ಯ ಅಥವಾ ಅತ್ಯಾಚಾರ ಸಂತ್ರಸ್ತೆಯರ ವರ್ಗದ ಭಾಗವಾಗಬಹುದು. ಅದು ವೈವಾಹಿಕವಾಗಿರಲಿ ಅಥವಾ ಅಲ್ಲದಿರಲಿ,ಸಮ್ಮತಿಯಿಲ್ಲದೆ ಲೈಂಗಿಕ ಕ್ರಿಯೆ ಅತ್ಯಾಚಾರದ ಸಾಮಾನ್ಯ ಅರ್ಥವಾಗಿದೆ ಎಂದು ಹೇಳಿದ ಸರ್ವೋಚ್ಚ ನ್ಯಾಯಾಲಯವು,‘ಐಪಿಸಿಯ ಕಲಂ 375ರ ವಿನಾಯಿತಿ 2ರ ಹೊರತಾಗಿಯೂ ನಿಯಮ 3ಬಿ (ಎ)ದಲ್ಲಿ ‘ಲೈಂಗಿಕ ದೌರ್ಜನ್ಯ’ ಅಥವಾ ‘ಅತ್ಯಾಚಾರ’ ಪದಗಳ ಅರ್ಥವು ಪತಿಯು ತನ್ನ ಪತ್ನಿಯ ಮೇಲೆ ನಡೆಸುವ ಲೈಂಗಿಕ ದೌರ್ಜನ್ಯ ಅಥವಾ ಅತ್ಯಾಚಾರ ಕೃತ್ಯವನ್ನು ಒಳಗೊಂಡಿದೆ. ವೈವಾಹಿಕ ಅತ್ಯಾಚಾರವನ್ನು ಅತ್ಯಾಚಾರದ ವ್ಯಾಪ್ತಿಯಿಂದ ಹೊರಗಿರಿಸಿರುವ ವಿನಾಯಿತಿಯು ಕೇವಲ ಕಾನೂನಿನ ಕಲ್ಪನೆಯಾಗಿದೆ. 

ಪತ್ನಿಯ ವಯಸ್ಸು 15 ವರ್ಷಕ್ಕೆ ಮೇಲ್ಪಟ್ಟಿದ್ದರೆ ಪತಿಯು ಆಕೆಯೊಡನೆ ನಡೆಸುವ ಲೈಂಗಿಕ ಕ್ರಿಯೆಯು ಅತ್ಯಾಚಾರವಲ್ಲ ಎಂದು ಈ ವಿನಾಯಿತಿಯು ಹೇಳುತ್ತದೆ. ಆದಾಗ್ಯೂ ಅದು ಅತ್ಯಾಚಾರವಾಗುತ್ತದೆ ಎನ್ನುವುದನ್ನು ಇಲ್ಲಿ ಒತ್ತಿ ಹೇಳಬೇಕಿದೆ. ವೈವಾಹಿಕ ಅತ್ಯಾಚಾರಕ್ಕಾಗಿ ಪತಿಯ ವಿರುದ್ಧ ಕ್ರಿಮಿನಲ್ ಕ್ರಮವನ್ನು ಜರುಗಿಸಬಹುದು ಎನ್ನುವುದು ಇಂದಿನ ತೀರ್ಪಿನ ಅರ್ಥವಲ್ಲ. ಅದು ಸೆ.16ರಂದು ವಿಚಾರಣೆ ನಡೆಸಿದ್ದ ಇನ್ನೊಂದು ಪ್ರಕರಣದ ವಿಷಯವಾಗಿದೆ. ನಾವು ಸದ್ಯಕ್ಕೆ ವಿನಾಯಿತಿಯ ಸಾಂವಿಧಾನಿಕ ಸಿಂಧುತ್ವವನ್ನು ಆ ಪ್ರಕರಣದಲ್ಲಿ ಅಥವಾ ಇನ್ಯಾವುದೇ ಸೂಕ್ತ ಪ್ರಕ್ರಿಯೆಯಲ್ಲಿ ನಿರ್ಧರಿಸುವುದಕ್ಕೆ ಬಿಡುತ್ತೇವೆ ’ ಎಂದು ಹೇಳಿತು.

ಆದರೆ ಇಂದಿನ ತೀರ್ಪಿನಿಂದಾಗಿ ವಿವಾಹದಲ್ಲಿ ಬಲವಂತದ ಲೈಂಗಿಕ ಕ್ರಿಯೆಗೊಳಗಾದ ಮಹಿಳೆಯರು ಎಂಟಿಪಿ ಕಾಯ್ದೆಯಡಿ ಗರ್ಭಪಾತವನ್ನು ಮಾಡಿಸಿಕೊಳ್ಳಬಹುದು.
ಗರ್ಭಪಾತ ಮಾಡಿಸಿಕೊಳ್ಳಲು ವಿವಿಧ ನಿಯಮಗಳನ್ನು ಪ್ರಶ್ನಿಸಿ ಅವಿವಾಹಿತ ಮಹಿಳೆಯೋರ್ವಳು ದಾಖಲಿಸಿದ್ದ ಪ್ರಕರಣದಲ್ಲಿ ಈ ತೀರ್ಪು ಹೊರಬಿದ್ದಿದೆ. ವಿವಾಹಿತ ಮಹಿಳೆಯರು 24 ವಾರಗಳವರೆಗೆ ಗರ್ಭಪಾತವನ್ನು ಮಾಡಿಸಿಕೊಳ್ಳಲು ಅವಕಾಶವಿದ್ದರೆ ಅವಿವಾಹಿತ ಮಹಿಳೆಯರಿಗೆ ಇದು 20 ವಾರಗಳಿಗೆ ಸೀಮಿತವಾಗಿದೆ.

ಈ ತಾರತಮ್ಯವು ‘ಕೃತಕವಾಗಿದೆ ಮತ್ತು ಸಾಂವಿಧಾನಿಕವಾಗಿ ಸಮರ್ಥನೀಯವಲ್ಲ ’ ಎಂದು ಎತ್ತಿಹಿಡಿದ ನ್ಯಾಯಾಲಯವು,ಅದು ಮೂಲಭೂತ ಹಕ್ಕುಗಳ ಉಲ್ಲಂಘನೆಯಾಗಿದೆ ಎಂದು ಹೇಳಿ ನಿರ್ಬಂಧವನ್ನು ರದ್ದುಗೊಳಿಸಿತು.